Волонтерски камп пред законченьом
Стреда, 28 Юлий 2010 22:22
Нєшка остатнї роботни дзень у Медзинародним младежским волонтерским кампу котри у Руским Керестуре тирва од 21. юлия.
Волонтере го законча на ушорйованю библиотеки на керестурскей парохиї дзе ше найстарши кнїжки, котри маю и прейґ тристо роки, премесца до просторийох на самей парохиї и до просторийох над ґаражу у парохийним дворе.
Гоч волонтере вельо поробели на чисценю и премесцаню кнїжкох пре їх вельке число робота нє закончена.
По словох керестурского пароха о. Михайла Малацка, волонтере поробели важну роботу, а будзе требац поробиц и їх класификованє и фахове пописованє.
Соботу закончени штварти Водова фест
Пондзелок, 26 Юлий 2010 22:49
Всоботу у Руским закончени Штварти музични фестивал младих "Водова фест".
По перших преценьованьох орґанизаторох зоз младежскей орґанизациї "Пакт Рутенорум" за два днї го нащивели коло 5 000 особи цо вецей як влонї кед були предати 4 500 уходнїци.
Нащивительох було зоз цалей Войводини, поготов зоз околних местох, а окрем домашнїх найвецей було Новосадянох, Зомборцох, а евидентовани аж и нащивитель зоз Нишу.
Другого вечара "Водова фесту" главни гвизди була горватска ґрупа "КУД Идийоти" зоз Пули, а удатно наступели и женски бенд "Фрайли" зоз Нового Саду, "Самостални референти" зоз Беоґраду и ґрупа "Свар".
Всоботу ше представела и керестурска ґрупа "Брейнловс", а як наявене нєсподзиванє бул наступ керестурских ґрупох "Маринер", та ґрупи младих музичарох "Пицикато бенд".
Цикаве же ше ґрупа "Маринер" специялно за "Водова фест" позберала знова грац о точно 20 роки, и зоз своїм наступом одушевели публику.
Нащивени були и други два бини, Реґе-бина и Бина-ладя дзе зоз техно звуком публику забавяли числени ди-джейове.
У рамикох "Водова фесту" бул отримани и мото-камп, а всоботу пополадню отримали и обовязни дефиле през улїчки Руского Керестура, а у орґанизациї домашнього мото-клуба "Шаркань".
Як уж традиция и на тогорочним "Водова фесту" на штандох ше представели и числени нєвладово и други младежски орґанизациї як цо "Пакт Рутенорум", Зєдинєна младеж Беоґраду, Младеж кулскей општини, Младеж ЯЗАС, Каритас, Форум младих Рускей матки, МАК-у и други.
Волонтере нащивели Национални совит и Каритас
Штварток, 22 Юлий 2010 20:37
Учашнїки Волонтерского кампу вчера нащивели Национални совит рускей националней заєднїци дзе их приял предсидатель Совиту Славко Рац.
Вон их привитал и пожадал же би були добри амбасадоре у штредкох и жемох.
Предсидатель Рац волонтером представел роботу Националного совиту, одношеня держави и националних меншинох, як и кратку историю Руснацох на тих просторох.
Волонтере тиж опатрели и музейну постановку котра змесцена у Замку.
У просторийох парохийного Каритасу хтори волонтере тиж нащивели як госци були и предсидатель општини Кула Светозар Буквич, предсидатель СО Кула, Желько Ковач, директор Каритасу СЧГ о. Владислав Варґа и Мирям Амброзини, зоз Каритасу Милану у Италиї.
Госци волонтером представели роботу институцийох котри представяю, а свою роботу представел и парохийни Каритас на чолє зоз координатором Янком Катоном.
Нєшка приход волонтерох
Нєдзеля, 18 Юлий 2010 21:56
Нєшка до Руского Керестура приходза млади з иножемства и нашей жеми на Штварти Медзинародни волонтерски камп, котри, як и скорейших рокох, орґанизує Младежска орґанизация Керестура “Пакт Рутенорум”, у сотруднїцтве з Волонтерским центром Войводини.
На добродзечну роботу до Руского Керестура приходза млади зоз Шпаниї, Французкей, Нємецкей, Мадярскей, Ческей, Македониї, наявени и приход єдного бувшого учашнїка з Италиї, котри придзе на “Водова фест”, а понеже волонтерски камп у Кули одказани, на Камп до Керестура приду и двойо волонтере з Польскей.
Зоз Сербиї, на Волонтерским кампу у Руским Керестуре буду робиц млади зоз Старих Лединцох, Кикинди, Нового Саду, Крушевцу, Яґодини, пецеро зоз Кули, так же на тогорочним Волонтерским кампу у Руским Керестуре буду робиц тринацецеро млади з иножемства, дзешецеро зоз Сербиї, та млади з Руского Керестура.
Идуцого тижня "Водова фест"
Штварток, 15 Юлий 2010 18:47
У Войводини вше популарнєйши Музични фестивал "Водова фест" того року будзе отримани о тидзень - 23. и 24. юлия, як и до тераз, на базену у Руским Керестуре.
Перши "Водова фест" отримани 2007. року и од теди прероснул до "Малого Еґзиту", як го популарно наволую, насампредз пре удатну орґанизацию младих з "Пакта Рутенорум", числени популарни ґрупи з музичней естради, атрактивни змисти котри "Водова фест" понука, алє и пре добру, обдуману промоцию прейґ промотивних журкох по местох ширцом Войводини, уж мешац пред отримованьом Фестивалу.
Прешлого року, "Водова фест" през два днї отримованя мал коло 4 500 нащивительох, а з оглядом на учашнїкох тогорочного Музичного фестивалу, орґанизаторе очекукую же нащива будзе и векша.
На трох бинох поставених на отвореним на базену - на Главней бини, Реґе-бини и Бини-ладї, котра и того року доплїва з Нового Саду, 23. и 24. юлия буду наступац дзешец познати и менєй афирмовани музични ґрупи, та 11 ди-джейове.
Вецей тексти...
Бок 1 oд 7
