Култура у Керестуре

Автор Администратор Штварток, 04 Maрец 2010 19:31

ФЕСТИВАЛ РУСКЕЙ КУЛТУРИ "ЧЕРВЕНА РУЖА"

Фестивал рускей култури "Червена ружа" найстарша и найзначнєйша културна манифестация Руснацох у Войводини (Сербиї). На инициятиву дакедишнього Клуба студентох и штредньошколцох у Руским Керестуре, манифестация виросла до фестивала презентациї културно–уметнїцкей творчосци Руснацох на тих просторох. Основни тон початку и розвою Фестивала дал Яким Сивч, автор шпиванки "Ружи, червени ружи", по хторей Фестивал и достал мено, як и автор велїх шпиванкох хтори глїбоко зажили при слухачох и тераз ше тримаю як народни.

Фестивал рускей култури "Червена ружа" постал окремни порив руским автором, алє и другим, за творенє нових композицийох, так же "Червена ружа" постала ношитель свойофайтового фундуса композицийох у народним и забавним духу, як и нових композицийох за дзеци у Радию и ТВ Нови Сад.

У прешлих 45 рокох "Червена ружа" була и остала порушовач роботи музично–фолклорних ансамблох у местох дзе жию Руснаци. На манифестацийох Фестивала каждого року просеково наступя коло 1200 учашнїки, а скоро каждого року на "Червеней ружи" наступя и ансамбли припаднїкох других народох и националних заєднїцох у Войводини. Тиж, скоро каждого року Фестивал бул домашнї и госцом зоз иножемства – найвецей зоз Словацкей и України, алє и зоз Польскей, Данскей, Французкей, Горватскей, Македониї...

Фестивал рускей култури "Червена ружа" иснує од 1962. року, а отримує ше каждого року у Руским Керестуре концом юния и початком юлия. У рамикох Фестивала каждого року ше отримую шлїдуюци манифестациї:

– Вистави (подобово, музейни, фото-документарни...)

– "Червене пупче" – дзецинска шпивацко-танєчна манифестация

– "Червена ружа" – найстарша манифестация, змаганє шпивачох-аматерох
за найкрасши дзивоцки и леґиньски глас

– "На штред широкей ровнїни" – шветочни концерт руских и госцуюцих
музично-фолклорних ансамблох, зоз своїм репрезентативним програмом .

fy; line-height: 150%;">Скорейших рокох у рамикох Фестивала отримовани и други манифестациї як цо "Одгуки ровнїни", "Естрада братства", Митинґ поезиї и музики младих "Струни шерца", Манифестация рок, поп и подобней музики "Керестурияда", науково совитованя, трибини и други, алє з часом дзепоєдни з нїх ше загашели, а дзепоєдни премесцени до других културних змистох.

Нєпоштредни орґанизатор Фестивала рускей култури "Червена ружа" Дом култури у Руским Керестуре, а значну финансийну и материялну помоц даваю Министерство култури Републики Сербиї, Секретарият за образованє и културу АП Войводини, Општина Кула, Месна заєднїца Руски Керестур и числени спонзоре.

Руски народни театер "Петро Ризнич Дядя"

Руски народни театер "Петро Ризнич Дядя" конституоване 1971. року як Аматерски руски театер "Дядя", зоз своїма двома сценами - Сцена у Руским Керестуре и Сцена у Новим Садзе. Под тим меном функционовал по 1991. рок, кед пременєл мено до Руски народни театер "Дядя". И далєй є у професийней функциї, у першим шоре при Руснацох у Войводини, та и ширше.

У маю 2003. року Театер трансформовани до професийного.

Театер пестує репертоар од класичней и фолклорней драми по експеримент, камерну и бабкарску сцену, у зависносци од условийох за роботу. У прейдзеним периодзе од 36 рокох були заступени дїла од шветових класикох по домашню и руску драму и комедию. У пейґ 100 виведзених премиєрох були заступени: Молиєр, Брехт, Ґоґоль, Нушич, Стерия, Сремац, Пекич, Чехов, Островски, Коляда, Курейчик, Ґавран, Удовички, Папгаргаї, Ковач, Канюх, и велї други творителє.

Театер участвовал на:

Союзним фестивалу аматерских театрох на Хвару, односно у Требиню, шейсц раз;

Републичним фестивалу аматерских театрох Сербиї, у Кули, вельо раз:

Покраїнскей смотри аматерских театрох (Кикинда, Стара Пазова) 30 раз;

Вечарох братства у Призрену, вецей раз;

Фестивалох у Мостару, Малим Црничу, Княжевцу, Смедеревскей Паланки, 
Крушевцу... вельо раз;

Стретнуцох професийних театрох Войводини, шейсц раз;

Фестивалох у иножемстве (Мадярска, Словацка, Україна) вецей раз;

Драмским мемориялу "Петра Ризнича Дядї" у Руским Керестуре, каждого року.

ДРАМСКИ МЕМОРИЯЛ ПЕТРА РИЗНИЧА ДЯДЇ

Драмски мемориял Петра Ризнича Дядї то свойофайтова рочна смотра смотра театралних досцигнуцох Руснацох на тих просторох, на хторей ше, попри представох за старших, виводза и представи за дзеци, а уж по традициї, каждого року ту госцує и найлєпша представа зоз Општинскей смотри театралней творчосци кулскей општини, а попри аматерских представох, ту ше виводза и професийни представи, а з часу на час и госцуюци представи зоз иножемства. Маюци у оглядзе же театрална творчосц синтеза шицких уметносцох, у рамикох того фестивала каждого року отримує ше и єдна вистава подобових роботох, а вецей роки отримована и манифестация "Стих за стихом" – стретнуце рецитаторох зоз шицких местох у хторих жию Руснаци. У рамикох тих активносцох Драмски мемориял чува памятку на Петра Ризнича Дядю, єдного зоз найвизначнєйших педаґоґох и театралних ентузиястох на тих просторох.

Драмски мемориял Петра Ризнича Дядї, чий нєпоштредни орґанизатор рускокерестурски Дом култури, отримує ше од 1969. року, на яр каждого року у Руским Керестуре, а орґанизацию финансийно потримую Министерство култури Републики Сербиї, Секретарият за образованє и културу АП Войводини, Општина Кула, Месна заєднїца Руски Керестур и спонзоре.