Руски Керестур

Архива висткох - марец 2007.

ПРОБУЙЦЕ НОВИ "CHAT"

30. марец 2007. - На сайту доступни унапредзени и комплетно вименєни сервис за медзисобну комуникацию хвильково активних нащивительох сайту такволани "chat". Найдзме ше у хижи за дописован вибором слички "chat" на насловним боку.

ПРЕДЛУЖЕНЄ ВИГЛЄДОВАЦКИХ РОБОТОХ НА ВОДИ

27. марец 2007. - Месна заєднїца Руски Керестур и Институт за хемию, технолоґию и метали (ИХТМ) зоз Беоґраду подпишу нови контракт о предлуженю виглєдовацких роботох на пошореню за пречисцованє води - заключене на схадзки Совиту Месней заєднїци.

На основу контракту у наступних шейсцох мешацох ИХТМ треба же би окончел аналитичну контролу процесу технолоґиї, же би обучел одредзени особи на пошореню хтори на нїм буду робиц после шейсцох мешацох виглєдовацкей роботи, же би обезпечел шицки нєобходни анализи о квалитету води и же би утвердзел цену на таки способ пречисценей води.

Тоти роботи керестурску Месну заєднїцу буду коштац 1.900.000 динари, а члени Совиту Месней заєднїци принєсли и одлуку же би признали и звекшани трошки у предходних шесйц мешацох хтори мал ИХТМ у виносу од 173.000 динари. Понеже Месна заєднїца за проєкт уж уплацела 550.000 динари по предходним контракту, тот проєкт у цалосци будзе коштац коло 2,5 милиони динари. Средства за тоти намени обезпечени зоз покраїнского буджету ище пред двома роками кед Покраїнски секретарият за польопривреду, водопривреду и лєсарство одобрел наменски 3 милиони динари за ришованє проблему води за пице.

УРЯДОВО ПРЕБАЧЕНЄ "ЗАДРУҐАРА"

27. марец 2007 - Фодбалски клуби "Русин" зоз Руского Керестура и "Задруґар" зоз Себского Милетичу убудуце буду пестовац приятельски, спортски и добри одношеня у духу толеранциї и медзисобного уважованя - гварене у розгваркох представительох тих двох клубох у Руским Керестуре, а после инциденту хтори ше случел у Сербским Милетичу кед фодбалере "Русину" увредзовани на националней основи.

Руководство ФК "Задруґар" зоз Сербского Милетичу ше прешлого тижня и урядово пребачело фодбалером "Русину" за инцидент хтори ше случел 11. марца на першенственим змаганю медзи тима двома клубами, наглашуюци же ше ФК "Задруґар" оградзує од таких зявеньох и предложене же би ше предлужело пестовац добре сотруднїцтво тих двох клубох цо руководство "Русину" и прилапело.

"БАРОН МИНХАУЗЕН" ИДЗЕ НА ЗОНУ

27. марец 2007 - Монодрама "Барон фон Минхаузен" Драмского студия АРТ Дома култури зоз Руского Керестура у виводзеню Емила Нярадия и режиї Владимира Надя Ачима ше пласавола за участвованє на Зонскей смотри аматерского драмского творчества хтора почина 29. марца у Червинки.

Пласман на Зонску смотру Няради витворел на Општинскей смотри аматерского драмского творчества хтора прешлого тижня отримана у Сивцу.

РИШОВАНЄ АТМОСФЕРСКЕЙ КАНАЛИЗАЦИЇ

22. марец 2007. - Подприємство "Панаква" зоз Нового Саду анґажоване на копаню яркох и препущеньох у Русинскей улїчки, Петра Кузмяка при гиподрому, Лоле Рибара, Маршала Тита, Беґельскей, Янка Тота Биґмека и Йовґена Сопки.
- Зоз законченьом тих роботох буду розришени шицки проблематични препущеня и буду витворени релативно добри условия за одводзенє звишка атмосферских водох зоз валалу гоч отримованє яркох и надалєй вимага анґажованє шицких Керестурцох - гвари Йоаким Надь, секретар Месней заєднїци.
За тоти намени керестурска Месна заєднїца утроши 1.320.000 динари хтори концом прешлого року по конкурсу достала од Покраїнского секретарияту за польопривреду, водопривреду и лєсарство. Совит Месней заєднїци за тоти роботи анґажовал новосдаску "Панакву" хтора на тендеру дала найвигоднєйши условия.

КСЕНИЯ БОДЯНЕЦ ДОБИТНЇЦА НАГРАДИ "ЗАРЇ КУЛТУРИ"

22. марец 2007. - Ксения Бодянец, професорка класней настави Основней школи и Ґимназиї "Петро Кузмук" достала найвисше припознанє "Зарї култури", хторе Културно просвитна заєднїца општини Кула каждого року додзелює за окремну роботу и досяги у култури и просвити.
Ксения Бидянец и вельорочна ґлумица у руским театре, режисерка представох за дзеци як и инструктор рецитованя у Школи. Бидянцова и коавторка и прекладателька вецей учебнїкох по руским и на руски язик, а єден спомедзи остатнїх и "Буквар" за першу класу ОШ.
Бодянцовей и ищє штверим добитнїком "Зарйох култури" награди уручени на шветочносци знагоди отвераня Општинскей смотри драмскей творчосци кулскей општини у Сивцу.

БОЯН КОСТРЕШ НАЩИВЕЛ РУСКИ КЕРЕСТУР

22. марец 2007. - Знагоди медзинационалного инцидента, кед на змаганю у Сербским Милетичу 11. марца публика увредзовала фодбалерох ФК "Русин" на националней основи, прешлей нєдзелї, 18. марца, Руски Керестур нащивел Боян Костреш, предсидатель Скупштини АП Войводини хтори на стадионє ФК "Русин" отримал конференцию за новинарох, а потим вєдно зоз Славком Оросом, предсидательом Националного совиту рускей националней меншини присуствовал першенственому фодбалскому змаганю медзи "Русином" и "Дунайом" зоз Бачкого Моноштору.

       - Я мал потребу нєшка присц до Руского Керестура и зоз своїм присуством указац же таки инциденти подполно нєжадани, же ми ту у Войводини од вше жили складно и то тото чому ше намагаме. У Войводини нє шме буц национални зраженя бо ше ми шицким таким потенциялним зраженьом зоз шицкима моцами спроцивиме и таки зявеня викоренїме - гварел Костреш.
     Славко Орос, предсидатель Националного совиту Руснацох гварел же за Керестурцох тота нащива од окремного значеня "бо на тих просторх мушиме пестовац заєднїцтво и єдни других оплеменьовац, а нє преволовац ше по було якей, а окреме нє на националней основи - гварел Орос
       Навияче Фодбалского клуба "Русин" - "Дзиви швинї" подаровали Боянови Кострешови єдну свою маїцу.

УТВЕРДЗЕНИ АКТИВНОСЦИ ЗА СНОВАНЄ ОПШТИНИ РУСКИ КЕРЕСТУР

16. марец 2007 - Члени Комисиї Совиту Месней заєднїци за запровадзованє инициятиви за формованє општини Руски Керестур на вчерайшей схадзки утвердзели акцийни план дальих активносцох з цильом витворйованя инициятиви же би Руски Керестур достал статус општини.

После виробку Елабората хтори потвердзел же постоя уставно-правни и економски условия же би Руски Керестур достал статус општини, найзначнєйши задаток, гварене на схадзки, упознац цо векше число Керестурцох зоз Елаборатом хтори по тераз уж розпатрени и прилапени на преширеней схадзки Совиту Месней заєднїци.

Догварене же будзе видруковани лїсток на хторим ше презентує найзначнєйши информациї и факти зоз Елаборату нєобходни гражданом за опредзельованє на референдуму о питаню снованя општини Руски Керестур. Информативни лїстки буду друковани у 2.000 прикладнїкох и буду подзелєни по шицких керестурских обисцох по конєц марца.

Збор гражджнох будзе отримани 15. априла, после хторого Совит Месней заєднїци на основу анкети хтора запровадзена, у хторей инициятиву за снованє општини Руски Керетсур потримали скоро 88 одсто Керестурци, и на основу розправи на Зборе гражданох поруша инициятиву за розписованє референдума о чим одлуку приноши Скупштина општини Кула.

Датум за отримованє референдума члени Комисиї нє одредзели, алє догварене же будзе найрационалнєйше же би ше референдум отримало источасно зоз отримованьом локалних, або покраїнских виберанкох, або ше орґанизує особне вияшньованє гражданох зоз потписом.

За потреби явней розправи як и за одборнїкох Скупштини општини Кула, Месна зайєднїца обезпечи 200 прикладнїки Елаборату о уставно-правних, економских и социялних основох Руского Керестура за образованє власней општини.

ВИБУДОВ ДРАЖКИ НА НОВИМ НАСЕЛЄНЮ

16. марец 2007 - Будовательне подприємство "Блашко" зоз Кули за даскельо днї закончи вибудов дражки на Новим населєню у длужини од 350 метери зоз чим будзе розришени єден од векших проблемох за гражданох у тей часци валалу. Подобни проблем розришени и гражданом у часци Русинскей улїчки ґу Крущичу дзе тиж направена дражка длугока 800 метери.

До вибудови дражкох Месна заєднїца зоз комуналних средствох вєдно инвестовала 1.500.000 динари.

УВРЕДЗОВАНЄ НА НАЦИОНАЛНЕЙ ОСНОВИ
14. марец 2007. - Спортске дружтво "Русин" упознало Национални совит рускей националней меншини же прешлей нєдзелї, 11. марца, на першенственим змаганю Зомборскей подручней лиґи у Серпским Милетичу зоз тамтейшим ФК "Задруґар" пришло до увредзованя екипи "Русину" збоку публики на националней основи. У допису хтори уручени предсидательови Националного совиту "Руснацох" Славкови Оросови, медзи иншим, стої же под час змаганя було чуц кричаня зоз публики "Руснацох до ґазних коморох". Управни одбор СД "Русин" очекує од Националного совиту же будзе реаґовац у складзе зоз своїма компетенциями. Славко Орос, предсидатель Националного совиту Руснацох виявел же одвитуюце реґаованє по тим питаню будзе послате компетентним державним орґаном.

ЗОЗ ВОДИ ОДКЛОНЄНИ АРСЕН

13. марец 2007. - Завод за защиту здравя зоз Зомбору пияток, 2. марца, на схадзки Комисиї Совиту Месней заєднїци за ришованє проблемох води за пице урядово потвердзел же вода, пречисцена на Пилот пошореню за пречисцованє води Института за хемию, технолоґию и металурґию (ИХТМ) зоз Беоґраду, у подполносци одвитує шицким преписаним нормом у правилїку о квалитету води, и гражданє ю можу хасновац за пице.

Пречисцованє води на пилот пошореню тирвало коло шейсц мешаци у лабораториї хтора була змесцена у просториї Месней заєднїци у Руским Керестуре, а до чиєй науковей роботи були нєпреривно уключени пецеро млади постдипломци зоз беоґрадского Институту на чолє зоз др. Милку Видович.

Др Милка Видович: "После даскелїх мешацох напорней роботи достали зме шицки задоволююци параметри квалитету води за пице и од тераз гражданє Руского Керестура можу тоту воду шлєбодно хасновац. У тим периодзе поробени вельо анализи. Зоз води одклонєни арсен и шицки орґаниски материї хтори були токсични, односно хтори зоз хлорованьом води виволовали канцероґени форми".

Др. Лиляна Соколова - Дьокич зоз Заводу за защиту здравя зоз Зомбору: "Тото пилот пошоренє пречисцовача води на хторим др. Видович достала перфектни резултати ше од других розликує по тим же то перше пилот пошоренє у нашей жеми на хторим започате таке виглєдованє и же є лєм за шейсц мешаци и закончене. За барз кратки период зме достали продукт хтори зме сцели и тераз треба ище окончиц даскельо паралелни анализи у даскелїх референтних лабораторийох же би нам потвердзели тото цо зме достали. Пилот пошоренє пречисцовача мала фабрика води на основу хторей лєгко направиц праву фабрику води хтора ґенарицийом Керестурцох обезпечи здраву воду за пице".

ОД ВЧЕРА ВОДА И УРЯДОВО ЗА ХАСНОВАНЄ

13. марец 2007 - Завод за защиту здравя у Зомборе после такволаней велькей анализи потвердзел же вода пречисцена на Пилот пошореню за пречисцованє води здрава за пице и варенє та ю Керестурци од вчера и урядово почали хасновац. У Месней заєднїци поставени три чопи, два у просториї и єден вонка, та гражданє можу воду точиц цали дзень и то у нєогранїчених количествох бо капацитет пошореня за пречисцованє до 1.000 литри на годзину.

Пошоренє за пречисцованє води поставене у просториї Месней заєднїци у хторей фаховци ИХТМ зоз Беоґраду робели шейсц мешаци и достали резултати єдинствени у Сербиї понеже ше на тим простору ище нїкому нє удало зоз води одклонїц арсен цо лєм за даскельо днї, як гварел секретар Надь, виволало вельке интересованє нє лєм медийох алє и представительох велїх местох хтори маю подобни проблеми, а таких у Войводини єст вельо.

ПИЛОТ ПОШОРЕНЄ КОШТА 550.000 ДИНАРИ

13. марец 2007. - На схадзки Совиту Месней заєднїци хтора отримана 9. марца принєшена одлука же би ше Институту за технолоґию, хемию и металурґию (ИХТМ) зоз Беоґраду виплацело 550.000 динари кельо виноши догварена цена за Пилот пошоренє за пречисцованє води.

Зоз контрактом хтори кереструска Месна заєднїца подписала зоз ИХТМ зоз Беоґраду предвидзене же би ше суму од 550.000 динари уплацело лєм у случаю же ше на Пилот пошореню за пречисцованє води посцигню задоволююци резултати.

КИРБАЙ НА СТАРИМ МЕСЦЕ

13. марец 2007. - Вашарска часц Кирбаю хтори ше у Руским Керестуре отримує 9. мая и того року будзе отримани на истим месце як и по други роки - одлучене на схадзки Совиту Месней заєднїци хтора 9. марца отримана у Руским Керестуре.

После розпатраня можлївосцох пременки локациї за отримованє вашарскей часци Кирбаю, а на основу поднєшеней вимоги гражданох зоз часци Русинскей улїчки опрез чиїх обисцох ше отримує Кирбай, члени Совиту после длукшей розправи нє нашли вигоднєйшу локацию та заключели же би ше и того року вашарска часц Кирбаю отримала на истим месце.