Средства за манифестациї
Автор Рутенпрес Стреда, 07 Юлий 2010 19:59
На своєй остатнєй схадзки, Совит Месней заєднїци Руски Керестур одлучел же Младежскей орґанизациї "Пакт Рутенорум" опредзелї 75 000 динари за орґанизованє тогорочного “Водова фесту”, котри будзе отримани 23. и 24. юлия.
Тиж так, Совит МЗ опредзелєл 20 000 динари за означованє 50-рочнїци Рукометного клубу "Русин". Означованє рочнїци керестурских рукометашох будзе 21. и 22. авґуста.
З одобрених средствох за "Водова фест" би требало покриц и орґанизованє мото-кампу, хтори под час Фестивала орґанизує рускокерестурски Мото-клуб "Шаркань", гварене на Совиту Месней заєднїци.
Средства опредзелєни на основи придатих писаних вимогох, "Водова-фест" придала и финансийни звити за скорейши Фестивали и план за тогорочни, а як гварене на схадзки, гоч за "Водова фест " питане 100 000 динари и 50 000 за Рукометни клуб, на розполаганю лєм 95 000 динари у ставки з дотацийох з месного самодоприносу. По тей основи, як дружтвена орґанизация, "Пакт Рутенорум" достанє и порядни 22 000 динари.
