На стреду Орґанизацийни одбор "Ружи"

Автор Рутенпрес Пондзелок, 06 Септембер 2010 20:12

Орґанизацийни одбор тогорочного Штерацец дзевятого Фестивала рускей култури "Червена ружа", будзе отримани на стреду, 8. септембра у Руским Керестуре.

Попри свойого конституованя, на Орґанизацийним одборе би мали буц одредзени термини и концепция програмох тогорочного Фестивала рускей култури "Червена ружа", а схадзка Орґанизацийного одбору, на стреду будзе отримана у Доме култури Руски Керестур од 11 годзин.

Сцигую школяре з України

Автор Рутенпрес Пондзелок, 06 Септембер 2010 20:11

Вчера до Ґимназиї Школи "Петро Кузмяк" у Руским Керестуре сцигли двойо школяре з України, з Подкарпатя, на штредньошколске школованє у тей єдиней ґимназиї по руски на швеце.

Як Рутенпрес дознава од директора Школи Янка Хому, та предсидателя Рускей матки Дюру Папуґу, котри ше окреме анґажовал коло приводзеня школярох з иножемства на школованє до нашей Школи, вчера до Керестура сцигли двойо од вєдно пецерих младих Руснацох зоз Закарпатскей обласци Укаїни, односно Подкарпатя, кельо ше од того школского року буду школовац у Руским Керестуре.

За тераз, на предлуженє школованя у другей класи Ґимназиї, у єй руским оддзелєню, сцигол Милан Падяк, котри ту закончел першу класу Ґимназиї, як и нова школярка - Леся Чепа з Иршави, котра будзе уписана до пешей класи руского оддзелєня Ґимназиї "Петро Кузмяк".

Як плановане, того тижня маю допутовац ище двоме школяре - на ютре и на пияток, а наступного тижня ище єден школяр, шицки з Мукачова, з Подкарпатя, котри, як и Чепова, буду уписани до першей класи Ґимназиї "Петро Кузмяк" у Руским Керестуре.

Меновани члени фахових одборох

Автор Рутенпрес Стреда, 01 Септембер 2010 21:14

На остатнєй схадзки, Совит Месней заєднїци Руски Керестур меновал члени своїх фахових одборох и комисийох, дзе предсидателє члени Совиту, док у составох одборох фахово особи з валалу.

За предсидательку Надпатраюцей комисиї менована Мария Майхер, а за членох Владимир Варґа, Андраш Орсаґ, Наталия Емейди, Дюра Колєсар и Александер Джуня.

За предсидателя Комисиї за явни набавки меновани Славо Бодваи, а за членох Владимир Емейди и Владимир Русковски.

За предсидателя Комуналного одбору меновани Владимир Дудаш Семанов, а за членох Дюра Джуня, Юлин Дудаш, Владо Будински и Яким Чижмар.

За предсидателя Одбору за дружтвени дїялносци меновани Желько Ковач, а за членох Янко Хома, Янко Катона, Борис Шайтош, Йоаким Рац Мими, Александер Ковач, Любица Няради, а ище буду меновани представителє здравства, дзецинбскей заградки и младежскей орґанизациї "Пакт Рутенорум".

За предсидателя Одбору за маркетинґ и розвой валала меновани Мирослав Надь, а за членох Михайло Пашо, Дюра Сабадош, Михайло Зазуляк, Борис Провчи и Владимир Джуджар Реґе.

Купованє косачки, роботи на водоводу

Автор Рутенпрес Стреда, 01 Септембер 2010 21:12

З оглядом на указану потребу за кошенє цо вецей и векших поверхносцох, знїщованє амброзиї, викошованє яркох и други роботи, Совит Месней заєднїци Руски Керестур принєсол одлуку о купованю ткв. “Малчер” косачки, котру ше капча на трактор.

Вредносц косачки коло 580 000 динари, а на Совиту виражене наздаванє же будзе купена зоз средствох општини, чи "Заводу за вибудов", праве як компензация за нєвитворени комунални средства з тих жридлох.

З оглядом же од Покраїнского секретарияту за польопривреду, по конкурсу ознова достати средства за реконструкцию водоводней мрежи, Совит розписал явну набавку малей вредносци за виводзача роботох на водоводу. Зоз звишком пенєжу з прешлорочного конкурсу и терашнїм, набавка розписана на суму од 3,6 милиони динари.

У МЗ уж тераз почали родумовац о роздрильованю шнїгу у жимским периодзе, та одлучене же би ше на постояцим огньогасним камионє окончело потребни доправки.

Роби ше о доправяню системи гидраулики, пре можлївосц капчаня и роботу зоз плугом за шнїг, а єй нєпостоянє представяло барз вельки проблем при чисценю шнгу. Доправка МЗ будзе коштац коло 63 000 динари.

Самодопринос ше витворює

Автор Рутенпрес Стреда, 01 Септембер 2010 21:11

Информацийни финансийни звит за перши тогорочни шейсц мешаци, звит о прилїву до месного сдамодоприносу, як и формованє одборох Совиту, були єдни з главних темох на остатнєй схадзки Совиту Месней заєднїци Руски Керестуре, пондзелок, 30. авґуста.

Як поведзене, финансованє ше сполнює як плановане, медзитим, и на тей Другей схадзки нового зволаня Совиту, а окреме на схадзкох скорейшого, ище раз наглашени позарядово вельки проблем з нєвимирйованьом обовязкох “Заводу за бивудов Кула”, односно општини, за такволани комунални средства.

Од 1,2 милиони динари, кельо обовязка, достати лєм з 200 000 динари, а општина нє вимирює анї свойо обовязки за ткв. "зверени роботи" у обласци комуналней дїялносци.

Познате же Руски Керестур (як и Крущич и Липар) нє ма свойо окремне комуналне подприємство, та шицки комунални роботи (а вони вше обсяжнєйши), окончує Комунална служба Месней заєднїци. "Зверени роботи" подрозумюю и отримованє желєних поверхносцох, а пре вше векши вимоги гражданох, комунална служба презавжата, з тим же и трошки кошеня вше векши.

На основи скорейших, и на тей схадзки Совиту обновене заключенє же би ше пририхтало и отримало єдну окремну, позаядову схадзку Совиту Месней заєднїци з предсидательом општини Кула Светозаром Буквичом и директором ЯП "Завод за вибудов Кула".