Идуцого тижня "Водова фест"
Автор Рутенпрес Штварток, 15 Юлий 2010 18:47
У Войводини вше популарнєйши Музични фестивал "Водова фест" того року будзе отримани о тидзень - 23. и 24. юлия, як и до тераз, на базену у Руским Керестуре.
Перши "Водова фест" отримани 2007. року и од теди прероснул до "Малого Еґзиту", як го популарно наволую, насампредз пре удатну орґанизацию младих з "Пакта Рутенорум", числени популарни ґрупи з музичней естради, атрактивни змисти котри "Водова фест" понука, алє и пре добру, обдуману промоцию прейґ промотивних журкох по местох ширцом Войводини, уж мешац пред отримованьом Фестивалу.
Прешлого року, "Водова фест" през два днї отримованя мал коло 4 500 нащивительох, а з оглядом на учашнїкох тогорочного Музичного фестивалу, орґанизаторе очекукую же нащива будзе и векша.
На трох бинох поставених на отвореним на базену - на Главней бини, Реґе-бини и Бини-ладї, котра и того року доплїва з Нового Саду, 23. и 24. юлия буду наступац дзешец познати и менєй афирмовани музични ґрупи, та 11 ди-джейове.
Главна гвизда тогорочного "Водова фесту" популарни Рамбо Амадеус, алє и ґрупи як цо то "КУД Идийоти" з Пули, з Горватскей, "Страх од летеня", "Д Фрайле", "Самостални рефернти" и други.
Спомедзи руских рок-ґрупох, на "Водова фесту" того року буду наступац популарни млади керестурски состав "Крейзи казанс", та "Брейнловс", а орґанизаторе за публику пририхтую и дзепоєдни нєсподзиваня.
У рамикох "Водова фесту" будзе орґанизовани и мото-камп, штанди вецей нєвладових орґанизацийох, а як и скорейших, и того року орґанизаторе пририхтую места за ошвиженє и костиранє под час Фестивала.
Вецей на сайту www.vodovafest.org
