Руски Керестур

Архива висткох - януар 2008.

Одвити з компетентних орґанох
31. януар 2008. (Рутенпрес) - На основи представки предсидателя Националного совиту Руснацох Славка Ороса, же прешлого року, медзи 28. и 29. новембром на єдней хижи у центре Руского Керестура виписани ґрафити - "Сербия Сербом", "Косово", штири слова "С" и "Делиє Оджак", до Националного совиту сцигли одвити з вецей державних орґанох.
      Министерство нукашнїх дїлох - Кабинет министра, информує предсидателя НС же на основи тей представки окончене вишлїдзованє з боку Полицийней станїци Кула Полицийней управи Зомбор, и констатоване же на хижи у улїци М. Тита ч. 75, власнїци Мелани Сивч, НН особи виписали тоти ґрафити, зоз чирилицу, велькосци словох коло 40 центиметри, зоз червеним спрейом.
      О тим збуваню такой информовани и општински явни тужитель, котри ше вияшнєл же ше роби о кривичним дїлу "Знїщованя и очкодованя цудзей ствари", зоз члена 212, става 1. Кривичного закону РС за котре ше гонєнє окончує по службенейх длужносци.
        Як ше гвари у Допису з Министерства нукашнїх дїлох, а на основи звиту Полицийней управи Зомбор, службенїки Полицийней станїци Кула пребераю шицки мири и роботи на идентификованю и пренаходзеню виновнїкох того кривичного дїла, после чого Националному совиту будзе доступни податки пре витворйованє одвитуюцих правох у складзе зоз Законом.
        Спричинєна чкода з тим чином оценєна на 14 500 динари, а после идентификованя виновнїкох, очкодована власнїца хижи годна поднєсц приватну тужбу за надополнєнє чкоди.
        Допис з Министерства нукашнїх дїлох, односно Полицийней управи Зомбор послати и до Покраїнского секретарияту за управу, предписаня и национални меншини, як и до Покраїнского омбудсману, одкаль тиж поинформовали Национални совит Руснацох о превжатих мирох на основи представки предсидателя НС.

РУСКИ КЕРЕСТУР - ВИБЕРАНКИ ЗА ПРЕДСИДАТЕЛЯ СЕРБИЇ
Поволанка др Дюру Мученскйия
31. януар 2008. (Рутенпрес) - Пред наступним другим кругом виберанкох за предсидателя Сербиї, поволанку за гласанє Керестурцом и Руснацом послал и народни посланїк др Дюра Мученски, у котрей ше гвари:
       "Руснаци того року першираз преславели свойо националне шевето, 17. януар, як дзень кед зме урядово почали приходзиц на тоти простори. Од теди прешли 260 роки, остали зме ту и очували свой национални идентитет - чуваюци язик, културу, школу, виру, гварел у своєй поволанки народни посланїк Мученски.
       Мученски визначел же "нєшка час здогаднуц ше на шицко тото цо нам ше збувало 90-тих рокох, алє и час нє допущиц їх врацанє". Прето, гварел Мученски, барз важне висц на виберанки на нєдзелю, 3. фебруара и дац свой глас Борисови Тадичови за предсидателя Сербиї.
      Вон гварел же, Тадич ґарант драги до Европи, мирного живота зоз нашима сушедами, отвераня европских фондох унапрямених на векши субвенциї у польопривреди и ґарант розвою нашей привреди.
       -Почитовани Руснаци, поволуєм вас же бисце шицки вишли на виберанки, на нєдзелю, 3. фебруара и дали потримовку Борисови Тадичови за предсидателя Сербиї. На таки способ гласаме за будучносц нас и наших дзецох” -гвари ше у поволанки народного посланїка Др Дюру Мученския.

Биоскоп у Каритасу
31. януар 2008. (Рутенпрес) - На пияток, 1. фебруара, у Руским Керестуре ознова прероби биоскоп, тераз у просторийох керестурского Каритасу. На пияток, з початком на 20,30 годзин, у Велькей сали Каритасу будзе приказани филм "Ключи од хижи", уход безплатни, а сала може прияц до седемдзешат особи.
Як Рутенпрес дознава од активистох керестурского Каритасу, прейґ спонзорох и донаторох набавена потребна опрема за приказованє филмох у таким просторе - платно велькосци 4 зоз 2 метери, кинопроєктор и озвученє.
Филми за тераз буду приказовани раз мешачно, а спрам указаного интересованя и потреби, можебуц и частейше. Кинопроєкциї наменєни шицким заинтересованим, а Каритас и на тото способ пробує анимировац младих и других заинтересованих за волонтерску роботу у тей церковней гуманитарней орґанизациї.

По кубик древа од ДСС
31. януар 2008. (Рутенпрес) - Општински одбор, односно Месни одбори Демократскей странки Сербиї по местох кулскей општини, у януаре орґанизовали акцию на безплатним додзельованю огриви найзагроженшим катеґорийом жительства.
Месни одбори даровали по кубик древа за огриву, а у Руским Керестуре, по кубик древа од Месного одбору ДСС достали пейц фамелиї чежшого материялного стану.

Першого дня без векших гужвох
29. януар 2008. (Рутенпрес) - Як дознаваме у керестурскей Пошти, вчера, першого дня уписованя безплатних акцийох, на шалтерох Пошти нє було векшей гужви и уписованє ишло у порядку.
      Пре уписованє безплатних акцийох гражданох, шалтери Пошти у Руским Керестуре робя и пополаднями, а буду робиц и през викенди. Попри стаємного роботного часу од 7 по 13 годзин през роботни днї, Пошта Руски Керестур роботнима днями акциї будзе уписовац и пополадню - од 14 до 18 годзин.
        Акциї у Пошти годно уписац и през викенд - всоботу од 8 до 11; та од 13 до 17 годзин, а внєдзелю од 14 по 19 годзин.
        Тиж так, за тих котри нє маю, при уписованю акцийох на Пошти годно отвориц и потребни жиро-рахунок.

Заєднїцки о чистоти беґелю
29. януар 2008. (Рутенпрес) - Пре лєгчейше обезпечованє риболовних дозволох, Керестурске здруженє "Коляк" прешлого року ше повязало зоз кулским здруженьом “Шаран”, а як визначене на Скупштини рибарох 25. януара, рибарски дозволи буду ше предавац по старей цени, спрам утвердзених возростох, и на пейц мешачни рати.
       Єдно з условийох за доставанє новей дозволи за лапенє рибох будзе вимирйованє старого длуства - одлучене на Скупштини. Понеже СЗР “Коляк” ище нє ма свойо просториї, место видаваня рибарских дозволох будзе сообщене познєйше, прейґ плакатох.
      Секретар керестурскей Месней заєднїци Яким Надь, на Скупштини рибарох наглашел же Руски Керестур будзе мац двох польочуварох и "було би добре кед би тота служба свою роботу координовала зоз ловочуварску и рибочуварску службу".
       - Остатнї час же би ше цо вецей водзела старосц о чистоти нашого беґелю, цо годно витвориц єдино зоз орґанизованьом ширших заєднїцких акцийох хтори допринєшу чистейшому и здравшому околїску - гварел Надь на Скупштини ЗСР “Коляк”.

Отримани традицийни Прадки
29. януар 2008. (Рутенпрес) - Пияток, 25. януара, на Прадкох у єдальнї керестурскей Школи, ше зишло красне число терашнїх и бувших занятих у ОШиҐ "Петро Кузмяк", дзе мали нагоду коштовац стародавни уж покус и забути руски єдла.
Вредни кухаре Школи, на чолє зоз Михалом Оросом, пред госцох предложели числени єдла и лакотки - капусну и парадичову мачанку зоз месом, ребрами и колбасу; печене месо, капущанїки, ґоргелї, галушки зоз сиром, череґи, кифлочки з маджуном, рейтеши зоз сиром и бундаву, варену кукурицу, пуканки, кашу...
Госцох у Школи забавял оркстер "Томас шоу бенд", а як и на каждим балу, була и томбола, котру подаровали сами роботнїки Школи и спонзоре.

ТВ Пинк знял прилоги у Керестуре
29. януар 2008. (Рутенпрес) - После вибору Янка Мудрия (26) зоз Руского Керестура же би участвовал у новим сериялну емисийох "З танцом до снох" на телевизиї Пинк, вчера, 28. януара, екипа ТВ Пинк нащивела Руски Керестур.
       З оглядом же сериял "З танцом до снох" ма и одредзени гуманитарни характер, спрам вибора Янка Мудря, вон будзе танцовац за керестурски Дом култури - за його реновиранє, технїчне опреманє и потребну опрему и ношнї секцийох Дома култури.
       Прето вчера, 28. януара, екипа ТВ Пинк зняла одредзени прилоги у керестурским Доме култури, котри буду илустровац витворенє "сна" Янка Мудрия, а за емисию "З танцом до снох", ТВ Пинк зняла вецей прилоги и по Руским Керестуре. Як гвари Мудри, жаданє му же би з тим анґажманом у "З танцом до снох" презентовал Руснацох, Руски Керестур, алє и помогнул тей нашей найвекшей установи у култури Руснацох - керестурскому Дому култури.
       За нови сериял емисиї "З танцом до снох" Янко Мудри будзе медзи дзешец учашнїками, дзе нашо медийни и естрадни гвизди буду танєчни пари шейсцом дзивком и штиром леґиньом. За тераз ище нє познате хто Мудрийови будзе танєчна пара, а предвидзене же нови сериял емисийох "З танцом до снох" на ТВ Пинки почнє початком фебруара.

Отримана Скупштина ЗСР "Коляк"
29. януара 2008. (Рутенпрес) – Здруженє спортских рибарох "Коляк" у тим року планує подмладзованє членства, акциї на чисценю керестурского беґелю, очуванє водох од рибокрадзи як и спозорйованє явносци на евентуални случаї векшого заґадзованя води - наглашене на порядней Рочней скупштини рускокерестурского Здруженя спортских рибарох “Коляк”, пияток, 25. януара.
     У звиту о прешлорочней роботу Здруженя рибарох визначене же попри планских, влонї орґанизовани и два нєплански змаганя рибарох, понеже змаганє у лапаню рибох орґанизовала и странка ЛСДВ, а прешлого року у Керестуре по першираз орґанизоване и лапанє чуки на дуґов, ткв. “Чукияда”.
     Єдна зоз значних активносцох було и порибйованю керестурского беґелю, та так власнїк беґелю - "Войводина-води" - часц беґелю медзи мостом и "Широким" порибел зоз 400 кили рибчатох амура и потьки.
       Єдну часц рибчатох зоз рибалова до беґелю випущел и "АБЦ ФООД" А.Д., а влонї нє було векшого заґадзованя беґельскей води, та нє зазначене анї векше загинуце рибох - гварене на Скупштини рибарох.
     Од половки прешлого рока, беґель чува професийни рибочувар "Войводина-водох" Стево Сабо, котрому предсидатель "Коляку" Янко Джуджар на Скупштини подаровал традицийни дарунок Здруженя - циґонь за лапанє рибох зоз машинку.
       Прешлого року "Коляк" розполагал зоз 136 000 динари. Стан на жиро-рахунку могол буц и вигоднєйши кед би нє опадла масовносц членства, бо зоз 223 реґистрованих рибарох, членство зменшане на 197 членох, а потребне и поряднєйше вимирйованє членарини.

У Пошти и пополаднями и през викенд
26. януар 2008. (Рутенпрес) - Пре уписованє безплатних акцийох гражданох, шалтери Пошти у Руским Керестуре буду робиц и пополаднями и през викенди, спрам упутства котри Пошта достала вчера, 25. януара - дознава Рутенпрес од Меланиї Чизмар, управнїци Пошти Руски Керестур.
Уписованє безплатних акцийох започне на пондзелок, 28. януара, а попри стаємного роботного часу од 7 по 13 годзин през роботни днї, Пошта Руски Керестур роботнима днями акциї будзе уписовац и пополадню - од 14 до 18 годзин.
Акциї у Пошти годно уписац и през викенд - всоботу од 8 до 11; та од 13 до 17 годзин, а внєдзелю од 14 по 19 годзин. Тиж так, за тих котри нє маю, при уписованю акцийох на Пошти годно отвориц и потребни жиро-рахунок.

Програма з нагоди Школскей слави
26. януар 2008. (Рутенпрес) -Вчера, 25. януара у керестурскей ОШиҐ "Петро Кузмяк" отримана програма з нагоди Школскей слави, односно означованя дня Святого Сави.
      Програму у Школи пририхтали школяре висших класох Основней школи, як и ґимназиялци, окреме сербских оддзелєньох керестурскей Ґимназиї, зоз своїма професорками - Лидия Пашову и Невенку Пєщич.
      Директор Школи "Петро Кузмяк" Янко Хома просвитним роботнїком и школяром повинчовал Славу, а попри музично-шпивацких и рецитаторских точкох, ґимназиялци виведли и пригодну драмску сличку зоз ламаньом славского колача.
        Вчера, 25. януара, и у керестурскей ОШиҐ "Петро Кузмяк" закончене перше полроче школского 2007/08. року, а друге полроче започнє 31. януара.

Скупштина СД Русин 10. фебруара
26. януар 2008. (Рутенпрес) - Порядна Рочна скупштина Спортского дружтва "Русин" зоз Руского Керестура будзе отримана на нєдзелю, 10. фебруара у Школи “Петро Кузмяк”, одлучене на схадзки Управного одбору Дружтва, 22. януара.
       Истого дня, 22. януара, перша екипа Фодбалского клуба "Русин" у физкултурней сали керестурскей Школи почала пририхтованя за ярню часц першенства.
     Тренер сениорскей екипи "Русина" Борис Шайтош на розполаганю ма двацец бавячох, єден фодбалер "Русина" - Петро Фаркаш ше врацел зоз войска, а пре одход до оджацкого "Текстилцу", екипу напущел Ненад Живанов зоз Лалитю.
      Ярня часц першенства у Подручней фодбалскей лиґи Зомбор, дзе ше "Русин" змага, почина 15. марца, а єшеньску часц, керестурски фодбалере закончели на пиятим месце на таблїчки, од 16 екипох кельо ше змагаю у тей лиґи.
       Як Рутенпрес дознава од тренера Бориса Шайтоша, циль змаганьох у ярнєй часци першенства будзе оставанє у горнєй часци таблїчки у Подручней фодбалскей лиґи Зомбор.
       Подросток "Русина" єшеньску часц першенства закончел на трецим месце, а зоз тренером Владом Боднаром, пририхтованя фодбалерох подростку "Русина" найвироятнєйше започню о два тижнї.

Пририхтованя за Дзешати конґрес РРЛ
25. януар 2008. (Рутенпрес) - Дзешати Шветови конґрес Руснацох, Русинох, Лемкох, як и штварти шветови Форум младих Руснацох, Русинох, Лемкох, у Руским Керестуре будзе отримани концом мая, лєбо початком юния 2009. року, заключене вчера, 24. януара, у Руским Керестуре на першей, конститутивней схадзки Орґанизацийного одбору за пририхтованє тих двох форумох.
       Як ориєнтацийни термин отримованя тих двох шветових сходох Руснацох, предложени остатнї викенд у маю лєбо перши викенд у юнию 2009. року, а Керестур очекує коло 200 учашнїкох и госцох Конґреса и Форума зоз Европи и Америки.
       Конєчна одлука о тим будзе принєшена после фебруарскей схадзки Шветовей ради РРЛ, у Букурешту, односно после Рочней скупштини Рускей матки.
        До Орґанизацийного одбору за пририхтованє двох шветово значних форумох Руснацох, попри членох Управного одбору РМ и Форума младих РМ, буду уключени представителє Националного совиту Руснацох, Апостолского еґзархата за грекокатолїкох у Сербиї и Чарней Гори; ОШиҐ “Петро Кузмяк”, Месней заєднїци, Дома култури, РНТ “Петро Ризнич Дядя”, Младежскей орґанизациї “Пакт Рутенорум”, та амбуланти, шицки зоз Руского Керестура.
       Тиж так, у Орґанизацийним одборе буду и представнїки Служби за людски и меншински права Влади Републики Сербиї, Покраїнского секретарията за управу, предписаня и национални меншини, як и Скупштини општини Кула.
        На вчерайшей схадзки у Руским Керестуре присуствовали и проф. Слободан Каранович, висши совитнїк и шеф Одсеку за национални меншини у Служби за людски и меншински права Влади РС, совитнїца директора истей Служби Душанка Попович, Боро Кецман, спред Покраїнского секретарияту за управу, предписаня и национални меншини, Светозар Буквич, предсидатель Општини Кула, як и Славко Орос, предсидатель Националного совиту Руснацох.
      З оглядом же финансиї буду єден з опредзелююцих факторох за витворенє планованих програмох Конґреса и Форума, Слободан Каранович предложел же би у Орґанизацийним одборе були и представителє Министерства за културу, Министерства просвити и Министерства за спорт и младеж.
        Як гварене на вчерайшей схадзки, за програмне и технїчне витворенє Дзешатого шветового конґреса и Штвартого форума младих РРЛ потребне коло 2 милиони динари.
       Душанка Попович спред Служби за людски и меншински права пренєсла усмену потримовку директора Служби Петра Ладєвича тому велькому проєкту Руснацох, з наглашеньом же Служба порихтана на гоч яку файту помоци у орґанизациї Конґреса и Шветового форума младих.
      -Таки сходи збогацую, оплєменюю и творя добре, як национални заєднїци, так и жеми котра їм домашня и шицки учашнїки тих збуваньох буду мили госци” - гварели представителє Служби за людски и меншински права Влади РС у Руским Керестуре.
    Потримовку наступному Дзешатому конґресу РРЛ и Штвартому форуму младих дал и предсидатель Општини Кула Светозар Буквич, як гварел - як домашнї, наглашуюци же цо скорей треба заврец финансийну конструкцию, та ше увидзи з якима средствами у орґанизациї будзе участвовац кулска општина.
     Потримовку обецал и секретар керестурскей Месней заєднїци Йоаким Надь.
      Спрам одлуки Дзевятого конґреса, єден спомедзи трох дньох отримованя Дзешатого Шветового конґреса РРЛ будзе отримани и у Вуковаре, Петровцох и Миколошевцох у Републики Горватскей.
       Окрем у пленуму, Шветови конґрес будзе робиц и у пейцох комисийох - за културу и историю, за школство, за литературу, информованє и публицистику, за духовну обласц и за економию и привредни розвой.
       Єдна зоз значних сеґментох Конґреса будзе и културно-уметнїцка програма, дзе винєшени вецей идеї, а є дна з нїх же би ше формовали и єден репрезентативни танєчно-музични ансамбл зоз КУД по наших местох, цо будзе конкретизоване на комисийох Орґанизацийного одбору.

Скупштина Рускей матки 23. фебруара
25. януар 2008. (Рутенпрес) - Рочна скупштина Рускей матки будзе отримана 23. фебруара, у Кули, у просторийох тамтейшого Руского КУД “Др Гавриїл Костельник” одлучене на вчерайшей схадзки Управного одбору Рускей матки.
На основи поволанки, делеґация Рускей матки 7. фебруара будзе бешедовац зоз експертами Совиту Европи, так же Управни одбор принєсол одлуку и о составе тей делеґациї.Розгварка зоз представителями Совиту Европи о витворйованю Европскей повелї о реґионалних и меншинских язикох будзе отримана у Вивершней ради АП Войводини, а подобну поволанку достал и национални совит Руснацох.

Пририхтованя за наиходзаци Конґрес Руснацох, Русинох Лемкох
24. януар 2008. (Рутенпрес) - Схадзка Орґанизацийного одбору за пририхтованє дзешатого Шветового конґреса Руснацох, Русинох Лемкох будзе отримана нєшка, 24. януара, у просторийох керестурского Дома култури.
      Источашнє будзе отримана и схадзка Орґанизацийного одбору за пририхтованє Штвартого Форума младих Руснацох, Русинох, Лемкох, понеже и Форум будзе отримани под час отримованя Конґреса РРЛ.
       Як цо познате, на остатнїм, дзевятим Шветовим конґресу РРЛ, прешлого року у Румуниї, принєшена одлука же би Дзешати Шветови конґрес Руснацох, Русинох, Лемкох, бул отримани у Сербиї, односно у Руским Керестуре.
     Орґанизацийному одбору на розпатранє нєшка будзе понукнути Нарис програми за орґанизацийни, технїчни и финансийни пририхтованя за отримованє Шветового конґреса РРЛ и Форума младих РРЛ.
       Як ориєнтацийни термин отримованя тих двох шветових сходох Руснацох, у Нарису програми предложени остатнї викенд у маю - од 28. по 31. май 2009. року, лєбо перши викенд у юния - од 4. по 7. юний 2009. року.
      Заплановане же єден спомедзи трох дньох отримованя дзешатого Шветового конґреса РРЛ будзе отримани и у Вуковаре и Петровцох, у Републики Горватскей.
       Окрем у пленуму, Шветови конґрес будзе робиц и у пейцох комисийох - за културу и историю, за школство, за литературу, информованє и публицистику, за духовну обласц и за економию и привредни розвой.
       Здогаднїме, треци Шветови конґрес 1995. року отримани у Руским Керестуре.

Наводньованє у керестурским хотаре
24. януар 2008. (Рутенпрес) - Зоз беґелю Мали Стапар-Косанчич, керестурски парасти годни залївац аж коло 700 гектари жеми, гварене вчера, 23. януара, у Месней заєднїци на презентованю проєкта реконструкциї того беґелю.
        Як гаврели технїчни директор Водопривредней орґанизациї “Бачка” з Вербасу Синиша Вуйович и проєктантка Аґота Николич, до початку тогорочней сезони залїваня, беґель Мали Стапар-Косанчич достанє двонаменску фунцкию - попри одводньованя, будзе служиц и за потреби наводньованя.
   Наводньованє, односно залїванє, як єдна з най-нєобходнейших мирох за унапредзенє польопривредней продукциї, будзе оможлївене зоз доводзеньом беґельскей води на польопривредни парцели, цо оможлїви вчера представени проєкт одводней беґельскей мрежи.
     Зоз пречисцованьом постояцих и докопйованьом нових яркох, буду формовани два залївни поля, а з каждого годно залївац по 350 гектари жеми.
        Пре пренаменьованє функциї того беґелю, будзе потребне формовац и два водозалапеня - водозалапенє Крущич и водозалапенє Руски Керестур, шейсц брани и два цивоводи.
     Роботи на розчисцованю терену уж почали, а цалу реконструкцию будзе финансовац Вивершна рада АП Войводини и зоз Фонду за капитални инвестициї.Водопривредне подприємство "Бачка" зоз Вербасу обезпечело 20 милиони динари.
       За тераз нєт индициї же би ше тоту беґельску води за залїванє, хасновательом и наплацовало.

Янко Мудри вибрани за учашнїка ТВ емисиї "З танцом до снох"
24. януар 2008. (Рутенпрес) - Млади керестурец Янко Мудри, двацец шейсц рочни нєзаняти столар, 22. януара вибрани за учашнїка нового серияла популарней емисиї ТВ Пинк - “З танцом до снох” (“Плесом до снова“), дознава Рутенпрес ексклуизивну вистку.
       За участвованє у тей ТВ емисиї, дзе анонимни млади людзе танцую зоз познатима гвиздами, Янко ше приявел у новембре прешлого року, же би ушлїдзела строга селекция и авдициї за конєчни вибор до емисиї "З танцом до снох".
      Сериял "З танцом до снох" ма насампредз одредзени гуманитарни характер, а як вибрал - Янко Мудри будзе танцовац за рускокерестурски Дом култури - за його реновиранє, технїчне оправянє и потребну опрему и ношнї секцийох Дома култури. Як гвари Мудри, жаданє му же би з тим анґажманом у "З танцом до снох" презентовал Руснацох, Руски Керестур, и нашу културу.
       Як Рутенпрес дознава од Мудрия, за участвованє у тим новим сериялу емисийох "З танцом до снох", приявели ше 90 млади учашнїки зоз рижних крайох Сербиї а Янко вошол медзи 15 найлєпших.
      Зоз самим участвованьом у тей емисиї, Мудри за Дом култури уж обезпечел 250 000 динари. Под час тирваня серияла, ТВ Пинк знєє и емисиї о керестурским Доме култури, о фамелиї Янка Мудрия, котра вєдно зоз Керестурцами, як публика, буду участвовац у ТВ емисийох "З танцом до снох".
        Млади Керестурец Янко Мудри иншак коло седем роки бул танєчнїк керестурского Дома култури, тераз є стаємни учашнїк Танєчней школи "Степ" у Кули, та попри гуманитарного сна, и танєчне знанє вироятно було опредзелююце за вибор до тей емисиї.

Свойо предлоги и до ладички на МЗ
24. януар 2008. (Рутенпрес) - Совит Месней заєднїци здогадує Керестурцох же на капури Месней заєднїци стої окремна ладичка до котрей можу пущац свойо предлоги и пригварки вязано за рижни, насампредз комунални роботи и потреби у валалє.
        Така пракса медзисобного комуникованя одвичательних у Месней заєднїци зоз гражданами постої уж даскельо роки, а найвецей предлоги за рижни роботи прейґ тей ладички, було на початку мандата терашанього секретара Месней заєднїци Йоакима Надя, пред коло 2,5 роками.
       Тиж так, каждого року Месна заєднїца орґанизує и збори гражданох початком рока, та так будзе и того, одлучене на остатнєй схадзки Совиту 21. януара, а точни датум отримованя тогорочного збору будзе утвердзени познєйше.
      У керестурскей Месней заєднїци оможлївени и сучасни способ комуникованя - прейґ интернету, так же веб-сайт МЗ – www.ruskikerestur.org каждодньово нащивени, а електронска интернет адреса МЗ глаши mesnark@beotel.net

Приоритени инвестицийни роботи
23. януар 2008. (Рутенпрес) - Приоритетни потреби Керестура у наиходзцим периодзе то санация водоводней мрежи и шмециска, та поставянє явного ошвиценя у главней улїци, констатоване на схадзки Совиту Месней заєднїци Руски Керестур.
    Єдна зоз значнєйших инвестицийних роботох будзе пририхтованє проєктох за пречисцовач води за пице, односно фабрику здравей води за пице. Тот проєкт найвироятнєйше войдзе и до Стратеґиї отримуюцого розвою кулскей општини, чий виробок у цеку.
        Проєктованє и поставянє канализациї зоз пречисцовачом, ґазификованє валала, асфалтованє улїцох и комуналне опреманє индустрийней зони тиж роботи котри треба поробиц у комуналней инфраструктури.
      Законченє школско-спортскей гали тиж будзе єдна з приоритетних роботох, алє и ушоренє просторох за бавенє дзецох, як и ушоренє базену и старого рибалова.
      За дзепоєдни роботи з того плану ше уж конкуровало, дзепоєдни роботи у цеку, алє, як гварене на схадзки Совиту, муши ше буц порихтани за можлївосц конкурованя за доставанє средствох.

Купованє машини за шнїг
23. януар 2008. (Рутенпрес) - На остатнєй схадзки Совиту Месней заєднїци, 21, януара, принєшена одлука о купованю єдней машини за чисценє шнїгу по дражкох.
Ширина залапйованя тей машини за шнїг 80 цм, а за потребни 250 000 динари за тоту намену, Месна заєднїца конкуровала до Покраїнского секретарияту за локалну самоуправу и медзиопштинске сотруднїцтво.

Вибрани виводзач роботох
23. януар 2008. (Рутенпрес) - Совит Месней заєднїци вибрал новосадске подприємство "Пан аква" за два роботи у валалє - за набавку єдней пумпи, як и за витворенє проєкта ушорйованя атмосферскей канализациї.
За обидва роботи достати средства зоз покраїнского секретарияту за польопривреду - за пумпу прейґ 1,2 и за атмосферску канализацию коло 2 милиони динари, а "Пан аква" вибрана пре найвигоднєйше понуканє на явней набавки.
Совит розпише и явну набавку за витворенє запланованого завераня шмециска, а вредносц тей роботи виноши коло милион и пол динари.

Приявиц до кулскей Ветеринарскей станїци
23. януар 2008. (Рутенпрес) - На вецей местох у валалє ознова ше зявело векше число псох-блукачох. З оглядом же за їх лапанє тераз задлужена Ветеринарска станїца у Кули, гражданє информацию о псох-блукачох можу приявиц до кулскей Ветеринарскей станїци, на телефон 722-354.

Винчованки з нагоди Националного швета Руснацох
22. януар 2008. (Рутенпрес) - Знагоди 17. януара, Националного швета Руснацох у Сербиї, до шедзиска Националного совиту Руснацох у Руским Керестуре, сцигли телеграми-винчованки од представительох державних, покраїнских, городских орґанох, як и од поєдинцох.
       Винчуюци швето, министер просвити у Влади Републики Сербиї др Зоран Лончар пожадал же свойо швето Руснаци "вихасновали за успишну промоцию ваших вредних резултатох на роботи заступаня националних интересох Руснацох у Републики Сербиї, вшелїяк и на полю култури и уметносци".
        - Барз зме пишни на факт же, ниа уж єден одредзени час, успишно сотрудзуєме и заєднїцки ше трудзиме очувац и унапредзиц творчосц рускей националней меншини у Сербиї. Вельо того зробене, алє ище и вельо роботи пред нами. Заш лєм, медзисобне сотруднїцтво и почитованє, значни предусловия за добри резултати” - стої у винчованки Ивани Стефанович, державней секретарки Министерства култури РС.
     Винчованку прейґ телеграми до Националного совиту послали и Милорад Дюрич, покраїнски секретар за информованє, та Предраґ Ґрґич, член Вивершней ради АП Войводини, задлужени за реґионалне и медзиреґионалне сотруднїцтво.
      - Примце мойо найсердечнєйши винчованки з нагоди велького швета рускей националней заєднїци, котре ше по першираз у историї урядово означує у Сербиї... Жадам шицким припаднїком рускей националней заєднїци же би предлужели з пестованьом традициї и обичайох свойого културного виразу и своєй вири, збогацуюци розкошну вецейзначносц културного милєа у котрим кажде з нас може лєгко препознац часточку себе, и прецо зме шицки пишнєйши, нє лєм на наш город, алє и на цалу жем" - стої у винчованки городоначалнїци Нового Саду Маї Ґойкович.
     У свойо и у мено Националного совиту бунєвацкей националней меншини, винчованку з нагоди швета послал и предсидатель Националного совиту Бунєвцох Никола Бабич.
        - Жадам вам повинчовац нашо швето и подзековац ше на велькей и нєочекованей чесце хтору сце ми нєшка указали. Пре нєочековани професийни обовязки, модлїм вас за порозуменє же сом нєшка вечар нє з вами. Гоч як ми прето жаль, з часци сом щешлїва же окончуєм ище єдно амбасадорске дїло за Руснацох и намагам ше же би то тому бул лєм початок” - гварела Даниєла Штайнфелд, ґлумица и добитнїца припознаня НС у обласци култури, у своєй телеграми.
      - З нагоди 17. януара, Националного швета Руснацох, жичим вам вельо успиху у будуцих роботох и активносцох на очуваню нашого руснацкого идентитету - пожадал Юлиян Рац (Мишков), дакедишнї Керестурец, тераз зоз Кичинеру у Канади.
      Тиж так, винчованку-телеграму НС послал и писатель Владимир Кочиш зоз Нового Саду, щиро винчуюци швето предсидательови, членом НС, а шицким учашнїком пожадал успишну програму 17. януара.

Тадичови найвецей гласи
22. януар 2008. (Рутенпрес) - Спрам нєурядових резултатох у Руским Керестуре гласали 2 512 вибераче з правом гласа, цо виноши 61,77 одсто виберанкового цела.
       Нєважаци лїсток бул 41, так же раховани 2 471 глас, а найвецей гласи у Руским Керестуре достал кандидат ДС Борис Тадич - 1 616, цо виноши 65,40 одсто од числа гласачох котри гласали.
       По числу гласох, на другим месце Чедомир Йованович (ЛДП) зоз 393 гласами, лєбо 15,90 одсто, а за нїм Томислав Николич (СРС) зоз 297 достатима гласами, односно 12,02 одсто. Милутин Мрконїч (СПС) у Керестуре достал 57 гласи - 2,31 одсто; Иштван Пастор (Мадярска коалиция) 39 гласи - 1,58 одсто; Миланка Карич (РМС) 26 гласи - 1,05 одсто; Велимир Илич (НС) 23 гласи - 0,93 одсто; Марян Ристичевич (НСС) 15 гласи - 0,61 одсто и Юґослав Добричанин (РС) 5 гласи, лєбо 0,20 одсто од числа гласачох котри гласали.
     Як и до тераз, Рускокерестурци гласали на штирох виберанкових местох - од числа 34 по 37 - у Ловарским доме, у Доме борцох и пензионерох, у Месней заєднїци и школским будунку Замок.
        У Ловарским доме гласали 672 од 1 037 уписаних на тим виберанковим месце (62,62 одсто); у Доме борцох и пензионерох 571 од 939 уписаних (60,80 одсто); у Месней заєднїци 656 од 1 037 (63,25 одсто) и у Замку 613 од 1 018 уписаних до виберанкового списку (60,21 одсто).
        Хори и нєрухоми особи могли гласац и у своїм обисцу, до 11 годзин, о чим ше старали виберанково одбори.
       Указало ше же Керестурци нє барз валушни коло точносци своїх податкох, понеже при велїх обачене нєскладанє зоз податками у особних карточкох и у виберанковим списку (матичне число, адреса), та прето нє могли гласац. Як и вше, мешац днї пред виберанками могло превериц точносц податкох у виберанковим списку у Месней канцелариї (при матичарови), алє ше пре тото нїхто нє явел, дознаваме у Месней канцелариї.
        Податки мож ускладзиц и тераз, медзитим, то нє значи же ше годно гласац у другим виберанковим кругу, понеже виберанково списки заключени. Но, насампредз пре наступни покраїнски и локални виберанки, треба мац увид до виберанкового списку, а ище баржей пре пошвидке уписованє за доставанє безплатних акцийох.

НАЦИОНАЛНЕ ШВЕТО РУСНАЦОХ
18. януар 2008. (Рутенпрес) – Зоз гимну Сербиї и хорским виводзеньом молитиви "Отче наш" котру виведол хор "Розанов" зоз Дюрдьова вчера вечар, 17. януара преславене першираз одкеди Руснаци на тих просторох, Националне швето нашей заєднїци.
    У Студию "М", дзе отримана Шветочна академия, присуствовали представителє скупштини Войводини, представителє других националних совитох у Сербиї, локалних самоуправох и почитовательох нашей заєднїци.
       Предсидатель Националного совиту рускей националней меншини Славко Орос привитал учашнїкох програми и госцох. Вон поздравел Руснацом у швеце котри мали нагоду прейґ интернету провадзиц цек Академиї.
      "Зоз задовольством, пиху и подзековносцу дзекуєме шицким котри нам помогли же би зме после вецей як 260 рокох, далєко од свойого родимого краю, же зме пришли ту, же зме ту и ту жадаме остац”, гварел Славко Орос.
      "И нєшка як и през прешли роки, сцеме и можеме щиро похопиц шицки други народи, шицких наших сушедох и приятельох, людяох зоз котрима жиєме, дзелїме заєднїцку долю и учиме єдни од других", наглашел Орос.
      Поздравяюци у мено Скупштини Войводини учашнїкох и госцох Шветочней академиї Борислав Новакович наглашел же Националне швето Руснацох подєднак припада рускей заєднїци, алє то и швето Войводини и Сербиї, бо историю того постору вєдно будовали шицки народи котри ту жию.
       После шветочней програми у Студию "М", означованє швета предлужене у холу Вивершней ради Войводини дзе поєдинцом котри у 2007. року найлєпше презентовали Руснацох у велїх сеґментох, уручени окремни припозная.
       Трогодзинова централна преслава 17. януара закончена зоз шпиваньом "На многая лїта" котру почал шпивац хор "Розанов", а спонтано ю прилапели коло тристо присутних у холу Вивершней ради Войводини.

Керестурци у доме култури
18. януар 2008. (Рутенпрес) – У Доме култури 17. януара означене швето Руснацох, а привитне слово мал Славко Орос, предсидатель Националного совиту. Святочносц почала зоз молитву "Оче наш" и "Богородице", котру з присутнима вимодлєл керестурски парох о. Юлиян Рац, а закончела ше зоз винчованками и закуску на хторей понукнути традицийни и смачни руски национални єдла. На будинок школи, Месней заєднїци и на Дом култури подзвигнути державна и руска застава.

Зоз Благородну службу почало означованє Националного швета Руснацох
17. януар 2008. (Рутенпрес) –Преслава Националного швета Руснацох - 17. януар, почала вчера вечар - зоз Благороднима службами у церквох нашого Апостолского еґзархату.
Благодарну Службу Божу у керестурскей Катедралней церкви св. о. Миколая – служел апостолски еґзарх кир Георгий Джуджар а после того отримани и Благодарни молебен.

На ютре шветочни приєм у Доме култури и кулским КУД
16. януар 2008. (Рутенпрес) - На ютре, 17. янауара, у Руским Керестуре будзе отримани пригодни шветочни приєм з нагоди 17. януара, Националного швета Руснацох.
     Шветочни приєм за представительох Општини Кула, керестурских орґанизацийох, установох, институцийох и здруженьох, Парохиї, представительох Месней заєднїци и привредних орґанизацийох, будзе отримани у Хорскей сали Дома култури, з початком на 11 годзин.
        Заплановане же на ютре, 17. януара, з нагоди означованя Националного швета Руснацох, на дзепоєдни валалски установи и орґанизациї, будзе виложена сербска и застава Руснацох у Сербиї.
       Домашнї шветочному приєму з нагоди Швета Руснацох - Национални совит рускей националней меншини, Дом култури Руски Керестур и Руски народни театер "Патро Ризнич Дядя". Подобни приєм за представительох општини и городу Кулу, истого дня, 17. януара, алє од 12 годзин, будзе орґанизовани у просторийох Подручней канцелариї Националного совиту, односно руского КУД "Др Гавриїл Костельник" у Кули.

Нєшка Благодарни богослуженя
16. януар 2007. (Рутенпрес) – Нєшка, 16. януара, у Руским Керестуре почнє перше означованє Националного швета Руснацох у Сербиї - 17. януар. Означованє Националного швета Руснацох у Сербиї почнє зоз Благодарну Службу Божу у керестурскей Катедралней церкви св. о. Миколая - за шицки прешли, терашнї и будуци ґенерациї Руснацох на тих просторох. Благодарна Служба Божа будзе отримана од 17 годзин, а после Служби будзе отримани и Благодарни молебен.

Сезону балованя отворели паприґаре
16. ЯНУАР 2008. (Рутенпрес) - Тогорочна жимска традицийна сезона балованя у Руским Керестуре отворена зоз "наймладшим" - трецим "Паприґарским" балом, всоботу, 12. януара, у Ресторану "Русалка".
"Паприґарски бал” характеризовали нови и ориґинални забавни бависка як и свойофайтови маскенбал, понеже нащивительох на столє чекали паперово маски, од котрих велї асоцирали на паприґи. Першому балу у тей сезони присуствовали 214 домашнї и їх госци, а забавял их "Михал шоу бенд". На балу подзелєни вредни и красни награди, та перша награда була викенд одпочивок за два особи у готелу "Термал" у Врднику, потим телевизор, електрична косачка за траву, аж и мерач влаги у жеми - "ирометер".
На соботу, 19. януара, у Ресторану "Руслка" будзе отримани найстарши - "Майсторки бал".

Пририхтованє представи у ДС "АРТ"
15. януар 2008. (Рутенпрес) - У Драмскиим студию "АРТ" рускокерестурского Дома култури, почало пририхтованє новей представи за тогорочну театралну сезону.
Як свой пияти театрални проєкт од кеди є формовани, Драмски студио “АРТ” пририхтує єднодїйку Юрия Авґустина Шереґия “Гладни”. Представу режира Владимир Надь Ачим, сценоґрафию пририхтує Биляна Роман, а у представи ґлумя коло 20 млади ґлумци, векшином без искуства на театралней сцени.
Премиєру представи "Гладни" Драмского студия "АРТ" мож очековац коло 8. марца, а керестурски Дом култури з ню будзе участвовац и на тогорочней Општинскей смотри драмских аматерох кулскей општини.

Контракт о поставяню закрица
15. януар 2008. (Рутенпрес) - Зоз подписованьом контракта, медзи финансиєром, инвеститором и виводзачом роботох, оможлївене предлужованє роботох на вибудови школскей гали у Руским Керестуре.
       Контракт о дальших роботох 10. януара, подписани медзи Покраїнским инвестицийним фондом, як финансиєром проєкта, инвеститором - керестурску Месну заєднїцу, односно Општину Кула и виводзачом роботох - подприємством "Слован" зоз Селенчи. "Слован” зоз Селенчи вибрани на тендеру, котри за тоту намену розписал Покраїнски инвестицийни фонд.
      Терашнї роботи на вибудови керестурскей гали буду предлужени з єй закриваньом, а вредносц тей роботи виноши коло 30 милиони динари. Здогаднїме - прешлого року у Покраїнским инвестицийним фонду за роботи на керестурскей гали одобрени 36 милиони динари, так же, попри закрица, буду поробени и додатни роботи, у вредносци 6 милиони динари.
       Як Рутенпрес дознава у керестурскей Месней заєднїци, после подписованя контракта шлїдза документацийно-пририхтуюци роботи, же би кладзенє закрица на галу почало цо скорей.

Велька потримовка польопривредним
продуковательом
14. януар 2008. (Рутенпрес) - Министерство польопривреди того року обезпечи и наменски средства за обнавянє статкарскей продукциї - гварел министер Слободан Милосавлєвич на трибини хтора отримана соботу 12. януара у Руским Керестуре.
        - Новини хтори зме предвидзели у плану за тот рок одноша ше на обезпечованє субвенциї за квалитетни крави у виносу од 70 евра по гарлу, за буячки 90, а за крави першоцельнїци 150 евра зоз чим жадаме обновниц статкарску продукцию, гварел министер Милосавлєвич.
        Вон гварел же шицки нєвимирени обовязки ґу парастом зоз прешлого року буду вимирени по конєц януара того року, у наступних дзешец дньох будзе виплацена треца рата длуства польопрувредним пензионером, после чого уж од фебруара почнє реализованє средствох зоз аграрного буджету за тот рок хтори виноши 17,3 милиярди динари. Указуюци на новини у кредитней политики министер Милосавлєвич гварел же убудуце парасти под окреме вигоднима условиями годни достац и длугорочни и краткорочни кредит у своєй дїловней банки вше кед им затреба, а нє кед то препише Министерство.
        - Зоз Народну банку Сербиї и зоз дїловнима банками зме ше догварели же убудуце польопривредним продуковательом понукнєме нєогранїчени кредитни средства зоз каматну стопу од 5-6 одсто за крадкорочни, односно 3 одсто за длугорочни кредити.. Обчекуєм же у тим року таки кредити хтори найвигоднєйши, годни вихасновац коло 100.000 реґистровани польопривредни ґаздовства - гварел Милосавлєвич.
      У тим року Министерство польопривреди видвоєло и средства за стимулацию здружованя у польопривреди пре витворйованє нїзших ценох минералниг гнойох, горива, нашеня и заєднїцкого наступу на тарґовищу за цо предвидзени окремни средства до 5 милиони динари.
      - Того року Министерство польопривреди место 30 обезпечи 40 одсто безповратни средства за осиґуранє шацох и животиньох, а окремна увага будзе дата и на обезпечованю средствох за правенє системох за залїванє. Шицко тото цо потреба єдного польопривредного ґаздовства за розвой базней польопривредней продукциї у тим року будзе субвенционоване - гварел министер польопривреди Слободан Милосавлєвич на трибини у Руским Керестуре.

За петнац виберачох менєй
11. януар 2008. (Рутенпрес) - До виберанкового списку у Руским Керестуре уписани 4 065 вибераче з правом гласа, цо за петнац виберачох менєй, у одношеню на остатнї вибернакови список початком априла прешлого року.
Виберанки за предсидателя Републики Сербиї 20. януара, у Руским Керестуре, як и до тераз, буду отримани на штирох виберанкових местох - у просторийох Месней заєднїци, школским будинку Замок, Доме пензионерох и Ловарским Доме.

Почина сезона балованя
11. януар 2008. (Ритенпрес) - Тогорочна жимска сезона балованя у Руским Керестуре почина тей соботи, алє найвироятнєйше будзе кратка, понеже уж 4. фебруара, у Руским Керестуре почина Вельконоцни пост.
      Сезону балованя започнє Здруженє паприґарох Руского Керестура, 12. януара, зоз своїм "Паприґарским балом", другим од кеди формоване Здруженє.
      Идуцого тижня, 19. януара, у Руским Керестуре будзе отримани традицийни Майсторки бал, у орґанизациї Здруженя ремеселнїкох и приватних привреднїкох Руского Керестура.
        Початком фебруара - 1. и 2., у Керестуре буду отримани два бали - 1. фебруара бал орґанизує Еколоґийни рух "Желєни персценє" и його Секция "Квецова заградка", а 2. фебруара будзе отримани Месарски бал.
      Шицки спомнути бали буду отримани у Ресторану "Русалка". Очекує ше же свойо бали зорґанизую и СД "Русин" и ОШиҐ "Петро Кузмяк" зоз своїма Прадками.

Нащива Слободана Милосавлєвича
11. януар 2008. (Рутенпрес) - Слободан Милосавлєвич, министер польопривреди у Влади Републики Сербиї, на ютре, соботу 12. януара, нащиви Руски Керестур.
Слободан Милосавлєвич у Доме ремеселнїкох и приватних привреднїкох Руского Керестура на ютре, 12. януара, будзе бешедовац о планох Министерства польопривреди у 2008. року, з наглашеньом на субвенциї польопривреднїком у тим року.
Стретнуце з министром Милосавлєвичом, ютре, 12. януара, започнє на 14,30 годзин у Доме ремесленїкох.

Др Дюра Мученски: Нє постої дзека у Комбинату за ришенє простору за индустрийну зону
10. януар 2008. (Рутенпрес) - "З боку власнїкох АБЦ нє постої дзека же би уступели жем за индустрийну зону" – виявел др. Дюра Мученски, народни посланїк на Скупштини ремесельнїкох и приватних привреднїкох прешлей нєдзелї у Руским Керестуре.
        Вон гварел же ше после двох рокох интензивних контактох зоз руководством та и власнїками Комбината прешвечел же вони по тераз нє випочитовали анї єдну догварку та нє вери же випочитую и остатню.По його словох ришенє простору за индустрийну зону Руски Керестур треба глєдац на другей локациї.
      Мария Штайнфелд, директорка Акционерского дружтва "АБЦ пожива" на шеветочней преширеней схадзки Совиту Месней заєднїци отриманей концом децембра виявела же Комбинат випочитовал шицки по тераз посцигнути догварки, алє же би тото исте требал випочитовац и Совит Месней заєднїци.
       Михайло Тиркайла, предсидатель Совиту Месней заєднїци гвари же шицки пригварки руководства Комбината на предлог предконтракту о купованю 10 гектарох жеми за индустрийну зону хтори ше ма подписац буду випочитовани.
      "Наздавам ше же текст предконтракту на чиїм виробку анґажовани правнїки и општински правобранитель будзе закончени по конєц того мешаца зоз чим буду витворени условия за його подписованє. Од того чи руководство Комбината потпише таки предконтракт чи нє будзе ясне же чи єст дзеки за ришованє проблему – гвари Тиркайла.
       Най здогаднєме, Др. Дюра Мученски бул задлужени збоку Совиту Месней заєднїци у Руским Керестуре за водзенє догваркох о купованю 20 гектарох жеми за потреби будуцей индустрийней зони.
      Понеже анї после двох рокох догварка нє посцигнута Вивершни одбор Совиту керестурскей Месней заєднїци за дальши догварки задлужел Михайла Тиркайлу и Славка Раца хтори начално догварели купованє 10 гектарох жеми за потреби формованя индустрийней зони понеже руководство Комбината вимагало же би други 10 гектари остали Комбинату за власни розвой.
      Зоз месного самодоприносу прешлого року керестурска Месна заєднїца обезпечела понад 4 милиони динари за купованє 10 гектарох жеми по цени од 5.200 еври за гектар.

Будзе ше вимагац зменшанє таксох
8. януар 2008. (Рутенпрес) - Здруженє ремесельнїкох и приватних привреднїкох у Руским Керестуре од Скупштини општини Кула будзе вимагац зменшнє комуналних таксох, догварене на рочней Скупштини ремесельнїкох и приватних привреднїкох у Руским Керестуре.
      На Скупштини гварене же условия привредзованя у прешлим року були очежани.Велї керестурски поднїмателє, окреме тапетаре, мушели зменшац продукцию цо ше одражело и на слабенє єкономскей моци Руского Керестура.
     "Од вельких предвиберанкових обецункох початком прешлого року нє витворене скоро нїч. Же би зме врацели власни будинок мушели зме анґажовац адвоката и прейґ суду витвориц тото право – гварел Дюра Надь, предсидатель керестурского Здруженя ремесельнїкох и приватних привреднїкох.
       Вон поинформовал присутних же би Майсторски дом требал буц пренєшени на Здруженє по марец того року, алє же тоти роботи вимагаю вельки материялни трошки та предложел же би шицки члени здруженя за тот рок на мено членарини уплацели по 500 динари.
     На Скупштини ремесельнїкох и приватних привреднїкох найвецей слова було о висельованю младих людзох до Канади хторе ше, як гварене муши застановиц.
       Же би ше то зробело нєобходне меняц державну политику у цилю твореня лєпших условийох за дїлованє поднїмательох хтори, як гварене, творя основу економского розвою.
     "Нє можеме ше помириц же у Керестуре ище вше нє направена индустрийна зона о хторей ше бешедує роками. Людзе одходза зоз валалу бо нє маю роботу и Совит Месней заєднїци муши того року поробиц дацо же би ше конєчно направело индуструйну зону– гварел Надь.
       Дюра Мученски, народни посланїк на скупштини указал на значносц здружованя приватнїкох пре лєгчейше витворйованє кредитох и других материялних средствох хтори держава видвоює за розвой поднїмательтва. Мученски виражел подозривосц же ше, без огляду на обецунки, посцигнє догварка зоз власнїками Комбината, понеже, як гварел, вони нє сцу тоту жем уступиц за индустрийну зону.
       "Од индустрийней зони нє треба одступиц, на тим або на другим месце, алє формованє индустрийней зони длукши процес, а тото на чим треба и мож такой робиц то творенє условийох за роботу у постояцих капацитетох у валалє" - гварел Мученски.

ПК "Перши май" пременєл мено
7. януар 2008. (Рутенпрес) - Од 1. януара 2008. року, керестурски Польопривредни комбинат "Перши май" ше вола "АБЦ фуд” А.Д., одлучене на Позарядовей скупштини акционерох Комбината.
         - З оглядом же вивожиме вецей як дзеведзешат одсто наших продуктох, завжали зме становиско ше бизме ше тому прилагодзели и прейґ мена нашей фирми - гварела директорка Комбината Мария Штайнфелдова.
        После приношеня одлуки о пременки назви, у цеку вименка шицких потребних актох, лоґа подприємства, веб-сайта, редизайнованє амбалажи, як и други потребни роботи у складзе зоз тоту пременку, же би ше од початку идуцого рока, Комбинат вшадзи зявйовал и презентовал як "АБЦ фуд" АД.
        Як Рутенпрес дознава од директорки Штайнфелдовей, пременка назви нє значи и пременку у структури роботи и нукашнєй орґанизациї дотерашнього ПК "Перши май".

Пририхтованє за швето Руснацох
5. януар 2008. (Рутенпрес) - У Националним совиту Руснацох у цеку орґанизацийни за означованє швета Руснацох у Сербиї - 17. януара, котре першираз наша заєднїца означи од кеди жиє на тим просторе.
       Швето Руснацох у Сербиї того року будзе орґанизоване и означене по першираз од кеди Руснаци жию на тих просторох, а 17. януар у историї остал зазначени як дзень кеди коморски власци тедишнєй Габзбуршкей монархиї подписали контракт о насельованю и формованю першого руского населєня на тедишнєй пустари Вельки Керестур.
       Подписованє того контракта 17. януара 1751. року значело урядови початок наставаня нєшкайшого Руского Керестура, найстаршого, найвекшого и найпознатшого места Руснацох у Войводини и Сербиї, гоч єден попис жительства зоз 1746. року шведочи о пребуваню векшого числа перших руских фамелийох нєдалєко од Керестура.
       Националне швето Русанцох 17. януара будзе означене зоз пригоднима змистами по Подружнїцох националного совиту у местох дзе жию Руснаци, у школох дзе ше порядно, лєбо факултативно виучує руски язик и у парохийох, односно церквох Апостолского еґзархату за грекокатолїкох у Сербиї.
       Централна шветочна академия, зоз присуством визначних госцох, будзе отримана 17. януара у Новим Садзе, у Студию "М" РТВ Нови Сад, зоз початком на 18 годзин.

предлужиц инциятиву же би Керестур бул општина
5. януар 2008. (Рутенпрес) - На остатнєй схадзки Совиту Месней заєднїци, Юлиян Колошняї Ристо, член Совиту и предсидатель Комисиї за запровадзованє тей инициятиви ознова наглашел потребу предлужованя актвивносцох на реализованю тей задумки.
       Як на тей схадзки 28. децембра гварел Колошняї, у 2007. року виробени окремни позитивни Елаборат о оправданосци же би Руски Керестур бул општинске место, о тим питаню бешедоване и з министром за державну управу и локалну самоуправу Миланом Марковичом, а принєшени и нови Закон о териториялней орґанизациї Сербиї.
       Предлужованє активносцох на тим планє потребне и пре законски одредби дзе општина, а нє месна заєднїца, найменша єдинка локалней самоуправи, а и месни самодопринос ма прейсц под инґеренцию општинох, гварел Колошняї.
        Як наглашел, перпши крочай у тим напряме би мало буц орґанизованє референдума Керестурцох о опредзелєню же би Руски Керестур бул општинске место.

Заєднїцки у центре валала
5. януар 2008. (Рутенпрес) - И попри тим же 31. януара вноци, на сам дочек Нового року у центре Руского Керестура штреляни числени петарди и други пиротехнїчни средства, тота “найшалєнша” ноц у Керестуре прешла без покалїченьох и у порядку на шицких местох дзе дочек бул орґанизовани.
       После того як 30. децембра у центре валала заєднїцки дочекали Дїда Мраза, котри того року подзелєл коло 300 пакецики, Рускокерестурци и того року мали нагоду Нови рок дочекац вєдно - у центре Руского Керестура.
       Остатнї швета у Руским Керестуре - Крачун и Нови рок були прави жимски,"били", понеже за обидва нападало надосц шнїгу, цо тиж допринєсло окремней шветочней атмосфери, алє вироятно пре шнїг, у центре Керестура остатнього дня 2007. року було менєй людзох як скорейших рокох.
      Точно на пол ноци, Керестурцом нови 2008. рок повинчовал Михайло Тиркайла, предсидатель Вивершного одбору Совиту Месней заєднїци, а потим пущани огньомет, провадзени з дзвонами з керестурскей Катедралней церкви.
        У Руским Керестуре дочек Нового року бул орґанизовани у Ресторану "Русалка", Ресторану "Лонґов", Дискотеки "Амадеус" (Дом младежи), як и у "НС плус"-у.
      На шицких местох було надосц госцох, а окреме бул нащивени "НС плус", дзе дочек Нового року орґанизовала младеж Руского Керестура.
       И ютредзень, 1. януара, спомнути обєкти орґанизовали такв. "бичак", котри тиж бул добре нащивени.

Почина пошвецанє обисцох
5. януара 2008. (Рутенпрес) - На пондзелок, 7. януара, у Руским Керестуре ше започнє зоз традицийним каждорочним пошвецаньом валалских обисцох. Того року буду пошвецени обисца у часци Керестура спрам Косанчичу, а обисца буду пошвецац шицки штирме священїки рускокерестурскей Парохиї.

Чисценє од шнїгу
5. януар 2008. (Рутенпрес) - Главна, маґистрална драга Кула - Оджак, котра преходзи през Руски Керестур, порядно преходна и очисцена од шнїгу.
По улїцох Руского Керестура пре шнїг, транспорт за моторни превозки очежани, а окремни камион за роздрильованє шнїгу Месней заєднїци и ДОД, шнїг роздрильовал такой 1. януара, як и после шветох, кельо то було можлїве, з оглядом же превозка стара и дотривала.
Як Рутенпрес дознава од секретара МЗ Йоакима Надя, кед нє будзе векши паданя, идуцого тижня би мало буц предлуженє вивоженє шмеца.

Уж 174. скупштина Здруженя
4. януар 2008. (Рутенпрес) - На нєдзелю, 6. януара, у Руским Керестуре будзе отримана порядна, Рочна скупштина здруженя ремеселнїкох и приватних привреднїкох Руского Керестура.
Будзе то уж 174. порядна рочна скупштина того Здруженя, а початок Скупштини заплановани на 15 годзин у Майсторским доме. Як наявене, на Скупштини здруженя ремеселнїкох и приватних привреднїкох будзе бешеди о преношеню власносци над Майстроским домом, як и о нових привредних обставинох, котри накладаю и потребу за орґанизованє привреднїкох у наступним периодзе.