Руски Керестур

Архива висткох - фебруар 2008.

Програмна потребох у инфраструктури
29. фебруар 2008. (Рутенпрес) - Совит Месней заєднїци Руски Керестур початком тижня прилапел єден ширши план потребох валал у обласци инфраструктури, спрам котрого би ше мало ровнац и вецейрочне планованє власних, та средства зоз других жридлох.
      У обласци ґазификованая наглашене же виробок проєкта ґазификованя Руского Керестура при концу, а витворенє ґазификованя условене зоз поставяньом ґазоводу високого прициску на траси Кула-Оджак.
       Пре звекшани арсен у води за пице, ушлїдзи виробок идейного проєкту за пречисцовач води капацитету 20 кубики води на годзину, же би ше вец виробело пречисцовач за цали валал.
        У обласци подмирйованя зоз воду, попри терашнїх штирох, потребне вибиц ище єдну студню, за цо уж у закончуюцей фази доставанє будовательней дозволи.
       Зоз Фонду за капитални укладаня Войводини, Месней заєднїци одобрени 9 милиони динари за студнї на водоводу, а за автоматизованє роботи водоводу уж виробени проєкт. Доставанє будовательней дозволи за санированє водоводней мрежи уж у поступку, а потребни средства глєдани од Фонду за капитални укладаня Войводини.

Розписани Конкурс за "Червену ружу"
29. фебруар 2008. (Рутенпрес) - Управни одбор Дома култури Руски Керестур 27. фебруара принєсол одлуку о розписованю Конкурса за нови руски шпиванки, за тогорочни фестивал култури "Червена ружа".
       На Конкурс мож послац шпиванки у народним духу и шпиванки за дзеци, а право участвованя на Конкурсу маю шицки заинтересовани.
      Ораґанизатор Фестивала онезпечи пенєжни награди композитором, писательом текстох и интерпретатором за композициї у народним духу, хтори завежню перши три места. У конкуренциї дзецинских шпиванкох, Орґанизатор обезпечи пенєжни награди за перши три композициї; єдну награду за найлєпши текст и єдну за найлєпшого интерпретатора.
       Окремна комисия, котру менує Орґанизатор, затримує право вибрац композициї котри буду виведзени на Фестивалє.
        Роботи на Конкурс треба посилац найпознєйше по 15. май 2007. року, на адресу: Дом култури, з наглашеньом "За Конкурс", 25233 Руски Керестур.

Драмски мемориял у априлу
28. фебруар 2008. (Рутенпрес) – Штерацети Драмски мемориял Петра Ризнича Дядї, того року будзе отримани од 11. по 20. април, предложене на прешлотижньовей схадзки Одбора за културу Националного совиту Руснацох.
     Як и по тераз, орґанизатор тей смотри театралней творчосци Руснацох у Сербиї будзе керестурски Дом култури. Спрам потерашнїх информацийох, на тогорочним Мемориялє буду виведзени єденац театрални витвореня - седем за старших и штири за дзеци.
     Спрам потерашнїх спознаньох, представи по наших местох ше рихта у Коцуре -два, спомедзи хторих єдна младежска; у Вербаше, у Руским Керестуре прешлеого викенду уж виведзена премиєра, зоз двома представами будз участвовац РНТ "Петро Ризнич Дядя", а заплановане и госцованє єдней сербскей професийней представи.
       Дзецински представи у пририхтованю у Руским Керестуре, Суботици и два у Вербаше, а вироятно под час Меморияла буду виведзени и дзепоєдни монодрами з прешлорочного Фестивала монодрами у Новим Садзе.

Школска смотра рецитаторох
28. фебруар 2008. (Рутенпрес) - У школским будинку Замок, нєшка, 28. фебруара, будзе отримана Школска смотра рецитаторох за младши возрост, односно школярох од першей по штварту класу.
Школярох за Школску смотру пририхтали учительки керестурскей ОШ "Петро Кузмяк", а зоз Школскей, змагателє буду вибрани за змаганє за Месни смотри рецитаторох. Школска смотра нєшка почина 17,30 годзин (у Замку), а Месна смотра рецитаторох Руского Керестура будзе отримана 5. марца.

Управни одбор Дома култури
28. фебруар 2008. (Рутенпрес) - Вчера, 27. фебруара, отримана схадзка Управного одбору керестурского Дома култури, на котрей длужносц предсидателя Управного одбору превжал Юлиян Колошняї Ристо, як и член УО Сашо Палєнкаш.
      До пременки у Управним одборе керестурского Дома култури пришло на основи нєдавного менованя предсидателя и члена УО на схадзки Дочасового орґана Општини Кула.
        Пре законске огранїченє вецей функцийой у орґанох котри менує Општина, потерашня предсидателька УО Ирина Олєяр розришена тей длужносци, а Дочасови орґан за предсидателя УО меновал Юлияна Колошняя.
       На вчерайшей схадзки УО прилапени финансийни звит Дома култури у прешлим року, а принєшена и одлука о розписованю конкурсох за нови дзецински и шпиванки у народним духу, за тогорочни Фестивал култури "Червена ружа".

Прилапени финансийни звит
27. фебруар 2008. (Рутенпрес) - Месна заєднїца Руски Керестур у прешлим року розполагала зоз скоро 24 милиони 300 000 динари, з чого до того року буду пренєшени скоро 7,8 милиони динари, гварене на схадзки Совиту Месней заєднїци, дзе прилапени звит о приходох и розходох за 2007. рок.
      Окреме наглашене же на основи конкурованя, Месна заєднїца зоз покраїнских секретариятох, односно буджету Скупштини Войводини достала нє цали 5 милиони динари, за кельо бул векши и прилїв у одношеню на плановане витворенє средствох за 2007. рок. Власни приходи прешлого року витворени зоз прейґ 5,5 милиони динари, зоз комуналних општинских жридлох прейґ 4,7 милиони, а з буджету кулскей општини дацо вецей як 500 000 динари.
        Прилїв до месного самодоприносу бул плановани на седем, а витворене 8 милиони 60 000 динари. Кед слово о приходох од комуналних услугох, на пондзелковей схадзки Совиту винєшене же наплацованє води звекшане у одношеню на 2006. рок, понеже процент наплати води прешлого року виношел прейґ 70 одсто, а предпрешлого року то було 66 одсто.
       Месна заєднїца, зоз самодоприносу, и прешлого року мала окремни средства за дотациї дружтвеним, нєвладовим орґанизацийом и за рижни манифестациї, за цо шицки хаснователє достали милион 160 000 динари.
      Совит Месней заєднї ци прилапел и план потребох Керестура у обласци инфраструктури, а догварене же би на яр того року бул означени Дзень планети жеми зоз єдну ширшу акцию на добродзечним пораєню валала.
       Пошвидко будзе зашедац и Комисия за воду при Месней заєднїци, же би розпатрела можлївосци за виробок проєктней документациї за фабрику води.

ПредсидатЕль Дружтва Ромох Драґан Новакович
26. фебруар 2008. (Рутенпрес) - Внєдзелю, 24. фебруара, Дружтво Ромох "Лоли лулудї" ("Червена ружа") зоз Руского Керестура, на своєй Позарядовей скупштини прилапело финансийни звит за прешли период, а вибрани и нови Управни и Надпатраюци одбор.
      Пре одредзени нєпорозуменя на порядней Скупштини, отриманей 9. фебруара, финансийни звит за период од 2004. по 2007. рок нє бул прилапени понеже дзепоєдни члени Дружтва обвинєли предсидателя Здруженя Драґана Новаковича и предсидателя Надпатраюцого одбору Данила Новаковича, же злохасновали социялну помоц у огриви, а, як ше указало - обвиньованя були фалшиви.
     Пре спомнути проблеми и обвини дзепоєдних членох руководства, на Позарядовей скупштини вибрани нови Управни и Надпатраюци одбор. За предсидателя нового Управного одбору Здруженя "Лоли лулудї" ознова вибрани Драґан Новакович, Йовица Ґецан за подпредсидателя, Марияна Малацко за секретара, Йоаким Надь за касира, а за членох Катарина Ґецан, Мирослав Новакович, Драґомир Стоянович, Соня Новакович и Иван Новакович.
      Хвильково, Здруженє Ромох "Лоли лулидї" ма 58 членох, отворене є и за нових, а после виполньованя приступнїци, Скупштина Здруженя будзе одобрйовац приступанє до членства. Як госц, Позарядовей скупштини Здруженя Ромох Руского Керестура "Лоли лулидї" присуствовал и Дюра Папуґа, предсидатель Рускей матки.

Нєшка премиєра
23. фебруар 2008. (Рутенпрес) - Нєшка, 23. фебруара, у Руским Керестуре у Велькей сали Дома култури, премиєрно будзе виведзена представа “Гладни” по тексту Юрия А. Шереґия, у режиї Владимира Надя Ачима.
Представу зоз младима аматерами пририхтал Драмски студио "АРТ" керестурского Дома култури, а початок на 20 годзин.

Янко Мудри будзе танцовац зоз Роману
23. фебруар 2008. (Рутенпрес) - Танєчна партнерка Янкови Мудрийови зоз Руского Керестура, учашнїкови нового сериялу емисиї “З танцом ґу сном” на ТВ Пинк, будзе позната шпивачка Романа дознава Рутенпрес.
       Вчера, 22. фебруара, Янко Мудри ше и урядово упознал зоз Роману, як свою будуцу танєчну партнерку, а од пондзелку, 25. фебруара, започинаю и каждодньово проби за танцованє и змаганє у емисиї "З танцом ґу сном".
       Здогаднїме, Керестурец Янко Мудри у сериялу емисийох на ТВ Пинк "З танцом ґу сном" танцує за технїчне опреманє керестурского Дома култури.
       У центре Руского Керестуре уж длугши час поставени и єден окремни билборд з Янкову подобу, як наява його будуцей учасци на ТВ Пинк, а правенє билборду финансовали Дом култури и керестурски привреднїк Звонимир Хома.
       Ище нє познати датум початку нового сериялу "З танцом ґу сном", а заплановане же док почнє, Керестурци и у центре валала, прейґ видео-биму, годни провадзиц Янково танцованє з Роману, а спонзор того подцагу тиж спомнути Звонимир Хома.

Ютре Скупштина Здруженя Ромох
23. фебруар 2008. (Рутенпрес) - На нєдзелю, 24. фебруара, у Руским Керестуре будзе отримана Позарядова скупштина Здруженя гражданох ромскей националносци "Лоли лулидї".
Попри финансийного звиту, заплановане же Скупштина на нєдзелю вибере нови Управни и Надпатраюци одбор Здруженя, а члени буду упознати з дотерашнїма и будуцима активносцами, як и можлївосцу учланьованя до Здруженя Ромох "Лоли лулидї".

НОВИ САД - "РУЖОВА ЗАГРАДКА"
21. фебруар 2008. (Рутенпрес) - Тогорочни 18. Фестивал новей рускей народней шпиванки "Ружова заградка" будзе отримани на нєдзелю, 2. марца, з початком на 20 годзин у Студию "М".
       На конкурс Фестивала сцигли 20 нови композициї од котрих фахови жири вибрал 14, котри буду виведзени на Фестивалє. Шпивачох будзе провадзиц Вельки тамбурови оркестер зоз допольнєньом смикових и дуйних инструментох.
       Як нам гварела Златица Няради, одвичательна редакторка Рускей редакциї РНС, композициї будзе оценьовац пейцчлени фахови жири, а новосц того року у тим же пияти член жирия буду того року нашо у Канади.
     Фестивал ше будзе директно преношиц прейґ радия телевизиї и прейґ интернета, а слухаче годни гласац прейґ телефонох и прейґ мейла, а адреса rusinska.radio@rtv.co.yu
     За тогорочни Фестивал пририхтана и вистава нашого подобового уметнїка Александра М. Лукича зоз Суботици, котра будзе отворена у горнїм голу Студия "М" – гварела нам Златица Няради.
        У ревиялней часци будзе промовована кнїжка 17. "Ружово заградки" хтора вишла з помоцу РТВ, Националного совиту и НВУ "Руске слово", а автор кнїжки Андреи Даждиу.

Змаганя фодбалерох и рукометашкох
19. фебруар 2008. (Рутенпрес) - Фодбалере рускокерестурского Русина внєдзелю, 17. фебруара, на своїм терену, у приятельским змаганю зоз сивецким Полетом, котри ше змага у висшим ранґу, одбавели нєришено 1:1, а ґол за Русин посцигнул Денис Югик.
У тижню за нами активна була и пионирска екипа рукометашкох Русина, котри бавели на турниру шейсцох екипох и завжали треце место. Турнир бул орґанизовани у Зомборе, Баймоку и Червинки, дзе пионирки Русина три змаганя победзели, а два страцели.

НОВИ CHAT

15. фебруар 2008. - Пре вельку заинтересованосц за chat и пре конєц роботи прешлого chat-у найдзени и инсталирани подобни chat у flash-у и порихтани є за роботу. Хвильково нєшка ше будзе ище тестирац и буду ше вершиц дробни вименки алє можеце почац ше приявйовац за нови chat. Чом прийавльованє? Понеже ше случовало же було вецей особи под истим назвиском (nickom) то у новим chat-у нє будзе виводлїве алє кажде будзе мац свойо назвиско и шифру як на форуму. Так же би сом вас замодлєл же би сце посилали на мою е-маил адресу (provcibo@ptt.yu) податки под котрима сцеце ше зявйовац на chat-у, а я у цо кратшим року вас реґиструєм.

Формовани Месни одбор НС
15. фебруар 2008. (Рутенпрес) - Концом прешлого мешаца, у Руским Керестуре формовани Месни одбор странки Нова Сербия Велимира Илича. До Месного одбору НС вибрани пецеро од коло двацец членох, кельо тота странка ма у Руским Керестуре, а за предсидателя Месного одбору вибрани Янко Николич Йоне.
За членох Месного одбору Новей Сербиї Руски Керестур вибрани Яким Чапко, Татяна Николич, Весна Надь и Юлин Будински.

Месни смотри рецитованя початком марца
15. фебруар 2008. (Рутенпрес) - Спрам Календара културних манифестацийох у кулскей општини, месни смотри рецитаторох того року буду отримани од 3. по 7. марец, прилапене вчера, 14. фебруара, на Комисиї за рецитованє Културно-просвитней заєднїци Општини Кула.
Месна смотра рецитаторох Руского Керестура будзе отримана 5. марца, а скорей месних смотрох, и у Руским Керестуре би мало буц отримане школске змаганє рецитаторох. Селкторка шицких месних смотрох у местох кулскей општини будзе Слободанка Настасич, професорка литератури у керестурскей Ґимназиї "Петро Кузмяк" а консултанти за руски, мадярски и українски язик будзе Владимир Бесерминї, а за мадярски язик Каролина Гудїк. З оглядом же дотерашнї предсидатель Комисиї за рецитованє Боґдан Бракус, умар прешлого року, по Виборну скупштини Културно-просвитней заєднїци, на яр, тоту длужносц будзе окончовац Михайло Зазуляк зоз Руского Керестура.

Пошвидко поставянє закрица
12. фебруар 2008. (Рутенпрес) - З оглядом же концом прешлого тижня виводзачови роботох уплацени аванс, виглядне же барз пошвидко будзе предлужене будованє школско-спортскей гали у Руским Керестуре. Од того року, виводзач дальших роботох на гали, насампредз на поставяню закрица, будзе Подприємство "Слован проґрес" зоз Селенчи.
Зоз Покраїнского фонду за капитални укладаня, концом прешлого рока за дальши роботи на вибудови керестурскей школско-спортскей гали одобрени 36 милиони динари, а за 30 милиони, Фонд подписал контракт зоз виводзачом роботох.
Окончена и ревизия ценох будованя, понеже постояци цени утвердзени ище пред пейцома роками, док шицка друга потребна документация за предлуженє роботох обезпечена.

Купена машина за шнїг
12. фебруар 2008. (Рутенпрес) - Пошвидко до Руского Керестура сцигнє єдна менша машина за чисценє шнїгу по дражкох и на менших поверхносцох.
Месна заєднїца Руски Керестур, на основи конкурса, од Покраїнского секретарията за локалну самоуправу и медзиопштинске сотруднїцтво, достала глєдани 250 000 динари за тоту намену.
Пенєж за машину за роздрильованє шнїгу уж уплацени новосадскому ИМВ "Стил", а ширина залапйованя машини за шнїг виноши 80 центиметри.

Отримана Рочна конференция
12. фебруар 2008. (Рутенпрес) - Внєдзелю, 10. фебруара, у Руским Керестуре отримана Рочна конференция Здруженя пензионерох Руского Керестура, котра була и виборна, понеже вибрани нови петнацчленови Вивершни одбор Здруженя.
      За предсидателя Здруженя керестурских пензионерох ознова вибрани Яким Еделински, а повторени и ревибор Яна Яворника за секретара и Якима Раца за касира Здруженя.
       Здруженє пензионерох Руского Керестура тераз ма прейґ 400 активних членох, а як гаврене на Конференциї - план роботи сполнєти у подполносци, док єден з основних задаткох и у тим року будзе робота на уключованю цо векшого числа пензионерох до Здруженя.
        Здруженє пензионерох своїм членом оможлївює хаснованє рижних олєгчаньох и бенифицийох, насампредз при купованю огриви и рижних продуктох по вигоднєйших ценох и з можлївосцу одплацованя на вецей рати.
       Тиж так, пензонере маю можлївосц хасновац и животне осиґуранє, дзе прейґ ДДОР-а Нови Сад уж осиґурани скоро 700 керестурски пензионере, а осиґуарнє виноши лєм 120 динари мешачно.

Два приятельки змаганя фодбалерох Русина
12. фебруар 2008. (Рутенпрес) - Фодбалере керестурского Русина прешлого викенду дома, на своїм терену, одбавели два приятельки змаганя.
        Всоботу, 9. фебруара, од Полету зоз Каравукова, котри ше змага у висшей, Войводянскей лиґи, Русин страцел зоз 2:1, а ґол за Русин посцигнул Яким Гарди.
       Внєдзелю, 10. фебруара, Русин зоз 4:2 победзел Слован зоз Селенчи, котри ше змага у єдней лиґи нїзше од Русина. По два ґоли за Русин на нєдзельовим приятельским змаганю посцигли Денис Югик и Дзвоно Югик.
       На нєдзелю, 17. фебруара, фодбалере Русина у Руским Керестуре одбавя ище єдно приятельске змаганє, зоз Полетом зоз Сивцу, котри ше змага у єдней лиґи висше од Русина.

Илона Гека Зарубица ознова спортистка рока у Русину
11. фебруар 2008. (Рутенпрес) - Илона Гека Зерубица, державна, европска и шветова шампионка у боди-билдинґу, и того року преглашена за найлєпшу спортистку у 2007. року у керестурским Спортским дружтве “Русин”.
        Преглашованє спортисту рока, як и найлєпших спортистох у дзешец клубох Спортского дружтва "Русин" окончене у присустве числених членох "Русина" - од наймладших по найстарших - на порядней Рочней скупштини Дружтва, внєдзелю, 10. фебруара.
      За найлєпшого спортисту Фодбалского клуба "Русин" у прешлим року преглашени Златко Боднар; у Рукометним клубу за найлєпшого бавяча преглашени Мирко Папуґа, а за найлєпшу рукометашку у 2007. року преглашена Калина Павлович.
      За найлєпшого шахисту у прешлим року на Скупштини “Русина” преглашени Лабуд Щепанович. У Столнотениским клубу найлєпши бул Деян Надь, а медзи атлетичарами Борис Барна. Стефан Ноґавица преглашени за найлєпшого каратисту.
      Фодбалски клуб "Русин" того року будзе означовац 85-рочнїцу од свойого снованя, так же и у рамикох початку того означованя, за почесних членох Спортского дружтва "Русин", на вчерайшей Скупштини преглашени дакедишнї активни спортисти, а тераз спортски роботнїки - Владимир Грубеня (1953.) и Ярослав Виславски (1957.).
      Преглашованє найлєпших спортистох по клубох, як и цалого Спортского дружтва ушлїдзело после подношеня звитох о роботи котри, у мено цалого Дружтва поднєсол його предсидатель Янко Хома, иншак директор керестурскей Школи, котрому представителє Клубох на вецей заводи виражели подзекованє на допомоги у роботи клубох "Русина".
      Роботи Скупштини СД "Русин" вчера присуствовал и народни посланїк др Дюра Мученски, котри од нєдавна и предсидатель Столнотениского клуба "Русин", Йошка Голперт, визначни спортиста и дакедишнї рукометни репрезентативец, спортски роботнїки, родичи младих спортистох и популарни навияче "Русина" "Дзиви швинї".

Керестурскей Школи половку менєй од вимаганого
10. фебруар 2008. (Рутенпрес) - Концом прешлого тижня, Школски одбор керестурскей Основней школи и Ґимназиї "Петро Кузмяк", виражел окремне нєзадовольство зоз малу суму средствох котри у буджету кулскей општини наменєни за тогорочни инвестицийни укладаня у тей Школи.
       У плану капиталних укладаньох з општинского буджету у обласци образованя, за керестурску ОШиҐ "Петро Кузмяк" опредзелєне 513 000 динари, цо скоро за половку менєй од глєданого.
       За одредзени укладаня у тим року, Школа "Петро Кузмяк" од општини вимагала коло милион динари, насампредз за технїчне пошоренє и мебель за шейц учальнї.
       Руководство ОШиҐ "Петро Кузмяк" на таке розподзельованє средствох будзе реаґовац при одвичательних у кулскей општини, з можлївосцу звекшованя средствох при ребалансу општинского буджету.

На нєдзелю Конференция пензионерох
9. фебруар 2008. (Рутенпрес) - Наютре, 10. фебруара, у Руским Керестуре будзе отримана Рочна конференция Здруженя пензионерох Руского Керестура.
На Конференциї будзе винєшени звит о роботи за прешли, як и напрямки роботи Здруженя у 2008. року. Конференция будзе отримана у Доме пензионерох зоз початком на 15 годзин.

Скупштина СД "Русин"
9. фебруар 2008. (Рутенпрес) - Рочна скупштина Спортского дружтва "Русин" будзе отримана на нєдзелю, 10. фебруара, у Руским Керестуре дзе буду поднєшени звити шицких клубох "Русина". Тиж так предвидзене наградзованє спортистох котри ше прешлого року визначовали у каждим клубу.
По традициї, и на тогорочней Скупштини будзе преглашени найлєпши спортиста "Русина" у єдним року, а тоту титулу и того року достанє шветова, европска и державна шампионка у боди-билдинґу Илона Гека Зарубица, дознава Рутенпрес у СД “Русин”.
Скупштина будзе отримана у просторийох ОШиҐ "Петро Кузмяк", зоз початком на 17 годзин.

Того викенду два приятельски змаганя
9. фебруар 2008. (Рутенпрес) - У рамикох пририхтованьох за ярню часц першенства у Подручней фодбалскей лиґи Зомбор, перша екипа рускокерестурского Фодбалского клуба “Русин”, того викенду на своїм терену одбави два приятельски змаганя.
       Нєшка, 9. фебруара, керестурски "Русин" будзе домашнї екипи "Полету" зоз Каравукова, котри ше змага у Войводянскей, єдней лиґи висше од "Русина".
       Наютре 10. фебруара, на Ярашу у Руским Керестуре госцує фодбалска екипа зоз Селенчи, котра ше змага у своєй општинскей лиґи, єдней нїзше од лиґи у котрей ше змага керестурски "Русин".
        Обидва змаганя на рускокерестурским Ярашу починаю на 14 годзин, а уход безплатни.
      Першенствени змаганя у Подручней фодбалскей лиґи Зомбор починаю 15. марца.

Пошвидко предлуженє вибудови гали
8. фебруар 2008. (Рутенпрес) - Предлуженє будованя школско-спортскей гали у Руским Керестуре почнє такой после авансованя трошкох виводзачови роботох, виявел секретар Месней заєднїци Йоакима Надя.
     Од того року, виводзач дальших роботох на гали, насампредз на поставяню закрица, будзе Подприємство "Слован проґрес" зоз Селенчи.
      Зоз Покраїнского фонду за капитални укладаня, концом прешлого рока за предлуженє роботох на вибудови керестурскей школско-спортскей гали одобрени 36 милиони динари, а за 30 милиони, Фонд подписал контракт зоз виводзачом роботох.
     Тераз ше окончує ревизию ценох будованя, понеже постояци цени утвердзени ище пред пейцома роками, док шицка друга потребна документация обезпечена.

До вчера прейґ 800 уписaних
6. фебруар 2008. (Рутенпрес) - Од початку уписованя за безплатни акциї 28. януара, та по вчера дополадня, 5. фебруара, у Руским Керестуре ше за доставанє безплатних акцийох евидентовали прейґ 810 особи, дознава Рутенпрес у рускокерестурскей Пошти.
        Велькей гужви и даяки проблеми коло уписованя акцийох нє було, гваря у керестурскей Пошти, а пре евидентованє, Пошта роби и пополадню и през викенд.
      У цалей кулскей општини за безплатни акциї до тераз евидентовани коло 5 000 гражданє, найвецей у Кули, коло 2 000, дзе, по потреби, робя аж три шалтери пре упис акцийох, но векши гужви нєт.
       Попри стаємного роботного часу од 7 по 13 годзин през роботни днї, Пошта Руски Керестур роботнима днями акциї уписує и пополадню - од 14 до 18 годзин. Акциї у Пошти мож уписац и през викенд - всоботу од 8 до 11; та од 13 до 17 годзин, а внєдзелю од 14 по 19 годзин.
       Тиж так, за тих котри нє маю, при уписованю акцийох на Пошти годно отвориц и потребни жиро-рахунок.

Ознова реаґованє пре вихабянє Републичного змаганя з руского язика
6. фебруар 2008. (Рутенпрес) - Тих дньох, Национални совит Руснацох и Дружтво за руски язик, литературу и културу, до Министерства просвити ознова мушели реаґовац прето же у Календаре змаганьох школярох за тот школски рок, котрим орґанизатор Министерство просвити - вихабене Републичне змаганє з руского язика.
       Спрам Календара змаганьох школярох у тим школским року и Фахового упутства, було предвидзене орґанизованє лєм школских и Окружного змаганя, а нє и Републичного, гоч Министерству просвити ище 10. септембра прешлого року, Одбор за образованє нашого Националного совиту и Дружтво за руски язик, литературу и културу, приявели участвованє наших школярох основних школох и за Републичне змаганє зоз руского язика и язичней култури.
        Медзитим, у Календаре змаганьох Министерства просвити, котри початком того тижня доручени школом, того змаганя за Руснацох вихабене. Иста ситуация була и прешлого школского року, кед за Руснацох тиж було вихабене орґанизованє Републичного змаганя з руского язика и язичней култури.
        Национални совит и Дружтво за руски язик, литературу и културу такой реаґовало по тим питаню и, як ше гвари у допису Националного совиту Руснацох Министерству просвити - чежко мож розумиц повторйованє истей гришки и глєда ше єй швидке виправянє.
       Вовторок, 5. фебруара, зоз Министерства просвити сцигнул одвит же школским управом послата конєчна верзия Фахового упутства, та Календар и тото упутство буду обявени у першим шлїдуюцим чишлє "Просвитного препатрунку", з чим би гришка мала буц виправена.

Дзекованє Рускокерестурцом
6. фебруар 2008. (Рутенпрес) - Месни одбор Демократскей странки Руски Керестур ше вчера, 5. фебрура, оглашел зоз сообщеньом Керестурцом з нагоди нєдзельових виберанкох за предсидателя Сербиї.
"Почитовани Керестурци, дзекуєме вам на велькей потримовки хтору сце на виберанкох за предсидателя Сербиї, 2. фебруара, дали Борисови Тадичови”. "Зоз таку вельку виходносцу на виберанки и ясним опредзелєньом за Бориса Тадича за предсидатлея Сербиї, указали зме же зме одвичательни гражданє и же жадаме жиц у держави повязаней зоз Европу. Дзекуєме на потримовки” - гвари ше у сообщеню Месного одбору Демократскей странки Руски Керестур.

Велька нащивеносц веб-сайту Клуба
6. фебруар 2008. (Рутенпрес) - Веб-сайт керестурского Клуба антиалкоголичарох "Здрави живот" мал понад 8 600 нащивительох, цо прешвечлїви доказ же тота хорота зависносци престава буц табу и виходзи зоз анонимносци - гварене 2. фебруара, на Скупштини Клуба антиалкоголичарох “Здрави живот” у Руским Керестуре.
       Роботу Скупштини чийо госци були и представителє двох новосадских, єдного вершецкого и єдного беоґрадского клуба, провадзел и народни посланїк др Дюра Мученски, др Стана Струґар, директорка кулского Дома здравя, представителє "Каритасу" и других дружтвених орґанизацийох Руского Керестура.
      Предсидатель КАА Юлиян Фейди винєсол искуства зоз Форума веб-сайта Клуба "Здрави живот", цо була и тема Скупштини, на котрим ше дискутує о хоротох зависносци, та и алкоголизeм и тота тема на сайту мала 8 635 нащиви.
       Заключене же причина такей масовносци у анонимносци нащивительох, та ше шлєбоднєйше, отворенше и без стримованя виноши думаня и о тей теми, визначел Фейди на Скупштини.
      Же би робота шицких клубох була доступна ширшому пасму людзох, у 2008. року потребне обезпечиц и домен на интернету, а у Мешацу борби процив алкоголизма (новембер), у планє орґанизовац трибину о алкоголизме як хороти.

Рекордна виходносц на гласанє
4. фебруар 2008. (Рутенпрес) - Спрам перших, нєурядових резултатох, котри Рутенпрес вчера вечар дознал од Месного одбору Демократскей странки Руски Керестур, у Руским Керестуре и у тим другим кругу виберанкох за предсидателя Сербиї убедлїво победзел кандидат Демократскей странки Борис Тадич.
        Борис Тадич у Керестуре достал два тисячи 567 гласи, цо виноши аж 85 одсто од числа гласачох котри вишли на виберанки.
        Кандидат Сербскей радикалней странки Томислав Николич у Руским Керестуре достал 434 гласи, лєбо 6 цали 68 одсто од Керестурцох котри нєшка гласали.
       У другим виберанковим кругу за предсидателя Републики Сербиї у Руским Керестуре гласали 2 944 гласаче од 4 070 уписаних до виберанкового списку, цо виноши аж 72, 33 одсто од виберанкового цела, и таке одволанє на виберанки у Руским Керестуре уж давно нє зазначене.
       Спрам тих перших, нєурядових податкох, у Керестуре вчера було 43 нєважаци гласацки лїстки.
      У одношеню на перши виберанкови круг, пред двома тижнями, виходносц на виберанки у другим кругу була векша за за 10,56 одсто, понеже у першим кругу у Керестуре гласало 61,77 одсто виберанкового цела.
       Як Рутенпрес дознал вчера вечар, нєурядово резултати гваря же у цалей кулскей општини на виберанки вишли 71,62 одсто од 38 155 гласачох з правом гласа.
      У цалей кулскей општини победзел Томислав Николич, кандидат СРС, котри достал 13 924 гласи, а кандидат ДС Борис Тадич достал 13 007 гласи.

Одход на Шветову раду РРЛ
4. фебруар 2008. (Рутенпрес) - Предсидатель Рускей матки Дюра Папуґа, котри источасно и член Шветовей ради Шветового Конґреса Руснацох, Русинох, Лемкох, од 4. по 6. фебруар будзе присуствовац роботи Шветовей ради.
Шветова рада Руснацох, Русинох, Лемкох будзе отримана у Букурешту, у Румуниї, а вєдно зоз Папуґом, до Букурешту одпутовал и технїчни секретар Рускей матки Михайло Бодянец. Єдна з темох схадзки Шветовей ради у Букурешту од 4. по 6. фебруар, будзе и пририхтованє наступного Дзешатого шветового конґресу РРЛ, котри 2009. року будзе отримани у Руским Керестуре.

"Мудрило" нови театрални проєкт
1. фебруар 2008. (Рутенпрес) - Шлїдуюци, єденасти проєкт нашого Руского народного театра "Петро Ризнич Дядя" у тей театралней сезони будзе представа "Мудрило", автора Михеон Хун-Кана, котрого познаме и як Мирона Канюха, одлучене на схадзки Управного одбору Театра, штварток, 31. януара.
        З тоту одлуку о новим театралним проєкту випочитоване и опредзелєнє напрямкох Управного одбору Театра, же би после шветового автора, Театер на сцени ознова мал текст нашого руского автора, а источасно, "Мудрило" и драмски текст котри на остатнїм конкурсу за нову руску драму ровноправно дзелї друге место.
      Най здогаднєме, спрам одлуки конкурсней комисиї початком януара, перше место нє додзелєне, а конкурс за нову руску драму прешлого року вєдно розписали Руски народни театер, Национални совит Руснацох и Новинско-видавательна установа "Руске слово" Нови Сад.
    При розписованю конкурса, одредзена нєобовязуюца препорука була и же би найлєпши тексти були поставени и на сцену.
      Текст Михеона Хун-Кана "Мудрило", як нови театрални проєкт у нашим театре предложел окончователь длужносци директора Театра Владимир Надь Ачим, котри бул и єден з членох комисиї котра оценьовала нови руски драмски тексти зоз спомнутого конкурса.
      Одлука о режисерови того найновшого проєкта будзе принєшена познєйше, а як можлїви режисере споминани Янко Лендєр и Михайло Зазуляк, аж можлїва и їх одредзена заєднїцка робота на тей представи.
        Управни одбор РНТ "Петро Ризнич Дядя" на своєй остатнєй схадзки розпатрал и терашнї финансийни стан, и гоч ше длуство покус зменшує, материялне положенє ище вше нєзадоволююце. Одлучене же би ше, у цесним сотруднїцтве зоз чолнїками нашого Националного совиту, як сновательом Театра, од покраїнских орґанох и надалєй вимагало и помоц у ришованю того проблему, и злєпшанє статусного положеня, гоч на остатню таку вимогу Театра концом прешлого рока, зоз Покраїни одвитоване неґативно.
      Принєшена одлука о висини гонорарох за учашнїкох остатнїх двох представох - "Кинґ Конґ" и "Приповедка о єдней страсци", а вони наисце нє вельки, и рушаю ше од 5 до 20 000 динари, у зависносци од учасци актерох у єдним проєкту.
      Управни одбор РНТ поинформовани и зоз планами за реконструкцию бини у керестурским Доме култури, винєшени даяки идеї о сотруднїцтве Театра и Дома култури по питаню твореня представох и на аматерскей основи, а порушане и питанє врацаня на стару назву, на лєм РНТ "Дядя", о чим будзе бешеди на даєдней з наступних схадзкох Управного одбору.

Того викенду остатнї бали
1. фебруар 2008. (Рутенпрес) - Вчера, 31. януара, у керестурским Каритасу орґанизовани Бал за старих, а того викенду буду отримани ище два бали. Нєшка, 1. фебруара, бал орґанизує Еколоґийни рух "Желєни персценє" и його Секция "Квецова заградка", а ютре, 2. фебруара будзе отримани Месарски бал.
Сезона балованя з тим будзе закончена, понеже 4. фебруара у Руским Керестуре почина Вельконоцни пост, а тей жими у Руским Керестуре вєдно отримани шейсц бали.