Нащива министра Светозара Чиплича
Автор Администратор Штварток, 04 Maрец 2010 19:35
Шицки национални совити, та и руски, орґанизовали ше уписац вецей як половку своїх припаднїкох, а уписованє меншинох до Окремних виберанкових спискох (ОВС) идзе без ексцесох и у Сербиї вецей нїхто нє ма проблем, лєбо страх, повесц же припада даєдней меншинскей заєднїци - визначел министер за людски и меншински права у Влади Републики Сербиї др Светотар Чиплич, под час вчерайшей нащиви Националному совиту Руснацох у Руским Керестуре.
Зоз констатацию же шицки национални совити, хтори за остатнї два тижнї нащивел под час промотивней кампанї, барз орґанизовано, з вельким жаданьом и амбицию приступели кампанї на уписованю припаднїкох меншинох до Окремного виберанкового списку, вчера, 9. фебруара, започала роботна розгварка министра Чипчлича и шефици його Кабинету Зорани Чамбер, з представнїками нашого Националного совиту.
- Радує ме же постої наисце щира амбиция же би ше, при шицких меншинох, уписало прейґ потребней половки їх припаднїкох и то абсолутне становиско шицких совитох котри сом нащивел.
- После першобутного очекованя же у тим першим циклусу вибору по новим Законє, єден, лєбо анї єден национални совит здобудзе право директного вибору, у Войводини, кед нє шицки, а воно векшина - та вироятно и руски - упишу прейґ половки своїх припаднїкох и буду директно виберац национални совит - гварел министер Чиплич у Керестуре.
- Ґу тому, на терену нєт нїяки ексцеси, людзе дзечнє прилапюю тото уписованє и Министерство, вєдно з националнима совитами, направело єдну добру, циху кампаню.
- То барз добри указатель же у Сербиї нїхто нє ма проблем, лєбо страх - повесц же припада даєдней меншинскей заєднїци, алє напроцив - же Сербия така держава у хторей тото мож и треба повесц, и дзе людзе абсолутно нє маю нїяки проблем зоз своїм националним идентитетом - гварел министер Чиплич у Руским Керестуре.
Роботней розгварки у нових просторийох Националного совиту Руснацох (у Замку) з министром Чипличом о уписованю нашей рускей, алє и других меншинох до ОВС, бешедовали предсидатель Националного совиту Руснацох Славко Орос, народни посланїки у Скупштини Сербиї Олена Папуґа и др Дюра Мученски, предсидатель Шветовей ради РРЛ и Рускей матки Дюра Папуґа, редакторе наших найвекших медийох по руски - Златица Няради, рускей Редакциї Радио Нового Саду, Мирко Канюх рускей редакциї ТВ Нови Сад, Дюра Винаї, редактор новинох "Руске слово", як и Татяна Мученски и Михайло Зазуляк, спред нашого Националного совиту задлужени за информованє о уписованю.
Министра интересовало як тота кампаня идзе у нашей заєднїци и на хтори евентуални проблеми ше наиходзи, на цо одвитоване же после меншого числа уписаних у першим мешацу тей кампанї, за остатнї два тижнї, число виполнєтих вимогох за упис Руснацох до ОВС драстично звекшане.
Бо, попри уписованя у орґанох општинох и месних канцеларийох, та подружнїцох Националного совиту, нєдавно рушела и кампаня "од хижи до хижи", котра, там дзе є запровадзена, уж дала добри резултати.
Праве того и идуцого тижня, по шицких наших векших местох, активисти буду исц од обисца до обисца пре уписованє, а окреме то потребне у Новим Садзе, дзе жиє тиж значне число Руснацох.
Така кампаня потребна и у других городох - Кули, Вербаше и Шидзе, а вона тераз оможлївена и з обезпечованьом средствох за таку активносц - з керестурскей Месней заєднїци и општинох дзе жию Руснаци.
З оглядом же по початок того тижня, формулари за уписованє виполнєли коло 75-80 одсто Руснацох од потребней квоти, як гварене, постоя наисце барз реални шанси же и ми упишеме достаточне число Руснацох за здобуванє права на директни вибор нашого Националного совиту.
Спрам спознаньох, анї при уписованю Руснацох до ОВС нє було нїяки почежкосци и ексцеси, похопена значносц того упису и було барз мало неґативни реакциї на кампаню, гварене у вчерайшей розгварки з министром.
У тим остатнїм мешацу кампанї, очекує ше и найвекши прилїв вимогох, так же уж присутни проблем обробку и ажурированя формуларох у општинох потребне цо швидше розришиц, а наш Национални совит понукнул и конкретну помоц по тим питаню, кед, и дзе то будзе потребне.
Попри Националного совиту и других наших преднякох котри ше активно уключели до тей кампанї, барз вельку улогу одробели и одрабяю и медиї по руски.
Кампанї ше пошвецує вельку увагу и у наших елктронских (ТВ НС аж емитує и за тото окремни спот), и у писаних медийох (та и на локалним уровню), а як наявел министер Чиплич, праве од 10. фебруара, и на шицких националних ТВ би мали буц емитовани окремни промотивни споти за уписованє меншинох до ОВС.
После розгваркох, министер Чиплич и шефица його Кабинету Зорана Чамбер, з домашнїма поопатрали и музейну збирку Руснацох у школским будинску Замок.
