У Руским Керестуре вчера вечар отримани Сход о частих крадзох у валалє, а як перши крочай у ришованю того проблему будзе порушованє петициї за ноцни дежурства полицийней патроли и през тидзень, а нє лєм у дньох викенду, як то тераз.
Сход, як гражданска инициятива, отримани у просторийох Каритасу, на инициятиву младих з Пакта Рутенорум, на котри ше одволало красне число жительох Керестура рижних ґенерацийой, найвецей тих котри очкодовани, односно чийо обисца, лєбо  подприємства нєдавно окраднути.
На сходзе бул и секретар Месней заєднїци (МЗ) Йоаким Надь, а гоч були поволани и обецали же приду, нє пришли представителє Полицийней управи.
Гражданє винєсли свойо неґативни искуства, дати и вецей предкладаня, а секретар МЗ Йоаким Надь обецал же на нєшкайшей схадзки Совиту МЗ будзе слова и о порушованю спомнутей петициї, як и о предкладаню з того сходу о самоорґанизованю пре лєпше доявйованє о крадзох, подозривих особох и подобних зявеньох.
Совит МЗ будзе инициятор и розгварки з командиром полициї о тей теми, цо би мало буц цо скорей. Орґанизаторе вчерайшого сходу наявели и нове сходзенє, пре дознаванє о превжатих крочайох и витворйованю їх предкладаньох.