|
|
|
Косидба претаргнута пре диждж
2. юлий 2009. (Рутенпрес) - После остатнього дижджу,
вчера, 1. юлия, у рускокерестурским хотаре комбайни анї нє виходзели
на косидбу жита пре вельку влагу, як зарна, так и на полю.
Можлїве же жатва жита у керестурским хотаре будзе предлужена нєшка,
так же ше ю окончує з прервами, а нєпреривни дижджи барз уплївую на
влагу и квалитет зарна.
Як оценєте, у керестурским хотаре того року под житом єст коло 600
гектари, а урожай до тераз покошеного жита ше руша од 25-30 метери
по гольту.
Медзитим, остатнї откоси з початку того тижня указую же жито влажне
коло 17-18 одсто, так же будзе мушиц буц змесцене на сушенє, цо
дополнююци
 трошок
за продуковательох жита.
И того року Волонтерски камп
1. юлий 2009. (Рутенпрес) - У Руским Керестуре и того
лєта будзе отримани Медзинародни волонтерски камп, а як
заплановане, будзе тирвац од 19. юлия по 02. авґуст. Ознова до
Керестура поприходза волонтере з цалого швета, як и зоз Сербиї, а
капацитет волонтерох зоз иножемства уж и пополнєти.
У догварки з Волонтерским центром Войводини, а и пре огранїчени
финансийни средства, заплановане же би на Кампу у Руским Керестуре
участвовали 10 иножемни и 20 волонтере зоз Сербиї, медзи нїма и
домашнї - Рускокерестурци. Волонтерски камп того року будзе
фестивалско-уметнїцки, понеже перши тидзень волонтере буду на базену
пририхтовац сценоґрафию за Водова Фест, котри будзе отримани 24. и
25. юлия у Руским Керестуре.
Заплановане же у другим тижню роботи на тогорочним Волонтерским
кампу, волонтере на керестурским пияцу буду рисовац историю
Руснацох, од приселєня по нєшка.
Лидерка тогорочного кампу Наташа Шовш, колидерка Марина Гайдукова,
обидва зоз Руского Керестура, а под час тирваня Кампу, до помоци им
придзе и лидерка з Волонтерского центру Войводини, Соня Братич.
За учасц на Волонтерским кампу у Руским Керестуре мож ше приявиц
Наташи Шовш, на тел. 064/333-67-01, та Марини Гайдук, тел. 064/29-42-353,
алє и на мейл
volonteri@vodovafest.org
Як то було и прешлого року, пре каждодньови одход на роботу,
волонтером на пожичку буду потребни бицигли.
Керестурци котри волонтером можу и жадаю пожичиц бициґли за
хаснованє под час тирваня Кампма, най ше явя лидерком Кампа -
Шовшовей и Гайдуковей, лєбо напишу на спомнуту
електронску
адресу.
У цеку Ноцни турнир у малим фодбалє
1. юлий 2009. (Рутенпрес) - Од пондзелку, 29. юния, у
Руским Керестуре у цеку традицийни Ноцни турнир у малим фодбалє,
котри, як нагадую орґанизаторе, будзе тирвац найвироятнєйше по 20.
юлий, цо завиши и од хвилї.
Орґанизатор Турнира и того року керестурске СД "Русин", а на Турниру
у конкуренциї сениорох участвую 13
екипи - зоз Руского Керестура, Кули, Червинки, Крущичу и Коцура,
котри подзелєни до трох ґрупох и бавя кажде з каждим.
У конкуренциї старших пионирох змагаю ше 6 екипи, у конкуренциї
младших пионирох 5 екипи и у обидвох катеґорийох то млади фодбалере
зоз Руского Керестура, Червинки и Коцура, котри подзелєни до по
єдней ґрупи за кажду катеґорию.
Змаганя на рукометним стадионє у Старей школи кажди вечар починаю од
20 годзин зоз змаганями пионирох, после котрих ше змагаю сениорски
екипи и єдного вечара на Турниру предвидзени по штири змаганя.
Як и скорейших, и того року за публику на основи уходнїцох будзе
орґанизована пригодна томбола, котру дарую рижни спонзоре.
Уплата по єдней сениорскей екипи виношела 5 000 динари, за пионирски
то було по 2 000 динари, а наградни фонд за освоєне перше место
виноши 40 одсто од уплати, за друге место 30, а за треце освоєне
место 20 одсто од уплати за
учасц
на Турниру.
Почала жатва жита
30. юний 2009. (Рутенпрес) - Комбайни керестурских
подприємствох, задруґох и приватнїкох вчера, 29. юния започали
тогорочну жатву жита, а кельо вона потирва, завиши од хвилї.
У польопривредних подприємствох нє можу оценїц кельо того року у
керестурским хотаре єст поверхносци под житом, алє оценюю же єст
прейґ 600 гектари.
У Подприємстве "Юарбис" на власних поверхносцох маю коло 186 и коло
800 гольти законтраченого жита.
У Дїловней єдински "Польопвиреда” Компаниї “АБЦ фуд” под житом єст
200 гектари, а у Задруґи истей Компаниї законтрачене коло 180
гектари тей култури.
У Задруґи дакедишнього Комбината жатву жита започали ище пред
дижджами, дзе штреднї урожай на польох парастох виношел од 2,5-3
тони по гольту, а з оглядом же длуга дижджовна хвиля пред жатву
очкодовала жито, очекує штреднї урожай од коло 25 метери по гольту.
Як гваря у "Юарбису", спрам дотерашнїх одкосох, влага жита ше руша
од 14 до 17 одсто, гектолитерскей чежини од
коло
80 ґрами.
За кошенє 4 500 динари по гольту
30. юний 2009. (Рутенпрес) - Гоч цена тогорочного роду
жита ище нє позната, цени комбайнованя и превозу жита у жатви уж
утвердзени.
У Руским Керестуре цена роботох у жатви, за тераз єднака у шицких
подприємствох котри ю окончую.
Так, комбайнованє жита у "Юарбису" виноши 4 500 динари, без шечки, а
зоз шечку 5 200 динари по гольту, а исто и у Задруґи "АБЦ фуд" -
кошенє жита за 4 500 динари по гольту (без шечканя).
За превоженє жита, даваче тей услуги буду брац 200 кг жита по
приколици у "Юарбису", лєбо 2 000 динари по приколици у Задруґи "АБЦ
фуд".
"Юарбис” жито вожи перше до своїх силосох, Задруґа на такв. Економию
(першу управу),
одкаль
жито будзе придате до кулскей “Житобачки”.
Жатва ярцу векшином закончена
30. юний 2009. (Рутенпрес) - У Подприємстве "Юарбис" и
Задруґи Компаниї "АБЦ фуд" жатва єшеньского, пивского ярцу
закончена, а “Юарбису” остало покошиц ище менши поверхносци под
ярнїм ярцом.
У "Юарбису" под ярцом було коло 100 гектари, дзе 77 були
законтрачени, а штреднї урожай пивского ярцу виношел од 30 до 35
метери по гольту.
Подобни урожай, од коло 3 тони по гектаре, зазначени и у Задруґи
дакедишнього Польопривредного комбината - од коло 3 тони по гектаре,
котри ту зняти зоз коло
20
гектарох.
Нєшка предлуженє роботох на драги до Крущичу
29. юний 2009. (Рутенпрес) - После павзи през днї
викенду, прелїванє драги з новим асфалтом медзи Руским Керестуром и
Крущичом будзе предлужене нєшка, 29. юния, так же од 7 до 18 годзин
тота драга будзе заварта за транспорт.
Прелїванє драги з новим асфалтом окончує Подприємство "Войдраги" зоз
Суботици, а започало од єй коло половки, односно у хотаре од Крущичу
спрам центра Руского Керестура.
Спрам спознаньох Рутенпресу, тота часц драги по центер Керестура
мала би буц закончена по штварток того тижня.
Од центра Керестура по уход до Крущичу з новим асфалтом ма буц
преляте коло 6,3 километри драги, а у хотаре, медзи Керестуром и
Крущичом, коло драги заплановане положиц и банкини ширини єден
метер.
После прелїваня драги по центер Керестура, започню роботи на
асфалтованю другей часци драги - спрам Крущичу.
Вредносц тей инвестициї виноши коло 68 милиони динари, дзе 60
милиони уж обезпечени прешлого року з Фонду за капитални укладаня
Войводини, а як гварел предсидатель општини Кула Светозар Буквич,
найвироятнєйше же и 8 милиони динари понад прешлорочного плана, тиж
обезпечи войводянски
Фонд
за капитални укладаня.
Побиднїки Лазаревчанки
29. юний 2009. (Рутенпрес) - Женска фодбалска екипа
Ласк зоз Лазаревцу, побиднїк Медзинародного турнира у малим фодбалу
за жени, котри од 24. по 26. юний отримани у Руским Керестуре.
Друге место освоєла екипа Машинац зоз Нишу, треце ЖФК з Нового
Бечею, штварте место завжала екипа Економист з Никшичу, з Чарней
Гори, пияти були фодбалерки домашнього Русина, а шесте место
припадло екипи Раванґрад зоз Зомбора.
Орґанизаторе того першого Медзинародного турнира у малим фодбалє за
жени були ОШиҐ "Петро Кузмяк" и Спортского дружтва Русин.Змаганя на
рукометним стадионє у Старей школи през три днї провадзело вельке
число патрачох.
Керестурци були домашнї визначним екипом у женским фодбалє, понеже
ше побиднїцка екипа з Лазаревцу, та другопласована з Нишу, змагаю у
першей лиґи Сербиї, тиж и Никшичанки у Чарней Гори, док у нашей
другей лиґи бавя екипи ЖФК з Нового Бечею и Раванґрад зоз Зомбора.
Фодбалерки позберани коло керестурского Женского Рукометного клубу
Русин, за тоту нагоду помоцнєт з бавячками з Коцура и Крущичу, у
финалним змаганю звладали екипу зоз Зомбора и освоєли пияте место од
шейсцох екипох.
На концу Турнира подзелєни и поєдинчени припознаня, та так за
найсимпатичнєйшу бавячку на цалим Турниру
преглашена
Кристина Сабадош з керстурского Русина.
Нащива "Реґати 2009"
29. юний 2009. (Рутенпрес) - Пияток през дзень и
вноци, 27. юния, керестурски базен бул домашнї векшим и меншим
ладьом, учашнїком тогорочней Реґати по беґелю од Нового Саду по
Диронь, односно далєй по Дунаю - од Боґоєва по Нови Сад.
Реґату орґанизує подприємство "Води Войводини", под назву "Води
Войводини - Реґата 2009", а участвую у нєй коло штерацец ладї и
ладьочки, чийо посади виражели вельке задовольство з пребуваньом у
Руским Керестуре. На за тоту нагоду попораєним базену, за учашнїкох
Реґати керестурска Месна заєднїца, Младжеска орґанизация "Пакт
Рутенорум" и Здруженє керестурских рибарох "Коляк" орґанизовали
вецей рекреативни змисти.
Пияток пополадню и вечар, "Пакт Рутенорум" на базену орґанизовал
промотивну журку з нагоди наступного Фестивала “Водова фест”, дзе,
попри музики, “Водова фест” представена и з другима промотивнима
змистами.
За учашнїкох Реґати, керестурске Здруженє рибарох на базену варело
пасулю у котлє, а госци нащивели и финални змаганя на Медзинародним
турниру за жени у малим фодбалє, котри ше у тот час отримовало у
Керестуре.
Всоботу, 25. юния дополадня, Реґата предлужели драгу спрам Дироню,
одкаль на преводнїци при Боґоєве нєшка войдзе до Дунаю, и после
нащиви Бачкому Новому Селу, 1. юлия свою 208 километерску драгу по
беґелю и Дунаю закончи у Новим
Садзе.
Преглєдайце скорейши вистки у архиви
>>
|
|
|
|
srpski
english
