Дарованє школского прибору
Автор Рутенпрес Собота, 21 Aвґуст 2010 10:24
На ютре 22. августа, будзе отримани Вашар школского прибору, котри орґанизує Каритас у Руским Керестуре.
Вашар, на хторим заинтересовани годни даровац школски прибор и учебнїки, лєбо их зачерац, на нєдзелю будзе отримани од 9 до 13 у просторийох Каритасу.
Окрем школского прибору, годно даровац и материялни прилоги.
Заинтересовани за учасц на Вашаре зоз своїма учебнїками и школским прибором, най ше обявя волонтером Каритасу - Снежани и Дзвонови Малацковим.
Нєдзельови Вашар будзе отримани у рамикох тогомешачней длугшей Акциї Каритасу керестурскей парохиї, прейґ хторей ше фамелийом зоз школскима дзецми у потреби жада олєгчац пририхтованє за наступни школски рок.
До тераз, дзепоєдни Керестурци уж принєсли кнїжки и школски прибор волонтером до Каритасу, а шицок материял назберани и на спомнутим Вашаре, будзе подзелєни фамелийом у потреби.
Почина першенство за фодбалерох "Русина"
Автор Рутенпрес Собота, 21 Aвґуст 2010 10:22
Фодбалере "Русина" з Руского Керестура на ютре, 22. августа, починаю урядово першенствени змаганя у Медзиопштинскей лиґи Зомбор,.
На початку першенства у тей найнїзшей лиґи, дзе ше "Русин" будзе змагац после випадованя з висшого ранґу, Керестурци госцую у Бачким Бреґу, дзе бавя з домашнїм "Динамом".
Як дознава Рутенпрес, место Бориса Шайтоша, нови тренер "Русина" Денис Югик, а Шайтош му помага у тренерскей роботи, алє и як активни бавяч.
У пририхтованьох за першенствени, "Русин" того лєта одбавел вецей приятельски змаганя, дзе на двох турнирох (у Каравукове и Новим Орахове), од трох змаганьох єдно страцел, а у двох бул побиднїк.
У приятельских змаганьох процив "Славиї" з Пиньвиц (на госцованю и дома), "Русин" страцел обидва змаганя, а екипу "Панониї" з Лалитю, з котру ше будзе змагац у истей спомнутей лиґи, "Русин" нєдавно победзел зоз 7:2.
Початок першенства, за керестурски "Русин" источасно представя и намаганє за пласман з того найнїзшого, до висшого ранґу змаганьох.
50 роки хлопского рукомету
Автор Рутенпрес Стреда, 18 Aвґуст 2010 21:40
Рукометни клуб "Русин" з Руского Керестура того року означує 50-рочнїцу бавеня хлопского рукомету, а централне означованє ювилею будзе на соботу и нєдзелю.
Преслава означованя 50-рочнїци хлопского рукомету у Руским Керестуре почнє на соботу, 21. августа, з рукометним турниром у Старей школи, на хторим участвую член Супер-лиґи РК "Червинка", член Першей лиґи РК "Вербас", та екипи з Бачкозонскей лиґи "Зомбор ££" и керестурски "Русин".
На нєдзелю, 22. августа, у Старей школи будзе отримани сход шицких дакедишнїх и терашнїх рукометашох "Русина", дзе будзе одбавене и змаганє старих и младих рукометашох "Русина".
После змаганя, у голи Школи "Петро Кузмяк", прейґ фото-документацийней вистави будзе приказана 50-рочна робота РК "Русин", цо источашнє будзе и Шветочна схадзка Клубу, после чого у Школи будзе отримана и заєднїцка вечера.
Од септембра - нова назва Школи у Керестуре
Автор Рутенпрес Пияток, 13 Aвґуст 2010 17:35
Нову назву - Основна и штредня школа з Домом школярох "Петро Кузмяк", Школа у Руским Керестуре урядово почнє хасновац од 1. септембра, з початком нового школского 2010/11. рока.
Пременку мена ище скорей иницировал Школски одбор Школи у Руским Керестуре, насампредз пре уводзенє нового образовного профилу - "туристични технїчар".
Тих дньох, у Привредним судзе у Зомборе окончене пререґистрованє, односно пременка назви Школи, та з тим реґистровани и нови урядови печац Школи.
Пререґистрованє, односно розчленьованє дїялносци, тих дньох окончене и у Републичним заводу за статистику, та основна дїялносц Школи и надалєй будзе основне образованє и ґимназия общого напряму, з додатим новим подручом роботи - образованє профилу "туристични технїчар".
По першираз на "Мелодийох Руского двору"
Автор Рутенпрес Стреда, 11 Aвґуст 2010 10:59
Народни оркестер Дома култури Руски Керестур, того року по першираз будзе участвовац на Фестивалє руских народних оркестрох у Шидзе.
Тринацчленови Народни оркестр Дома култури, зоз своїм фаховим руководительом Юлияном Рамачом, коло два тижнї отримує проби пре участвованє на Трецим фестивалє "Мелодиї Руского двору".
Керестурци на Фестивалє у Шидзе 14. августа одграю два инструментални руски композициї, а шпивацки дует Весна Надьова и Андрея Бучкова, з провадзеньом Народного оркестру одшпиваю два руски шпиванки, спрам пропозицийох яки одредзели орґанизаторе Фестивалу.
Попри пририхтованя за Фестивал руских народних окестрох у Шидзе, Керестурци ше тих дньох пририхтую и за наступ на Осмим фестивалє жридлового шпиваня “Най ше нє забудзе” у Дюрдьове.
Спред Дома култури Руски Керестур, у Дюрдьове 22. августа наступя Женска и Хлопска жридлова шпивацка ґрупа, окреме зоз своїма шпиванками, а з провадзеньом Народней оркестри Дома култури. И за тот наступ, шпивачох и оркестер пририхтує Юлиян Рамач Чамо.
Вецей тексти...
Бок 3 oд 6
