Витайце  Место  Месна заєднїца  Руснаци  Инфо сервис  Рижне
 
Архива висткох - марец 2008.

 

 
 


У цеку Општинска смотра дзецинскей драмскей творчосци
27. марец 2008. (Рутенпрес) - Два представи зоз Руского Керестура, вчера, 26. марца, наступели на тогорочней 48. Општинскей смотри дзецинскей тетралней творчосци, котра у Крущичу тирва и нєшка.
         Млади аматере зоз Руского Керестура вчера на Смотри у Крущичу виведли представу "Перша любов" Силвестера Дорокхазия, у режиї Ксениї Бодянцовей, а у продукциї Драмского студия АРТ керестурского Дома култури. После тей, на програми Смотри була дзецинска монодрама “Залюбена до кравки Славки”, у виводзеню Адрияни Надь зоз Руского Керестура, котру у продукциї керестурского МО РМ режирал Владимир Надь Ачим.
       Пред двома керестурскима, на Општинскей смотри наступели домашнї - дзеци КУД "Крущич", зоз представу Стефана Ликола “Каролинов Крачун”, у режиї Федора Попова. Нєшка на програми смотри ище три дзецински представи - два зоз Червинки и єдна зоз Кули, после чого селектор Смотри дзецинскей драмскей творчосци Михайло Зазуляк, преглаши котри ше представи пласовали на дальше - Зонске змаганє.

Упис до першей класи у керестурскей Основней школи
27. марец 2008. (Рутенпрес) - И попри того же упис до першей класи основней школи у шицких школох у жеми започнє од 1. априла, у керестурскей ОШ “Петро Кузмяк” упис першокласнїкох будзе окончени аж штредком мая.
        Як Рутенпрес дознава од педаґоґи керестурскей Школи Мариї Шантовей, така вецейрочна пракса зажила пре тестованє способносци предшколских дзецох за упис до школи. Педаґоґа керестурскей Школи тото тестованє уж вецей роки окончує у обєкту ПУ "Бамби", цо ше указало як добре, понеже пре дзецом познати амбиєнт - резултати тестованя обєктивнєйши.
        И того року тестованє предшколцох почнє у априлу, а сам упис до школи будзе коло 12. мая, о чим родичи на час буду поинформовани.
       До першей класи основней школи ше уписує дзеци народзени од марца 2001., по марец 2002. року. Спрам спознаньох, за упис до першей класи ОШ того року у Руским Керестуре єст лєм 38-еро дзеци, цо за 12 менєй як влонї.
         Упис до ПУ "Бамби", односно його оддзелєня "Цицибан" у Руским Керестуре, до шицких воспитних ґрупох почнє тиж штредком мая.

Означена рочнїца кир Славомира Микловша
26. марец 2008. (Рутенпрес) - Вчера, 25. марца, на Други дзень Велькей ноци у Руским Керестуре, котри источасно и швето Благовищенє Богородици, владика Крижевски - кир Славомир Микловш, означел 25-рочнїцу од свойого пошвецаня за владику Крижевского владичества.
         Владика Крижевски кир Славомир на нєшкайши дзень пред 25 роками, праве у рускокерестурскей церкви пошвецени за владику. З нагоди ювилея кир Славомира, у рускокерестурскей церкви вчера служена Благодарна Архиєрейна литурґия, котру предводзел ювилант, кир Славомир, а сослужовали 13 священїки зоз Крижевского владичества и Апостолского еґзархату за грекокатолїкох у Сербиї и Чарней Гори.

Нове руководство Пакта Рутенорум
26. марец 2008. (Рутенпрес) - За предсидателя Вивершного одбору Пакта Рутенорум вибрани Владимир Чижмар, за подпредсидателя Славко Пап, а за членох Арияна Сабадош, Бранимир Боянович, Мая Зазуляк, Андри Рац и Михайло Пашо - одлучене на схадзки Форума младих всоботу, 22. марца.
          До Надпатраюцого одбору Пакта Рутенорум меновани Сашо Палєнкаш и Иґор Варґа.
         Як Рутенпрес дознава од дотерашнього предсидателя Вивершного одбору керестурскей младежи Пакта Рутенорум Иґора Варґи, гоч дворочни мандат терашньому Одбору виходзи у юнию, виберанки окончени уж тераз пре пририхтованє вецей проєктох младежскей орґанизациї, котри буду витворени праве у лєтних мешацох.

Познати доботнїки "Зарйох култури"
 26. марец 2008. (Рутенпрес) - Комисия за награди Културно-просвитней заєднїци Кула, пондзелок, 24. марца, спомедзи єденац предлогох, вибрала седем тогорочних добитнїкох награди “Зарї култури”, котру тота институция каждого року додзелює за резултати посцигнути у обласци култури и образованя.
        Медзи тогорочнима добитнїками награди "Зарї култури" и Ксения Макаї Орос, поетеса, рецитаторка и ґлумица зоз Руского Керестура и Слободанка Настасич зоз Кули, професорка у рускокерестурскей Школи "Петро Кузмяк".
         Попри нїх, награду достали Здруженє гражданох "Непкер" зоз Кули, штредня Економско-тарґовецка школа зоз Кули и Миладин Маринкович, роботнїк у култури и образованю зоз Сивцу.
         Награда КПЗ Кула "Зарї култури" будзе уручена 1. априла, на отвераню Зонскей смотри аматерских драмских театрох у Червинки.

Пошвецаню Пасхи присуствовал и Боян Костреш
24. марец 2008. (Рутенпрес) - У Руским Керестуре нєшка Вельконоцни пондзелок, односно Перши дзень Велькей ноци, котра започала вчера, 23. марца. Вельконоцну Архиєрейну Службу Божу, вчера у керестурскей Катердралней церкви предводзел апостолски еґзарх за грекокатолїкох у Сербиї и Чарней Гори, преосвящени владика кир Георгий Джуджар, а сослужовали домашнї священїки - керестурски парох о. Юлиян Рац и капелан о. Тони Анґелов, як и кулски парох о. Антоний Турчаник.
       Архиєрейней служби Божей на Вельку ноц присуствовал и предсидатель Скупштини АП Войводини Боян Костреш, котрого пред Службу привитали предсидатель Националного совиту Руснацох Славко Орос, предсидатеоль Совиту и секретар керестурскей Месней заєднїци Желько Ковач и Йоаким Надь, предсидатель Церковного одбору рускокерестурскей церкви Славко Бучко, як и Олена Папуґова, член Предсидательства Лиґи социялдемократох Войводини.
       На початку своєй казанї-винчованки у Вельконоцней Служби, владика кир Георгий окреме привитал предсидателя Скупштини Войводини Бояна Костреша, и виражуюци подзекованє на тей нащиви, наглашел же то за нас знак почитованя и охрабреня.
         Боян Костреш присуствовал и пошвецаню Пасхи у порти керестурскей церкви, як и Вельконоцному полудзенку на Парохиї, а после пошвецаня Пасхи, наглашуюци же є першираз у Керестуре на тото швето, Керестурцом повинчовал Вельконоцни швета.
         Вельконоцну Архиєрейну Службу Божу зоз своїм шпиваньом провадзел Хор керестурскей церкви и Дома култури, под руководством Лидиї Пашовей, а у присустве числених Керестурцох и госцох зоз других местох, Пасху и Вельконоцни кошарки у керестурскей порти пошвецели владика кир Георгий и керестурски парох о. Юлиян Рац. Нєшка и ютре - на Перши и Други дзень Велькей ноци, у керестурскей церкви Богослуженя буду отримовани як на швета, з тим же на вовторок, 25. марца, у Богослуженьох будзе и мированє.
         Тиж так, нєшка, пондзелок 24. марца, на Перши дзень Велькей ноци, у манастире Малих шестрох , будзе отримане Богослуженє зоз мированьом, од 16 годзин.
        Вшелїяк, як то по традициї, нєшка и на ютре, Першого и Другого дня Вельконоцних шветох, хлапци и дзивчата буду ходзиц по облїваню.

Инициятива за Дзень Юлияна Надя
 24. марец 2008. (Рутенпрес) – Здогадованє и означованє дїла поети, публицисти и новинара Юлияна Надя треба орґанизовац зоз окремну програму под назву "Дзень Юлияна Надя", гварене на Месним одборе Рускей матки Руски Керестур, котри отримани 21. марца.
         На Одборе порушана и инициятива за окремну "Едицию Юлияна Надя", у котей би ше каждого року, на основи конкурса, обявйовало по єдну збирку писньох наших младих поетох - по руски и по сербски. Тиж так, керестурски Месни одбор РМ порушал инициятиву же би ше у рамикох Драмского меморияла Петра Ризнича Дядї ознова орґанизовало гумористично-сатиричну програму под назву "Соцкийов вечар", цо будзе предложене Одбору за културу Националного совиту Руснацох.
        З оглядом на значносц тих инициятивох з обласци култури и литератури, МО РМ Руски Керестур предклада же би тоти програми вошли и до програмох роботи културних орґанизацийох и манифестацийох у нашей заєднїци.

О можлївосоцх доставаня роботи и обезпечованя биваня
 24. марец 2008. (Рутенпрес) - О инклузиї, односно уключованю Ромох до дружтвеней заєднїци, пияток, 21. марца, у Руским Керестуре бешедовал Душко Йованович, директор Канцелариї за инклузию Ромох при Вивершней ради Войводини.
        Попри припаднїкох ромскей националней заєднїци зоз Руского Керестура, на сходу присуствовало и значне число припаднїкох ромскей заєднїци зоз скоро шицких местох кулскей општини, понеже є и орґанизована на таким уровню. Канцелария за инклузию Ромох при войводянскей Вивершней ради основана у маю прешлого року и уж посцигла замерковани резултати на уключованя ромскей популациї до ширшей заєднїци и унапредзованю живота Ромох у шицких обласцох, а як наглашел Душко Йованович - то єдинствена Канцелария на швеце.
        У тим школским року, прейґ Канцелариї за инклузию, до штреднїх школох у Войводини уписани 156 школяре ромскей националнсоци и 27 студенти; штредньошколци змесцени до интернатох по местох Войводини, а 355 Роми-штредньошколци зоз Войводини порядно доставаю и стипендию од 48 еври мешачно.
         Тот проєкт финансує Министерство просвити, у сотруднїцтвом зоз Минстерством за социялну роботу, порушала го праве Канцелария за инклузию и його вредносц прейґ милион еври за цалу Сербию и финансує ше прейґ Фонду за образованє Ромох зоз Будимпешти.
         Як гварел Йованович, Роми катеґория жительства котра шейсц раз худобнєйша од других худобних у Сербиї, проблем їх нєзанятосци єден з найвекших, так же Канцелария понука и проєкти за обезпечованє роботи.
         После прешлорочного конкурса (у октобру) за самообезпечованя роботи, дзекуюци средством ВР АПВ од 4 милиони динари, роботу себе обезпечела 31 особа, бо у Войводини на таки способ оформени 16 подприємства чийо власнїки Роми, цо єдинствени случай у швеце, гварел Йованович. Тих дньох ше очекую же ознова будзе розписани подобни конкурс за самообезпечованє роботи, за нови 4 милиони динари, так же ище коло 30 особи сами себе и другим годни обезпечиц роботу.
         Шицку потребну процедуру за конкурованє за єден дзень покончи Канцелария, гварел Душко Йованович, а право конкуровац маю лєм нєзаняти, котри у евиденциї Националней служби за обезпечованє роботи.
        У обласци обезпечованя простору за биванє, цо тиж єден з вельких проблемох ромскей популациї, Йованович як барз добри приклад винєсол модел кулскей општини, котра перша у Сербиї, у Сивцу, дислоцирує ромске населєнє зоз купованьом хижох ромским фамелийом. До тераз купени 10 хижи, у Сивцу вони потребни ище двом фамелийох, а того року у буджету Општини Кула заплановани милион динари за ришованє проблемох Ромох.

Премиєра дзецинскей монодрами
24. марец 2008. (Рутенпрес) - У Велькей сали керестурского Дома култури, вчера, 23. марца, на Вельку ноц, премиєрно виведзена дзецинска монодрама “Залюбена до кравки Славки” Роберта Такарича, у виводзеню Адрияни Надьовей, а у режиї Владимира Надая Ачима.
        Першираз у традициї руского театру монодраму виведло дзецко, так же млада ґлумица Адрияна Надь, школярка штвартей класи керестурскей ОШ, вошла до историї нашого театра.
         Надьова барз шлєбодно, весело и розиграно, як кед би то було даяке бависко, коло пол годзини тримала повагу дзецох, младшей и старшей публики и одлично одґлумела дзивче своїх рокох, залюбене до бависка Кравки Славки, и на дзецински способ потолковала з котрима ше проблемами ноши єй ґенерация.
         Дзецинска монодрама витворена у продукциї Месного одбору Рускей матки Руски Керестур, а премиєрне виводзенє провадзело красне число публики, котра з длугим аплаузом наградзела Адрияну Надьову.

Владика кир Георгий Джуджар упуцел парохияном винчованку за Вельку ноц
22. марец 2008. (Рутенпрес) – Пред Вольконоцне швето котре ше по Грегориянским календаре того року означи 23. марца, владика кир Георгий Джуджар парохияном упуцел традицийну винчованку з нагоди того найвекшого християнского швета.
        У своєй винчованки Владика визначел же и попри того же ше "грих вше вецей шири у швеце" Исус предлужує свою побиду на "злом и шмерцу". Вон у своєй винчованки наглашел важносц любови и єй божеске походзенє.
         - Кельо зме порихтани любиц, тельо зме порихтани пребачовац. А Божа любов векша од каждого гриха. Чи можлїве любиц без Бога? Кажда любов ма корень у Богу – чи зме того свидоми, або нє. АтеЇсти, котри любя, нєсвидомо прилапюю Бога, гвари у своєй винчовани владика кир Георгий Джуджар.
         - Воскреснути Христос полнота нашого живота – полнота любови, полнота радосци, полнота добра, полнота щесца... Вон смисел живота. Живота каждого чловека., поручене у винчованки.
       Владика наглашел же "воскресенє нє швето котре тирва три днї, штерацец днї... То програма християнского живота. То ориєнтир за кажду животну драгу. Чловек и чловечество були би без Воскресеня путнїки без компасу, людзе котрим швето лєм дзень забави и розваги"
        На концу своєй Вельконоцней винчовани владика кир Георгий Джуджар пожадал "радосни и полни любови швета Христового воскресеня".

Винчованки державних и националних институцийох
22. марец 2008. (Рутенпрес)- У винчованки за предстояцу Вельку ноц котру означа вирнїки котри тото християнске швето рахую по новим календаре, предсидатель Вивершней ради Войводини, Боян Пайтич им пожадал же би “вельке християнске швето препровадзели у мире и благостану, виполнєти зоз радосцу и виру, любову спрам ближнїх”.
        Вельконоцну винчованку припаднїком рускей заєднїци упуцел и Национални совит рускей националней меншини и його предсидатель Славко Орос.У поруки ше гвари же би Велька ноц була час добрей надї котра дава порив розвою нашей заєднїци и єй добрих одношенїох зоз народами котри вєдно зоз нами жию у окруженю.

Догварка зоз нашим КУД и здруженями
22. марец 2008. (Рутенпрес) - Национални совит Русанцох нєшка соботу, 22. марца, у Руским Керестуре орґанизує роботну догварку представительох Националного совиту зоз предсидателями, лєбо представителями наших КУД и здруженьох.
         Тема сходу плани и програми, як и одредзени почежкосци у роботи КУД, здруженьох, алє и подручних канцеларийох Националного совиту по местох дзе жию Руснаци, у 2008. року. На схадзки у Руским Керестуре представительом КУД и здруженьох буду уручени и прикладнїки найновшого зборнїка нотних и авдио-записок "Ружова заградка 1990-2007", а будзе догварене и о потреби друкованя других репрезентативних материялох нашей заєднїци.
        Як наглашене у поволанки - присуство за представительох шицких КУД и здруженьох, чию порядну роботу з часци финансує Национални совит - обовязне, а представителє длужни пририхтац и кратки звит о планог и проблемох у своєй роботи.
         Схадзка представительох Националного совиту и наших КУД и здруженьох будзе отримана у просторийох Дома култури, зоз початком на 10 годзин.

Премиєра дзецинскей монодрами
22. марец 2008. (Рутенпрес) - На нєдзелю, 23. марца, у Руским Керестуре будзе отримана премиєра дзецинскей монодрам “Залюбена до кравки Славки”.
         У Велькей сали Дома култури, млада ґлумица Адрияна Надь виведзе спомнуту монодаму котру написал Роберта Такарича, а режирал ю Владимир Надь Ачим.
         Монодрама пририхтана у продукциї Месного одбору Рускей матки Руски Керестур, а початок премиєри на 19,30 годзин.

Спозореня на потребни комунални роботи
21. марец 2008. (Рутенпрес) - На нєдавней схадзки представительох керестурских здруженьох и орґанизацийох зоз чолнїками Месней заєднїци, бешедоване о роботней акциї 5. априла и дати вецей предлоги о дзепоєдних комуналних роботох у валалє.
         Так наглашена нєобходносц предлуженя започатого ушореня атмосферскей канализаци а представителє Цековного одбору планую ушориц банкини на бетонскей драги до Водици.
        Вони тиж наглашели же им будзе потребна и фахова помоц коло вибору нових древкох за садзенє до церковней порти, понеже того року планую повинїмац стари и дотирвали.
        Присутни визначели и нєсовисне справованє дзепоєдних тарґовцох у валалє, котри през ноц охабяю шкатули и друге шмеце опрез своїх предавальньох, окреме то нєпримеране у центре Керестура, обок коло Дзецинскей заградки "Бамби".
         Ґу тому, як гварене, у центре Керестура - опрез трафикох и на других местох хибя кошарки за шмеце, котри би там требало покласц пре чистейши и ушоренши валал.

Янко Мудри прешол далєй
21. марец 2008. (Рутенпрес) - Янко Мудри зоз Руского Керестура прешол до дальшого кругу змаганя, после свойого трецого наступу у ТВ емисиї "З танцом ґу сном" на ТВ Пинк.
        У трецей емисиї, стреду, 19. марца, Романа и Янко Мудри танцовали салсу и од фахового жирия и жирия новинарох достали по тераз найвекши похвали и оцени, окреме за Янково шлєбодне танцованє.
        Зоз 27 бодами (гласами) Янко и Романа виборели директни пласман до шлїдуюцей емисиї, котра ше отрима 26. марца.
       Най здогаднєме - Янко Мудри танцує за рускокерестурски Дом култури, за його технїчне и друге опреманє, та з тим на красни способ презентує и Руски Керестур и Руснацох у Сербиї.
       Тото презентованє Руснацох ширшей явносци у Сербиї прейґ ТВ Пинк стреду, 19. марца, було ище упечатлївше, понеже у студию, емисию и Янково танцованє директно провадзели и коло трицец Керестурци, з дзепоєднима водитель и бешедовал, а у Студию була розвита и наша руска застава зоз гербом.
        Одход до студия ТВ Пинк на директну учасц у ТВ емисиї "З танцом ґу сном" пре потримовку Янкови Мудрийови, орґанизовал керестурски Дом култури и Месна заєднїца. Було очиглядне же самому Янкови Мудрийови тота директна потримовка и "навиянє" барз вельо значели за розбиванє треми и вельо шлєбоднєйше танцованє, як у перших двохй наступох у тей забавно-гуманитарней емисиї на ТВ Пинк. 

Обряди и Богослуженя предводзи кир Георгий
20. марец 2008. (Рутенпрес) - У Руским Керестуре, у шедзиску Апостолского еґзархату за грекокатолїкох у Сербиї и Чарней Гори, на нєдзелю, 23. марца - Велька ноц.
         Нєшка, 20. марца, у Керестуре Желєни штварток, и до Руского Керестура приходзи и наш преосвящени владика, кир Георгий Джуджар, апостолски еґзарх за грекокатолїкох у Сербиї и Чарней Гори, котри у Керестуре будзе пребувац под час Вельконоцних шветох.
       Нєшка вечар, з початком на 18 годзин, у керестурскей Катедралней церкви св. о. Миколая будзе отримана Вечурня зоз Службу Божу Василия Велького и зоз символичним умиваньом ногох одборцом - членом Церковного одбору рускокерестурскей церкви.
       На ютре, на Вельки пияток, од 8 годзин будзе служена Утриня, зоз читаньом дванац страсних євангелийох. Истого дня, на 15 годзин будзе отримана Вечурня зоз покладаньом плащанїци Исуса Христа до гроба, у народзе наволана як обряд Исусового хованя зоз викладаньом його плащанїци у церкви, так же на Вельки пияток и соботу, вирни маю можлївосц за молитву при Исусовим гробе.
         На Вельки пияток од 17,20 годзин у церкви започнє Дзевятнїца до Божого милосердия, а од 19 годзин, у сали Каритасу будзе проєкция филма "Пасия".
         На Вельку соботу, 22. марца, од 8 годзин у керестурскей церкви будзе отримана Єрусалимска утриня пред Божим гробом, а на вечар, од 20 годзин - Пасхалне бдиниє - Всеночне зоз Воскресну утриню.
        На нєдзелю, 23. марца, на Вельку ноц, у Керестуре буду отримани два Богослуженя - рано од 8 и дополадня - Велька архиєрейна Служба Божа од 10 годзин, зоз пошвецаньом Пасхи у порти керестурскей церкви, а Вельконоцна Вечурня на нєдзелю будзе од 18 годзин. У случаю подлей хвилї, Паска будзе пошвецена у самей церкви, як и у салох у порти керестурскей церкви. Як наявене, Вельконоцней Архиєрейней Служби Божей будзе присуствовац и предсидатель Скупштини Автономней Покраїни Войводини Боян Костреш, а очекує ше и приход велїх госцох-священїкох, як и вирних зоз других наших местох.
        Шицки обряди и Богослуженя з нагоди Вельконоцних шветох, у Руским Керестуре будзе предводзиц преосвящени владика, кир Георгий Джуджар. На Перши и Други дзень Велькей ноци, у керестурскей церкви Богослуженя буду отримовани як на швета, з тим же на вовторок, 25. марца, у Богослуженьох будзе и мированє.
         Тиж так, на пондзелок, на Перши дзень Велькей ноци, у манастире малих шестрох на Циґлашоре, будзе отримане Богослуженє зоз мированьом, од 16 годзин. Вшелїяк, як то по традициї, на пондзелок и вовторок, Першого и Другого дня Вельконоцних шветох, хлапци и дзивчата буду ходзиц по облїваню.
        На Вельки пияток и на пондзелок, 24. марца, у Руским Керестуре нєроботни днї, так же нє будзе анї настава у рускокерестуркей ОШиҐ "Петро Кузмяк".

 

Догварка зоз нашим КУД и здруженями
20. мареец 2008. (Рутенпрес) - Национални совит Русанцох на соботу, 22. марца, у Руским Керестуре орґанизує роботну догварку представительох Националного совиту зоз предсидателями, лєбо представителями наших КУД и здруженьох.
        Тема соботового сходу буду плани и програми, як и одредзени почежкосци у роботи КУД, здруженьох, алє и подручних канцеларийох Националного совиту по местох дзе жию Руснаци, у 2008. року.
       На схадзки у Руским Керестуре представительом КУД и здруженьох буду уручени и прикладнїки найновшого зборнїка нотних и авдио-записох “Ружова заградка 1990-2007”, а будзе догварене и о потреби друкованя других репрезентативних материялох нашей заєднїци.
        Як наглашене у поволанки - присуство за представительох шицких КУД и здруженьох, чию порядну роботу з часци финансує Национални совит - обовязне, а представителє длужни пририхтац и кратки звит о планог и проблемох у своєй роботи.
         Схадзка представительох Националного совиту и наших КУД и здруженьох будзе отримана у просторийох Дома култури, зоз початком на 10 годзин.

Пораєнє Керестура 5. априла
20. марец 2008. (Рутенпрес) - Добродзечна роботна акция на пораєню Руского Керестура, з нагоди Дня планети жеми будзе отримана 5. априла - догварене на сходзе представительох Месней заєднїци дружтвених и привредних орґанизацийох и установох валала.
        Як вчера порадзене, у случаю подлей хвилї 5. априла, роботна акция будзе отримана о тидзень - 12. априла, а координаторе роботней акциї буду керестурска Месна заєднїца и Еколоґийни рух, а орґанизаторе - кажда орґанизация и здруженє окреме.
         На сходзе такой утвердзени конкретни роботи каждей орґанизациї и здруженя, а уж того тижня, школяре и члени Еколоґийного руху на вецей местох посадза коло 100 древка котри од Општинского еколоґийного фонду сцигли вчера до Руского Керестура.
        Велї здруженя уж и почали з дзепоєднима акциями на ушореню свойого простору, та так Здруженє рибарох нєдавно очисцело пристанїще на беґелю, а 5. априла буду чисциц бент и беґель од рижного одпаду, од вельочисленей пластичней амбалажи, и у тей роботи поможу и школяре керестурскей Школи.
        Тиж так, и Здруженє ловарох Керестура ма свойо порядни роботни акциї, 5. априла планую попораїц простор коло свойого Дому, а кед зоз Еколоґийного фонду Општини сцигню древка за садзенє, уключа ше до їх садзеня.
         Еколоґийни рух и його секциї ше остараю за садзенє квеца до жардинєрох на вецей местох по валалє, як и, вєдно з Месну заєднїцу, за пораєнє центра валала.
        До роботней акциї ше уключа и школяре на ушореню простору коло школских будинкох, огньогасци предлужа пораєнє коло свойого дому, До акциї ше уключа члени здруженя пензионерох, ремеселнїкох, та Спортского дружтва "Русин", а на помоци буду и млади зоз "Пакта Рутенорум". У роботней акциї 5. априла буду участвовац и роботнїки привредних орґанизацийох валала, тиж на ушореню опрез своїх будинкох - "Юарбис" и "АБЦ ФУД", котри даю потребни превозки.
         Керестурски Каритас найвироятнєйше орґанизує акцию на ушореню у и опрез обисцох старох особох, до котрей буду уключени и школски дзеци. Орґанизацийом и здруженьом чийо представнїки нє присуствовали вчерайшей догварки, Месна заєднїца пошлє о тим информациї, же би ше уключели до роботней акциї 5. априла.
         Церковни одбор керестурскей церкви уж попораєл простор коло церковних обєктох, та порту и Водицу пред наступну Вельку ноцу, но и його члени буду уключени до роботней акциї, насампредз на предлуженю пораєня и ушореня теметова.
         Як вчера догварене, роботна акция будзе тирвац од 9 до 13 годзин, а после пораєня у своїх обєктох, централна робота добродзечней роботней акциї 5. априла будзе предлужена на пораєню теметова.
         Як гварене на вчерайшим сходзе - таки роботни акциї би ознова мали зажиц каждого року, а значне же представителє шицких здруженьох и орґанизацийох потримали предлог Месней заєднїци о пораєню валала.

О теми Руски Керестур - општина
20. марец 2008. (Рутенпрес) - На соботу, 22. марца, Странка желєних зоз Червинки у Руским Керестуре орґанизує трибину на тему Руски Керестур-општина, як и о дзепоєдних актуалних питаньох вязаних за месни заєднїци.
         На питаня "Прецо гражданом Руского Керестура нє даю право на општину и "Як ше з новима законами цо ше их пририхтує, оцудзує маєток гражданох Руского Керестура", будзе одвитовац предсидатель червинскей Странки желєних Херцен Радонїч, котри и предсидатель Совиту червинскей Месней заєднїци.
         Трибина на соботу будзе отримана у Малей сали Дома култури, зоз початком на 19 годзин. 

Прилапени план приходох у 2008. року
19. марец 2008. (Рутенпрес) - Цалосни приходи Месней заєднїци Руски Керестур у тим року заплановани на скоро 25,5 милиони динари - гварене на схадзки Совиту Месней заєднїци, пондзелок, 17. марца.
       Од тей суми, прилїв до месного самодоприносу плановани на 8,5 милиони динари, цо за пол милиона вецей у одношеню на прешли рок, приходи од предаваня услугох, плановани на 6 милиони 670 000 динари, план других приходох виноши 430 000 динари, а од кулскей општини приход плановани на 550 000 динари. Ґу тому, як то уж усоглашене зоз кулским ЯП "Завод за вибудов", Руски Керестур за рижни комунални роботи и инвестициї у тим року достанє 9 милиони 251 000 динари.
        Найвироятнєйше же тоти приходи Месней заєднїци нє и конєчни, понеже нє мож плановац кельо ше средства достанє на основи конкурованя за наменски средства до Републичних орґанох, односно до Пораїнского фонду за капитални укладаня Войводини.
        Попри предлужованя уж запланованих роботох на Совиту заключене же у локалней самоуправи потребне конкуровац зоз новима проєктами за чиї виробок кулска општина у своїм буджету за 2008. рок опредзелєла 80 милиони динари.
        З оглядом на нє мали средства котри ше видвоює за драгово трошки, на пондзелковей схадзки Совиту повторена и одлука о купованю єдного авта за потреби Месней заєднїци.

Кельо будзе коштац здрава вода
19. марец 2008. (Рутенпрес) - Совит керестурскей Месней заєднїци пондзелок, 17. марца, принєсол одлуку о виробки Студиї о оправданосци, як и идейного проєкта за випоручованє здравей води за цали валал, условно поведзено - за свойофайтову фабрику води.
       Студия и идейни проєкт би мали одвитовац на терашню найвекшу дилему - о цени коштаня будуцей здравей води, односно о цени єдного кубика такей води, котру би Кереструци доставали прейґ водоводу.
       Най здогаднєме - вода очисцена од арсену и других чкодлївих материйох, у Керестуре достата прейґ пилот-построєня, єдиного такого у Сербиї, а тераз найвекши проблем як тоту здраву воду довесц до каждого обисца и кельо би ю Керестурци плацели.
        После доставаня тей студиї, Месна заєднїца будзе преберац дальши крочаї по питаню ришованя проблема зоз доручованьом здравей води цалому валалу.

По юний ше будзе чекац на одвит "АБЦ ФУД"
19. марец 2008. (Рутенпрес) - Предконтракт о купованю жеми за будуцу индсутрийну зону од "АБЦ ФУД" нєдавно доручени предсидательови Управного одбору того подприємства и чека ше на одвит Акционерского дружтва по тим питаню, гварене на остатнєй схадзки Совиту керестурскей Месней заєднїци, 17. марца.
        Кед же по 1. юний зоз власнїком жеми предвидзеней за будуцу индустрийну зону нє будзе посцигнута догварка, за тото ше будзе глєдац иншаки ришеня - гварене на Совиту керестурскей Месней заднїци.

Школяре у нащиви Месней заєднїци
19. марец 2008. (Рутенпрес) - Прешлого тижня представителє школярох трох оддзелєньох шестей класи ОШ "Петро Кузмяк" зоз свою наставнїцу гражданского вихованя Меланию Бояновичову, нащивели Месну заєднїцу.
        З тей нагоди секретарови МЗ Якимови Надьови школяре придали проспекти проєкта "Граждан", котри виробели на предмету Гражданске воспитанє.
       Проєкт облапя два часци назвами "Лєшик" и "Базен", у котрих школяре дали свойо видзенє и предкладаня за ушоренє и унапредзенє тих локацийох.
        Школяре секретарови МЗ пренєсли похвали своїх парнякох же прилапени и їх скорейши суґестиї, та поставене ошвиценє у "Ґимназийовей" и у улїчки коло парохиї, лєжаци полицайци пред будинком школи, як и нови транспортни знаки.
        Спрам словох наставнїци Бояновичовей, школяре ше на таки способ уча активно преберац граждански инициятиви и позитивно уплївовац на свой штредок.

Поховани Дюра Папгаргаї
18. марец 2008. (Рутенпрес) - У Руским Керестуре вчера, 17. марца, поховани єден з наших найвизначнейших писательох, театрални роботнїк, режисер, идейни творец и орґанизатор наших културних манифестацийох, културни и дружтвени роботнїк - Дюра Папгаргаї, котри всоботу, 15. марца, умар у Новим Садзе у своїм седемдзешат другим року живота.
        Попри Керестурцох, випровадзаню Дюру Папгаргая на його остатню драгу присуствовали представителє Националного совиту Руснацох, колектив новосадского "Руского слова", дзе Папгаргаї препоровадзел свой роботни вик, Руского народного театра "Петро Ризнич Дядя", дзе Папгарагї зохабел свой тирваци шлїд; Рускей редакциї Радия и телевизиї Нови Сад, керестурского Дома култури и Школи “Петро Кузмяк”, представителє Дружтва писательох Войводини, културно-уметнїцких дружтвох зоз наших местох, наших орґанизацийох, установох и институцийох, писателє и нашо явни и културни роботнїки.
        Вчера на поладнє, у Велькей сали керестурского Дома култури отримана Комеморативна схадзка, на котрей о творчей роботи и дїлу котре нам Дюра Папгаргаї занавше зохабел до нашлїдства, у мено Одбора за културу Националного совиту и Театра Петро Ризнич Дядя бешедовал Михайло Зазуляк.
       У мено "Руского слова”, о роботи Дюру Папгаргая бешедовал директор тей Установи Владимир Паланчанин, а у мено Дружтва писательох Войводини, дзе Папгаргаї бул член Управного одбору - його предсидатель Йован Зивлак.
         На концу, од Дюру Папграгая у мено Националного совиту и шицких наших орґанизацийох ше одпитал Славко Орос, предсидатель Националного совиту Руснацох.
        Исти особи, о подоби и дїлу Дюри Папгаргая бешедовали и над труну, у каплїчки керестурского теметова. Обряд хованя Дюру Папгаргая предводзел рускокерестурски парох о. Юлиян Рац, а обряд зоз шпиваньом провадзели и члени священїцкей фамелиї Холошняйових зоз Дюрдьова.
        На свою остатню драгу Дюра Папгаргаї випровадзени зоз виривками своєй поезиї хтора характеризовала його цалокупни поетски опус.
       На концу обряду, члени керестурского Хору одшпивали облюбену шпиванку Дюру Папгаргая - "Бачко, моя Бачко", котру спонтано прилапели присутни, и зоз ню Дюра Папгарагаї випровадзени на його остатню драгу.

Яна Еделински на Републичней смотри освоєла перше место
17. марец 2008. (Рутенпрес) - Яна Еделински, школярка керестурского Оддзелєня кулскей Школи за основне музичне образованє, всоботу, 15. марца, освоєла перше место на Републичним фестивалє уметнїцкей тамбури.
        Яна Еделински школярка штвартей класи ШОМО, односно седмей класи керестурскей ОШ "Петро Кузмяк", на тим змаганю зоз граньом на бас-прим тамбури освоєла 93,20 боди, од можлївих сто. Змаганє отримане у Новим Садзе, у Музичней школи "Йосип Славенски", а попри Еделинсковей, на змаганю участвовали ище штверо школяре ШОМО зоз Кули, котри тиж освоєли високи пласман.
        Наставнїца Яни Еделинсковей у керестурским Оддзелєню ШОМО Геленка Будински Семан.

Отримана премиєра дзецинскей представи
17. марец 2008. (Рутенпрес) - Вчера, 16. марца, у Руским Керестуре отримана премиєра дзецинскей представи "Перша любов” Силвестера Дорокхазия, у режиї Ксениї Бодянцовей.
      Представа "Перша любов" поробена у продукциї Дзецинскей ґрупи Драмского студия АРТ рускокерестурского Дома култури. У представи участвую аж штернацецеро ґлумци основношколского возросту, котри досц розбавено винєсли тематику зоз живота билїзкого тому возросту, насампредз о залюбльованю и першей любови.
       Сценоґрафию за представу "Перша любов" виробела Биляна Роман, костимоґраф була Таня Орос, а музику вибрали Иван Еделински и Сашо Палєнкаш.
       Зоз представу "Перша любов", у режиї Ксениї Бодянцовей, Дзецинска драмска ґрупа Студия АРТ Дома култури будзе участвовац и на Општинскей смотри дзецинских театралних витвореньох концом марца у Крущичу.

Була Квитна нєдзеля пред наступну Вельку ноцу
17. марец 2008. (Рутенпрес) - Рускокерестурци вчера, 16. марца, преславели Квитну нєдзелю и ступели до Страсного тижню, пред найвекшим християнским шветом - Христовим воскресеньом - Вельку ноцу, котра у Керестуре будзе на нєдзелю, 23. марца. Вчера, на Квитну нєдзелю, у керестурскей Катедралней церкви св. о. Миколая домашнї священїки служели штири Служби Божо, чия нащива була окреме велька, та так лєм у Малей Служби було коло 550 вирних.
       После Богослуженьох, по традициї вирним дзелєни багнїтки, пошвецени у Утринї. Як свойо перше Богослуженє, вчерайшу Вельку службу Божу у Руским Керестуре служел нови коцурски капелан зоз Македониї о. Оливер Тантушев, и после каждого Богослуженя дзелєл свой неоєрейски благослов.
       Од Желєного штвартку, у Руским Керестуре будзе пребувац и преосвящени владика, апостолски еґзарх за грекокатолїкох у Сербиї и Чарней Гори, кир Георгий Джуджар, котри од того дня будзе предводзиц Богослуженя з нагоди Велькей ноци.
        Як наявене зоз керестурскей церкви, на Паску, односно сам дзень Велькей ноци, 23. марца, Велькей служби Божей будзе присуствовац и предсидатель Скупштини АП Войводини Боян Костреш.

Прешлого тижня скупштина
17. марец 2008. (Рутенпрес) - Керестурски ловаре у прешлей сезони одштрелєли 327 заяци, 232 фазани и 12 сарнї - винєшене на порядней Рочней скупштини рускокерестурского Ловарского дружтва “Ярабица”, котра отримана пред вецей як тижньом - 8. марца. У истим периодзе госци зоз иножемства, одштрелєли 8 сарняки штреднєй вредносци, 25 заяци и 5 фазани.
       Mедзи двома скупштинами ловаре до своїх шорох прияли трох приправнїкох и єдного члена, отримали змаганє лабрадорох, преляли асфалт коло ловарского дому, а обновели и єдну часцу инвентару.
       Пре вельки спореня зоз сушеднима-кулскима ловарами коло гранїцох своїх ловищох, порушана и инициятива за виход керестурского ЛД "Ярабица" зоз Општинского здруженя ловарох - чуло ше на Скупштини керестурских ловарох.
       Спрам одлуки Скупштини, на наиходзацей Виберанковей скупштини Општинского ловарского здруженя "Яребица", делеґацию керестурских ловарох буду представяц шицки предводнїки ловарских ґрупох. 

Драмски аматеризем у опадованю
15. марец 2008. (Рутенпрес) - Репертоар и тогорочного Драмского меморияла указує на факт же драмски аматеризем по наших местох у опадованю - гварене на схадзки Орґанизацийного одбору тогорочного Драмского меморияла Петра Ризнича Дядї, штварток, 13. марца.
         За тото нєт оправданя, понеже у шицких наших местох єст условия за нормалну роботу, та и потребни финансийни средства, гварел на схадзки Орґанизацийного одбору предсидатель Националного совиту Руснацох Славко Орос. Як наглашел Орос, дружтва по наших местох, односно подружнїци НС, порядно доставаю средства за роботу, котри прешлого року, по подружнїци, виношели вецей як 120 000 динари рочно.
         За витворенє театралних представох мож порядно и на час конкуровац и до покраїнских секретариятох, средства ше вец розподзелює прейґ НС, а часц средствох би мала обезпечиц и локална самоуправа.
        Дружтва по наших местох би у першей половки рока повагу мушели дац тим манифестацийом котри перши на шоре, як цо то праве случай зоз смотру нашей театралней творчосци - Драмским мемориялом Петра Ризнича Дядї. И на останєй схадзки Одбора за културу Националного совиту, кед бешедоване о розподзельованю средствох, заключене же основни критериюм за доставанє пенєжу за театралну дїялносц будзе учасц на Драмским мемориялє.

 

Орґанизацийни одбор Драмского меморияла
14. марец 2008. (Рутенпрес) - Тогорочни, Штерацети драмски мемориял Петра Ризнича Дядї будзе отримани од 11. по 20. април, утвердзене на схадзки орґанизацийного одбору, котра вчера, 13. марца,отримана у Руским Керестуре.
        Спрам терашнїх спознаньох сиґурне же на тогорочним Мемориялє од представох за старших, по руски буду виведзени штири цаловечарши представи - зоз Руского Керестура, Коцура и два представи нашого професийного Театра “Петро Ризнич Дядя”.
        Зоз Руского Керестура, будзе участвовац представа "Гладни", у режиї Владимира Надя Ачима, Драмского студия АРТ Дома култури; зоз Коцура "Меркуй жени", коцурскей Роботней єдинки Дома култури Вербас, а РНТ "Петро Ризнич Дядя" будзе участвовац зоз своїма остатнїма двома театралнима витворенями - "Приповедка о єдней страсци" и "Кинґ Конґ".
       Тиж так, сиґурне же на тогорочним Мемориялє будзе участвовац и представа КУД "Яким Гарди" зоз Петровцох, зоз Горватскей - "Мачка зоз дзевец животами", котру з режисером Якимом Ердельом, по руски пририхтали тамтейши аматере.
         Заплановане же и представа за старших у вербаским КПД "Карпати", тиж "Мачка зоз дзевец животами", котра у пририхтованю зоз режисером Владимиром Надьом Ачимом, по Драмски мемориял будзе закончена.
         У Коцуре и КУД "Жатва" пририхтує младежску представу "Перша любов" у режиї Силвестера Дорокхазия, медзитим, пре почежкосци у отримованю пробох , тота представа нє будзе закончена по тогорочни Мемориял.
        Попри спомнутих, на Драмским мемориялє буду участвовац и три першонаградзени монодрами зоз прешлорочного Фестивала монодрами у Новим Садзе, як и прешлорочна найлєпша монодрама у Войводини - "Барон Мингавзен".
        Драмски мемориял того року понукнє досц богату продукцию дзецинских представох.Од 14. по 18. април, на керестурскей сцени буду виведзени пейц театрални витвореня за дзеци.
        КПД "Карпати" зоз Вербасу участвує зоз двома дзецинскима представами - "Шнїгочка и седем патульки" по руски и "Маскенбал", по сербски, обидва у режиї Нади Лендєровей.
        Драмски студио АРТ керестурского Дома култури на Мемориялє будзе участвовац зоз представу "Перша любов", у режиї Ксениї Бодянцовей, а Месни одбор Рускей матки Руски Керестур, зоз дзецинску монодраму "Залюбена до Кравки Славки".
         Дружтво Руснацох зоз Суботици пририхтало бабкарску представу за дзеци - "Будз тото цо ши", у режиї Бошка Бошкова. Як догварене на вчерайшей схадзки, под час Меморияла будзе орґанизована вистава подобових роботох Владимира Нярадия зоз Вербасу.
        За предсидателя Орґанизацийного одбору Штерацетого драмского меморияла вибрани Владимир Малацко, окончователь длужносци директора керестурского Дома култури, а як и до тераз, под час Меморияча будзе виходзиц и його глашнїк - "Билтен меморияла".

Промоция нового числа МАК и ДВД
14. марец 2008. (Рутенпрес) –Нєшка ше у Руским Керестуре у Доме култури зоз почтком на 19 годзин отрима промоцию Младежского часопису МАК.
        Найновише число МАК пошвецене зявеню алтернатвного театру при Руснацох и зтей нагоди младежски часопис приноши дазкельо тексти младих новинарох на тоту тему.
        Тиж так на промоциї у Руским Керстуре будзе представене и окремне МАК-ово виданє ДВД, "Театер з МАК-ом- Хлєба и забави", на котрим зазначени шейсц театрални представи по руски котри маю характер алтернативней естетики.
       Нєшка вечар вєдно зоз промоцию будзе и проєкция єдней представи зазначеней на ДВД.Наявена проєкция "Спитованя" у режиї Владимира Надя Ачима.

Янко Мудри прешол до другого кругу
14. марец 2008. (Рутенпрес) - Керестуртец Янко Мудри, котри участвує у другим циклусу забавно-гуманитарней емисиї на ТВ Пинк “З танцом ґу гвиздом”, после танцованя у другей емисиї того сериялу, 12. марца, прешол до другого кругу змаганя.
        Мудри, котри у емисиї "З танцом ґу гвиздом" танцує зоз шпивачку Роману, за танцованє "инґлиш-валцеру" од жирия достал 27 боди, исто як и у першей емисиї, так же вєдно зоз таїнственима гласами, по тераз освоєл 66 боди и дзелї седме место од дзешец парох.
         Шлїдуюца емисия у котрей Янко Мудри и Романа танцую за технїчне опреманє рускокерестурского Дома култури будзе на стреду, 19. марца. 

1 рок роботи
 

13. марец 2008.

 

Витворене

  • за 1 рок зме постали найнащивенши сайт на руским язику

  • понукли зме “живи” сайт дзе шицки можу присц до вираженя, комуниковац єдни з другима

  • пущели зме слику и писню зоз Руского Керестура по цалим швеце

  • креирали зме форум на котрим ше нєпреривно розправя о рижних темох

  • приношиме швижи вистки зоз Руского Керестура ...

Треба витвориц

  • збогациц сайт зоз текстами о Руским Керестуре и Руснацох

  • анимирац шицких структури у валалє и ширше же би участововали у преширйованю сайта зоз информациями, оглашками, текстами о активносцох у привреди, спорту, о вирским и духовним живоце, образованю, култури ...

  • попрекладац основни тексти и информациї на сербски и английски язик же би зме цо лєпше презентовали Руски Керестур

  • буц вяза медзи шицкима струкутрами у валалє и медзи шицкима Руснацами без оглаяду дзе ше находза ...

И дакус статистики

                            (за векшу слику прициснуц на слику)

 

Гала будзе закрита
13. марец 2008. (Рутенпрес) - Початком того тижня, у Руским Керестуре предлужени роботи на вибудови школско-спортскей гали, тераз на поставяню закрица на галу.
        За дальши роботи на школско-спортскей гали, Месна заєднїца прешлого року од Покраїнского фонду за капитални укладаня достала 36 милиони динари. Роботи на кладазеню закрица на рускокерестурску школско-спортску галу окончує Будовательне подприємство "Слован" зоз Селенчи.

Роботи коло каплїчки
13. марец 2008. (Рутенпрес) - У Руским Керестуре у цеку роботи на бетонованю приходних дражкох и дополнююцих паркинґох за авта коло каплїчки на теметове.
        Початком того рока, у януаре, коло каплїчки поставене и явне ошвиценє, а терашнї роботи окончує БП "Поп-ґрадня" зоз Темерину.
        Роботи на инфраструктури коло каплїчки финансує ше зоз средствох Покраїнского фонду за локалну самоуправу и медзиопштинске сотруднїцтво, за цо керестурска Месна заєднїца, на основи конкурса, прешлого року достала милион динари.
        Ґу тому, часц роботох коло каплїчки будзе финансована и зоз . комуналних средствох, котри з кулскей општини припадаю Керестуру, а у априлу заплановане и поставаянє огради коло каплїчки. 

Контраченє сладкей кукурици
12. марец 2008. (Рутенпрес) - Керестурска Фабрика змарзнутей желєняви "АБЦ" и того року зоз приватнима продукователями контрачи и продукцию свойого найзначнєйшого продукту - сладкей кукурици.
        Kонтраченє сладкей кукурици з кооперантами започало тих дньох, будзе тирвац по шатву, а по тераз кооперанти зоз Руского Керестура законтрачели коло 10 гектари под сладку кукурицу.
       Сладку кукурицу ше контрачи по 11 евроценти за килограм (0,11 еври), а на основи контракта, Хладзальня обезпечує нашенє и, за тераз, тлаченє сладкей кукурици.
       Кед ше сце ламац з комбайном, найменша поверхносц за контраченє виноши 3 гектари, а мож законтрачиц и менши поверхносци, з тим же вец ламанє будзе ручне.
      Поверхносци котри "АБЦ фуд" того року планує зоз приватнима кооперантами нєогранїчени, а зоз дзепоєднима фирмами, за тогорочну продукцию сладкей кукурици уж законтрачени коло 700 гектари.

Янко Мудри нєшка ознова на ТВ Пинк
12. марец 2008. (Рутенпрес) - У другей емисиї "З танцом ґу сном" на ТВ Пинк, нєшка вечар, 12. марца, керестурец Янко Мудри и його танєчна партнерка - шпивачка Романа, буду танцовац “инґлиш-валцер”.
        Учашнїк нового сериялу забавних емисийох на Телевизиї Пинк "З танцом ґу сном" Янко Мудри зоз Руского Керестура, зоз свою танєчну партнерку, познату шпивачку Роману, прешлого тижня, 5. марца, успишно стартовал у тей забавно-гуманитарней емисиї.
        Як и други танєчнїки-аматере у тим сериялу, котри за пару достали даєдну познату естрадну гвизду, и Янко Мудри у тим сериялу емисийох на ТВ Пинк танцує за "витворенє свойого сна".
       Най здогаднєме - Янко Мудри танцує за рускокерестурски Дом култури, за його технїчне и друге опреманє, та з тим на красни способ презентує и Руски Керестур и Руснацох у Сербиї. У представяню Янка Мудрия на ТВ Пинк, 5. марца були емитовани и даскельо кадри бини керестурского Дома култури, котри барз виродостойно указали потребу за єй реновираньом.
        О своїм першим наступе, 5. марца, Янко Мудри за Рутенпрес лєм накратко гварел же мал барз вельку трему, но же є и з наступом и зоз свою танєчну партнерку барз задовольни, а аж после трецей емисиї за танєчнїкох годна гласац и публика.

Обнова реґистрацийох по конєц марца
12. марец 2008. (Рутенпрес) - По 31. марец потребне обновиц реґистрацию польопривредних ґаздовствох, же би ше могло достац шицки стимулациї у польопривреди котри у тим року одредзело Министерство польопривреди - наглашує Милан Зелькович, шеф Експозитури Управи трезора у Кули.
        Попри обнови реґистрациї, по 31. марец мож окончиц и цалком нове реґисторванє, а кед ше реґистрацию обнови, лєбо реґиструє после того датума, стимулациї за реґистровани польопривредни ґаздовства годно витвориц аж идуцого року.
        Спрам словох Милана Зельковича, по 8. марец того року на териториї кулскей општини реґистровани 3 033 польопривредни ґаздовства - 373 вецей як концом прешлого рока.
         Од того числа, по 8. марец 1 481 ґаздовство поднєсли вимогу за обнову реґистрациї свойого ґаздовства, а 1 179 ґаздовства ище нє, и муша то окончиц по 31. марец, кед жадаю хасновац шицки стимулациї котри понука Министерство польопривреди. За обнову реґистрациї потребне пополнїц такволани формулар "три" хтори, уж реґистрованим ґаздовством послати по пошти.
       Зелькович визначел же з Руским Керестуре, дзекуюци и правнїкови Юлиянови Медєшийови зоз "Юарбису", сотруднїцство у поглядзе реґистрованя польопривредних ґаздовствох наймасовнєйше и найлєпше.
       У Руским Керестуре реґистровани 533 польопривредни ґаздовства, а од того числа 368 ґаздовства уж обновели реґистрацию за тот рок.

План ґенералней реґулациї Керестура
12. марец 2008. (Рутенпрес) - До половки того року би мал буц виробени План ґенералней реґулациї, односно детальни урбанїстични план Руского Керестура, на основи контракта котри вчера, 11. марца, подписали чолнїки кулского ЯП “Завод за вибудов” и ЯП “Завод за урбанїзем Кула-Оджак”.
         Попри за Керестур, План ґенералней реґулаци до половки того рока будзе виробени и за Сивец и Липар. Тиж так, спрам подписаного контракта, до конца рока будзе виробени и План детальней реґулациї Малого Стапару, з цильом його розвиваня як туристичного места, а як пририхтованє за Шветову конференцию беґельох, котра у септембру того року ма буц отримана у Малим Стапару.
         Попри подписнїкох Контракта - директора "Заводу за вибудов" Бранислава Вуйовича и директора "Заводу за урбанїзем Кула-Оджак" Александра Ачанского, вчерайшому подписованю того Контракта присуствовали и предсидатель Општини Кула Светозар Буквич и предсидатель Дочасового орґану кулскей општини Велибор Милоїчич.

Ютре схадзка Орґанизацийного одбору Меморияла
12. марец 2008. (Рутенпрес) - На ютре, 13. марца, у керестурским Доме култури будзе отримана перша схадзка Орґанизацийного одбору тогорочнохо 40. драмского меморияла Петра Ризнича Дядї.
         Як заплановане, тогорочна смотра театралней творчосци Руснацох у Сербиї ма буц отримана од 11. по 20. април а после ютрейшей схадзки Одбору, мали би буц познати учашнїки тогорочного Штерацетого драмского меморияла.
За Хладзальню законтрачене коло 70 гольти паприґи
11. марец 2008. (Рутенпрес) - Зоз Фабрику змарзнутей желєняви керестурского подприємства "АБЦ фуд", паприґаре по тераз законтрачели коло 70 гольти паприґи, цо виноши коло 70 одсто тогорочней планованей продукциї паприґи у Хладзальнї. Коло 50 гольти паприґи законтрачели керестурски, а коло 20 гольти паприґаре зоз Кули и Деспотова.
        "АБЦ фуд” контрачи паприґу, файти “Амфора” и “Слоново ухо”, кооперантом уж подзелєне и нашенє паприґи за шатву, котре будзе одбите на єшень од придатого количества паприґи. Паприґу ше одкупює по 0,20 еври, односно 20 евроценти за килограм, а треба наглашиц же ше єй контраченє того року окончує по першираз, пре сиґурне обезпечованє тей сировини за продукцию Хладзальнї. У планє же од Хладзальнї кооперанти за паприґу достаню и потребни защитни средства, а гемийну защиту паприґи будзе ше окончовац у сотруднїцтве зоз фаховцами "АБЦ фуд".
        У дакедишнїм Комбинату наглашую же тото контраченє и сотрдуднїцтво з кооперантами треба же би постало каждорочне - з оглядом на потреби Фабрики змарзнутей желєняви пре преширенє продукцийних капацитетох.

Розчисцене пристанїще
11. марец 2008. (Рутенпрес) - Єденац члени Управного одбору керестурского Здруженя спортских рибарох "Коляк", як и даскельо роботнїки керестурского рибалова, внєдзелю, 9. марца, отримали першу тогорочну акцию на розчисцованю пристанїща на беґелю - од корова, дзивякох и рижного твардого материялу.