Руски Керестур

Архива висткох - май 2007.

ОПАДА ВРЕДНОСЦ АКЦИЇ ПК "ПЕРШИ МАЙ"
31. май 2007. - После мированя од скоро мешац дньох вредносц акциї Польопривредного комбината "Перши май" вчера на Беоґрадскей берзи опадла за 18,60 одсто, односно зоз 4.300 на 3.500 динари.
         Од 4. по 31. май вредносц акциї була 4.300 динари, алє по тей цени предани лєм два акциї.
        Зоз пороснуцом вредносци акциї у априлу и маю нагло поросло понуканє акцийох за предаванє, док заинтересованих за купованє нє було. Вчера зоз 534 акцийох, понуканє поросло на 720 цо найвироятнєйше и уплївовало на опадованє вредносци акциї.
         По цени од 3.500 динари вчера на Берзи предана лєм єдна акция.

У ВОДИЦИ НА ЗАВИТНИМ ДНЮ КОЛО 1.000 ПОЛОМНЇКИ
31. май 2007. - Коло 1.000 вирни - поломнїки зоз Бачки, Сриму и Горватскей вєдно зоз своїма священїками на Треци дзень Русадльох, 29. мая, були у Марийовим святилїщу у Водици преславиц тот вельке християнске швето. Процесия зоз порти Катедралней церкви до Водици рушела предходного вечара кед у Водици отримана Служба Божа. На Завитни дзень молитви започали зоз раншу Службу Божу, а потим отримана Архиєрейна Служба Божа котру служел владика кир Георгий Джуджар, еґзарх за грекокатолїкох у Сербиї и Чарней гори зоз священїками зоз Дюрдьова, Коцура, Руского Керестура, Шиду, Петровцох и Нового Саду.

ИЛОНА ЗАРУБИЦА ПЕРША НА ШВЕЦЕ У ПРОФЕСИЙНИМ ФИТНЕСУ И БОДИ-БИЛДИНҐУ
30. май 2007. - Керестурска боди - билдерка Илона Зарубица прешлого викенду освоєла перше место на Шветовим першенству у фитнесу и боди-билдинґу за професионалцох.
        Шветове першенство отримане у Єкатеринбурґу у Русиї. Право участвованя як професионалци на тим першенстве мали змагателє котри освойовале перши три места на аматерских змаганьох.
      На Шветовим першенстве Зарубицова, медзи коло 100 змагателями, була єдина зоз Сербиї. Перше место освоєла у найчежшей катеґориї боди - билдинґу, такволаней "Висшей", у хторей ше змагали лєм 14 боди - билдерки.
        Зоз освойованьом першого места Илона Зарубица достала сертификат за дальши змаганя зоз професионалцами, алє виявела же ше и надалєй будзе змагац и у аматерскей конкуренциї и то, найвироятнєйше, уж на Шветовим аматерским першенстве на Малти хторе будзе отримане 9. юния.

ФЕСТИВАЛ КУЛТУРИ "ЧЕРВЕНА РУЖА"
30. май 2007. - Тогорочни 46. Фестивал култури "Червена ружа" будзе отримани у Руским Керестуре 29. и 30 юния и 1. юлия. - одлучене на першей схадзки Орґанизацийного одбору Фестивала. За предсидателя Орґанизацийного одбору вибрани професор Владимир БесерминЇ, а за подпредсидателя Владимир Малацко, окончователь длужносци директора Дома култури.
        Концепция тогорочного Фестивала подобна як и прешлих рокох. Буду отримани традицийни манифестациї: "Червене пупче" манифестация за дзеци, Шветочни концерт зоз музично-танєчнима точками КУД зоз наших местох як и два госцуюци музично фолклорни ансамбли зоз Прешова и Гуменого зоз Републики Словацкей, и "Червена ружа" - змагательна манифестация за нови композициї и найкрасши женски и хлопски глас.
         На "Червеним пупчецу" буду виведзени 12 нови композициї за дзеци, а на "Червеней ружи" 10 нови композициї у народним духу. За найкрасши женски и хлопски глас ше буду змагац 15 млади шпиваче.

ПОСЛЕ ОПОМНУЦОХ ВИКЛЮЧОВАНЄ ВОДИ
29. май 2007. Служба Месней заєднїци у Руским Керестуре доручела опомнуца гражданом хтори маю длуства за потрошену воду. По словох секретара Месней заєднїци Йоакима Надя длуства виноша коло 2 милиони динари, а поєдинєчни виноси длуствох ше рушаю аж по 35.000 динари.
- На опомнуцох наглашене же длуство треба вимириц найпознєйше по 15. юний. Хто по тот датум нє вимири свойо обовязки почнє ше виключовац обисца зоз водоводней мрежи, понеже служба водоводу на таки способ нє годна функционовац, а окрем того шицки муша похопиц же ше обовязки муши вимирйовац – гвари секретар Надь.
Перше буду виключени ґаздовства и правни особи хтори маю найвекши длуства.

ОНАЧЕНИ ДЗЕНЬ ОШ И ҐИМНАЗИЇ "ПЕТРО КУЗМЯК"
29. май 2007. - Основна школа и Ґимназия "Петро Кузмяк" у Руском Керестуре зоз богату програму, хтора тирвала три днї, означела 25. май, Дзень школи.
        Означованє Дня школи почало 24. мая зоз отримованьом пригодней културно-уметнїцкей програми хтору пририхтали школяре, и зоз дружтвеним вечаром на хторим заняти у Школи випровадзели до пензиї шейсцох своїх колеґох.
         - Того року зме на преславу Дня школи поволали госцох зоз велїх местох, Дюрдьова, Коцура, Нового Орахова... даєдни з нїх були змесцени у нашим интернату бо зме их и на таки способ сцели упознац зоз нашу Ґимназию, направиц промоцию єй вредносцох и обезпечиц упис цо векшого числа школярох – гварел Янко Хома, директор ОШ и Ґимназиї "Петро Кузмяк" у Руским Керестуре.
         Другого дня отримани змаханя у малим фодбалу, одбойки, рукомету и других спортских дисциплинох, а соботу 26. мая, у рамикох преслави Дня школи и 16. Спортских змаганьох "Яша Баков" отримани улїчни обегованя за школярох основних школох у хторих попри Керестурцох участвовали и школяре зоз Дюрдьова, Коцура, Нового Орахова, Апатину, Червинки и Кули.

НАЙУСПИШНЄЙШИ НА УЛЇЧНИХ ОБЕГОВАНЬОХ
29. май 2007 - На улїчних обегованьох хтори отримани 26. мая у рамикох означованя Дня школи и 16. Спортских бавискох "Яша Баков" у Руским Керестуре змагали ше 120 учашнїки од трецей по осму класу, а перши места завжали: у конкуренциї трецих класох Андрея Надь зоз Руского Керестура и Бейце Фехир зоз Нового Орахова. У конкуренциї Штвартих класох перши места завжали Кристина Шепински и Давид Катона обидвойо з Руского Керестура. Од пиятих класох перша на циль сцигла Мария Пена зоз Червинки, а од хлапцох Зоран КолошняЇ зоз Руского Керестура, а у змаганю школярох шестих класох перше место завжала Беата Дудаш зоз Нового Орахова и Педя Савич зоз Коцура. Перши на циль у конкуренциї седмих класох сцигли Тияна Гарди и Борис Барна зоз Руского Керестура, а у конкуренци осмих класох найлєпши були Радойка Шкрбич зоз Червинки и Боян Сабо зоз Кули.

ОТРИМАНИ ТРАДИЦИЙНИ РОЧНИ КОНЦЕРТ
29. май 2007. - Прешлей нєдзелї, 27. мая, у велькей сали Дома култури у Руским Керестуре отримани традицийни рочни концерт на хторим приказана часц роботи аматерох шицких секцийох хтори активни у тей културней установи.
       Наступели мишани хор зоз духовнима шпиванками, дзецински танєчни ґрупи, дзецински шпивацки ансамбл "Шкорванчок", рецитаторе, старши мишани хор, женска и хлопска жридлова ґрупа як и фолколрни ансамбл, а шпивачох и фолклорашох провадзела тринацчленова орхестра Дома култури.
          Владимир Малацко, окончователь длужносци директора Дома култури привитал аматерох и преполну салу патрачох и визначел найвекши успихи керестурских аматерох на тогорочних змаганьох, а було их надосц.
       Точки за тогорочни наступ и змаганя та и за тот успишни концерт приритали дириґент мишаного хору Лидия Пашова, хореоґрафе Йоакуим Рац Мими и Михайло Стрибер, руководитель охестри, шпивацких ґрупох и аранжер Юлиян Рамач Чамо и руководитель рецитаторскей секциї Михайло Зазуляк.

У РУСКИМ КЕРЕСТУРЕ ОТРИМАНА РОЗПРАВА О ТЕЗОХ ЗА ВИРОБОК ЧАСЦИ ЗАКОНА О ЛОКАЛНЕЙ САМОУПРАВИ
23. май. 2007. - Нєвладова орґанизация "Локална самоуправа" зоз Беоґраду ше заклада же би месна заєднїца як форма орґанизованя гражданох и надалєй остала у Закону о локалней самоуправи, та аж же би достала и векше значенє. Зоз таким становиском ше зложели и учашнїки у розправи хтору прешлого тижня у керестурскей Месней заєднїци орґанизовала тота Нєвладова орґанизация на хторей були присутни и представителє месних заєднїцох зоз Бачкей Тополї, Суботици, Вербасу, Червинки и других местох и на хторей утвердзени 15 тези хтори би, як гварене требали буц убудовани до нового Закону о локалней самоуправи.
        Зоз утвердзенима тезами ше вимага ше же би Месна заєднїца мала свойство правней особи як и же би могла мац маєток або право хаснованя на општинским маєтку, а обєкти хтори вибудовани зоз средствами гражданох прейґ самодоприносу нє мож оцудзовац без согласносци гражданох, анї меняц их намену.
        Учашнїки у розправи о тезох за вименку Закона о локалней самоуправи у часци хтора ше одноши на месни заєднїци були єдинствени и зоз становиском же би ше средства месней заєднїци водзели на окремним рахунку, и же би ше их могло хасновац лєм за намену за хтору су напредок утвердзени з планом и програмами, а же би за средства хтори ше наменски уплацує зоз бужета општини, месна заєднїца була поштредни хаснователь.
         Обща оцена, гварене на тим сходзе, же локална самоуправа та и держава ище длуго нє годни мац таку добру мрежу оспособених институцийох, кадро и финансийни средства хтори годни у подполносци препознац интереси гражданох. Месна самоуправа, односно месна заєднїца праве тота хтора хтора, зоз реафирмованьом одредзених вонка институционалних формох активносци, тоти интереси препозна и парципує, и по обсягу и медзисобней усоглашеносци, будзе обезпечовац средства и шицки форми донацийох, цо заєднїцки унапрями до стратеґиї розвою општини – гварене, медзи иншим, на сходзе у Руским Керестуре.

ПОЧАЛ УПИС ДЗЕЦОХ ДО ОВОДИ
23. май 2007. - У оддзелєню "Цицибан" предшколскей установи "Бамби" у Руским Керестуре, почал упис дзецох до тей предшколскей установи за наступни школски рок.
         Упис до оводи будзе тирвац по 20. юний, а спрам законских предписаньох, упис дзецох до предшколского оддзелєня обовязни, та дзеци народзени 2001. року обовязно муша буц уписани до предшколского оддзелєня, односно до такволаней пририхтуюцей предшколскей програми. До того оддзелєня мож уписац и дзеци народзени 2002. року.
       За упис дзецох потребне кресцене писмо дзецка, його здравствену кнїжочку, особну карточку єдного родителя и привесц дзецко зоз собу на упис.
         Дзеци мож уписац кажди дзень у чаше од 10 до 17 годзин.

ПИЯЦ УКРАШЕНИ З КВЕЦОМ
23. май 2007. - Школяре штвартей класи ОШ "Петро Кузмяк", у рамикох виборного предмету "Чуваре природи", прешлого тижня зоз своїма учительками Меланию Рамач и Наталию Зазуляк, украшели керестурски пияц зоз садзеньом квеца до жардиниєрох. У акциї участвовали и жени зоз Еколоґийней секциї "Кветова заградка" на чолє зоз Любицу Нярадийову.
         Вецей як 200 коренки, найвецей петониї, посадзени до шицких жардиниєрох, а материялно акцию помогла ОШ и Ґимназия "Петро Кузмяк" и керестурска Месна заєднїца.

ВИБРАНИ НОВИ ЧЛЕНИ УО РНТ "ПЕТРО РИЗНИЧ ДЯДЯ"
22. май 2007. - На 19. схадзки Националного совиту рускей националней меншини хтора прешлей соботи отримана у Коцуре за окончователя длужносци директора Руского народного театра "Петро Ризнич Дядя" меновани Владимир Надь Ачим.
На истей схадзки меновани и нови члени Управного одбору нашого Националного театра: Михайло Зазуляк, Любомир Надь, и Владимир Варґа зоз Руского Керестура, Ирина Гарди Ковачевич и Мирон Канюх зоз Нового Саду, Дюра Макаї зоз Коцура, Мирослав Цирба зоз Шиду, Янко Лендєр зоз Вербасу и директор Дома култури зоз Руского Керестура по функциї хтору тераз окончує Владимир Малацко.

ВИМОГА ЗА ИСТУ ЦЕНУ ВОДИ
22. май 2007. - Месни заєднїци Руски Керестур, Крущич и Липар послали Дочасовому орґану општини Кула вимогу за виєдначованє цени води у шицких местох кулскей општини - гвари Йоаким Надь, секретар Месней заєднїци.
         Вон наглашує же цени потрошеней води розлични и рушаю ше од 15 динари за кубик, яки случай у Руским Керестуре, по 20 и вецей динари, а на основу проєкциї ценох, цену води мож звекшац лєм за седем одсто, та ше и тераз и убудуце будзе правиц вше векша розлика.
      Секретаре шицких трох месних заєднїцох у хторих дистрибуцию води окончую месни заєднїци, понеже у тих местох нєт явни комунални подприємства, вимагаю од Дочасово орґану општини Кула же би принєсол одлуку же би у шицких местох кулскей општини гражданє за кубик води плацели по истей цени.

ФОДБАЛЕРЕ СТРАЦЕЛИ, ШАХИСТИ ПОБЕДЗЕЛИ
22. май 2007. - Фодбалере "Русину" у першенственим змаганю Зомборскей подручней лиґи внєдзелю на своїм терену страцели од екипи Липару з резултатом 1:0, перши пол час 0:0. Липарчаньом боди барз значни за обставанє у лиґи, а Керестурци и попри того пораженя и надалєй забераю високе место на першенственей таблїчки.
         У предзмаганю подросток "Русину" зоз подростком з Липару одбавел змаганє з нєришеним резултатом 3:3. Голи за подросток дали Борис Орос, Дарко Надь и Владо Дервишевич.
         Шахисти "Русину" у другим колу першенства у Сивернобачкей лиґи внєдзелю у Руским Керестуре победзели екипу Червинки зоз 4,5:3,5 и зоз двох колог освоєли 4 меч боди. Побиду за "Русин" вивойовали Лазор, Щепанович, Перич и Радович, док Сабадош ремизовал.

ПОЧИНА АСВАЛТОВАНЄ ДРАГИ У РУСИНСКЕЙ
17. май 2007. - Асвалтованє драги у Русинскей улїчки почнє наступного тижня и будзе закончене за два-три днї. Асват будзе преляти на часци од центру у напряме школи по конєц Русинскей, док друга часц од центру валала ґу Крущичу, по словох секретара Месней заєднїци Йоакима Надя будзе поробена источасно зоз реконструкцию драги Руски Керестур - Крущич.
Средства у виносу од 3 милиони динари обезпечени зоз здружованьом средствох Месней заєднїци и Републичней дирекциї за драги по системи динар на динар, а роботи окончи подприємство "Вой драга" зоз Суботици.
Понеже реконструкцию драги Руски Керестур - Крущич у цалосци финансує Републична дирекция за драги, початок тих роботох вязани за приношенє републичного буджету за 2007. рок.

ВИРОБЕНИ ҐЕНЕРАЛНИ ПРОЄКТ ДИСТРИБУТИВНЕЙ ҐАЗНЕЙ МРЕЖИ
17. май 2007. - Ґенерални проєкт дистрибутивней ґазней мрежи за Руски Керестур уж виробени, вибрани найвигоднєйши виводзач за виробок проєктней документациї за вибудов Главней мерней реґулацийней станїци, Мерней реґулацийней станїци як и проєктней документациї дистрибутивней ґазней мрежи по Керестуре.
Совит Месней заєднїци шицки технїчни роботи вязани за ґазификованє Руского Керестура зверел Явному подприємству "Кула ґаз", средства у виносу од 850.000 еври обезпечело Явне подприємство "Сербия ґаз" зоз Националней инвестицийней програми, а роботи на ґазификованю валала би требали буц закончени того року.

КРАСНИ УСПИХ МЛАДИХ АТЛЕТИЧАРОХ
17. май 2007. - Млади атлетичаре Спортского дружтва "Русин" посцигли красни успих на Окружним змаганю хторе 10. мая отримане у Зомборе. Борис Барна у скаканю до далєка скочел 5,13 метери и з тим резултатом виборел пласман на Медзиокружне змаганє хторе будзе отримане того мешаца у Суботици. У скакню до висока Желько Кршич бул треци, а Тияна Гарди завжала штварте место. На Окружним змаганю у Зомборе участвовали и Валентина Барна и Давид Катона у обегованю на 100 метери.

УСПИШНИ СТАРТ КЕРЕСТУРСКИХ ШАХИСТОХ
17. май 2007. - У першим колу першенства у Сивернобачкей шаховскей лиґи Шаховски клуб "Русин" на госцованю у Ґакову победзел домашнїх з резултатом 4,5 : 3,5 поени.

ДОГВАРКА О ОРҐАНИЗОВАНЮ ВОЛОНТЕРСКОГО КАМПУ
16. май 2007. - Представителє Волонтерского центру Войводини пондзелок, 14. мая у Руским Керестуре бешедовали зоз представителями керестурскей Месней заєднїци, младежскей орґанизациї Пакт Рутенорум, дружтвених орґанизацийох и дзепоєдних керестурских привреднїкох о орґанизованю Волонтерского кампа хтори под назву "Лєто у Руским Керестуре" будзе отримани од 17. по 30. юлий. Обчекує ше же у роботи Кампа буду участвовац 15 волонетере зоз иножемства и исто тельо млади зоз местох Войводини. Предвидзене же под час Кампа будзе ушорени керестурски базен и його околїско, а єдна з главних роботох, як догварене, будзе и правенє лєтней бини коло базену и вилєтнїцкого места. Секретар Месней заєднїци Йоаким Надь наглашел же Месна заєднїца да потребну технїчну потримовку за окончованє планованих роботох и поинформовал учашнїкох же Совит МЗ уж опредзелєл 80.000 динари за куповенє потребного алату и материялу. Попри Месней заєднїци материялну потримовку Кампу "Лєто у Керестуре" даю и Основна школа и Ґимназия "Петро Кузмяк", ПК "Перши май", як и други привредни фирми у нашим месце и зоз Червинки. Под час отримованя Кампа од 28. по 30 юлий будзе отримана и традицийна "Рок - фешта" хтору орґанизує Пакт Рутенорум.

ОЛЕСЯ РАМАЧ ДРУГА У РЕПУБЛИКИ
15. май 2007. - Олеся Рамачова, школярка штвартей класи Школи за основне музичне образованє у Кули (школярка шестей класи ОШ "Петро Кузмяк"), завжала високе друге место на Републичним фестивалє музичних и балетских школох хтори отримани у Вршцу.
         Олеся Рамачова школярка виолини у кулскей музичней школи у класи професорки Лїляни Барна - Никитович, а на Републичним фестивалє участвовала у штирочней екипи.

ОТРИМАНА ОПШТИНСКА СМОТРА
15. май 2007. - Хлопска и женска жридлова шпивацка ґрупа керестурского Дома култури виборели пласман за Зопнску смотру на Општинскей смотри музично-фолклорней творчосци хтора у Руским Керестуре отримана прешлого викенду.
       На Општинскей смотри у Руским Керестуре участвовали ансамбли и секциї домох култури зоз Руского Керестура и Сивцу, и културно уметнїцких дружтвох зоз Липару, Кули и Крущичу.
        Вонка з конкуренциї наступел и Мишани хор Дома култури з Руского Керестура под руководством Лидиї Пашовей.
        Селекторе Општинскей смотри були Ирина Олеяр, професорка музики зоз Руского Керестура и Любомир Вуйчин, кореоґраф зоз Вербасу.

КЕРЕСТУРЦИ НЄШКА ПРЕСЛАВЮЮ КИРБАЙ
9. май 2007 - Нєшка Керестурци преславюю Кирбай - Дзень Катедралней церкви св. о. Миколая и Дзень Апостолского еґзархату за грекокатолїкох у Сербиї. З нагоди того велького швета у Церкви очекую приход прейґ 50 госцох, духовних достоїнственїкох зоз жеми и иножемства. Медзи другима, наявени приход и Ватиканского папского апостолского нунция у Беоґрадзе, Еуджения Сбарбара, а попри домашнього Апостолского еґзарха кир Георгия Джджара, наявени и приход Беоґрадского надвладики Станислава Хочевара и Крижевского владики кир Славомира Микловша. З нагоди Кирбая велька Архиєрейна Служба Божа будзе служена на 10 годзин. Вашарска часц Кирбаю будзе отримана на истим месце як и влонї, а нєшка у керестурских привредних подприємствох, дружтвених орґанизацийох як и у ОШ и Ґимназиї "Петро Кузмяк" нєроботни дзень.

КЕРЕСТУР НАЩИВЕЛИ СЛАВИСТИ ЗОЗ МАДЯРСКЕЙ
6. май 2007. - У рамикох нащиви нашей жеми професоре, лекторе и студенти славистики Института за славистику и балистику ЕЛТЕ у Будимпешти прешлого тижня нащивели и Руски Керестур. Вони у Керестуре нащивели Основну школу и Ґимназию "Петро Кузмяк", Музей, Церкву и дописовательство НВУ "Руске слово" дзе им подаровани нашо руски виданя. Под час пребуваня у Керестуре госци зоз Мадярскей присуствовали и на представох на Драмским мемориялє. До тей нащиви славистох зоз Мадярскей зоз хторима були и новинаре и представителє локалней самоуправи Будимпешти, пришло на инициятиву постдипломскинї на тим Институту Зорици Фирисовей, родом зоз Руского Керестура.

НЄШКА ШЕ ЗАКОНЧУЄ ДРАМСКИ МЕМОРИЯЛ
5. май 2007. - Нєшка, остатнього дня, на 39. Драмским мемориялє "Петра Ризнича Дядї" наступя члени Аматерского театра Културного центру зоз Кули хтори прикажу представу "Ранєни орел" у режиї Драґана Остоїча. Представа почнє на 20,30 годзин. Уходнїца 100 динари.
       Зоз тоту представу хтора преглашена за найлєпшу на Општинскей смотри драмского творчества у Сивцу, будзе закончени тогорочни Мемориял понеже ше драмским аматером зоз Шиду, хтори требали наступиц на ютре, нє удало закончиц представу Цветина Аничича "Битка за Сталїнґрад".
         У рамикох Драмского меморияла нєшка на 17 годзин у Доме култури будзе отримана трибина на тему "Театрална дїялносц Руснацох" хтору орґанизує Национални совит Руснацох и РНТ "Петро Ризнич Дядя".

АКЦИЯ ПК "ПЕРШИ МАЙ" ВРЕДЗИ 4.300 ДИНАРИ
5. май 2007. - Вредносц акциї Польопривредного комбинату "Перши май" на Беоґрадскей берзи вчера знова поросла за 20,01 одсто и тераз вредзи 4.300 динари.
        Прешлого тижня акция керестурского Комбината вредзела 3.583 динари. Економисти толкую же ше вредносц акциї звекшує (у остатнїх мешац и пол дньох за по 20 одсто мешачно) насампредз пре вельки инвестицийни укладаня ПК "Перши май" до Фабрики змарзнутей желєняви АБЦ.

ОТРИМОВАНЄ ШМЕЦИСКА ЗВЕРЕНЕ РР "СЛАBЧЕ"
4. май 2007. - Совит Месней заєднїци принєсол одлуку же би ше роботи на роздрильованю шмеца на шмециску зверело Ремесельнїцкей роботнї "Славче" зоз Руского Керестура понеже то було найвигоднєйше понуканє на тендеру на хтори сцигли штири понуканя.
       РР "Славче" роздрильованє шмеца на шмециску будзе окончовац по цени од 4.443 динари на годзину зоз плаценьом после окончених роботох. За окончованє истей роботи "Бачка" зоз Вербасу глєдала 4.543 динари, Землєдїлска задруґа "Зарно" зоз Коцура 5.239, а Мега инжинєринґ зоз Вербасу 8.000 динари.

ЯК НАПЛАЦОВАЦ ВИНОШЕНЄ ШМЕЦА
4. май 2007. - Совит Месней заєднїци на наступней схадзки треба же би утвердзел способ наплацованя виношеня шмеца понеже, пре зменшанє стопи видвойованя, воно ше вецей нє финансує зоз месного самодоприносу.
Вивершни одбор Совиту предложел три вариянти: же би ше виношенє шмеца наплацовало по поверхносци бивацого простору у ґаздовствох, по члену ґаздовства, або по меху хтори би гражданє куповали и зоз чим би була плацена услуга воношеня шмеца.
Служба Месней заєднїци за наступну схадзку Совиту треба же би направела калкулациї за шицки три предлоги после чого члени Совиту принєшу конєчну одлуку.

МЕДЗИНАРОДНИ МЛАДЕЖСКИ КАМП ОД 17. ПО 30. ЮЛИЙ
3. май 2007. - Младежска орґанизация "Пакт Рутенорум" поволує младих Керестурцох же би ше приявели за участвованє на Медзинародним волонтерским кампу хтори у Руским Керестуре будзе отримани од 17. по 30. юлий под меном "Лєто у Керестуре".
"Жадаме заинтересовац цо вецей младих Керестурцох. Нєдавно зма мали перши промотивни парти вечар о Кампу, а надалєй ше ту уключа и активисти з Волонтерского центра Войводини котри и главни орґанизаторе - гвари Сашо Палєнкаш, член орґанизациї "Пакт Рутенорум".
Приявйованє за учашнїкох Волонтерского кампа "Лєто у Керестуре" уж тирва, а заинтересовани ше можу приявиц ґу Владимирови Надьови Ачимови (моб. тел 064/618 21 24) и Иґорови Варґови (моб. тел. 064/183 92 97).

МЗ ВИДВИЄЛА 80.000 ДИНАРИ ЗА ВОЛОНТЕРСКИ КАМП
3. май 2007. - Совит Месней заєднїци на остатнєй схадзки принєсол одлуку же орґанизацию Младежского волонтерского кампу хтори будзе отримани у Руским Керестуре од 17. по 30. юлий, помогнє зоз 80.000 динари.
Тоти средства буду похасновани за набавку алату и материялу нєобходного за ушоренє базена и околїска на чим млади кампере зоз иножемства и нашей жеми буду найвецей робиц.

"БАРОН МИНХАУЗЕН" ШЕ ПЛАСОВАЛ НА ВОЙВОДЯНСКИ ФЕСТИВАЛ
3. май 2007.- Монодрама "Барон Минхаузен" ше пласовала за участвованє на Фестивалу малих сценох и монодрамох Войводини хтори будзе отримани у Сенти. Монодраму "Барон Минхаузен" Драмского студия АРТ Дома култури у Руским Керестуре, виводзи Емил Няради у режиї Владимира Надя Ачима.

МРС БУДЗЕ ПРИ КАПЛЇЧКИ

2. май 2007. - Мерна реґулацийна станїца (МРС) за ґаз будзе вибудована при каплїчки на поверхносци 660 квадратни метери у желєним пасу – заключене на остатнєй схадзки Совиту Месней заєднїци.
Як гварене, идейни проєкт траси уж поробени, а при концу и виробок проєкту ґазификованя та би нєодлуга требали почац и роботи на ґазификованз нашого места за цо зоз Националного инвестицийного плану ЯП "Сербия ґаз" обезпечел 850.000 еври.

ВОДУ ШЕ НАПЛАЦУЄ ПО СТАРЕЙ ЦЕНИ
2. май 2007. - Цена води у Руским Керестуре ище вше нє пременєна и наплациє ше по 15 динари за кубик цо найнїзша цена у одношеню на други места у општини. Предложене звекшанє цени води за 20 одсто нє прилапене понеже у проєкциї ценох комуналних услугох, звекшанє за тот рок, можлїве лєм за коло 7 одсто.
Понеже остатня корекция ценох у Руским Керестуре робена ище 2003. року Совит керестурскей Месней заєднїци предложел же би шицки комунални подприємства, односно комунални служби Дочасовому орґану општини Кула доручели заєднїцку вимогу за виєдначованє ценох шицких комуналних услогох у шицких местох кулскей општини.

ОБУЧИ ШЕ ДВОХ РОБОТНЇКОХ
2. май 2007. - За рукованє на пошореню за пречисцованє води у Руским Керестуре на хторим фаховци Института за хемию, технолоґию и метали зоз Беоґраду ище вше рообя, буду обучени двоме роботнїки служби Месней заєднїци хтори и тераз задлужени за водоводну мрежу – заключене на схадзки Совиту месней заєднїци.
Виглєдованя на пошореню за пречисцованє води предлужени ище шейсц мешаци и у тим периодзе окрем обучованя роботнїкох за рукованє зоз пошореньом за пречисцованє води треба же би ше утвердзело констaнтносц квалитету води и утвердзело цену пречисценей води на тим пошореню.

НА МЕМОРИЯЛЄ И НЄШКА ШЛЄБОДНИ ДЗЕНЬ
2. май 2007 - Пре Перши май вчера на 39. Драмским мемориялє "Петра Ризнича Дядї" бул шлєбодни дзень, а представа "Барон Минхаузен" хтора по програми була планована нєшка нє будзе одбавена пре оправдану причину пре хтору ґлумец Емил Няради нє може бавиц.
Наютре, 3. мая на Мемориялє буду приказани два представи: на 13 годзин дзецинска "Кед би зме верели моєй баби" у виводзеню дзецинскей ґрупи Драмского студия АРТ Дома култури зоз Руского Керестура, и на 20,30 "Перша дама" у продукциї РНТ "Дядя".

ПЕРШИ МАЙ НА БАЗЕНУ

1. май 2007 - Перши май, Медзинародне швето роботи числени Керестурци нєшка преславели на вилєтнїцким месце Базен. Варело ше котлїки, пекло роштиль, алє печени прашата на рожню того року були прави хит.
Орґанизовани и першомайски спортски змаганя у фодбалу и одбойки, участвовали надосц екипи, найлєпши достали награди, а о резултатох другираз. На остатку, вони анї нє таки битни.

ВРЕДНОСЦ АКЦИЇ ПК "ПЕРШИ МАЙ" И ДАЛЄЙ РОШНЄ
1. май 2007 - Вредносц акциї ПК "Перши май" на Беоґрадскей берзи прешлого тижня знова поросла за 19,99 одсто и тераз виноши 3.583 динари.