|
|
|
Нєшка почина "Ружа"
4. юлий 2008. (Рутенпрес) - Нєшка,
пияток, 4. юлия, у Руским Керестуре почина наш найвекши и найстарши
Фестивал - "Червена ружа", котри тирва по нєдзелю, 6. юлий.
Попри вистави подобових роботох учашнїкох прешлорочного зволаня
Колониї "Няради", програму Фестивала рускей култури "Червена ружа"
творя музично-танєчна манифестация дзецох "Червене пупче", ревиялни
концерт ансамблох зоз руских местох "На штред широкей ровнїни", як и
музична манифестация "Червена ружа".
Нєшка, од 18,30 г., у голу ОШиҐ "Петро Кузмяк" будзе отверанє
Вистави подобових роботох, а после того, у дворе Школи, од 18,30 г.,
манифестация дзецох "Червене пупче".
Як заплановане, шицки манифестациї Фестивала буду отримани на
отвореней сцени у дворе керестурскей Школи "Петро Кузмяк", а у
случаю подлей хвилї - у сали керестурского Дома култури.
Тринац нови композициї за дзеци, наступ младих аматерох зоз наших
КУД, та наступ госцуюцого ансамбла - "Хемлонячок" зоз Гуменого, зоз
Словацкей, главни ознаки програми тогорочного "Пупча".
На соботу, 5. юлия од 21 г., сцену Фестивала пополня ансамбли зоз
наших местох зоз своїма найлєпшима точками на ревиялним концерту з
назву "На штред широкей ровнїни" як и нашо краянє зоз Горватскей -
зоз Миклошевцох, а госц ревиялного концерта будзе Фолклорни ансамбл
"Вила" зоз Нового Саду.
Нєдзеля, 6. юлий, пошвецена младим шпивачомкотри ше буду змагац за
найкрасши хлопски и женски глас и новим руским шпиванком у народним
духу.
Шпивачох у змаганю за найкрасши глас провадзи Вельки народни
оркестер керестурского Дома култури а нови композициї грає
Тамбурашски оркестер РТВ Нови Сад. Госц того вечара будзе Женска
шпивацка ґрупа РКПД Нови Сад.
Директного ТВ преношеня манифестацийох "Ружи" нє будзе.
Попри вецей спонзорох, дзе найвекши новосадска "Металс банка",
отримованє Фестивала култури финансийно допомагаю и Министерство
култури РС, Покраїнски секретарият за образованє и културу,
Покраїнски секретарият за предписаня, управу и национални меншини;
ВР АП Войводини, Општина Кула, Национални совит Руснацох, ОШиҐ
"Петро Кузмяк" и Месна  заєднїца
Руски Керестур.
Директни радио-пренос манифестациї
"Червена ружа"
4. юлий 2008. (Рутенпрес) - Руска редакция Радио
Нового Саду, на нєдзелю, 6. юлия, на своїх радио габох, директно
будзе преношиц музичну манифестацию "Червена ружа" - змаганє
за найкрасши глас и нових композицийох у народним духу, з Фестивала
рускей култури - од 21. годзину.
Попри того, дзень после "Червеного пупча", на соботу, 5. юлия, Руска
редакция Радио Нового Саду, одложено будзе емитовац цалосну програму
музично-танєчней манифестациї за дзеци "Червене пупче" - од 8 до 11
годзин.
Тиж так, на нєдзелю, 6. юлия дополадня, од 8 до 11 годзин, Руска
редакция Радио Нового Саду, будзе емитовац знїмок соботовей
манифестациї на тогорочней "Ружи" - ревиялного концерта "На штред
широкей ровнїни".
Реприза нєдзельовей манифестациї "Червена ружа" - змаганя за
найкрасши глас и нових композицийох у народним духу, будзе емитована
на пондзелок, 7. юлия, тиж од 8 до 11 годзин.
Руска редакция Радио Нового Саду свою програму емитує на
ултракратких габох на 100 меґагерци.
Отворени нови просториї "Металс банки"
2. юлий 2008. (Рутенпрес) - Вчера,
1. юлия, керестурска Експозитура "Металс банка" а.д. Нови Сад, свою
роботу започала у нових просторийох, у центре валала.
Шветочному отвераню нових просторийох Експозитури "Металс банки" у
Руским Керестуре присуствовали руководителє тей Банки -
директор маркетинґу Данило Копривица, директор дистрибуциї дїловней
мрежи Раденко Лечич, директорка сектору за роботу зоз жительством
Верица Янкович, та руководителє експозитурох зоз Кули, Оджаку и
Вербасу.
Отвераню нових просторийох "Металс банки" у Керестуре присуствовал и
дакедишнї директор ДДОР-банки, Яким Голик зоз Нового Саду, котри
вєдно з керестурским привреднїком Славком Рацом, бул єден з главних
иницияторох же би и у Руским Керестуре зажили оддзелєня и ДДОР и
терашней "Металс банки".
Госцох зоз Руского Керестура, медзи нїма и предсидателя Националного
совиту Руснацох, та чолних людзох привредних и дружтвених
орґанизацийох Керестура, у мено домашнїх привитала руководителька
керестурскей експозитури Ґабриєла Саянкович.
Зоз своїм граньом на гушльох, шветочне отверанє украшели шестри
Оксана и Олеся Рамачово, а власнїк керестурского подприємства
“Юарбис” Славко Рац Цацо у мено привреднїкох Керестура, наглашел же
и вони у тей Банки препознали свойого партнера и здушнє ю потримали.
Рац подзековал "Металс банки" же уложели значни средства до опреманя
єдного такого сучасного, репрезентативного простору, и же значне же
банки и у малих штредкох препознаваю свою перспективу.
Винчуюци отверанє нових просторийох, предсидатель Националного
совиту Руснацох Славко Орос виражел задовольство же шицки реклами и
попис услугох "Металс банки" написани по руски, цо красни приклад ,
алє и "лекция другим дїловним людзом и орґанизацийом".
Владимир Малацко, о.д. директора керестурского Дома култури
подзековал "Металс банки" на финансийней помоци, як приятеля
Фестивала рускей култури "Червена ружа" и з нагоди отвераня нових
просторийох Банки подаровал и подобову роботу нашого уметнїка Влади
Нярадия.
Дзекуюци на указаней часци приятельом и коминтентом, директор
маркетинґу Данило Копривица, у Руским Керестуре винєсол и податки же
"Металс банка" у Керестуре ма прейґ 3 000 партиї, прейґ тисяч
карточки, вельке число шпоровних улогох и вони, як Банка,
презадовольни.
- Наша повага Рускому Керестуру и рускей националней заєднїци, нє
лєм нашо стратеґийне опредзелєнє же бизме унапредзовали розличносци
у Войводини, алє и одраз єдного успишного дїловного сотруднїцтва -
гварел Копривицва.
- И у рокох котри пред нами, “Металс банка” и надалєй будзе приятель
“Червеней ружи”, о чим подпишеме и протокол о сотруднїцтву - гварел
Копривица.
Данило Копривица на вчерайшим шветочним отвераню нових просторийох
Експозитури "Металс банки" у Руским Керестуре визначел же то 73.
место у Сербиї дзе тота Банка дїлує.
Нєдавно и у Керестуре преробел перши и єдини банкомат, а пошвидко
придзе час кед преробя и банкомати за уплату пазару, по чим "Металс
банка" перша у Сербиї.
После шветочного отвераня, госци и домашнї нащивели и керестурску
Катедралну церкву, з чию историю их накратко упознал
парох о. Юлиян Рац.
Керестурски Русин побиднїк Медзинародного турниру
1. юлий 2008. (Рутенпрес) - Фодбалере керестурского
Русина освоєли перше место на Медзинародним фодбалским турниру,
котри прешлого викенду отримани у Медзилаборцох, у Словацкей
Републики.
Турнир отримани у рамикох Фестивала култури и спорту, котрому главни
орґанизаторе Русинска оброда Словацкей и Месни уряд Медзилаборци.
На фодбалским турниру у Медзилаборцох, попри керестурского Русина
участвовали ище три екипи - ФК Намешт зоз Ческей, ФК Сокол зоз
Польскей, и домашнї, ФК Спартак зоз Медзилаборцох.
У финалу Медзинародного турнира на Фестивалє култури и спорту у
Медзилаборцох, внєдзелю, 29. юния, фодбалере керестурского Русина
зоз ФК Намешт зоз Ческей одбавели нєришено 0:0, так же ше приступело
виводзеню пеналох.
Керестурски ФК Русин бул лєпши, дзекуюци и свойому ґолманови
Желькови Оросови, котри одбранєл єден пенал и з тим постал прави
герой того Турнира, так же Русин ческу екипу победзел зоз 3:2.
Попри того же керестурски Русин достал погар за освоєне перше место,
фодбалер Русина Яким Гарди преглашени за найлєпшого ґолґетера на
цалим Турниру, зоз посцигнутима трома ґолами.
Як Рутенпрес дознава од предсидателя ФК Русин Якима Грубенї Бору, то
по першираз же на Медзинародним турниру у Медзилаборцох, дзе Русин
участвовал на вецей заводи, посцигнути таки позарядови успих.
Од предсидателя Фодбалского клубу Русин Яким Грубеня Бора дознаваме
же уж концом авґуста, ФК Спартак зоз Медзилаборцох будзе госц у
Руским Керестуре, з нагоди означованя 85-рочнїци од формованя ФК
Русин.
З нагоди госцованя у Словацкей, керестурске подприємство "АБЦ фуд"
фодбалером и делеґациї подаровало маїци зоз своїм амблемом, так же
на одредзени способ, Русин там бул и свойофайтови промотер продуктох
керестурскей Фабрики змарзнутей желєняви.
Одход фодбалерох Русина до Широкого и Медзилаборцох у Словацкей
републики, попри самого Спортского дружтва, финансовали и
керестурска Месна заєднїца и Школа "Петро Кузмяк".
Преглєдайце скорейши вистки у архиви
>>
|
|
|
|
srpski
english
