Почала акция "Школски прибор"
Автор Администратор Вовторок, 10 Aвґуст 2010 07:55
Вчера почала традицийна акция Каритасу керестурскей парохиї наволана "Школски прибор", а будзе тирвац по 22. авґуст.
Фамилийом зоз школскима дзецми у потреби, з тоту акцию ше жада олєгчац пририхтованє за наступни школски рок.
Шицки котри на даяки способ жадаю помогнуц - зоз школским прибором, лєбо пенєжнима прилогами, помоц каждодньово можу принєсц на парохию у Руским Керестуре, або до просторийох Каритасу - вовторками вечар од 20 до 21 годзин.
Свой пенєжни прилог за акцию "Школски прибор" мож подаровац и до Каритасовей шкатули у керестурскей церкви, як и у просторийох дакедишнєй "Металс", а од нєдавно Розвойней банки Войводини, у центре Керестура.
Днї рукомета
Автор Иван Рац Собота, 07 Aвґуст 2010 12:15
Зоз нагоди 50 рочнїици рукометного клубу Русин очекую нас днї рукомета, хтори ше отримаю 21. и 22. авґуста 2010. року на теренє стара школа. Будзе отримани турнир и ревиялни утакмици. На соботу 21. авґуста ше орґанизує турнир, а участвовац буду екипи
1. Русин
2. Червинка
3. Вербас
4. Зомбор
Внєдзелю буду отримани утакмици дзе буду бавиц рукометаше русина медзисобно по ґенерацийох, односно подзелєни як бавяче наступали по сезонох.
З тей нагоди поволуєме шицких любительох рукомета же би нащивели тот турнир и уживали у рукометних дньох.
Финале Керестурскей лиґи малого фодбалу
Автор Администратор Вовторок, 03 Aвґуст 2010 22:19
Финални змаганя Керестурскей лиґи малого фодбалу, отримани вчера, кед преглашени и найлєпши екипи и бавяче.
Перше место од осем сениорских екипох завжала екипа "Креативо 17" котра у финалним змаганю победзела екипу СУР "Флями" зоз резултатом 6:1.
Екипа СУР "Флями" так була друга, а треце место виборела екипа "Цвайта" котра ище прешлого штвартку победзела екипу "Подросток Русина".
За найлєпшого ґолґетера Лиґи преглашени бавяч Боян Надь зоз екипи "Креативо 17", за найлєпшого бавяча Петро Фаркаш зоз истей екипи, а за найлєпшого ґолмана Мирослав Накич зоз екипи СУР "Флями".
У конкуренциї пионирох од штирох екипох котри ше змагали найлєпша була екипа "Ол старс" котра у финалу победзела екипу "Женски рукометни клуб Русин" зоз резултатом 9:1.
Друге место припадло екипи "Бед бойс" котра у финалу бавела нєришено 3:3 зоз екипу "Найки".
За найлєпшого бавяча у конкуренциї пионирох преглашени Давид Катона.
У конкуренциї младших пионирох у Керестурскей лиґи ше змагали три екипи, а за найлєпшу преглашена екипа "Адидас зеро", друге место завжала екипа "Младши рукометашки Русина", а за найлєпшу бавячку вибрана Мелинда Сопка, бавячка тей екипи.
Почал додатни упис до ПУ "Бамби"
Автор Администратор Вовторок, 03 Aвґуст 2010 22:15
Додатни упис за идуци школски рок до Предшколскей установи "Бамби" у Кули почал вчера и будзе тирвац по 7. авґуст.
Упис ше окончує у Кули у обєкту "Сунчица", а тиж и у "Бамбийових" оддзелєньох у населєних местох кулскей општини, та медзи нїма и у оддзелєню "Цицибан" у Руским Керестуре.
Уписац ше годно до цалодньового пребуваня, як и до полудньового зоз обовязним предшколским програмом.
Цена цалодньового пребуваня за яшелька и обданїще, за єден мешац 3 250 динари, а за тераз ше нє зна чи ше ю од септембра будзе звекшовац.
И надалєй, безплатне пребуванє у предшколских установох маю кажде треце и штварте дзецко за котри пребуванє финансує Влада Войводини, а у општини Кула тото важи и за кажде шлїдуюце дзецко у фамелиї котре финансує општински буджет.
Най здогаднєме, у керестурским оддзелєню "Цицибан" у першим уписним термину до цалодньового пребуваня вєдно уписани 72 дзеции, и у шицких ґрупох єст ище места, а до полудньового 45 дзеци народзени 2004. и 2005. року.
Волонтерски камп пред законченьом
Автор Администратор Стреда, 28 Юлий 2010 22:22
Нєшка остатнї роботни дзень у Медзинародним младежским волонтерским кампу котри у Руским Керестуре тирва од 21. юлия.
Волонтере го законча на ушорйованю библиотеки на керестурскей парохиї дзе ше найстарши кнїжки, котри маю и прейґ тристо роки, премесца до просторийох на самей парохиї и до просторийох над ґаражу у парохийним дворе.
Гоч волонтере вельо поробели на чисценю и премесцаню кнїжкох пре їх вельке число робота нє закончена.
По словох керестурского пароха о. Михайла Малацка, волонтере поробели важну роботу, а будзе требац поробиц и їх класификованє и фахове пописованє.
Вецей тексти...
Бок 4 oд 5
