Волонтерски камп
Автор Рутенпрес Стреда, 07 Юлий 2010 19:58
Того року од 19. по 29. юлий
Младжеска орґанизация "Пакт Рутенорум", у сотруднїцтве з Волонтерским центром Войводини, и того року у Руским Керестуре орґанизує Волонтерски камп.
Медзинародни волонтерски камп у Руским Керестуре будзе орґанизовани по штвартираз, того року од 19. по 29. юлий, а орґанизаторе очекую приход младих волонтерох з иножемства, нашей жеми и домашнїх, з Керестура.
Лидерки тогорочного Волонтерского кампу Сенка Надь и Светлана Няради и як Рутенпрес дознава од Надьовей, приход на Волонтерски камп до Руского Керестура уж потвердзели дзешецеро млади зоз Шпаниї, Французкей, Нємецкей, Мадярскей, аж з Ниґериї, з Ческей, а наявени и приход єдного бувшого учашнїка з Италиї, котри придзе на "Водова фест".
На Волонтерски камп приду и коло пецеро млади з вецей местох у Сербиї, а буду робиц и коло 20 волонтере з Руского Керестура.
Главна робота волонтерох будзе початок ушорйованя обсяжней библиотеки на рускокерестурскей парохиї.
Тиж так, волонтере буду робиц на пририхтованю терену на базену за "Водова фест", а як и до тераз, за волонтерох буду орґанизовани и провадзаци змисти, вязани за упознаванє з Руснацами и Руским Керестуром.
Волонтере буду змесцени у интернату керстурскей Школи "Петро Кузмяк", а як и скорейших рокох, потребна им помоц Керестурцох у пожички найменєй 10 бициґлох пре каждодньови одход на роботу.
Пре жичанє бициґлох, котри буду врацени после отримованя Кампу, треба ше обявиц лидерком Волонтерского кампу - Сенки Надьовей и Светлани Нярадийовей, на тел. 065/76-83-777 и 064/423-13-17.
Ґу тому, як то було и до тераз, волонтере од Керестурцох очекую и добродзечну помоц у поживи, насампредз у дарованю желєняви и овоци.
