Архива висткох - април 2007.

ИНДУСТРИЙНА ЗОНА
30. април 2007 - За даскельо мешаци Руски Керестур би требал достац индустрийну зону хтора би требала обезпечиц швидши економски розвой места.
По словог др. Дюри Мученския, народного посланїка у Скупштини Сербиї и члена Совиту Месней заєднїци у Руским Керестуре задлуженого за ришованє того проблема, зоз векшинским власнїком Польопривредного комбината Перши май догварене купованє жеми поверхносци коло 20 гектари хтора ше находзи прейґ бензинскей пумпи, з лївого боку на виходзе зоз Руского Керестура. Тераз предстоя активносци на ришованю правно маєткових одношеньох, односно приношеню нєобходних одлукох Дочасового орґану општини Кула, ЯП "Завод за вибудов", Републичней Дирекциї за маєток и на концу Влади Републики Сербиї.

МЕСНА ЗАЄДНЇЦА МА ФИНАНСИЙНИ ПРОБЛЕМИ
30. април 2007 - Служба Месней заєднїци у перших трох мешацох того року ма вельки финансийни проблеми. У тим периодзе зоз комуналного доприносу на рахунок Месней заєднїци нє уплацени анї єден динар, а прилїв средствох з месного самодоприносу на нїзким уровню бо пензионере, хтори подписали вияву, ище вше нє плаца самодопринос як и польопривредни продукователє. Длуства за потрошену воду виноша коло 2 милиони динари.
Пре таку ситуацию на остатнєй схадзки Совиту Месней заєднїци догварене же би служба ажуровала шицки форми наплацованьох, а же би ше длужнїком послало опомнуца. Тим хтори и после опомнуцох нє вимиря длуства за потрошену воду будзе онєможлївене хаснованє води.

НЄШКА НА МЕМОРИЯЛЄ ПЕТРОВЧАНЄ

30. април 2007 - Нєшка на 39. Драмским мемориялє "Петра Ризнича Дядї" представа Дюру Папгаргая "Далєко гвизда габура" хтору, у режиї Якима Ерделя, виведу драмски аматере КУД "Яким Гарди" зоз Петровцох, Република Горватска.

Представа почнє на 20,30 годзин. Уход 100 динари.

НА ЮТРЕ ПОЧИНА 39. ДРАМСКИ МЕМОРИЯЛ

26. април 2007. - Зоз наступом членох Тетара Александра Духновича зоз Словацкей наютре у Руским Керестуре почина 39. Драмски мемориял "Петра Ризнича Дядї" хтори будзе тирвац по 6. май и на хторим керестурска публика будзе мац нагоду видзиц 12 представи од хторих 10 за старших и два дзецински.
Од ансамблох зоз наших местох на Мемориялє наступя драмски аматере зоз Дюрдьова, Вербасу, Руского Керестура, Шиду и Нового Саду, а як госци, окрем професийного театра зоз Прешова хтори виведу два представи, наступя и драмски аматере зоз Петровцох зоз Горватскей и зоз Кули.
Под час Меморияла будзе отворена вистава малюнкох Владимира Провчия зоз Риєки и отримана трибина на тему "Тетрална дїялносц Руснацох" хтору орґанизує Национални совит Руснацох и РНТ "Петра Ризнича Дядї".

КРАСНИ УСПИХ НАШИХ РЕЦИТАТОРОХ
25. април 2007. - Лидия Костелник у младшим и Мирослав Малацко у штреднїм возросту буду участвовац на Републичней смотри рецитаторох "Поето народу мойого" хтора будзе отримана 18. и 19. мая у Валєву. Вони пласман витворели на Покраїнскей смотри рецитаторох хтора прешлого викенду отримана у Сечню, а на хторей участвовали 163. рецитаторе зоз Войводини у младшим, штреднїм и старшим возросту.
Цецилия Надь у старшим возросту, попри Костелниковей и Малацка у своїх конкуренцийох, вибрани медзи 18 найлєпших рецитаторох на смотри и достали златни дипломи.
На Покраїнскей смотри у Сечню зоз Руского Керестура участвовали и Андрей Орос, Александра Живкович и Мирта Иштванович, а шицких рецитаторох зоз Руского Керестура пририхтал Михайло Зазуляк.

ЗА ПЕРШИ МАЙ СПОРТСКИ ЗМАГАНЯ НА БАЗЕНУ
25. април 2007. - Знагоди Першого мая, Медзинародного швета роботи на керестурским базену буду орґанизовани спортски змаганя у малим фодбалу, одбойки, шаху, пикаду и крос обегованю - одлучене вчера на преширеней схадзки Одбору Месней заєднїци за дружтвени дїялносци и преслави, на хторей були присутни и представителє привредних и дружтвених орґанизацийох и здруженьох граждано.
        Спортски змаганя буду орґанизовани 1. мая на вилєтнїцким месце Базен, а почню на 8 годзин.
         Шицки заинтересовани за участвованє у спортских змаганьох екипно, або поєдинєчно треба цо скорей же би ше приявели Янкови Хомови, директорови ОШ и Ґимназиї "Петро Кузмяк", або Борисови Шайтошови, секретарови Спортского дружтва "Русин".
        За найуспишнєйши екипи и поєдинцох орґанизатор обезпечи награди.

АКЦИЯ ПК "ПЕРШИ МАЙ" ВРЕДЗИ 2.488 ДИНАРИ
25. април 2007. - Вчера на Беоґрадскей берзи вредносц акциї Польопривредного комбината "Перши май" у Руским Керестуре поросла за 20,02 одсто и вредзи 2.488 динари.
У остатнїх 52 тижньох найнїзша вредносц акциї ПК "Перши май" була 1. марца того року и виношела 950 динари, а 12. децембра 2003 року єй вредносц була найнїзша у историї Комбината и виношела 403 динари.
Вредносц акциї Польопривредного комбинату "Перши май" у Руским Керестуре у остатнїх мешац дньох на Беоґрадскей берзи зазначує тижньови рост за по 20 одсто, найвироятнєйше пре значни инвестициї до преширйованя капацитетох и вибудови новей хладзальнї.

СХАДЗКА СИВИТУ МЗ ЗАКАЗАНА ЗА ШТВАРТОК
24. април 2007. - Желько Ковач, предсидатель Совиту Месней заєднїци за штварток 26. април заказал схадзку Совиту на хторей будзе вибрани виводзач роботох на отримованю шмециска.
Члени совиту Месней заєднїци на истей схадзки утвердза дальши активносци на запровадзованю инициятиви за снованє општини Руски Керестур и меную членох комисиї за запровадзованє референдума.
На схадзки будзе слова и о ушореню базена и околїска под час отримованя волонтерского кампу, одредзованю локациї мерней реґулацийней станїци (МРС) за ґаз, додзельованю просторийох за роботу нєвладовим орґанизацийом (НВО), о провадзеню роботи пречисцовача за воду и других питаньох.

Схадзка Совиту будзе отримана у просториї Месней заєднїци з початком на 19 годзин.

ДOГВАРКА О ПЕРШОМАЙСКИХ СПОРТСКИХ АКТИВНОСЦОХ
24. април 2007. - Члени одбору Совиту Месней заєднїци за дружтвени дїялносци и преслави у преширеним составу нєшка утвердза спортски активносци хтори буду запровадзени знагоди першомайских шветох.
Догварка будзе отримана у Месней заєднїци з початком на 20 годзин.

УМАР МИХАЙЛО ВАРҐА, УЧИТЕЛЬ У ПЕНЗИЇ
20. април 2007. - Нєшка у Руским Керестуре, у 67. року живота нєсподзивано умар Михайло Варґа, учитель у пензиї.
         Михайло Варґа народзени 5. новембра 1940. року у Руским Керестуре дзе закончел и основну школу, док учительску школу закончел у Зомборе.
         У Основней школи у Руским Керестуре як учитель почал робиц 1958. року. Директор образовного центру "Петро Кузмяк" бул у периодзе од 1985. по 1993. рок, а потим єден час бул воспитач у интернату керестурскей Ґимназиї.
         Михайло Варґа бул секретар Месней заєднїци Руски Керестур од 1996. по 2001. рок.
         Варґа ше окреме анґажовал у роботи Рускей матки чий предсидатель бул од 1993. по 1999. рок, а шмерц го застала на функциї предсидателя Месного одбору Рускей матки у Руским Керестуре.
         Комеморативна схадзка з нагоди шмерци Михайла Варґу будзе отримана наютре 21. априла на 12 годзин у Основней школи и Ґимназиї "Петро Кузмяк".
         Михайло Варґа, будзе поховани наютре, 21. априла на 14 годзин зоз каплїчки на месним теметове.

ПРОБЛЕМИ ЗОЗ "CHAT"-ом
19. април 2007. - Тих дньох, даскельо раз наш популарни "chat" нє робел, и то нє пре нашу "заслугу" алє пре проблеми зоз сервером интернет провайдера Neobee.net на котрим поставена тота презентация. Же би ше заобишли тоти проблеми зоз сервером, "chat" поставени и на други сервер, другого интернет провайдера. Ми сами будземе провадзиц хтори як сервер роби та там "chat" будзе активни, док сами хаснователє анї нє замеркую. Дзекуєм на сцерпеню, чуєме ше и видзиме на "chat"-у.

ГОСЦОВАНЄ У ГОРВАТСКЕЙ
19. април 2007. - Члени музично - фолклорного ансамблу Дома култури зоз Руского Керестура и ґлумци Руского народного театра "Петро Ризнич Дядя" нєшка путую до Риєки, Републики Горватскей дзе буду участвовац у програми "Тидзень рускей и українскей култури" хтору орґанизує Културне дружтво "Рушняк" Приморско - горянскей жупаниї зоз Риєки.
Виводзацка танєчна ґрупа, орхестра и соло шпиваче у Риєки виведу два цаловечарши концерти 20. и 21. априла, а члени Руского народного театра "Петро Ризнич Дядя" прикажу представу Мира Ґаврана "Перша дама" у режиї Владимира Надя Ачима. Представа будзе виведзена 22. априла.

НА ТЕНДЕРУ ЗА ОТРИМОВАНЄ ШМЕЦИСКА 4 ПОНУКАНЯ
18. април 2007 - Комисиї Совиту Месней заєднїци за явни набавки доручени штири понуканя хтори сцигли на розписани тендер за отримованє шмециска у Руским Керестуре.
После отвераня понуканьох Комисия за явни набавки констатовала же найвигоднєйши условия понукла Ремеселска роботня "Славче" зоз Руского Керестура.
На тендеру участвовала и Землєдїлска задруґа "Зарно" зоз Коцура и два фирми зоз Вербасу - "Меґа инжинєринґ" и ДВП "Бачка".
Конєчну одлуку хто у наступним периодзе будзе анґажовани на отримованю шмециска принєше Совит Месней заєднїци на першей наступней схадзки.

ЖАРДИНИЄРИ ПРОЦИВ НЄСОВИСНИХ
18. април 2007 - Нєсовисни вожаче у Руским Керестуре вше частейше авта паркираю и до парку у центру валала зоз чим знїчтожую желєну поверхносц, односно траву.
       До ушореня парку уложени значни средства як и до його отримованя, а комунална инспекция на таки зявеня очигляднє нє реаґує та Месна заєднїца будзе мушиц сама ришиц тот проблем.
       Йоаким Надь, секретар Месней заєднїци гвари же на часци парку при Ресторану "Русалка" дзе авта найчастейше ставаю, буду покладзени жардиниєри бо то найефикаснєйши способ же би ше зопарло нєсовисних и зачувало желєну поверхносц.

УТВЕРДЗЕНИ ПРЕДЛОГ ЗА НАЦИОНАЛНИ СИМВОЛИ
16. април 2007. - Национални совит рускей националней меншини утвердзел предлог за национални символи Руснацох, герб и заставу, а за националне швето Руснацох у Сербиї предложени 17. януар. Шветочна шпиванка ище вше нє одредзена, а предложене же би ше ю вибрало помедзи "З давен давна" Агнети Тимковей и "Браца Русини" Иринея Тимку, после виводзеня на Фестивалу култури Руснацох "Червена ружа" у Руским Керестуре и то зоз новима аранжманами.
        За герб предложени тот хтори уж прилапени при векшини руских орґанизацийох у швеце, а на хторим приказани медведз цмей червеней фарби у стояцим положеню хтори по даєдних толкованьох представя стародавни славянски символ котри Руснацох/Русинох вяже за їх праотечество у Карпатох.
        За заставу предложене же би то була сербска застава у хторей положени герб Руснацох.
        Национални совит предложел же би националне швето Руснацох було 17. януар як здогадованє на тот датум кед 1751. року Франц Йожеф де Редл, совитнїк царици Мариї Терезиї и администратор Кральовско-державного Бачкого дистрикту подписал перши урядови документ - Контракт о насельованю 200 руских греко-католїцких фамилийох на тедишню пусту Вельки Керестур.
        Конєчни одлуки о националних символох Руснацох, гербу, застави и националним швету принєше Влада Републики Сербиї, а о шветочней писнї одлучи Национални совит Руснацох.

Обширнєйше >>

О ФОРУМУ И КРАТКЕ УПУТСТВО ЗА ФОРУМ
13. април 2007. - Почитовани, од нєшка отворени форум, за вашо дискусиї, предклади, критики, жаданя, роздумованя, идеї, коментари, молби, жалби на рижни теми. Хвильково отворени даскельо теми котри розмесцени до вецей катеґорийох (Руски Керестур, Руснаци, спорт, гумор и забава, мали оглашки, рижне). Теми шлєбодно мож отверац у тих катеґорийох - за котри думаце же постої интересованє лєбо кед маце даяки питаня або проблеми за котри думаце же можеце достац одвит.
       Форум комплетно попрекладани зоз английского на сербски язик пре лєгчейше хаснованє (пре оправдани причини нє могло на руски язик). Тиж и упутства попрекладани на сербски язик, а кед ше зявя даяки проблеми шлєбодно можеце контактирац администратора форуму.
        За розлику од "chat"-у на форуму ше потребне перше реґистровац, вибрац свойо назвиско, шифру и зоз тима податками вше ше будзеце приявйовац на форум. Реґиструє ше вибором опциї Registruj se (у горнїм правим углє). Особи котри ше нє реґиструю можу лєм опатрац поруки и дискусиї, алє нє можу участвовац у дискусийох и охабяц свойо поруки и коментари. Кед шлїдуюцираз нащивице форум треба лєм ше приявиц на форум зоз вашим назвиском и шифру вибором Pristupi (тиж у горнїм правим углє).
        Поруки оставаю на форуму, так же за даяку дискусию нє важне чи хвильково ище дахто присутни на форуму. Кед войдзеце на форум перше вибереце катеґорию котра вас интересує, а потим и тему котра интересантна за вас. Кед жадаце написац даяку поруку на одредзену тему треба же би сце вибрали Odgovоri, а кед сцеце написац поруку стим же жадаце и цитирац дакого вибереце хтору поруку цитираце и прицишнєце Citiraj, а потим у новим облачку упишеце текст и пошлїце го.
        Зоз опциями котри ше находза у (горнїм правим углє) годни сце преглєдовац форум по даяким слову, глєдац одредзеного члена цо шицко написал на форуму, добиц кратке упутство за проблеми котри ше зявя...

ЦЕНА АКЦИЇ ПК "ПЕРШИ МАЙ" ЗНОВА ПОРОСЛА

13. април 2007. - Цена акциї ПК "Перши май" на Беоґрадскей берзи нєшка знова поросла за 20 одсто и тераз єй вредносц место дотерашнїх 1.440 виноши 1.728 динари. У остатнїх трох тижньох акция ПК "Перши май" поросла зоз 1.000 на 1.728 динари. На основу берзанского звиту нєшка ше и глєдало и понукало 10 акциї.

ШАХИСТИ "РУСИНА" У ФИНАЛУ КУПА ВОЙВОДИНИ
10. април 2007. - Шаховски клуб "Русин" прешлей нєдзелї ше пласовал до финалу шаховского купу Войводини понеже у трецим колу квалификацийох победзел Шаховски клуб "Бач" з резултатом 3:0.
У квалификацийох за финале купа Войводини участвовали 110 войводянски шаховски екипи, а пласман витворели 16.
Финале войводянского шаховского купу будзе отримане од 28. априла по 1. май у Банї "Юнакович" у Апатину.

РОШНЄ ЦЕНА АКЦИЇ ПК "ПЕРШИ МАЙ"
7. април 2007 - Цена акциї Польопривредного комбинату "Перши май" зоз Руского Керестура на Беоґрадскей берзи штредком тижня знова поросла за 20 одсто и нашла ше медзи дзешец акциями зоз найвисшим ростом цени на Беоґрадскей берзи. Вреднос берзи зоз найвисшим ростом цени кед зоз 1.000 цена поросла на 1.200 динари, односно за 20 одсто.

ХРИСТОС ВОСКРЕС - ВОИСТИНУ ВОСКРЕС
7. април 2007 - Наютре, 8. априла Катедарлна церква святого оца Миколая у Руским Керестуре и єй парохиянє преславя єдно од найвекших християнских шветох - Воскресенє Исуса Христа. На 10 годзин будзе отримана архиєрейна служба Божа зоз пошвецаньом паскох. Знагоди Пасхи, владика Георгий, Апостолски еґзарх у вельконоцней винчованки гварел же на тото вельке християнске швето ше вирнїки здогадую велькей Исусовей жертви зоз котру вон унєсол шветло до законох жеми. Винчуюци тото вельке швето нашей вири, жичим вам шицким цо вецей християнского мира у живоце. Радуйце ше наша судьба заґарантована. Ми ю дали до рук тому, котри єдини победзел шмерц и гварел же тот хто будзе вериц до ньго, гоч и умре - будзе жиц. Христос воскрес - воистину воскрес - гвари у вельконоцней винчиванки владика Георгий, Апостолски еґзарх.

ПРИРИХТОВАНЯ ЗА 39. ДРАМСКИ МЕМОРИЯЛ
7. април 2007 - Драмски мемория "Петра Ризнича Дядї" будзе отримани у Руским Керестуре од 27. априла по 6. май - заключене на схадзки Орґанизацийного одбору хтора отримана 5. априла. Буду виведзени осем представи за старших и штири дзецински. Найвироятнєйше же зоз наших руских местох буду виведзени лєм два аматерски представи за старших, два представи прикажу члени Руского народного театра "Петро Ризнич Дядя", а догварени и наступ русинского професийного театра Александра Духновича зоз решова, Република Словацка.