Од пондзелку Волонтерски камп
Автор Рутенпрес Штварток, 15 Юлий 2010 18:46
Тогорочни Штварти медзинародни волонтерски камп, у Руским Керестуре почина на пондзелок, 19 юлия, и будзе тирвац по по 29. юлий.
Як и скорейшим трох, орґанизатор и терашнього Медзинародного волонтерского кампу Младжеска орґанизация "Пакт Рутенорум", у сотруднїцтве з Волонтерским центром Войводини.
Лидерки Штвартого волонтерского кампу Сенка Надь и Светлана Няради з Руского Керестура и як Рутенпрес дознава од Надьовей, приход на Волонтерски камп потвердзели дзешецеро млади зоз Шпаниї, Французкей, Нємецкей, Мадярскей, з Ниґериї, зоз Ческей, а наявени и приход єдного бувшого учашнїка з Италиї, котри придзе на “Водова фест”.
На Волонтерски камп приду и коло пецеро млади з вецей местох у Сербиї, а буду робиц и коло 20 волонтере з Руского Керестура.
Главна робота волонтерох будзе початок ушорйованя обсяжней библиотеки на рускокерестурскей парохиї.
Тиж так, волонтере буду робиц на пририхтованю терену на базену за "Водова фест", а як и до тераз, за волонтерох буду орґанизовани и провадзаци змисти, вязани за упознаванє з Руснацами и Руским Керестуром.
Волонтере буду змесцени у интернату Школи "Петро Кузмяк", а як и скорейших рокох, потребна им помоц Керестурцох у пожички найменєй 10 бициґлох пре каждодньови одход на роботу.
Пре жичанє бициґлох, котри буду врацени после отримованя Кампу, треба ше обявиц лидерком Волонтерского кампу - Сенки Надьовей и Светлани Нярадийовей, на тел. 065/76-83-777 и 064/423-13-17.
Ґу тому, як то було и до тераз, волонтере од Керестурцох очекую и добродзечну помоц у поживи, насампредз у дарованю желєняви и овоци.
