И Рускокерестурци на Покраїну
30. април 2008. (Рутенпрес) - Як Рутенпрес дознава представа "Перша любов" Силвестера Дорокхазия, у режиї Ксениї Бодянцовей, Дзецинскей ґрупи Драмского студия “Арт” Дома култури зоз Руского Керестура, виборела пласман на покраїнску смотру дзецинских драмских анасмблох.
       Попри Керестурцох, зоз кулскей општини ше на покраїнске змаганє пласовали ище два представи - "Мачки", кулского Културного центру у режиї Тат'яни Лабович, и "Кед би кулиси бешедовали”, Дома култури Червинка, у режиї авторох представи Цвиєти Йованович и Зорана Радуловича.
       Фестивал сценских витвореньох дзецох Войводини "Майски стретнуца", по традициї будзе отримани у Индїї, од 7. по 11. май. На "Майских стренуцох" у Индїї, свойо представи Керестурци и Червинчанє одбавя 7. а Кулянци 8. мая.

Конкуроване за коло 20 милиони динари
29. април 2008. (Рутенпрес) - По 25. април, покля бул час за придаванє вимогох, Месна заєднїца Руски Керестур конкуровала за дзешец рижнима проєктами з обласци комуналней инфраструктури до вецей покраїнских секретариятох.
      Месна заєднїца Руски Керестур за доставанє средствох конкуровала за проєктованє канализациї и пречисцовач за санацию водоводней мрежи и чисценє атмосферских яркох. Тиж так, конкуроване за ушоренє дильовох, теметова за ушоренє паркох и желєних поверхносцох, за набавку єдней самоходней моторней косачки, як и за отримованє веб-сайта Месней заєднїци.
       Тиж так до Општинского фонду за защиту животного штредку, вєдно зоз Младежску орґанизацию Пакт Рутенорум, Месна заєднїца конкуровала за отримованє Волонтерского кампу, котри заплановани и того року у Руским Керестуре.
      Вредносц шицких проєктох, односно роботох за котри Месна заєднїца конкуровала виноши коло 20 милиони динари, а резултати конкурсох ше очекує штредком мая.

Перши май на базену
29. април 2008. (Рутенпрес) - Комисиї за преслави при рускокерестурскей Месней заєднїци, предложела же означованє Медзинародного швета роботи - Паршого маю, и того року будзе на популарним керестурским вилєтним месце, на базену.
       Розвага и забава на базену з нагоди Першого мая того року з найвекшей часци зверена Младежскей орґанизациї Пакт Рутенорум, котра там уж од 30. априла, та у наступних трох дньох, по 2. май, будзе орґанизовац одредзени музични змисти.
        Найвецей вилєтнїкох зоз Керестура и других местох, на базену ше очекує праве на штварток, 1. мая, дзе заплановани и одредзени спортски змаганя, як цо то у одбойки, пикаду и нацагованю штранґа.
       Новосц тогорочного вилєту на базену з нагоди Першого мая будзе ушорене и реґуловане паркированє превозкох опрез и коло вилєтного места, а нє на самим вилєтним базену, за цо будзе задлужене окремне обезпеченє.

Уж мож осиґурац єшеньски и яарнї шаца
29. април 2008. (Рутенпрес) – У оддзелєню ДДОР Нови Сад у Руским Керестуре уж мож осиґурац єшеньски и ярнї шаца од рижних нєпогодох а премиї осиґураня за польодїлски и заградкарски рошлїни уж познати.
        Як Рутенпрес дознава од Елемира Рамача, инкасанта осиґураня ДДОР-а, за осиґуранє єдного гольта жита, премия виноши 1 332 динари; ярцу 1 540 динари по гольту; слунечнїку 1 150, сої 1 224 , а кукурици 1 785 динари по гольту. Осиґуранє єдного гольта паприґи того року драгше за коло штири тисячи динари, так же виноши 20 938 динари.
        До подраґшеня премиї за паприґу пришло пре векши ступень опасносци од очкодованя, котри ше мера за три роки, а здогаднїме, за остатнї три роки у рускокерестурским хотаре два раз побило паприґу.
       Медзитим, того року дата векша цена паприґи, так же, при оценьованю можлївей чкоди, єден килограм паприґи ше будзе раховац по 25 динари. Премиї за осиґуранє єшеньских и ярнїх шацох мож виплациц по 15. авґуст, за паприґу по 15. новембер. У одношеню на прешли рок, од того року осиґуранє важи 48 годзини од дня осиґураня польодїлских, лєбо заградкарских рошлїнох.
       Тогорочна носвосц и тота же за 10 одсто звекшане реґресованє осиґараня, та тераз виноши 40 одсто, так же парастом держава враци 40 одсто од уплаценей премиї за осиґуранє даєдного свойого шаца, лєбо заградкарских рошлїнох.
       Як Рутенпрес дознава од Рамача, пошвидко Оддзелєнє ДДОР-а будзе преселєнє до нових, реновираних просторийох у центре Керестура, до будинку Дома култури (дакедишнєй валалскей библиотеки), вєдно зоз Металс банку.

Керестурци ше пласовали на Покраїну
25. април 2008. (Рутенпрес) - Спрам нєурядових резултатох, керестурска представа "Перша любов" Силвестера Дорокхазия, у режиї Ксениї Бодянцовей, Дзецинскей ґрупи Драмского студия “Арт” Дома култури, виборела пласман на Покраїнску смотру дзецинских драмских анасмблох.
       Попри Керестурцох, зоз кулскей општини ше на покраїнске змаганє пласовали ище два представи - "Мачки", кулского Културного центру у режиї Тат'яни Лабович, и "Кед би кулиси бешедовали", Дома култури Червинка, у режиї авторох представи Цвиєти Йованович и Зорана Радуловича. Селекторка смотри була режисерка зоз Нового Саду Вера Хрчанова Остоїч, а Фестивал сценских витвореньох дзецох Войводини "Майски стретнуца" ше, по традициї отримує у Индїї, того року од 7. по 11. май.

Премесцени будки у центре валала
25. април 2008. (Рутенпрес) - Штварток, 24. априла, у центре Руского Керестура, будки опрез двора Друкарнї "Руске слово" премесцени блїжей ґу церковней порти. Усточасно з премесцаньом трох будкох, тих дньох почало и ушоренє двора Друкарнї "Руске слово", власнїка керестурского привреднїка Звонимира Хому.
       Так, од вчера, 24. априла, центер Руского Керестура випатра векши, а з ушореньом двора, дзе тераз заграда погосцительного обєкта, будзе и красше випатрац.

Пласман на Општински крос
25. април 2008. (Рутенпрес) - Штварток, 24. априла, на Ярашу, на фодбалским стадионє ФК "Русин", отримани ярнї крос ОШиҐ “Петро Кузмяк”, на котрим ше змагали школяре шицких класох основней и штреднєй школи.
        Медзи школярками перших класох ОШ, перша у обегованю на Школским кросу була Валерия Ковач, а од хлапцох, перше бул Андрей Катона. Перши места у конкуренциї другей класи ОШ освоєли Светлана Балїцки и Мижо Чизмар, у конкуренциї трецей класи Антния Тиркайла и Петро Арва, а у конкуренциї оддзелєньох штвартих класох ОШ найлепши були Адрияна Надь и Ваньо Хома.
       У конкуренциї пиятей класи ОШ, медзи дзивчатми и хлапцами, перши були Кристина Шепински и Давид Катона, други Барбара Колошняї и Ивица Няради, а треци Саня Николич и Тони Костелник. У змаганю школярох з оддзелєньох шестих класох ОШ перши места освоєли Валентина Барна и Зоран Колошняї, други Мелинда Сопка и Тобияс Шанта, а треци Долорес Ґовля и Дамир Хома. Медзи школярами зоз седмей класи, перши места на Кросу завжали Яна Еделински и Саша Колошняї, други Єлена Зорич и Борис Шовш, а треци Сашка Козар и Борис Будински.
       Од змагательох з осмих класох ОШ, на Шолским кросу найлєпши були Шейла Зарубица и Борис Барна, други места освоєли Андрея Малацко и Желько Кршич, а треци Николина Зорич и Андрей Орос.
       У конкуренциї ґимназиялкох з першей класи, найлєпша у обегованяю була Кристина Сабадош, друге место освоєла Валерия Хорват, а треце Александра Чанади. Ґимназиялци з першей и другей класи ше обеговали вєдно, та так перше место у тей конкуренциї освоєл Боян Скиба, друге Иґор Илич, а треце Йован Паравина. Медзи ґимназиялками з другей класи, перше место на Кросу освоєла Соня Плавшич, друге Тат'яна Дудаш, а треце Таня Ключковски, док медзи матурантками, найлєпша була Александра Дорошки, друге место завжала Александра Куколь, а треце место освоєла Нада Драґович.
        У конкуренциї ґимназиялцох зоз трецей и штвартей класи, котри ше тиж обеговали вєдно, перше место освоєл Милош Кривокуча, друге Александар Станисавлєвич а треце место припадло Миркови Копривицови.
        Побиднїки школского кросу зоз висших класох ОШ, як и ґимназиялци - шицки котри завжали перши три места, источасно виборели и пласман за змаганє на Општинским кросу, котри будзе отримани прве у Руским Керестуре, 16. мая.

Чанак: вибераме драгу до Европи або изолациї
25. април 2008. (Рутенпрес) - Здогадуюци присутних же ту, у Доме култури першираз бешедовал пред 18 роками, предсидатель Лиги социялдемократох Войводини и ношитель лїстини Коалициї "Вєдно за Войводину" за покраїнску скупштину Ненад Чанак, после нащиви Кули, вчера вечар, 24. априла, бешедовал и у Руским Керестуре.
        Як гварел Чанак пред полну салу Керестурцох, и пред 18 роками у Руским Керестуре бешедовал о економиї, прето же людзох у Войводини то найвецей и интересує, наглашуюци же наступни виберанки на шицких уровньох ключни за Войводину и за Сербию.
       - Вибераме чи без бариєрох пойдземе просто до полноправного членства у Европскей униї, цо и єдина драга Сербиї як держави и Войводини у нєй, як сучасней европскей реґиї, чи пойдземе до изолациї - гварел Ненад Чанак.
        Чанак гварел же 11. мая " вибераме чи будземе руска провинция у котрей мож краднуц, и держава, як сиґурна хижа за войнових злодїйох, руски колхоз у котрим можу владац Веля и Коштуница." Як наглашел - "ми нє сепаратисти, нє сцеме други, алє иншаку державу. Державу у котрей владаю закони", ище раз наглашуюци познати становиска своєй странки о врацаню судскей, вивершней и законодавней власци Войводини.
      Тиж так, подкрипююци то з велїма доказами, як цо то НИС, автодрага Горґош-Пожеґа, Електродистрибуция, желєзнїца, державна жем, Чанак гварел же Войводина убудуице муши вельо вецей розполагац зоз своїм маєтком и пенєжом.
       - Ми за дебеоґрадизованє, алє и за деновосадинизованє Сербиї и Войводини - и з тим у вязи ше присутним опитал прецо административне шедзиско Апостолкого еґзархату у Новим Садзе, а нє у Керестуре.
       - Наша програма - децентрализованє Сербиї, направиц таку Войводину у котрей людзе буду жиц у вилагоди и приємно, нє роздумуюци о тим же би з нєй одходзели - гварел Ненад Чанак у Руским Керестуре.
        Скорей предсидателя ЛСВ и ношителя лїстини "Вєдно за Войводину", после привиту Владимира Джуджара Беґия, спрд МО ЛСВ, на Трибини у Керестуре бешедовала Олена Папуґа, иншак родом зоз Керестура, кандидатка за републичну посланїцу ЛСВ на лїстини "За европску сербию - Борис Тадич" и кандидатка на пропорцийней и на векшинскей лїстини у Кули, за посланїка до Скупштини Войводини. Понеже на локалним, општинским уровню, ЛСВ на виберанки тераз виходзи самостойно, Папуґова присутних поволала же би гласали за Лиґу, та на уровню Покраїни за Коалицию "Вєдно за Войводину", як и на уровню Републики за Коалицию котра, як гварела, проевропски ориєнтована - "Вєдно за Сербию", дзе Лиґа наступа вєдно з Демократску странку и Ґ17 плус.
      Ратко Филипович, предсидатель Политичного совиту Войводянскей алтернативи, котра з другима войводянскима странками твори Коалицию "Вєдно за Войводину", у Руским Керестуре гварел же тота Коалиция ма заєднїцки менитель - войводянски - так же їм циль полна автономия Войводини, без хторей нєт перспективи за будуци войводянски поколєня. Мая Седларевич, член Предсидательства ЛСВ и посланїца у Републичним парламетну, вчера у Руским Керестуре наглашела же 11. май будзе дзень од котрого будземе будовац сиґурну будучносц - за Европу, у хторей ше почитує правила, же би млади людзе вецей нє роздумовали о одходзеню з тей жеми.
        - Тераз у Войводини маме найменши плаци и пензиї у Сербиї; у 468 населєних войводянских местох лєм у 45 єст канализация, спомедзи 45 войводянских општинох, лєм у седем ше пиє здраву воду; трецину жительства Сербиї творя Войводянє, 27 одсто Сербиї то Войводина, док з 55 одсто буджет Сербиї полнї Войводина. Треба зопрец тоту крадзу и економске експлоатованє Войводини - гварела Мая Седларевич.
       Попри членох и симпатиозерох ЛСВ, та других войводянских партийох, вчерайшей Трибини у Руским Керестуре присуствовали и представителє Демократскей странки и Ґ 17 плус, з котрима ЛСВ у коалициї на виберанкох на уровню Републики.

Акция даваня креви
24. април 2008. (Рутенпрес) - Под мотом "Акция место приповедки", вовторок, 22. априла, младеж странки Ґ17 плус, у Руским Керестуре орґанизовала акцию добродзечного даваня креви. Акция отримана у сотруднїцтве зоз Службу за трансфузию креви вербаского шпиталю, тирвала коло два годзини и у керестурским Доме ремесленїкох ше за даванє креви приявели коло двацец, углавним млади особи, и после преверйованя здравственого стану, од векшини крев и вжата.
       Як Рутенпрес дознава од кандидата за покраїнского посланїка тей странки зоз Руского Керестура Звонка Сабадоша, котри и сам дал крев, попри помоци Дому за старих, у предвиберанковей кампанї Г17 плус купела и часц будовательного материялу за мурик коло теметова.
        Тиж так, у планє и финансийна помоц за одредзени роботи у рускокерестурским Доме ремеселнїкох.

Нєшка Крос, настава аж од 5. мая
24. април 2008. (Рутенпрес) - На Ярашу, нєшка, 24. априла, керестурска ОШиҐ "Петро Кузмяк" отримує порядни ярнї крос, после котрого шлїдзи "ярнї розпуст".
       Нєшкайши Крос школярох почина од 10,30 г. зоз обегованьом ґимназиялцох; од 11,30 г. ше буду обеговац школяре ОШ од шестей по осму класу, а од 13 годзин школяре од першей по пияту класу основней школи. Ярнї розпуст у рускокерестурскей ОШиҐ "Петро Кузмяк" почина на пияток, 25. априла и тирва по пондзелок, 5. мая, кеди, зоз пременку зменох, ознова починаю роботни и наставни днї.

Ненад Чанак нєшка у Кули и Руским Керестуре
24. април 2008. (Рутенпрес) – Нєшка на 17 годзин коалиция "Вєдно за Войводину-Ненад Чанак" у рамикох виберанковей кампанї будзе бешедовац зоз гражданами по кулских улїчкох.
       Предсидатеь Лиґи социялдемократох Войводини Ненад Чанак упозна гражданох Кули зоз програму странки и опредзелєньом Коалициї. На 18 годяин будзе отримана трибина коалициї "Вєдно за Войводину– Ненад Чанак" у Велькей сали Скупштини општини Кула на хторей буду бешедовац Ненад Чанак, Мая Седларевич, Ратко Филипович и Олена Папуґа.
       Трибина тей истей Коалициї на 19,30 годзин будзе отримана и у Руским Керестуре а на нєй буду бешедовац исти госци як и у Кули.

Придати вимоги за финасованє виробку проєктней документациї
23. април 2008. (Рутенпрес) - Пондзелок, 21. априла, до Покраїнского секретарияту за урбанїзем, архитектуру и будовательство, керестурска Месна заєднїца придала вимогу за финансованє виробки проєкта канализациї и пречсцовача.
       Вимога за финансованє проєктней документациї уж придата и очекує ше же вона пошвидко будзе ришена на хасен Керестура. Прето Совит принєсол и одлуку о розписованю явней набавки за проєктованє канализациї. Спрам одлукох Совиту, будзе розписана и явна набавка за виробок проєкта за будованє єдней твардей драги до хотара, такволаней червинскей.
       Совит Месней заєднїци на истей схадзки принєсол и одлуку о розписованю явней набавки за купованє єдней косачки-тракторчка, на основи средствох котри ше очекує зоз Покраїнского секретарията за локалну самоуправу. Попри спомнутих вимогох, рускокерестурска Месна заєднїца тих дньох конкуровала, лєбо будзе конкуровац на коло 10 рижни конкурси до вецей покраїнских секретариятох, за доставанє средствох за рижни комунални роботи у валалє.
        Концом того тижня ма буц отримана и схадзка Одбора за преслави Месней заєднїци, дзе будзе порадзене о тогорочних активносцох и спортских змаганьох з нагоди наступного швета роботи, Першого маю, котри, як и до тераз, буду отримани на керестурским базену.

Троме рецитаторе руского язижного подруча на Републичней смотри
22. април 2008. (Рутенпрес) - Андрей Орос и Мирослав Малацко зоз Руского Керестура, та Александар Мудри зоз Кули, виборели пласман на Републичну смотру рецитаторох “Поету народу мойого”, котра у маю будзе отримана у Валєве.
       Пласман на Републичне змаганє нашо рецитаторе витворели после Покраїнскей смотри рецитаторох, котра од 18. по 20. април, отримана у Сечню, дзе участвовали аж осмеро рецитаторе з наших местох котри рецитовали по руски.
       Спрам пропозицийох Покраїнскей смотри, попри по дзевец пласованих з каждого возросту на Републичне змаганє, вибера ше 18 добитнїкох Златней дипломи Смотри, так же медзи нїма и Иван Недич зоз Коцура, у штреднїм возросту. Зоз кулскей општини, на Републичну смотру у Валєве пласовала ше ище Леа Котлица зоз Кули, у штреднїм возросту, а медзи добитнїками Златней дипломи и Ваня Божович зоз Кули, у конкуренциї старшого возросту.
       Рецитаторох оценьовал пейцлчленови фахови жири, котри творели Миодраґ Петрович, Тибор Вайда, Милина Флориян, Нику Чобану и Владимир Бесерминї.

Нєшка добродзечне даванє креви
22. април 2008. (Рутенпрес) - Нєшка, 22. априла, у Руским Керестуре, у Доме ремеселнїкох орґанизоване добродзечне даванє креви. Добродзечне даванє креви за шицких заинтересованих орґанизує странка Ґ 17 плус, а крев годно дац од 9 до 12 годзин, у Майсторским доме.

Трибина Лиґи социялдемократох Войводини
22. април 2008. (Рутенпрес) - На штварток, 24. априла, у Руским Керестуре будзе отримана Трибина Лиґи социялдемократох Войводини, на котрей будзе бешедовац и єй предсидатель Ненад Чанак.
       Трибина ЛСВ будзе отримана у Велькей сали керестурского Дома култури, з початком на 19,30 годзин.

Базар здравя бул добре нащивени
21. април 2008. (Рутенпрес) - Дазкельо стотки керестурцох всоботу, 19. априла, мали нагоду безплатно превериц свойо здравє, на Базару здравя у керестурскей Амбуланти.
    Под покровительством Покраїнского секретарията за здравство и социялну политику, Базар здравя у Руским Кереетуре орґанизовал Дом здравя Кули и кулска локална самоуправа, а Керестурцох препатрали здравствени роботнїки заняти у кулских здравствених установох.
        Попри других здравствениох услугох, на соботовим базаре здравя могло ше безплатно вимерац кревов прицисок, уровень цукру у креви, мониторинґ шерцового ритму; вимерац чежину и висину, уровень голестеролу, як и количество масци у орґанизму.

Вчера два, нєшка єдна представа
19. април 2008. (Рутенпрес) - Нєшка, 19. априла, на Драмским мемориялє Петра Ризнича Дядї, госцує професийни Словацки войводянски театер зоз Бачкого Петровцу котри одбави култну представу Тенеси Вилиямса “Склєняна менажерия”, у режиї Андрея Приврацкого.
       Вчера, 18. априла, на Мемориялє дзецинску представу, з елементами бабкарского театра, "Будз тото цо ши" Флорияна Зденека, у режиї Бошка Бошкова, виведли члени Дзецинскей ґрупи Дружтва Руснацох зоз Суботици, а представа витворена у сотруднїцтве зоз тамтейшим Дзецинским театром.
       Зоз вчерайшу вечаршу представу Петровчанох, зоз Републики Горватскей, тогорочни Мемориял достал и медзинародни характер.
        Госци зоз Петровцох, зоз Горватскей, по руски одбавели представу "Мачка зоз дзевец животами", Златка Якобовича, у режиї Якима Ерделя. За найлєпшу ґлумицу вечара вибрана Ивана Колбас за улогу Олґи.
       На ютре, 20. априла, Штерацети драмски мемориял Петра Ризнича Дядї будзе закончени зоз представу "Кинґ Конґ" Едґара Валса, у режиї Цветина Аничича, а у виводзеню нашого професийного Руского народного театра "Петро Ризнич Дядя". Як Рутенпрес дознава, на завераню тогорочного Мемориялу очекує ше приход министра култри Вої Брайовича.

Сон заш лєм будзе витворени
18. април 2008. (Рутенпрес) - Гоч керестурец Янко Мудри и шпивачка Романа Панич 9. априла випадли з дальшого змаганя у гуманитарно-забавней емисиї “З танцом ґу сном” на ТВ Пинк, такв. “сон” Янка Мудрия заш лєм будзе витворени.
       Най здогаднємє - Янко Мудри танцовал за реновиранє и опреманє Дома култури Руски керестур, пре злєпшанє условийоих за роботу. И за самого Янка, котри нароком бул поволани до емисиї, як и за патрачох, було вельке нєсподзиванє кед на початку прешлей емисиї "З танцом ґу сном", стреду, 16. априла, предсидатель Вивершней ради Войводини Боян Пайтич, особнє, прейґ ТВ екранох, сообщел же Мудрийов “сон” заш лєм будзе витворени.
        Так, реновиранє керестурского Дома култури будзе оможлївене дзекуюци и закладаню и танцованю Янка Мудрия у ТВ-емисиї "З танцом ґу сном", односно виношеню того проблему ширшей авносци. Як Рутенперс дознава, средства за реновиранє Дома култури Руски Керестур, односно за реконструкцию закрица над бину, буду обезпечени зоз буджетней резерви Скупштини АП Вийводини.

Ютре у Керестуре Базар здравя
18. април 2008. (Рутенпрес) - На соботу, 19. априла, у Руским Керестуре будзе отримани базар здравя, котри под покровительством Покраїнского секретарията за здравство и социялну политику орґанизую кулски Дом здравя и локална самоуправа.
        Базар здравя од 9 до 13 годзин будзе отримани у просторийох керестурскей амбуланти.
       На соботовим базаре здравя шицки заинтересовани годни безплатно вимерац кревов прицисок, уровень цукру у креви, мониторинґ шерцового ритму; вимерац чежину и висину, будзе им вираховане БМИ, уровень голестеролу, тиж годно вимерац и количество масци у орґанизму.
        Попри того, на базаре здравя годно очисциц и пооправяц зубни протези, достац информациї о правилней покарми за шицки возрости, о чкодлївосци догану, о правилним отримованю гиґиєни устох и зубох. Заплановане и доставанє информацийох о превенциї кардиоваскуларних и малиґних хоротох, о чуваню репродуктивного здравя женох, о пестованю бебох и дзецох, та о превенциї заразних хоротох.

Руснаци з Мадярсакей медзи нами
16. април 2008. (Рутенпрес) - Од 11. по 13. април, у Руским Керестуре пребувала делеґация Русинох зоз Мадярскей котра допутовала на поволанку Националного совиту Руснацох, РНТ "Петро Ризнич Дядя", Рускей матки и Дома култури.
       Предсидатель Вседержавней русинскей меншинскей самоуправи Андрий Манайла и єй члени др Мариана Лявинєц, котра источасно и член Шветовей ради РРЛ, поетеса Валерия Мориляк и Андрея Манайло о дальшим сотруднїцтве бешедовали зоз предсидательом Националного совиту Руснацох Славком Оросом, директором РНТ Владимиром Надьом, предсидательом Рускей матки Дюром Папуґом, як и о.д. директора Дома култури Владимиром Малацком.
       Госци зоз Мадярскей попри пребуваня на Мемомориялу нащивели Нови Сад и Дюрдьов, дзе их у мено дюрдьовскей Парохиї привитал о. Михаил Холошняй, а у мено КУД "Тарас Шевченко" Яким Чапко. 

Вчера и нєшка по три представи
15. април 2008. (Рутенпрес) - На репертоаре Штерацетого драмского меморияла Петра Ризнича Дядї, нєшка, вовторок, 15. априла, два монодрами и єдна дзецинска представа.
       Од 12,30 г., у Велькей сали Дома култури дзецинску представу “Шнїгочка и седем патульки”, Цветина Аничича, у режиї Нади Лендєровей, по руски виведу члени КПД “Карпати” зоз Вербасу.
       На вечар, од 20 годзин, Мемориял понука два монодрамски витвореня, обидва зоз Коцура, у продукциї косурского Месного одбору Рускей матки. Публики ше перше представи Мелания Макаї, з монодраму "Приповеданя єдней звичайней Рускинї", а потим Аранка Медєши, у першонаградзеней монодрами з прешлорочного Фестивала монодрами у Новим Садзе - "Мено ми Андя, а волаю ме Ханча". Обидва монодрами режирал Дюра Макаї.
       Вчера на Мемориялє монодраму за дзеци "Залюбена до кравки Славки" виведла Адрияна Надьова, як и Емил Няради, монодраму "Барон Мингавзен". Обидва монодрами режирал Владимир Надь Ачим.
       Вчера вечар, на Мемориялє наступела трецонаградзена монодрама з прешлорочного фестивала у Новим Садзе - "Тварде слово" Мариї Сопковей, у виводзеню Меланиї Арвайовей зоз Кули, а у режиї Михайла Зазуляка.
        На ютре, на стреду 16. априла, на репертоаре Меморияла дзецинска представа Вербащанох "Маскенбал", по сербски, режисерки Нади Лендєровей, и монодрама "Илия опозиция" Дюри Папгаргая, а у виводзеню и режиї Янка Лендєра.

Керестурци з танцом иду на Зону
15. април, 2008. (Рутенпрес) - Всоботу, 12. априла, у Липару отримана Општинска смотра музично-фолклорней творчосци за дзеци, дзе керестурски Дом култури участвовал з танцом “Нє до нас, нє до нас” старшей танєчней ґрупи - школярох висших класох ОШ.
        Кореоґраф танцу Йоаким Рац Мими, аранжман написал Юлиян Рамач Чамо, котри и руководитель Велькей народней оркестри котра провадзи танцошох, а танєц виборел пласман за дальше, зонске змаганє дзецох у обласци музично-фолклорней творчосци.

Керестурски треци
15. април 2008. (Рутенпрес) - Школярки-рукометашки висших класох ОШ "Петро Кузмяк" зоз Руского Керестура, зоз тренером Янком Хомом, прешлого тижня посцигли по тераз свой найвекши успих од кеди ше змагаю.
       На Покраїнским змаганю школярох у рукомету, котре потримали Министерство просвити и Министерство спорту, рукометашки зоз Керестура освоєл треце место. На Покраїнским змаганю, котре 11. априла отримане у Качу, участвовали штири екипи - зоз Ади, Качу, Баймоку и Руского Керестура.
        Лєм з єдним ґолом розлики - 20:19, керестурски рукометашки у полуфиналу страцели од парнякиньох зоз Баймоку, но, и треце место барз високи пласман керестурских младих рукометашкох.

Робота и по дижджу
14. април 2007. (Рутенпрес) - Всоботу, 12. априла, у Руским Керестуре закончени добродзечни роботни акциї на пораєню валала, котри започали предпрешлей соботи, 5. априла, робело ше потим и у тижня, а 12. априла векше число Керестурцох, гоч и по подлєйшей хвилї, робело на вецей локацийох.
       Найвекше число особох, коло трицец, пораєло часц теметова поза каплїчку, котра найзароснутша, а всоботу там робели члени Церковного одбору керестурскей церкви, Здруженя ремеселнїкох, Добродзечного огньогасного дружтва, Месней заєднїци, та людзе з валалу и дзепоєдних привредних орґанизацийох. По беґелю, члени керестурского Здруженя рибарох "Коляк" зберали рижни пластични одпад, аж и зоз беґелю - зоз чамцох, по обидвох бокох.
       Робело ше и на базену, на його пораєню и ушореню, та по дзепоєдних валалских улїцох, а у тих роботох були уключени чолнїки и активисти Месней заєднїци, члени Младжескей орґаниазциї "Пакт Рутенорум", та роботнїки привредного подприємства "Изґлед" Йоакима Чижмара.
       Докончене и 5. априла започате пораєнє опрез дома ДОД, дзе члени ДОД ушорели простор и пошали траву. За роботнїкох, после роботи, на базену и у просторийох одборнїкох Церковного одбору прирхтани парпиґаши з котла, а дижджовна хвиля и тей соботи претарговала роботу, но заплановане з векшого заш лєм поробене.

Успихи на Општинским и Окружним змаганю
12. април 2008. (Рутенпрес) - Млади атлетичаре керестурского Русина того тижня зазначели замерковани резултати на Општинским и Окружним змаганю атлетичарох котри од 8. по 10. април отримани у Червинки и Зомборе.
       На Општинским змаганю у Червинки, 8. априла, медзи седем екипох, пионирки Русина екипно освоєли друге место, а у конкуренциї младежи, спомедзи трох штреднїх школох у кулскей општини, екипа з Керестура тиж була друга.
        У поєдинєчней конкуреницї пионирка Тияна Гарди освоєла перше место у обегованю на 100 метери, а Кристина Шепински друге место у обегованю на 600 метери. У спомнутих дисциплинох, Гардийова на Окружним змаганю у Зомборе, 10. априла, була треца, а Шепинскова и на Окружним змаганю повторела пласман на треце место. Штафета пиониркох зоз Керестура, штири раз по 100 м, на Општинским змаганю у Червинки осовєла друге место.
      Николина Зорич, у скоку до далєка у конкуренциї пиониркох, зоз доскоченим резултатом од 4,16 м на Општинским змаганю освоєла треце место, док ше Марґарита Хома, у скоку до висока, директно пласовала на Окружне змаганє у тей дисциплини.
       На Окружним змаганю у Зомборе 10. априла, Хомова зоз прескоченима 130 цм освоєла високе друге место. У конкуренциї пионирох, Борис Барна на Општинским змаганю, зоз доскоком од 5,39 метери освоєл перше место, а зоз кус слабшим резултатом у скаканю до далєка, од 5,18 метери, на Окружним змаганю освоєл друге место.
     У обегованю на 800 метери, Зоран Колошнаяї и на Општинским и на Окружним змаганю бул треци, а Желько Кршич, после директного пласмана на Окружне, там зоз прескоченима 145 цм освоєл треце место у скоску до висока.
       У конкуренциї младежских екипох, штафета 4 раз по 100 метери штредньошколцох зоз Керестура освоєла треце место, а поєдинєчно, атлетичаре на Општинским змаганю освоєли два перши и два треци места. У обегованю на 1 000 метери, Боян Скиба зоз Кули освоєл перше место, як и Марян Солдо зоз Вербасу у руцаню кулї чежини 6 кґ, зоз резултатом од 10,52 метери.
       Треце место на Општинским змаганю у Червинки завжали Владимир Ґрубор зоз Вербасу у обегованю на 100 метери, як и Милян Щепанович зоз Крущичу, у скоку до далєка. Спомнути штредньошколци школяре керестурскей Ґимназиї, и пребуваю у керестурским интернату.
        На Окружним змаганю у Зомборе, 10. априла, Боян Скиба зоз освоєним першим местом у обегованю на 100 метери виборел сиґурни пласман на Покраїнске змаганє, а Марян Солдо на Окружним, у своєй дисциплини бул треци, зоз доруцену кулю од 10,48 метери.
    Медзиокружне, односно Покраїнске змаганє младих атлетичарох будзе отримане 17. априла у Сенти.

Штерацети квиток руского театра
14. април 2008. (Рутенпрес) - Тогорочни Штерацети драмски мемриял Петра Ризнича Дядї, смотру театралней творчосци Руснацох у Сербиї, пияток, 11. априла, шветочно отворела Нада Лендєрова, ґлумиŸца и режисерка з Вербасу, котра того року означує 30-рочнїцу од свойого активного занїманя у театралним живоце Руснацох.
       - Пред нами розпука нови, штерацети квиток Швета руского театра, котрого после дзешец дньох уплєцеме до прекрасного венчика ювилейного Драмского меморияла Петра Рузнича Дядї - гварела Лендєрова у своєй бешеди на отвераню.
      - Полни 40 роки пах руского театра зоз исту, або ище векшу моцу - шири ше зоз дескох рускокерестурскей сцени. Його маґийна моц опивала, и ище вше опива, ґенерациї и ґенерациї ґлумцох фанатикох, на чиїх фундаментох мриї и стварносци є и збудовани.
        - З кажду нову сезону, дзешатки и дзешатки вирнїкох и рабох богинї Талиї, з исту, або и моцнєйшу страсцу у себе, уходза до швета чаривней шкатули у котрей бовчи вични, опиваци швет на дескох котри наисце живот знача.
        - И нєшка отвераме тоту чаривну шкатулу з котрей, каждого вечара под час тирваня Швета, будзе бовчац живот, любов и страсц, алє и грожиц мержня, злоба и шмерц. Ту пред вами - вирну публику, котра вше знала почитовац глумца и його уметнїцки намаганя - рабинї и раби театра буду отверац латочки нового квитку, же би ше його чаривни пах усадзел до ваших чувствох и паметаня.
         - Штерацец роки час кед ше узрето патри на живот, кед животне искуство глїбоко уплєцене у власох котри нагадую же стриберни роки за нами, а златни ювилей уж дурка на дзвери. То час кед ше з гордосцу шме повесц же пионирска робота наших предходнїкох нє була даремна.
        - Ми, терашнї ґенерациї котри твориме у своїх аматерских театрох по наших местох, учиме будуци ґенерациї, виховани и инфицировани з театром и ґлуму наших предходнїкох, зачатнїкох руского професийного театра, маме и нову обовязку: обовязку зачувац красу того Швета и пах руского театра. Тераз и занавше.
        - А же зме на добрей драги, потвердзує же нєшка дзеци нашого театра уж шмело крачаю по бинох домашнїх и шветових театрох.
        - Пред нєполним мешацом, занавше нас зохабле слуп того Швета театра, його идейни творитель, алє и вожд. Ґлумец, режисер, драмски писатель - Дюра Папгаргаї. Остало празне место дзешка у дзешатим шоре... Виостаню дзекеди и горки и джобаци, алє вше добронамирни критики.
         - Його живот и спатранє места и улоги руского театра у нашим цалосним єстве, треба и муши нам будз драгоказ на дражкох пред нами.
        - Ґу венчику зоз трицец дзевец квиткох, котри кладземе на пиєдестал тих котри вецей нє з нами, докладаме и штерацети, котри нєшка пред вами - гварела Нада Лендєрова, пияток, 11. априла, отвераюци Драмски мемориял Петра Ризнича Дядї.

По тераз наградзени ґлумци
14. април 2008. (Рутенпрес) - И того року на Драмским мемориялє окремна комисия додзелює награду за найлєпше одбавену улогу у вечарших представох.
       У першей виведзенєй представи на тогорочним Мемориялє - "Приповедка о єдней страсци" РНТ "Петро Ризнич Дядя", 11. априла, награду за найлєпше одбавену улогу достала Александра Лендєрова за улогу Юлиї. У представи "Меркуй жени" КЦ Вербас, Роботней єдинки Коцур, всоботу, 12. априла, награду за найлєпше одбавену улогу достал Иван Папуґа, за улогу Сержа.
       За улогу у представи "Дзивки" театра "Стеван Сремац" Дома култури зоз Червинчанки, внєдзелю, 13. априла, за найлєпше одбавену улогу наградзена Цвиєта Йованович за улогу Ани.
     Комисию за награди на Штерацетим драмским мемориялє творя Любица Дудаш, Михал Варґа и представитель НВУ "Руске слово", котре и дарователь награди - кнїжки "Триски" - позбераних творох Гавриїла Г. Надя.

Нєшка три представи
14. април 2008. (Рутенпрес) - На репертоаре Штерацетого драмского меморияла Петра Ризнича Дядї, нєшка, 14. априла, три монодрами - два за дзеци и єдна вечарша, за старших.
       Од 11 годзин дзецинску монодраму "Залюбена до кравки Славки" виведзе мала ґлумица зоз Керестура Адрияна Надьова; монодрама поробена у продукциї Месного одбору Рускей матки Руски Керестур, а у режиї Владимира Надя Ачима.
       После нєй, од 12,30 годзин, на шоре монодрама "Барон Мингавзен - Путованє на Мешац и Война з Турками" у виводзеню Емила Нярадия зоз Р. Керестура, у режиї Владимира Надя Ачима, а у продукциї ДС АРТ Дома култури Руски Керестур.
        На вечар, од 20 годзин, на репертоаре Меморияла ище єдна монодрама - "Тварде слово" Мариї Сопковей, у виводзеню Меланиї Арваї зоз Кули, а у режиї Михайла Зазуляка. Монодрама "Тварде слово" виробена у заєднїцкей продукциї кулского Руского КУД "Др Гавриїл костельник" и ГО РМ Нови Сад и освоєла треце место на прешлорочним Фестивалє монодрами у Новим Садзе.
       У голу Дома култури публика кажди дзень може опатриц виставу подобових роботох Владимира Нярадия зоз Вербасу.

Наградзени Керестурци при Боянови Пайтичови
10. април 2008. (Рутенпрес) - Подобово роботи Кристияна Ґута и Филипа Барана зоз Руского Кересетура, дзецох предшколского возросту зоз керестурского Оддзелєня ПУ "Бамби", наградзени медзи 250 роботами дзецох найстаршого предшколского возросту зоз предшколских установох Войводини.
        Роботи аж двох малих Керестурцох з керестурского обєкту "Цицибан" ПУ "Бамби" вибрани медзи найлєпши роботи дзецох зоз цалей Войводини, на основи конкурса под назву "Шестру и брата жадам", а двоме наградзени з Предшколского оддзелєня котре водзи воспитачка Емилия Костич.
      Конкурс уж по штаварти раз розписал Покраїнски секретарият за демоґрафию, фамелию и дружтвену старосц о дзецох, а награди уручени вовторок, 8. априла, у голу ВР АПВ. На пригодней програми з тей нагоди дзецом, їх воспитачом и родичом, 8. априла, повинчовал и предсидатель ВР АПВ мр Боян Пайтич, визначуюци же така вистава значна як за звекшованє наталитету, так и за розвиванє креативносци и здравого змагательного духу при малих дзецох.
        - У Войводини рочно єденац тисячи людзох вецей умре як цо ше народзи, и таки тренд озбильно загрожує число жительох у нашей Покраїни. Прето зме порушали числени мири за звекшанє наталитету, а єдна з окреме значних то уводзенє надополнєня за перше дзецко - гварел Боян Пайтич з тей нагоди.
        У голу ВР АПВ поставена и вистава наградзених 250 роботох предшколских дзецох, котру отворела ресорна покраїнска секретарка Новка Моїч. Попри Кристияна Ґута и Филипа Барана зоз Руского Керестура, зоз кулскей општини, односно ПУ "Бамби", награди за свойо роботи достали и по єдно дзецко зоз Червинки и Кули.
         Наградзени дзеци з цалей Войводини достали красни и вельо дарунки прилагодзени дзециньскому зросту, а роботи посилани на основи кнїжки-сликовнїци "Шестру и брата любел бим мац" Снежани Йович Влашкалич, котра того року видата и по руски, у прекладзе Наталиї Канюховей.

На соботу пораєнє валала
10. април 2008. (Рутенпрес) - На соботу, 12. априла, у Руским Керестуре будзе отримана добродзечна роботна акция на пораєню Руского Керестура, з нагоди Дня планети жеми.
       Часц тей роботней акциї отримана уж и прешлей соботи, 5. априла, так же и попри подлей хвилї, коло своїх обєктох и нука, попораєли члени Добродзечного огньогасного дружтва, вєдно зоз членми Здруженя Ромох; потим у Ловарским дружтве "Ярабица", у Здруженю пензионерох, дзепоєдни роботи и у "Юарбису", а дзень пред тим, акцию отримали и члени Здруженя керестурских ремеселнїкох.
       На соботу, 12. априла, медзи иншим, плановане пораєнє центра Руского Керестура, та на беґелю, а велька векшина акцияшох будзе анґажована на пораєню керестурского теметова. На основи скорейшей догварки, шицким учашнїком у акциї потребни превозкох обезпеча Месна заєднїца, "Юарбис" и "АБЦ ФУД". Координаторе роботней акциї буду керестурска Месна заєднїца и Еколоґийни рух, орґанизаторе - кажда орґанизация и здруженє окреме, а акция будзе тирвац од 9 до 13 годзин.

На репертоару Меморияла вкупно 17 представи
9. април 2008. (Рутенпрес)- Штерацети Драмски Мемориял "Петро Ризнич Дядя" того року почнє пияток 11. а закончи ше на нєдзелю 20.. априла. За дзешец днї публика увидзи вкупно 17 театрални представи.
      Мемориял почнє пияток на 19,30 минути зоз отвераньом вистави Владамира Нярадия и представу "Приповедка о єдней страсци котру виведзе РНТ "Петро Ризнич Дядя".
        Ютредзень , 12. априла на репртоару коцурска представа "Меркуй жени" а на нєдзелю 13. априла ,Театер "Стеван Сремац" зоз Червинки одбави представу "Дзивки".
       За пондзелок 14. априла, плановани три представи.То дзецинска представа "Залюбена до кравки славки" и монодрами "Барон Минхавзен" и "Тварде слово".Три престави плановани и за вовуторок 15. априла.То вербаска представа "Шнїгочка и седем патульки" и два монодрами "Приповеданє звичайней Рускинї" и " Мено ми Андя а зову ме Ганча".
       Представа "Маскенбал" зоз Вербасу на тогорочним Мемориялу будзе на стреду 16. априла а истого дня и монодрама "Илия опозиция". Штварток плановани тиж за два представи: "Першу любов" и "Гладни".Обидва представи бавя керестурски ґлумци.
      Суботицка бабкарска представа "Будз тото цо ши" на репертоару на пияток 18. априла а госци зоз Петровцох зоз Горватскей наступя истого дня зоз представу "Мачка зоз дзевец животи".
      Ґлумци Словацкого войводянского театру зоз Бачкого Петровцу госцую на соботу 19.. априла зоз представу "Склєняна менажерия" а Мемориял ше завре на нєдзелю 20. априла зоз представу Руского народного театру "Кинґ-Конґ".

У Каритасу отворена школа танцу
9. април 2008. (Рутенпрес) - Прешлей соботи, 5. априла, у рускокерестурским Каритасу з роботу почала Школа танцу, як оддзелєнє Танцового студия “Торнадо” зоз Кули, власнїка Ференца Папачека.
       Каждей соботи,од 14 г., Школу танцу будзе водзиц професор Бела Селеш зоз Суботици, а вежби каждого пондзелку (од 20 г.) Марияна Винаї и Янко Мудри зоз Руского Керестура.
        Янко Мудри и сам бул школяр тей школи, а тераз є учашнїк гуманитарно-забавней емисиї "З танцом ґу сном" на ТВ Пинк.
       У школи годно научиц коло 20 рижни танци, од класичних по латиноамерицки, а приявиц ше можу заинтересовани од 8 по 60 роки старосци.  Школа будзе тирвац коло 4 мешаци, а кошта 800 динари мешачно.

По штвартираз розбити авзлоґ на пекарнї
8. април 2008. (Рутенпрес) – Прешлого викенду у Руским Керестуре, уж по штварти раз, розбити авзлоґ на пекари на углє русинскей и партизанскей улїци, котрей власнїк єден Албанєц зоз Кули. Тиж так, на муре уж длугши час стої виписане "Косово Сербия", а авзлоґ на тей пекари першираз розбити два тижнї после познатого митинґу у Беоґрадзе, по єдностраним преглашованю нєзависносци Косова.
       Розбиванє авзлоґу приявене и полициї, медзитим, виновнїки ище нє пренайдзени. О тим збуваню предсидатель Националного совиту Руснацох Славко Орос вчера упознал и Републичну Службу за людски и меншински права, а одредзениу мири превежнє и Месна заєднїца.

Менянє явного ошвиценя
8. април 2008. (Рутенпрес) -После Крущичу, Сивцу и Червинки, и у Руским Керестуре будзе окончене заменьованє шветлосних лампох за явне ошвиценє. Прейґ кулского "Заводу за вибудов", Руски Керестур достал 920 лампи а по тераз заменєни коло 100 у Фрушкогорскей и улїци Владимира Назора.
      Реконструкцию явного ошвиценя по шицких местох кулскей општини финасує ше зоз средствох Покраїнского фонду за капитални укладаня. Роботу у Керестуре окончує керестурска Самостойна ремеселнїцко-дїловна робота "Виклер" Дарка Ковача, а як ше нагадує, будзе тирвац по конєц априла.

Керестурци иду на Републичну Домияду
8. април 2008. (Рутенпрес) - Зоз освойованьом першого места у малим фодбалу за дзивчата, школярки керестурскей Ґимназиї “Петро Кузмяк”, односно єй интернату, виборели пласман на Републичну домияду.То першираз же ше школяре керестурского интернату буду змагац на Републичним уровню у спортскей часци Домияди.
       Спортска часц Домияди домох школярох зоз цалей Войводини отримана 5. априла у Сримскей Митровици, а седемнацецеро школяре з Керестура ше, попри у малим фодбалу, змагали и у цильованю, столним тенису и шаху, дзе освоєли треце место.
        Републична домияда будзе отримана у Свилайнцу, уж того викенду.

Потримовка Мудрийови у Студию и Доме младежи
9. април 2008. (Рутенпрес) - Янко Мудри и шпивачка Романа у нешкайешей емисиї "З танцом ґу сном" на ТВ Пинк, буду танцовац у такв. “танєчним дуелу”, за гласи публики, як и за оставанє у дальшим змаганю у тей гуманитарно-забавней емисиї.
        Гласац за Янка Мудиря и Роману мож непреривно, зоз посиланьом поруки прейґ мобилного телефона, так же ше напише "пар" (вец розмак), "1", на телефон 3333, а цена поруки лєм коло 20 динари.
        Романа и Янко и нєшка, 9. априла, буду мац потримовку трицец Керестурцох у студию ТВ Пинк, а спонзор їх нєшкайшого одходу до Беоґраду Национални совит Руснацох, та керестурски Дом култури и Месна заєднїца.
       Попри того, у керестурским Доме младежи, односно Дискотеки "Амадеус", нєшка вечар (од 20 г.) шицки заинтересовани прейґ видео-биму годни провадзиц танєчни дуел Янка и Романи з другу танєчну пару, цо директно будзе преношиц и окремна екипа ТВ Пинк.

Актив наставнїкох руского язика
8. април 2008. (Рутенпрес) - На своєй порядней рочней схадзки, 5. априла у ОШиҐ "Петро Кузмяк" у Руским Керестуре, Актив наставнїкох руского язика утвердзел активносци коло тогорочного Републичного змаганя з руского зика и язичней култури, та Стретнуца руских школох.
       Осме Републичне змаганє з руского язика и язичней култури будзе отримане 17. мая у Руским Керестуре, а Штернасте стретнуце руских школох 7. юния у Вербаше.
       Члєнїци Актива зоз Руского Керестура, Коцура и Дюрдьова - дзе ше наставу по руски отримує порядно, як и зоз Нового Саду, Вербасу, Кули, Нового Орахова и Ґосподїнцох, дзе настава нашого язика факултативна - поднєсли звити о школских змаганьох у марцу, зоз котрих ше найлєпши школяре пласовали на Републичне змаганє. Прияву за змаганє послала и наставнїца зоз Шиду, а того року нє будзе школярох зоз Суботици, Беоґраду и Сримскей Митровици.
       Зоз порядней настави ше буду змагац школяре седмих и осмих класох, а зоз пестованя язика, школяре од пиятей по осму класу.
       На схадзки Актива виражене нєзадовольство з тим же ше и того року ознова мушело интервеновац, пре вихабйованє змаганя з руского и румунского язика зоз Календара змаганьох Министерства просвити, а виправка познєйше прилапена.
       На соботовей схадзки Актгива у Керестуре догварене же би тести за Републичне змаганє, як и дотераз, виробел др Яков Кишюгас, иншак и автор учебнїкох зоз руского язика.О пририхтованьох за тогорочне Стретнуце руских школох у Вербаше, Актив поинформовала Славица Малийова.
       Члени Актива поинформовани и о Литературним конкурсу проф. Гавриїла Г. Надя на тему "Мацерински язик и родзени край", котри за руских школярох будзе отворени 14. априла у Коцуре, кед Дружтво за руски язик означи 95-рочнїцу од народзеня покойного професора. Нєдавно умартому писательови Дюрови Папгаргайови, котри участвовал у креированю того конкурса, члени Активу на своєй схадзки дали почесц зоз минуту цихосци.

Атлетичаре зоз Руского Керстура освоєли медалї
8. април 2008. (Рутенпрес)- Млади атлетичар керестурского Русина Зоран Колошняї, на кросу АП Войводини, у обегованю на 1 000 метери освоєл друге место и стриберну медалю, а Борис Барна, у обегованю на 1 500 метери, треце место и бронзову медалю. Покраїнски крос того року отримани у Канїжи, 5. априла, а на нїм зоз керестурского Атлестского клубу Русин, на Кросу участвовали ище пецеро млади атлетичаре.
       У конкуренциої младших пиониркох, на 800 метери, обеговала ше Кристина Шепински, а у конкуренциї младших пионирох, попри Колошняя, бежали ище Дамир Хома, котир бул седми, и Давид Катона, котри освоєл 9. место на 1 000 метери. Марґарита Хомова ше обеговала на 1 000 метери у конкуренциї старших пиониркох, а спомнути Борис Барна, у конкуренциї старших пионирох, по першираз бежал на 1 500 метери и такой зазначел и замерковани успих.
       Вообще першираз на єдним атлетским змаганю, зоз Керестура участвовал Далибор Малацко, котри у конкуренциї старших юниорох, у обегованю на 4 000 метери завжал високе шесте место.

Робело ше и по дижджу
8. април 2008. (Рутенпрес) - Всоботу, 5. априла, диждж и подлєйша хвиля онєможлївели отримац єдну роботну акцию на уровню цалого Керестура, так же пораєнє валала будзе тей соботи - 12. априла.
        Заш лєм свойо обєкти попораєли члени Добродзечного огньогасного дружтва, вєдно зоз членми Здруженя Ромох. Робело ше и Ловарским дружтве "Ярабица", Здруженю пензионерох и "Юарбису". Дзень пред тим, акцию отримали и члени Здруженя керестурских ремеселнїкох.
       На соботу, 12. априла, плановане пораєнє центра Руского Керестура, та на беґелю, а спрам скорейшей поради, велька векшина акцияшох будзе анґажована на пораєню керестурского теметова.

Нєшка пораєнє валала
5. април 2008. (Рутенпрес) - Нєшка, 5. априла, у Руским Керестуре будзе отримана добродзечна роботна акция з нагоди Дня планети, котра почина на 9, а будзе тирвац по 13 годзин. У случаю подлей хвилї, роботна акция будзе отримана о тидзень - 12. априла.
       Координаторе роботней акциї керестурска Месна заєднїца и Еколоґийни рух, док орґанизаторе - кажда орґанизация и здруженє окреме. Понеже шицки представителє здруженьох и привредних орґанизацийох Керестура прилапели учасц у тей широкей роботней акциї, кажде ушори простор коло своїх обєктох, после чого акция будзе предлужена на пораєню теметова.
        На основи догварки, шицким учашнїком у акциї потребни превозкох обезпеча Месна заєднїца, "Юарбис" и "АБЦ ФУД".

Схадзка Активу наставнїкох руского язика
5. април 2008. (Рутенпрес) - Актив наставнїкох руского язика Дружтва за руски язик, литературу и културу, нєшка, 5. априла, у Руским Керестуре отрима свою схадзку, а у сотруднїцтве зоз Одбором за образованє Националного совиту Руснацох.
       Члени Актива, наставнїки руского язика зоз наших школох буду бешедовац о активносцох у прешлим року, резултатох школских змаганьох з руского язика и язичней култуири, як и о пририхтованю Републичного змаганя з руского язика и язиченей култури.
        Републичне змаганє з руского язика и язичней култури того року будзе отримане у Руским Керестуре, 17. мая. Тиж так, на нєшкайшей схадзки Актива у керестурскей Школи "Петро Кузмяк", будзе бешеди и о наступним, Штернастим стретнуцу руских школох, котре будзе отримане 7. юния у Вербаше.

Русин госцує у Оджаку
5. април 2008. (Рутенпрес) - У 19. колє першенственого змаганя у Зомборскей подрученй лиґи, рускокерестурски ФК Русин госцує у Оджаку. Зоз истомену екипу, Русин у Оджаку будзе бавиц на нєдзелю, 6. априла, зоз початком 15,30 годзин.

Одход до Беоґраду плацел Национални совит
5. априла 2008. (Рутенпрес) - Рутенпрес вчера пренєсол погришну информацию же 2. априла спонзор одходу Рускокерестурцох до емисиї "З танцом ґу сном" на ТВ Пинк, пре потримовку танєчней пари Янкови Мудрийови и Романи, бул привреднїк Елемир Рац.
       Остатнї одход до беоґрадского Студия ТВ Пинк спонзоровал Национални совит Руснацох, а спомнути Елемир Рац бул спонзор пребуваня екипи зоз ТВ Пинк, под час їх остатнього знїманя прилогох у Руским Керестуре, за емисию 2. априла.
        Як познате, после стредового танцованя у гуманитарно-забавней емисиї "З танцом ґу сном" на ТВ Пинк, керестурец Янко Мудри и шпивачка Романа Панич у шлїдуюцей емисиї буду танцовац у такв. "танєчним дуелу", за гласи публики прейґ мобилних телефонох.
       Гласац за Янка Мудиря и Роману, же би и надалєй танцовали у тей емисиї, мож уж од тераз, зоз посиланьом поруки прейґ мобилного телефона, так же ше напише "пар" (вец розмак), "1", на телефон 3333.

Цифровани "Бамбифест"
4. април 2008. (Рутенпрес) - Пред преполну салу, у Доме култури, вчера, 3. априла, отримана програма котру дзеци зоз керестурского обєкту “Цицибан”котру вони виведли у рамикох тогорочного “Бамбифеста”.
        Руски танєц и рижни кореоґрафиї, рецитациї и шпиванки у цифрованих костимох и сценоґрафиї, виведли дзеци шицких ґрупох керестурскей оводи, а кажду точку публика наградзовала зоз длугима аплаузами.
       Програму з малима керестурскима дзецми пририхтали виспитачки обєкту "Цицибан" Мелания Семан, Емилия Костич, Ксения Вулович, Блаженка Мецек, Оленка Русковски и Наташа Настасич.
       Програму у Руским Керестуре вчера провадзела и директорка Предшколскей установи "Бамби" Кула Весна Йовович зоз своїм сотруднїками, як и зоз госцами зоз Бару, зоз Чарней Гори. Тогорочни "Бамбифест" у местох кулскей општини почал 1., а закончи ше нєшка, 4. априла.

Цвикла пошата, на шоре олєйовки и кукурица
3. април 2008. (Рутенпрес) - Пре нїзку одкупну цену, а драги репроматериял, у Сербиї того року зашате за коло 40 одсто менєй цукровей цвикли, хтора скорейших рокох заберала поверхносци од коло 80 000 гектари, а як нагадую фаховци, того року будзе найдрагша шатву у историї домашнього аґрара.
       У керестурским "Юарбису", цукрова цвикла законтрачена и зашата на половку менєй поверхносцох у одношеню на прешли рок - лєм на 26 гектарох, а спрам оцени дипл. инґ. аґрономиї “Юарбиса” Владимира Тамаша, тото зменшанє присутне у цалим керестурским хотаре. У "Юарбису" тераз започнє шатва олєйовкох - слунечнїку и сої, дзе слунечнїк до тераз законтрачени на 38, а соя на 41 гектаре.
       Спрам одлуки вербаского "Виталу", нашенє слунечнїку кооперанти того року достаню задармо, а єдине условиє за бесплатне доставанє нашеня же би коперанти олєярнї випоручели найменєй 12,5 метери слунечнїку по гольту.
       Започало ше и зоз контраченьом кукурици, котра кооперантом углавном служи як покрице за доставаню потребного репроматериялу, та то нє може буц обєктивне мерадло зашатих поверхносцох, а у "Юарбису" кукурица того року зашею на 145 гектарох. Уж тераз нє спорне же кукурица годна преруциц плановани поверхносци, бо єй цена польопривреднїком вше интересантнєйша, док за слунечнїк и сою преруцованє планованих поверхносцох ище вше нєизвесне.

На соботу пораєнє валала
3. април 2008. (Рутенпрес) - Добродзечна роботна акция на пораєню Руского Керестура, з нагоди Дня планети жеми будзе отримана тей соботи, 5. априла, а у случаю подлей хвилї, роботна акция будзе отримана о тидзень - 12. априла.
      Координаторе роботней акциї буду керестурска Месна заєднїца и Еколоґийни рух, док орґанизаторе - кажда орґанизация и здруженє окреме. Як з Месну заєднїцу порадзене ище штредком марца, шицки представителє здруженьох и привредних орґанизацийох Керестура прилапели учасц у тей широкей роботней акциї.
     Попри того же кажде здруженє и подприємство ушори простор у, и коло своїх обєктох, робота добродзечней роботней акциї будзе предлужена на пораєню теметова. На основи догварки, шицким учашнїком у акциї потребни превозки обезпеча Месна заєднїца, та "Юарбис" и "АБЦ ФУД".
       Роботна акция на соботу будзе тирвац од 9 до 13 годзин, а вони би у Керестуре мали зажиц каждого року.

Схадзка Активу наставнїкох руского язика
3. април 2008. (Рутенпрес) - Актив наставнїкох руского язика Дружтва за руски язик, литературу и културу, на соботу, 5. априла, у Руским Керестуре отрима свою схадзку, а у сотруднїцтве зоз Одбором за образованє Националного совиту Руснацох.
       На сходзе свойого Актива, наставнїки руского язика буду бешедовац о активносцох у прешлим року, резултатох школских змаганьох з руского язика и язичней култури, як и о пририхтованю Републичного змаганя з руского язика и язиченей култури. Републичне змаганє з руского язика и язичней култури того року будзе отримане у