На ютре почина школа
Автор Рутенпрес Пондзелок, 30 Aвґуст 2010 09:36
На ютре, 31. августа, у Школи "Петро Кузмяк" у Руским Керестуре будзе орґанизовани шветочни початок нового школского 2010/11. року.
На ютрейшим сходзе школярох и просвитних роботнїкох з нагоди початку нового школского рока будзе подзелєни розпорядок годзинох, а урядово, настава у керестурскей Школи почнє на стреду, 1. септембра.
Спрам скорейших спознаньох, до першей класи ОШ уписани 50-еро дзеци, з тим же упис тирва по сам початок школи, и буду два оддзелєня першокласнїкох.
До керестурсдкей Ґимназиї - до оддзелєня з руским наставним язиком уписани 14 школяре, а до того оддзелєня буду уписани и штверо Руснаци з Подкарпатя, з України.
До оддзелєня Ґимназиї зоз сербским наставним язиком уписани 25 школяре, а до напряму "Туристични технїчар" 30 школяре.
Нови школски 2010/11. рок, Школа у Руским Керестуре почина з нову назву - Основна и штредня школа з Домом школярох "Петро Кузмяк".
Пременка мена ушлїдзела пре уводзенє нового образовного профилу - "Туристични технїчар", алє основна дїялносц Школи и надалєй будзе основне образованє и ґимназия общого напряму, з додатим новим подручом роботи - образованє профилу "Туристични технїчар".
Подписани Протокол о сотруднїцтве
Автор Рутенпрес Пияток, 27 Aвґуст 2010 00:35
Интернет-Радио Руски Керестур и Радио Нови Сад Радиодифузней установи Войводини, односно Програма на руским язику,вчера у Руским Керестуре подписали Протокол о сотруднїцтве.
У мено РНС Протокол подписала одвичательна редакторка Програми на руским язику Златица Няради, у мено Интернет-радия Руски Керестур його снователь и власнїк Мирослав Будински, а подписованю Протоколу присуствовали и предсидатель Националного совиту Руснацох Славко Рац и одвичательни редактор керестурского радия Владо Джуджар Реґе.
До сотруднїцтва двох радийох хтори програму емитую по руски, пришло дзекуюци закладаню и догварком предсидателя НС Славка Раца, директора Радио Нового Саду Йожефа Клема и редакторки Програми на руским язику РНС Златици Няради, а предлог о институцийним сотруднїцтве потримал и прилапел власнїк Интернет-радия Мирослав Будински.
Русин ше ма зоз чим цешиц
Автор Иван Рац Стреда, 25 Aвґуст 2010 23:45
Днї рукомета
З нагоди означованя и постояня 50 роки рукометного клубу Русин, клуб ше мал прилику приказац а и здогаднуц длугей традициї рукомету.
На терену стара школа отримани днї рукомета дзе соботу 21. авґуста бул турнир на хторим участвовали екипи
1. Русин
2. Вербас
3. Зомбор
4. Червинка
Екипи ше змагали по принципу два полуфинала и бавенє за треце односно перше место.
На першей утакмици участвовали Червинка - Вербас 16 - 16 (4 - 5 пенали), другу утакмицу бавели Русин - Червинка 19 - 12.
Дарованє школского прибору
Автор Рутенпрес Собота, 21 Aвґуст 2010 10:24
На ютре 22. августа, будзе отримани Вашар школского прибору, котри орґанизує Каритас у Руским Керестуре.
Вашар, на хторим заинтересовани годни даровац школски прибор и учебнїки, лєбо их зачерац, на нєдзелю будзе отримани од 9 до 13 у просторийох Каритасу.
Окрем школского прибору, годно даровац и материялни прилоги.
Заинтересовани за учасц на Вашаре зоз своїма учебнїками и школским прибором, най ше обявя волонтером Каритасу - Снежани и Дзвонови Малацковим.
Нєдзельови Вашар будзе отримани у рамикох тогомешачней длугшей Акциї Каритасу керестурскей парохиї, прейґ хторей ше фамелийом зоз школскима дзецми у потреби жада олєгчац пририхтованє за наступни школски рок.
До тераз, дзепоєдни Керестурци уж принєсли кнїжки и школски прибор волонтером до Каритасу, а шицок материял назберани и на спомнутим Вашаре, будзе подзелєни фамелийом у потреби.
Почина першенство за фодбалерох "Русина"
Автор Рутенпрес Собота, 21 Aвґуст 2010 10:22
Фодбалере "Русина" з Руского Керестура на ютре, 22. августа, починаю урядово першенствени змаганя у Медзиопштинскей лиґи Зомбор,.
На початку першенства у тей найнїзшей лиґи, дзе ше "Русин" будзе змагац после випадованя з висшого ранґу, Керестурци госцую у Бачким Бреґу, дзе бавя з домашнїм "Динамом".
Як дознава Рутенпрес, место Бориса Шайтоша, нови тренер "Русина" Денис Югик, а Шайтош му помага у тренерскей роботи, алє и як активни бавяч.
У пририхтованьох за першенствени, "Русин" того лєта одбавел вецей приятельски змаганя, дзе на двох турнирох (у Каравукове и Новим Орахове), од трох змаганьох єдно страцел, а у двох бул побиднїк.
У приятельских змаганьох процив "Славиї" з Пиньвиц (на госцованю и дома), "Русин" страцел обидва змаганя, а екипу "Панониї" з Лалитю, з котру ше будзе змагац у истей спомнутей лиґи, "Русин" нєдавно победзел зоз 7:2.
Початок першенства, за керестурски "Русин" источасно представя и намаганє за пласман з того найнїзшого, до висшого ранґу змаганьох.
Вецей тексти...
Бок 2 oд 5
