Туристични фах найвироятнєйше по руски
30. май 2008. (Рутенпрес) - Гоч за терашнї упис штредньошколцох Покраїнски секретарият за образованє, односно Скупштина АП Войводини, дали согласносц на формованє нового образовного профилу у керестурскей Ґимназиї "Петро Кузмяк" - туристични технїчар (по сербски), у тогорочним Конкурсу за упис до штреднїх школох Министерства просвити РС - тот напрям у Керестуре вихабени.
     По питаню отвераня нового образовного профилу у керестурскей Ґимназиї, стреду, 28. мая, зоз державну секретарку Министерства просвити Миряну Йованович, як и ресорнима совитнїками, бешедовали предсидатель Националного совиту Руснацох Славко Орос и директор рускокерестурскей ОШиҐ "Петро Кузмяк" Янко Хома.
     Проблем коло вихабяня нового образовного профилу керестурскей Школи у Конкурсу Републичного Министерства, як школи од окремного значеня за Войводину, стреду, 28. мая, у Министерстве просвити винєсол и др Золтан Єґеш, покраїнски секретар за образованє.
      На схадзки у Министерстве просвити догварене же єст барз реални шанси же би ше нови образовни профил - туристични технїчар - у рускокерестурскей Школи отворело з руским наставним язиком, а скорей того будзе окончена анкета о заинтересованосци терашнїх школярох закончуюцих осмих класох ОШ за упис до того профилу.
      Уж од вчера, 29. мая, таку анкрету ше окончує у Руским Керестуре и Коцуре, а до нового профилу потребне уписац найменей 15 будуцих штредньошколцох. Спрам терашнїх догваркох, у Руским Керестуре би и надалєй робели два оддзелєню общей Ґимназиї - єдно по руски и єдно по сербски, як и нови напрям за туристичного технїчара, за тераз - по руски. Проблем настал коло будуцого финансованя нового напряму, гоч ше, у сущносци, з його уводзеньом у керестурскей Ґимназиї нє звекшує анї число оддзелєньох першей класи штреднєй школи, анї число школярох Ґимназиї, єдино би, место єдного оддзелєня Ґимназиї по сербски, бул отворени нови образовни профил.
      Спрам нових законских предписаньох, на Скупштину Войводини пренєшени инґеренциї о снованю мрежи штреднїх школох на териториї Войводини, алє нє и цалосне финансованє, бо дїялносц штреднїх школох и надалєй финансує Министерства просвити Републики Сербиї.

Конєц школи за осмакох
30. май 2008. (Рутенпрес) - Нєшка, 30. мая, школяре осмих класох основней школи - маломатуранти - закончую свойо основношколске образованє. У рускокерестурскей Основней школи "Петро Кузмяк" осму класу того року закончую 46 школяре, котри були у двох оддзелєньох.
       На стреду, 4. юния, за школярох осмих класох у Школи будзе отримана пригодна шветочносц з нагоди законченя основношколского образованя, програму за тоту нагоду пририхтую школяре седмих класох, а после того, у Керестуре за нїх будзе отримани и маломатурски вечар.

Олеся Рамач освоєла першу награду
29. май 2008. (Рутенпрес) - Олеся Рамач зоз Руского Керестура, школярка пиятей класи виолини Школи за основне музичне образованє Кула (ШОМО), у класи професорки Лїляни Барна Никитович, штредком мая освоєла першу награду на високим змаганю школярох виолини.
       Першу награду зоз 96 освоєнима бодами, Олеся Рамач, иншак школярка седмей класи керестурскей ОШ "Петро Кузмяк" освоєла на Шестим фестивалє смикових инструментох, котри од 14. по 18. май отримани у Сримскей Митровици.
      Праве нєшка, 29. мая, Олеся Рамач и Александра Надь зоз Сивцу, у Концертней сали ШОМО у Кули, отримаю заєднїцки концерт на гушльох, а концерт почина на 19 годзин.

ДЕРЖАВНЕ ЗМАГАНЄ З ТРАНСПОРТУ
29. май 2008. (Рутенпрес) - Штверо школяре зоз кулскей општини - по двойо з Руского Керестура и Кули - 30. и 31. мая буду участвовац на 39. державним змаганю школярох основних школох Сербиї - "Цо знаш о транспорту". Змаганю наступного викенду будзе отримане на Дивчибарох, а зоз Руского Керестура ше буду змагац Мирко Катона зоз шестей и Наташа Колєсар зоз седмей класи рускокерестурскей ОШ "Петро Кузмяк" у такв. старшим возросту.
       У младшим возросту, на найвисшим змаганю школярох зоз транспорту у Сербиї, буду ше змагац Мирко Милутин з ОШ "Петефи бригади" и Даница Дьоґич зоз ОШ "Иса Баїч", ободвойо школяре пиятей класи, зоз Кули. Штверо школояре зоз кулскей општини пласман на Державне змаганє виборели после змаганю на Окружним, так же на Дивчибарох, єдини буду представя Заходно-бачки округ.
       На Державним змаганю участвую 112 найлєпши школяре зоз 28 округох Сербиї, по штверо зоз каждого, а у тогорочним циклусу змаганьох школярох ОШ зоз транспорту, у Сербиї участвовали аж коло 500 000 школяре. Теорийна часц змаганя "Цо знаш о транспорту", односно покладанє тестох, будзе отримане на пияток, 30. мая, а на соботу, 31. мая, будзе отримана друга, практична часц змаганя, односно воженє на бициґлох на "Полиґону схопносци" и "Транспортним полигону".
       За змаганє на полиґонох, школярох зоз керестурскей Школи пририхтал професор технїчного образованя у ОШиҐ "Петро Кузмяк" Зденко Шомодї, а за змаганє з теорийней часци Сашо Ковач, инструктор зоз керестурскей Авто-школи "Ковач". Орґанизаторе 39. державного змаганю школярох ОШ Сербиї "Цо знаш о транспорту" Авто-мото Союз Сербиї и Дружтво наставнїкох технїчного образованя Сербиї, а под покровительством Министерства просвити Републики Сербиї.

Закончени Биєнале лемковско-русинскей култури у Кринїци
27. май 2008. (Рутенпрес)- Внєдзелю 25. мая, делеґация Рускей матки, лауреатка награди "Александар Духнович" Ирина Гарди Ковачевич и ансамбл керестурского Дома култури врацели ше зоз Кринїци у Польскей до Руского Керестура. Керестурци у Польскей, у Кринїци, участвовали на Пиятм медзинародним биєналу лемковско-русинскей култури, котри з вецей манифестациями и схадзку Шветовей ради Руснацох/ Русинох/ Лемкох, отримани 23. и 24. мая.
       Виводзацки танєчни ансамбл Дома култури, Народни оркестер и соло-шпивачки Андрея Бучко и Весна Надь, у Кринїци зоз свою програму наступели на шветочним отвераню Биєнала, пияток, 23. мая. Керестурци часц своєй програми виведли и на заєднїцким концерту з нагоди завераня Биєнала и уручовая Литературней награди "Александар Духнович", всоботу, 24. мая, а на обидвох концертох наступали вєдно з ансамблами "Зория", "Роса" и "Ластовичка" з Польскей, "Шариш" и "Барвинок" зоз Словацкей, як и "Русини" зоз Мадярскей.
      На закончуюцим концерту Пиятого биєнала, 24. мая, после наступу нашого ансамбла, Ирини Гарди Ковачевич, поетеси зоз Нового Саду, уручена Литературна награда "Александар Духнович" за 2007. рок.
      Пияток вечар, у Кринїци отримани и литературни вечар, на котрим, вєдно з поетами зоз Словацкей, Мадярскей и Польскей, участвовали и нашо поетове - Ирина Гарди Ковачевич зоз Нового Саду и Владимир Малацко зоз Руского Керестура.
     Под час отримованя Биєнала, 24. мая отримана и схадзка Шветовей ради Шветового конґреса Руснацох/Русинох/Лемкох, котрей, у одсутносци предсидателя Ради др Павела Роберта Маґочия, предшедовал єй подпредсидатель Дюра Папуґа з Руского Керестура.
        Медзи иншим розпатрани и заключеня з остатнєй схадзки Шветовей ради у Букурешту, дзе бешедоване о ситуациї у русинских здруженьох на Подкарпат'ю, у України, а понеже представителє Русинох з Подкарпат'я нє присуствовали анї терашней схадзки Ради у Кринїци, стану у їх орґанизацийох будзе пошвецени наступни сход Ради, у юнию того року.
      Тиж так, члени Шветовей ради на схадзки у Польскей бешедовали и о пририхтованю наступного, Дзешатого Шветового конґреса РРЛ, котри идуцого року будзе у Руским Керестуре, у Сербиї, и єден дзень у Петровцох, у Горватскей. Заключене же Перши камп основношколцох РРЛ будзе отримани шлїдуюцого лєта у Словацкей, а до конца рока, заинтересовани учашнїки ше маю приявиц Шветовей ради.
       Остатнього дня Биєнала, 24. мая, у Кринїци отримани и Симпозиюм о актуалних стану, дзе о Руснацох у Сербиї бешедовал предсидатель нашого Националного совиту Славко Орос.
     Пияти медзинародни Биєнале у Кринїци финасийно потримало и Министерство Републики Польскей задлужене за национални меншини, чиї представитель тиж присуствовал програмом Биєнала.

Керестурци прешвечлїво за Буквича
27. май 2008. (Рутенпрес ) - Светозар Буквич, кандидат Демократскей странки, односно Коалициї За европску Войводину-Борис Тадич за покраїнского посланїка по векшинскей системи, у Руским Керестуре на виберанкох 25. мая достал 1 506 гласи, лєбо аж 91,22 одсто гласох Керестурцох котри того дня гласали.
       Тихомир Дюричич Тихо, кандидат Сербскей радикалней странки, у Керестуре достал 145 гласи, лєбо 8,78 одсто од тих котри вишли на виберанки у другим кругу гласаня за покраїнских посланїкох.
       У Руским Керестуре право гласа мали 4 105 вибераче, котри гласали на штирох виберанкових местох, од числа 34 по 37.

Ище три контракти за средства з Покраїни
27. май 2008. (Рутенпрес) - Штредком прешлого тижня, секретар рускокерестурскей Месней заєднїци Йоаким Надь, подписал ище три контракти з котрима Покраїна опредзелює пенєж за роботи у Руским Керестуре.
       Вредносц остатнїх трох контрактох виноши 1 850 000 динари, а наменєни су за ушоренє теметова, потим паркох и желєних поверхносцох, як и за набавку ище єдней косачки.
       На основи подписаних контрактох, Месна заєднїца Руски Керестур до конца того рока достанє коло 17 милиони динари, а на основи конкурованя з вецей проєктами до рижних покраїнских секретариятох.
       Пенєж будзе витворени у наступним периодзе а зоз нїм буду у финансовани рижни комунални роботи и инфраструктура у Руским Керестуре.

Перша причасц у керестурскей церкви
26. май 2008. (Рутенпрес) - Внєдзелю, 25. мая, у рускокерестурскей Катедралней церкви св. о. Миколая отримана Перша причасц за школярох основней школи.
       У Велькей Служби Божей, вчера, 25. мая, котру предводзел домашнї парох о. Юлиян Рац, Першу причасц достали 32 школяре другей класи основней школи.
      После Служби Божей, у котрей школяре по першираз достали святу тайну Першей причасци, вчера у порти керестурскей церкви отримана Процесия зоз святима тайнами, популарно наволана "Сят", у котрей, на окреме шветочни способ, участвовали дзеци предшколского и школского возросту.
       Першопричашнїкох за перше доставанє тей святей тайни пририхтали шестра Георгия и о. Зеновий Вовк.

Добра орґанизация Улїчних обехованьох
26. май 2008. (Рутенпрес) - Прейґ шейдзешат школяре од трецей по осму класу основней школи - дзивчата и хлапци - участвовали на Улїчних обегованьох, од 300 до 900 метери, котри всоботу, 24. мая, отримани у Руским Керестуре. Улїчни обегованя були закончуюца манифестация тогорочного означованя Дня рускокерестурскей ОШиҐ "Петро Кузмяк", котре тирвало од 22. по 24. май.
       Попри Дня керестурскей Школи, Улїчни обегованя отримани и у рамикох СБ "Яша Баков", а у їх орґанизациї участвовал и Атлетски клуб "Русин". На улїчних обегованьох за школярох ОШ участвовали змагателє зоз Коцура, Нового Орахова, Зомбора, Бачкого Брестовцу и Руского Керестура.
      У конкуренциї дзивчатох зоз 3. класи ОШ, котри ше обеговали на 300 м, перше место освоєла Инес Мученски зоз Коцура, друге Антония Тиркайла зоз Р. Керестура, треце Кинґа Секе зоз Н. Орахова, док у обегованю хлапцох, на 400 м, перши бул Виктор Киш Тушкеи зоз Н. Орахова, други Мижо Чижмар зоз Керестура, а треци Тамаш Дємбер, тиж зоз Орахова.
       Дзивчата зоз 4. класи бежали на 400, хлапци на 500 метери, и перше место освоєла Катарина Балович зоз Зомбора, друге Адрияна Надь зоз Керестура, треце Енико Санто зоз Орахова, док у конкуренциї хлапцох перши бул Фехир Бенце з Орахова, а други и треци Кереструци Ваня Хома и Стефан Бранкович.
        У конкуренциї 5. класох, дзе ше на 500 метери обеговали лєм два дзивчата, перше место завжала Евелин Хомоля зоз Нового Орахова, друге Кристина Шанта зоз Коцура, док медзи хлапцами, на 600 м, найлєпши бул Иван Дудаш зоз Коцура, а други и треци Кристиян Киш и Кристиян Хатала, обидвоме зоз Орахова.
       Медзи дзивчатми зоз 6. класох, котри бежали на на 600 зам, перше место освоєла Валентина Барна, друге Долорес Ґовля, обидва з Керестура, док треце место завжала Валентина Фаркаш зоз Н. Орахова.
       У конкуренциї хлапцох зоз 6. класи, у обегованю на 700 метери, шицки три побиднїцки места освоєли Керестурци - перше Зоран Колошняї, друге Тобияс Шанта, а треце Дарко Чернок.
        Дзивчата зоз седмих класох бежали на 700 метери, и медзи дзивчатми, найшвидша була Беата Дудаш з Н. Орахова, друга Марґарита Хома з Керестура, треца Тина Ивошев зоз Зомбора, док у конкуренциї хлапцох, котри бежали на 800 м, перше место освоєл Педя Савич зоз Коцура, друге Золтан Чолич зоз Н. Орахова, а треце Александар Делич зоз Бачкого Брестовцу.
        У конкуренциї осмих класох обеговали ше лєм хлапци - на 900 метери, и перше место очековано освоєл Борис Барна зоз Руского Керестура, друге Тамаш Талош зоз Нового Орахова, а треце Желько Кршич зоз Руского Керестура.
       Початку Улїчних обегованьох у Руским Керестуре присуствовал и предсидатель Општини Кула Светозар Буквич, а медалї и дипломи побиднїком обегованьох уручел народни посланїк др Дюра Мученски.
       У орґанизациї обегованьох, цо було на барз добрим уровню, попри професорох физкултури з Керестура и других местох, участвовали и родичи младих атлетичарох керестурского АК "Русин".

Вчера отримани спортски змаганя школярох з вецей школох
24. май 2008. (Рутенпрес) - З нагоди означованя Дня керестурскей Основней школи и Ґимназиї "Петро Кузмяк", вчера, 23. мая, Школа була орґанизатор вецей спортских змаганьох, на котрих участвовали школяре з вецей местох з Войводини.
      Дополадня у керестурскей Школи оримани змаганя у малим фодбалє за штредньошколцох зоз домох школярох (интернатох) зоз Зомбора, Бачкого Петровцу и ґимназиялцох зоз Руского Керестура. Перше место у змаганю штредньошколцох у малим фодбалє освоєли школяре зоз Бачкого Петровцу, други були Рускокерестурсци, а треци Зомборчанє.
        Вчера, 23. мая пополадню, у Школи отримани и змаганя за школярох ОШ - за дзивчата у рукомету, а за хлапцох у малим фодбалє. Перше место у малим фодбалє освоєла екипа ОШ "Братство-єдинство" зоз Коцура; друге домашнєй ОШ "Петро Кузмяк", а треце место припадло ОШ "Вук Караджич" зоз Дироню. У рукомету ше змагали екипи школяркох основних школох "Петар Кочич" зоз Ридїци, и "Петро Кузмяк" зоз Руского Керестура, дзе госцински домашнїх победзели зоз 17-16.
       Тиж так, отримане и змаганє дзивчатох у малим фодбалє медзи школярками ОШ "Бора Станкович" зоз Каравукова и домашнєй Школи "Петро Кузмяк", у котрим керестурски победзели зоз 4-0. У физкултурней сали Школи вчера отримани и змаганє у столним тенису, помедзи ОШ "Янош Гуняди" зоз Чантавиру и рускокерестурску ОШ "Петро Кузмяк".
       За екипу керестурскей Школи змагали ше Борис Ковач, Тони Костелник, Дамир Ковач и Мижо Сабадош, а змаганю були ревиялного характеру.

Нєшка наступ Дома култури на Биєналу лемковско-русинскей култури
24. май 2008. (Рутенпрес) - Як дознава Рутенпрес, музично-танєчни ансамбл керестурского Дома култури и делеґация Рускей матки, вчера, 23. мая, допутовали до Кринїци, у Польскей, на Пияти медзинародни биєнале лемковско-русинскей култури. Вчера, 23. мая, Керестурци мали свой перши заєднїцки наступ зоз ансамблами "Зоия" и "Роса" зоз Польскей, "Шариш" зоз Словацкей и "Русини" з Мадярскей.
       И нєшка, 24. мая пополадню, танцоше, соло-шпиваче и оркестер Дома култури Руски Керестур, зоз свою програму наступаю тиж на заєднїцким концерту у Кринїци, на завераню Пиятого медзинародного биєнала.
      Попри Керестурцох, на завераню Пиятого медзинародного биєнала лемковско-русинскей култури участвую и ансамбли “Ластовичка” з Польскей, “Студзенка” зоз України, “Барвинок” зоз Словацкей.
      През два днї Биєнала, у Кринїци отримани вецей културно-уметнїцки програми и змисти, а нєшка дополадня и схадзка Шветовей ради Руснацох/Русинох/Лемкох.
     На Медзинародним биєналу у Кринїци, нашей поетеси Ирина Гарди Ковачевич уручена награда за литературу "Александар Духнович" за 2007 рок, за єй збирку поезиї "Єднозложносц", а награду додзелює Фондация Штефана Чепи.
       Вчера у Кринїци отримани и литературни вечар, на котрим, вєдно з поетами зоз України, Словацкей, Сербиї, Мадярскей, Ческей и Польскей, участвовали и нашо поетове - Ирина Гарди Ковачевич зоз Нового Саду и Владимир Малацко зоз Руского Керестура. Нєшкайша схадзка Шветовей ради Шветового конґреса Руснацох/Русинох/Лемкох - пошвецена проблемом сучасней лемковско-русинскей култури и єй месце у нєшкайшим швеце.
     Попри члена Шветовей ради РРЛ зоз Войводини - предсидателя Рускей матки Дюру Папуґи, у роботи Шветовей ради участвує и Славо Орос, предсидатель Националного совиту рускей националней меншини у Сербиї котри будзе бешедовац о актуалних збуваньох медзи Руснацами у Сербиї, за остатнї два роки.

На нєдзелю Перша причасц
24. май 2008. (Рутенпрес) - На нєдзелю, 25. мая, у керестурскей Катедралней церкви св. о. Миколая будзе отримана Перша причасц за школярох основней школи. Вельку Архиєрейну Службу Божу, од 10 годзин, будзе предводзиц апостолски еґзарх за грекокатолїкох у Сербиї, владика кир Георгий Джуджар.
        Першопричашнїкох за перше доставанє тей святей тайни пририхтали шестра Георгия и о. Зеновий Вовк.

Вчера конєц школского рока, шлїдза матурски
испити
24. май 2008. (Рутенпрес) - Як и у других войводянских штреднїх школох, и за матурантох рускокерестурскей Ґимназиї “Петро Кузмяк” вчера, 23. мая, закончени школски наставни рок. Ґимназию общого напряму у Руским Керестуре закончую 57 штредньошколци.
       У оддзелєню зоз руским наставним язиком, матуру буду покладац 23 школяре, найвецей зоз Руского Керестура, алє и зоз Дюрдьова и Вербасу. У двох оддзелєньох зоз сербским наставним язиком, штиророчне штредньошколске образованє у керестурскей Ґимназиї закончую 34 школяре з вецей местох у Войводини.
      На вовотрок, 27. мая, у керестурским Ресторану "Русалка" за ґимназиялцох закончуюцого року и їх професорох, будзе отримани матурски вечар. Покладанє матурских испитох почина 30. мая з писменим испитом зоз мацеринского язика - руского, лєбо сербского, а 2. юния, матуранти, тиж писмено, буду покладац испит з виборного предмету - странского язика, лєбо математики.
      Одбрана писмених матурских роботох тогорочних матурантох будзе од 5. по 12. юний, а 18. юния, матурантом керестурскей штреднєй школи, шветочно буду уручени дипломи о законченей Ґимназиї общого напряму.

Нєшка Улїчни обегованя
24. май 2008. (Рутенпрес) - Нєшка, 24. мая, у Руским Керестуре ше отримаю Улїчни обегованя школярох и младежи, у рамикох означованя Дня рускокерестурскей Школи "Петро Кузмяк" и Спортских бавискох "Яша Баков".
      Попри домашнїх, на Улїчних обегованьох у Керестуре буду участвовац коло 100 змагателє, як зоз местох дзе жию Руснаци, так и зоз других местох у Войводини.
       Улїчни обегованя почню на 10 годзин, а наявене же тото змаганє у Руским Керестуре отвори предсидатель општини Кула Светозар Буквич, котри побиднїком уручи и медалї.
      Пре Улїчни обегованя од 10 до 12 годзин буду заварти улїци: од М. Тита по Б. Кидрича; Фрушкогорска - од Русинскей по Дю. Кишюгаса; Дю. Кишюгаса - од Фрушкогорскей по Б. Кидрича и Б. Кидрича - од Русинскей по Дю. Кишюгаса.
      Гражданє замодлєни же би у тим чаше нє виганяли превозки пре угрожованє дзецох котри ше у тот час буду обеговац по спомнхутих улїцох.

Штерацец седма "Червена ружа" од 27. по 29. юний
22. май 2008. (Рутенпрес) - Штерацец седми фестивал рускей култури "Червена ружа" будзе отримани од 27. по 29. юний, у Руским Керестуре, заключене вчера, 21. мая, на схадзки Орґанизацийного одбору тогорочного Фестивала. Фестивал рускей култури и того року започнє з отвераньом вистави подобових роботох з Уметнїцкей колониї "Няради", на тот завод 27. юния.
      Истого дня, 27. юния у дворе керестурскей Школи "Петро Кузмяк", будзе отримана музично-танєчна манифестация дзецох “Червене пупче”дзе ше очекує 12 нови руски шпиванки за дзеци як наступ дзециньских ансамблох зоз наших местох. Новосц же того року окремна комисия котру меновал Орґанизацийни одбор Фестивала, вибере програмски точки за "Пупче" и "Ружу".
      Як гварене на Орґанизацийним одборе, "Червене пупче" будзе мац и иножемного госца - дзецински музично-танєчни ансамбл "Хемлонячик" з Гуменого, зоз Словацкей републики.
       Музично-танєчна манифестация руских КУД и ансамблох Шветочни концерт, на "Ружи" будзе отримана 28. юния, а як догварене на Орґанизацийним одборе, намаганє же би на нєй наступели шицки нашо дружтва, алє лєм зоз по єдну найквалитетнєйшу точку.
        Шветочни концерт тиж будзе мац госца зоз иножемства - Музично-танєчни ансамбл “Вихорлат” зоз Снїни, зоз Словацкей, з котрима наступи и тамтейша позната русинска соло-шпивачка Мария Железна.
       Фестивал рускей култури будзе закончени зоз свою традицийну манифестацию под назву "Червена ружа" - 29. юния.
       Спрам дотерашнїх спознаньох, у змаганю на найкрасши дзивоцки и леґиньски глас, односно за традицийни награди - кошарку червених ружох и чобольов - того року на "Червеней ружи" наступя аж до 15 млади шпиваче-змагателє зоз вецей наших местох.
       Як и каждого року, "Червена ружа" будзе мац и власну продукцию нових руских шпиванкох у народним духу, а у планє же ше на Фестивалє буду змагац коло 12 нови композициї.
     На Орґанизацийним одборе велька повага пошвецена и сотруднїцтву зоз Радиодифузну установу Войводини-РТВ Войводини, коло учасци того явного сервису у орґанизацийно-технїчних роботох, алє и уметнїцкей часци 47. фестивала рускей култури.

Одлуки о виводзачох роботох и явних набавкох
20. май 2008. (Рутенпрес) - Виробок проєктованя драги до хотара зверене "Ателєу" зоз Темерину, одлучене на вчерайшей схадзки Совиту Месней заєднїци Руски Керестур, док проєктованє канализациї и пречисцовача одпадних водох вироби ПР “Ґнип” зоз ”Нового Саду.
       Як винєшене вчера, 19. мая, за проєктованє канализациї, та проєктованє пречицовача одпадних водох, Месна заєднїца од Покраїнского секретарията за урбанїзем, аритектуру и будовательство достала по 2,7 милиони динари. Проєктованє драги до хотара зоз 250 000 динари будзе финансовац сама Месна заєднїца.
       На вчерайшей схадзки Совиту МЗ принєшена и одлука о розписованю явних набавкох за дальши роботи коло каплїчки, ушоренє дильовох, реґенерованє студньох, санированє водоводней мрежи, як и за чисценє атмосферских яркох. За дальши роботи коло каплїчки (будованє дражкох, кладзенє огради), Месна заєднїца, на основи конкурса, од Покраїнского секретарията за локалну самоуправу и медзиопштинскей сотруднїцтво достала 1,4 милиони динари.
       Од Покраїнского секретарията за польопривреду, водопривреду и лєсарство, за санированє водоводней мрежи, керестурска Месна заєднїца достала 4, а за чисценє атмосферских яркох 2 милиони динари. Исти Секретарият, зоз милион динари будзе финансовац и ушоренє дильовох у керестурским хотаре.
      Средства достати на основи конкурованя до спомнутих покраїнских секретариатох, а очекує ше же позитивно буду ришени и вимоги за средства за ушоренє теметова, паркох и желєниох поверхносцох, як и за набавку єдней косачки, за цо тиж конкуроване до Покраїнского секретарията за локалну самоуправу и медзиопштинске сотруднїцтво.
       Скорей, Месна заєднїца купела и машину за чисценє шнїгу, за цо, на основи конкурса, од Покраїнского секретарията за локалну самоуправу и медзиопштинске сотруднїцтво достати 250 000 динари. З оглядом на достати и очековани средства, роботи коло каплїчки и ушореню атмосфесрких яркох пошвидко буду предлужени, а приступи ше и виробки спомнутей проєктней документациї.

Отримани Општински крос
20. май 2008. (Рутенпрес) - Прешлого пиятку, 16. мая, у Руским Керестуре, у лєшику, отримани Општински крос на котрим участвовали коло 200 школяре од пиятей по осму класу основней школи, як и штредньошколци зоз местох кулскей општини. Спомедзи Керестурцох, у конкуренциї пиятих класох, Давид Катона освоєл перше, Ивица Няради треце, а Кристина Шепински друге место.
       У змаганю дзивчатох и хлапцох зоз шестей класи, Валентина Барна була перша, Долорес Ґовля друга, а Зоран Колошняї перши. Марґарита Хома освоєла перше место у змаганю дзивчатох зоз седмих класох, як и Тияна Гарди у змаганю дзивчатох зоз осмих класох, док у змаганю хлапцох зоз осмих класох, тиж перше место освоєл Борис Барна.
     Медзи штредньошклоцами, Кристина Сабадош зоз керестурскей Ґимназиї освоєла треце место у конкуренциї перших класох, як и Соня Плавшич у конкуренциї других класох штреднєй школи.
       Ґимназиялки керестурскей Ґимназиї - Моника Винаї освоєла перше место у змаганю штредньошколкох зоз трецих класох, док Александра Дорошки освоєла перше, Нада Драґовац друге, а Александра Куколь у змаганю матуранткох. У обегованю хлапцох зоз першей класи штреднєй школи, Боян Скиба освоєл перше место, док у заєднїцким змаганю хлапцох зоз трецих и штвартих класох, перше место освоєл Милош Кривокуча, друге Мирко Копривица, а треце Душан Спасич, зоз керестурскей Ґимназиї.
        Шицки школяре котри освоєли перши три места, здобули право участвовац на Републичним кросу Радио-телевизиї Сербиї, котри у вецей местох будзе отримани на єшень.

Конституовани Управни одбор Завода за културу
20. май 2008. (Рутенпрес) - Зоз уручованьом Ришеньох о менованю предсидателя и членох, вчера, 19. мая, у Руским Керестуре конституовани Управни и Надпатруюци одбор новоформованого Заводу за културу войводянских Русанцох.
       Ришеня о менованю предсидателя и членох Управного, та Надпатруюцого одбору Завода за културу ВР, принєсла Вивершна рада Скупштини АП Войводини, на своєй схадзки 29. априла того року.
       За предсидателя Управного одбору Завода за културу войводянских Руснацох меновани Владо Няради, шлєбодни уметнїк зоз Вербасу, а за членох - Славко Орос, предсидатель НС Руснацох, зоз Руского Керестура; Йоаким Рац, хореоґраф, секретар НС Руснацох, зоз Р. Керестура; Любица Отич, кустос, совитнїк у Музею Войводини, зоз Дюрдьова; Мирослав Цирба, правнїк, активиста у култури зоз Шиду; Ирина Олеяр, проф. музики, подпредсидателька НС Руснацох и предсидателька Одбору за културу НС, зоз Р. Керестура; Михайло Зазуляк, новинар, секретара Одбору за културу НС Руснацох зоз Р. Керестура; о. Михаил Холошняй, священїк зоз Дюрдьова и Славко Рац, привреднїк зоз Р. Керестура.
       За предсидателя Надпатруюцого одбору меновани Мирослав Чакан зоз Дюрдьова, а за членох Владимир Варґа зоз Руского Керестура и Любица Малацко зоз Нового Саду.
        За директора Завода за културу войводянских Руснацох меновани Мирослав Кевежди.
       На своєй першей, конститутивней схадзки, Управни одбор принєсол Предлог статута Завода за културу войводянских Руснацох, на котри, як и за шицки статути других заводох войводянских националних заєднїцох, согласносц даю компетентни покраїнски орґани.
      После даваня согласносци на Статут, ушлїдзи урядове реґистрованє Завода за културу войводянских Руснацох зоз шедзиском у Руским Керестуре, у Тарґовинским суду у Зомборе.
        Як гварене на схадзки Управного одбору, по творенє потребней процедури и других условийох, шедзиско Завода реґистроване на адреси керестурского Дома култури, а пре оперативни роботи, дочасове шедзиско єден одредзени час будзе у Новим Садзе.
       Намаганє Завода за културу будзе же би його робота була квалитетно децентрализована, пре конкретни роботи на терену, гварене на вчерайшей схадзки Управного одбору.
       На своєй шлїдуюцей схадзки, Управни одбор будзе розпатрац програму и план роботи, як начални, так и за тот рок, котри поднєше директор Завода Мирослав Кевежди. 

Мирослав Малацко треци у Републики
19. май 2008. (Рутенпрес) - Мирослав Малацко зоз Руского Керестура, освоєл треце место на Републичней смотри рецитаторох у Валєве. Мирослав Малацко школяр седмей класи керестурскей ОШ и рецитатор Дома култури Руски Керестур, рецитовал виривок зоз писнї Михала Рамача "Повист о Данилови", а за змаганя го пририхтал Михайло Зазуляк.
       Ювилейна, Штерацета републична смотра рецитаторох Сербиї "Поето народу мойого" того року отримана 16. и 17. мая у Валєве у орґанизациї Союзу аматерох Сербиї, а зоз финансийну потримовку Минстерства просвити, Министерства култури РС и Општини Валєво.
        Попри Малацка, на найвисшим змаганю рецитаторох у держави участвовали ище двоме рецитаторе котри ше змагали по руски - Андрей Орос зоз Руского Керестура, у младшим возросту и Александра Мудри зоз Кули, у старшим возросту. Уж сам пласман на Републичну смотру представя позарядови успих, понеже у тогорочним циклусу змаганьох участвовали аж коло 25 000 рецитаторе у цалей Сербиї, же би лєм 108 участвовали на Републичней смотри, а медзи нїма 27 зоз Войводини, односно по дзевецеро у каждим возросту.
        На Републчичней смотри рецитаторох у Валєве, зоз кулскей општини участвовала и Леа Котлица зоз Кули, у штреднїм возросту, котра вошла до финалного змаганя - медзи шесцеро найлєпших у Сербиї, и спрам числа бодох од фахового жирия - освоєла штварте место.
       Андрея Ороса пририхтал Михайло Зазуляк, Александра Мудрия Амалия Ковач, а Леу Котлицу Владана Цицмил.

Отримане Републичне змаганє з руского язика
19. май 2008. (Рутенпрес) - У керестурскей ОШиҐ "Петро Кузмяк", соботу, 17. мая, отримане Републичне змаганє з руского язика и язичней култури.
       На Републичним змаганю у Керестуре участвовали школяре основних школох у хторих ше руски язик виучує порядно, як и школяре зоз школох у хторих ше руски язик виучує як виборни предмет, з елементами националней култури.
       Спрам обявених резултатох у катеґориї школярох котри руски язик виучую у проядней настави за зрост седмей класи найвецей боди 56, освоєла Наташа Колєсар школярка ОШ "Петро Кузмяк " зоз Руского Керестура. У истей катеґориї за зрост осмей класи зоз 59 бодами перша була Ана Мария Недич школярка ОШ "Братство Єдинство" зоз Коцура.
       У катеґориї школярох котри руски язик виучую як виборни, школярка ОШ Светозар Маркович-Тоза" зоз Нового Саду Мария Рамач у катеґориї школярох пиятих и шестих класох зоз 54 бодами була перша а Мелита Рускаї школярка ОШ "Й. Й. Змай" зоз Сримскей Каменїци була найлепша у зросту седмих и осмих класох зоз освоєнима 56 бодами.
     Змаганє з руского язика ше отримало у орґанизациї Министерства просвити Републики Сербиї, як и Дружтва за руски язик, литературу и културу.

Шветочне отверанє новей Хладзальнї
17. май 2008. (Рутенпрес) – Предсидатель Привредней комори Сербиї, Милош Буґарин вчера, 16. мая, Руским Керестуре шветочно отворел нови погон Фабрики змарзнутей желєняви, у рамикох Компаниї АБЦ Фуд, односно дакедишнїого рускокерестурского ПК “Перши май”.
        Цалком нова хладзальня з роботу почала концом прешлого року, а з инвестицийнима укладанями од коло 7 милиони евра продукцийни капацитетикерестурскей Фабрики звекшани за два раз. Тераз АБЦ Фуд може випродуковац и до 15 тони змарзнутей желєняви - коло 5 000 тони гращку, 8 000 тони сладкей кукурици; 1 000 тони мархви, 500 тони паприґи, 250 тони кромплї, 250 тони броколи, карфиолу и рижней другей желєняви.
        Прешлого року Фабрика достала и HACCP сертификат, так же попри терашнього, у планє преширенє пласману їх желєняви зоз защицену робну марку и на таржовище ЕУ.
        На вчерайшим шветочним отвераню нового погону Фабрики АБЦ фуд були присутни велї госци зоз жеми и иножемства, представителє политичного живота и медийох.

Републичне змаганє з руского язика
17. май 2008. (Рутенпрес) - У керестурскей школи "Петро Кузмяк", нєшка 17. мая, будзе отримане Републичне змаганє з руского язика и язичней култури.
       На Републичним змаганю у Керестуре участвую школяре основних школох у хторих ше руски язик виучує порядно, як и школяре зоз школох у хторих ше руски язик виучує як виборни предмет, з елементами националней култури.
       На Републичним змаганю ше буду змагац 58 школяре ОШ дзе настава руского язика орґанизована як порядна, и 26 школяре дзе ше руски язик виучує як виборни предмет.
       Републичне змаганє з руского язика ше отримує у орґанизациї Министерства просвити Републики Сербиї, як и Дружтва за руски язик, литературу и културу.

Мирослав Малацко и Леа Котлица у финалу републичней смотри
17. май 2008. (Рутенпрес) – У квалификацойх котри вчера отримани на Републичней смотри рецитаторох за штреднї возрост медзи шейсцома финалистами Мирослав Малацко зоз Руского Керестура и Леа Котлица зоз Кули.
       Нєшка ше отримаю квалификациї за младши зрост дзе наступи Андрей Орос зоз Руского Керестура док Александар Мудри зоз Кули прейдзе квалификациї за старши зрост. Александра Мудри зоз Кули прешлорочни добитнїк бронзовей плакети тей Смотри, односно трецого места у Сербиї у своїм возросту. Андрей Орос ше на Републичну смотру пласовал зоз писню Дюри Папгаргая "Чорцик"; Мирослав Малацко з виривком з поеми Михала Рамача "Повист о Данилови", а Александар Мудри з писню американского поети Теда Джонса "Трицецосмичка".
      Рецитаторох котри ше пласовали на Републичну смотру пририхтали Амалия Ковач у Кули и Михайло Зазуляк у Руским Керестуре.  

Наградзени школяре на литературно-подобовим конкурсу "Штефан Чакан"
16. май 2008. (Рутенпрес) - На Републичним змаганю з руского язика и язиченей култури, ютре, 17. мая, буду уручени и награди школяром за найлєпши роботи зоз Литературно-подобового конкурсу о рускей басни “Штефан Чакан”, Нове Орахово 2006/07, котри орґанизовало Дружтво за руски язик, литературу и културу.
        У обласци литературного конкурса, першу награду достали двоме Деянове Надьове, обидвоме школяре 6. класи керестурскей ОШ, а другу награду достали Михайло Бесерминї, зоз 6. класи керестурскей ОШ, Ксения Еделински, з 5. класи ОШ з Петроварадину и Миня Саламун, школяр 1. класи ОШ з Ветернику. Трецу награду за басну достали Наташа Сабадош и Теодора Бодянец, школярки 6. класи як и Яна Еделински и Марина Биркаш, тиж зоз 6. класи шицки зоз керестурскей Школи.
      У обласци подобових роботох у конкуренциї школярох предшколского возросту, з першу награду наградзени Ана Медєши и Лука Кошарко, другонаградзена Аня Суботич, а трецу награду достал Марко Митрович, шицки зоз Вербасу.
       У конкуренциї основношколцох, першу награду освоєла Аня Гудак зоз Нового Саду, другу Єлена Чордаш зоз Кули, а трецу, Катарина Будински зоз Суботици и Валентина Кишюгас зоз Бачкей Топшолї. Литературни роботи школярох оценьовали писателє Штефан Гудак и Гелена Гафич Стойков, та лекторка Наталия Рамач, а подобово роботи Биляна Роман, побови уметнїк.

Подзекованє МО ДС Керестурцом
15. май 2008. (Рутенпрес) - Месни одбор Демократскей странки Руски Керестур, тих дньох виражел подзекованє Керестурцом на указаним довирию на виберанкох за шицки уровнї власци 11. мая.
      - Дзекуєме гражданом Руского Керестура на датим довирию на виберанкох 11. мая, за шицки уровнї власци. З таку потримовку, Руски Керестур ище раз указал же препознава политичну опцию котра ше заклада и стара о своїм месце. Наша обовязка - виполнїц Вашо довириє зоз сполньованьом наших обецункох - гаври ше у ссобщеню МО ДС.
        - На нєдзелю, 25. мая, будзе отримани други круг виберанкох за посланїкох до Скупштини АП Войводини по векшинскей системи, дзе наш кандидат Светозар Буквич, вошол до другого кругу.
        - Ище раз нам потребна Ваша потримовка за нашого кандидата, з чию побиду будзе витворена можлївосц за формованє стабилней демократскей векшини у Скупштини Войводини. Дзекуєме - гварене у сообщеню Месного одбору Демокрастекй странки Руски Керестур.

Означена пейцрочнїца од снованя Еґзархата
14. май 2008. (Рутенпрес) - У Марийовим святилищу Водица при Руским Керестуре, вчера, 13. мая, на треци - Завитни дзень Русадльох, шветочно и на високим уровню, преславена пейцрочнїца од снованя Апостолского еґзархату за грекокатолїкох у Сербиї и Чарней Гори.
      У Водици, 13 мая, присуствовало вельке число людзох, окреме младих фамелийох зоз дзецми, велї паломнїки пришли орґанизовано и на автобусох - зоз Дюрдьова, Нового Саду и Вербасу.  Преслави пейцрочнїци нашого Апостолского еґзархату присуствовал и представитель святого оца папи - монсиньор архиепископ Еудженио Сбарбаро, апостолски нунций у Сербиї.
     Тиж так, вчерайшей преслави и Завитному дню у Водици присуствовали владикове зоз Сербиї и иножемства - монс. архиепископ и митрополита беоґрадски Станислав Гочевар, подпредсидатель Владическей конференциї св. Кирила и Метохия и владика суботицки Янош Пензеш; монс. Дюра Ґашпарович, викар за сримску часц Дяковского владичества, архиепископ Львова преосвящ. Игор Возняк; архиепископ и митрополит Прешовскей митрополиї Ян Бабяк, новопошвецени владика новей Братиславскей епархиї Петро Руснак, преосвящ. владика Милан Шашик з Мукачевскей епархиї з Ужгороду, преосвящ. владика крижевски Славомир Микловш, заступнїк кошицкого владики Хаутора о. Владимир Томко, як и декан о. Ґеорґий Трайков зоз Македиониї.
       Шветочносци у Водици вчера присуствовала и секретарка Министерства вирох Невени Витошевич Цеклич, як и представителє валалских власцох.
       - Зишли зме ше означиц 5 роки од тей историйней подїї и огляднуц ше на прейдзену драгу и на тото цо, з помоцу Божу - зробене. Гоч 5 роки нє вельо, и нашо крочаї нє вельки, алє су очиглядни и сиґурни, а на тим месце вимодлюєєме и надалєй Марийово заступнїцтво, нє забуваюци же зме ше ту прейґ молитви отримали - гварел кир Георгий, апостолски еґзарх за грекокатолїкох у Сербиї и Чарней Гори.
        Дзекуюци Церковному одбору керестурскей церкви, орґанизация Завитного дня у Водици того року була добре орґанизована.

Гласали 62,74 одсто Керестурцох
12. май 2008. (Рутенпрес) - Спрам перших, нєурядових резултатох, у Руским Керестуре од 4 104 виберачох, вчера, 11. мая, за шицки уровнї власци гласали 2 575, лєбо 62,74 одсто Керестурцох од цалосного виберанкового цела.
       Як и по тераз, Керестуци гласали на штирох виберанкових местох - од числа 34, по число 37, та на виберанковим месце котре ше находзи у Ловарским доме, од 1 081 уписаного виберача, гласал 681, лєбо нє цали 63 одсто од уписаних.
        На виберанковим месце у Доме борцох и пензионерох, од 948 виберачох гласали 595, лєбо 62,76 одсто. На виберанковим месце у Месней заєднїци гласали 654 гласаче од 1 047 уписаних цо виноши 62,46 одсто од числа уписаних гласачох. На виберанковим меце у школским будинку "Замок", од 1 028 виберачох уписаних до виберанкового списку, вчера гласали 645, цо виноши 62,74 одсто од уписаних.
       У одношеню на други круг виберанкох за предсидателя Сербиї - у фебруаре того року, виходносц на вчерайши виберанки за шицки уровнї власци, у Руским Керестуре тераз була менша за 9, 62 одсто.

На Завитни дзень у Водици будзе означена
 пейцрочнїца Еґзархата
12. май 2008. (Рутенпрес) – На завитни дзень односно остатнї дзень Русадльох ,13. мая у Водици будзе означена пейцрочнїца од формованя Апостолского еґзархату за грекокатолїкох у Сербиї и Чарней Гори.
       З нагоди означованя пейцрочнїци од формованя Апостол-ского еґзархату, на ютре у Водици Архиєрейну Службу Божу будзе предводзиц апостолски нунций у Сербиї, монсиньор Еудженио Сбарбаро. Попри нашого владики, апостолского еґзарха кир Георгия, Службу Божу зоз апостолским нунцийом буду сослужовац и владикове зоз Медзинародней владическей конференциї Кирила и Методия.
       Як то уж узвичаєне, на Завитни дзень ше очекує приход велїх паломнїкох зоз нашей жеми и иножемства, з тим вецей же того року на Завитни дзень будзе преславена и пейцрочнїца од снованя нашого Еґзархату.

Керестурски Русин побиднїк Медзинародного
турнира
12. май 2008. (Рутенпрес) - Фодбалска екипа керестурского Русина освоєла перше место на медзинародним турниру рускей младежи у малим фодбалу, за школярох основней школи, котри 9. и 10. мая отримани у Руским Керестуре. Попри Русина зоз Керестура, на Медзинародним турниру змагал ше и Русин зоз Мукачова, составени зоз школярох з вецей школох, котри на Подкарпат'ю, у України, факултативно виучую русински язик.
      Тиж так, на Медзинародним турниру у Керестуре змагала ше и екипа ОШ "18. октобер" зоз Нового Орахова, як и дзивчатска екипа Женского рукометного клубу Русин зоз Руского Керестура. После змаганя керестурски хлапци освоєли перше место, новоораховчанє друге, треце место завжали госци зоз Мукачова, а штварте керестурски дзивчата.
      За найлєпшого бавяча на цалим Турниру преглашени Александар Чижмар зоз Керестура, за найлєпшого ґолмана Ричард Бриндза зоз Нового Орахова, а титула най-ґолґетера, за посцигнути 9 ґоли, припадла Васильови Лїбакови зоз Мукачова.
       Погари, медалї, подзекованя, як и маїци зоз знаком Националного совиту Руснацох, шицким учашнїком того Медзинародного турнира уручел предсидатель нашого НС Славко Орос, виражуюци подзекованє на участвованю, як и наздаванє же таки спортски стретнуца рускей младежи буду орґанизовани и убудуце и у нас, и у иножемстве.
       Медзинародни турнир рускей младежи у малим фодбалу вєдно орґанизовали Национални совит Руснацох, рускокерестурска Основна школа и Ґимназия "Петро Кузмяк", Руска матка и керестурске Спортске дружтво "Русин". 

Зоз Вельку арихєрейску Службу Божу у Руским Керестуре почал Кирбай
9. май 2008. (Рутенпрес) - Нєшка, 9. мая, у Руским Керестуре - Кирбай - духовне швето пошвецене св. о. Миколайови, як покровительови рускокерестурскей Катедралней церкви. Вчера, после Молебену, у керестурскей церкви служене Саночне пред Кирбайом.
      Нєшка, на Кирбай, у Церкви св. о. Миколая Вельку архиєрейну Службу Божу, од 10 годзин, служи апостолски еґзарх за грекокатолїкох у Сербиї, владика кир Георгий Джуджар. Архиєрейну Службу Божу, попри домашнїх, зоз владиком Георгийом буду сослужовац и велї священїки зоз нашого Еґзархату, а Службу будзе провадзи и Хор керестурскей церкви и Дома култури.
        Архиєрейна Служба Божа од 10 годзин будзе зоз обходом коло церкви, як и можлївосцу отпусту.
        На Кирбай, вечарша Служба Божа будзе од 19 годзин, зоз Молебеном.
       Попри духовних змистох, як и каждого року, у Руским Керестуре ше нєшка, за Кирбай, очекує и вельку забавну, вашарску часц, як и приход велїх госцох з наших местох до Руского Керестура.

Звонимир Сабадош освоєл награду у Словацкей
9. май 2008. (Рутенпрес) - Звонимир Сабадош, школяр осмей класи ОШ "Петро Кузмяк", за свою подобову роботу достал награду на медзинародним конкурсу у Словацкей, у Банскей Бистрици.
       Сабадош достал награду на Тринастим медзинародним подобовим конкурсу под назву "Желєни швет 2008", котри розписало Министерство за защиту животного штредку Словацкей републики, у сотруднїцтве зоз Медзинародним филмским фестивалом "Енвирофилм" зоз Банскей Бистрици.
       Конкурс бул розписани 14. марца, за дзеци од 10 до 15 рокох, а школяре рускокерестурскей ОШ "Петро Кузмяк", на нїм участвовали уж по други раз, под менторством своєй професорки подобового вихованя и нашей подобовей уметнїци Биляни Романовей. Концом априла, до керестурскей Школи сцигнул допис зоз котрим Звонимир Сабадош, як добитнїк єдней з наградох, поволани же би присуствовал їх шветочному додзельованю. Додзельованє наградох будзе 13. мая у Музею словацкого националного повстаня у Банскей Бистрици.

Нєшка почина Медзинародни турнир у малим фодбалє
9. май 2008. (Рутенпрес) - Нєшка, 9. и на ютре, 10. мая, у керестурскей школи "Петро Кузмяк", будзе отримани Медзинародни турнир младих Руснацох у малим фодбалу, за школярох основней школи.
       На турнир до Руского Керестура пришла и млада фодбалска екипа зоз Мукачова, зоз України, а попри Рускокерестурцох, котри на Медзинародним турниру участвую з єдну хлапцовску и єдну дзивчатску екипу, змагаю ше и млади фодбалере зоз Нового Орахова.
       Медзинародни турнир у малим фодбалє вєдно орґанизую Национални совит Руснацох, Руска матка и ОШиҐ "Петро Кузмяк", а здогаднїме, на прешлорочним, заєднїцка екипа керестурскей Школи и "Русина", у України освоєла перше место. Нєшка, 9. мая, змаганя починаю од 16 годзин, а на ютре, на соботу, 10. мая, од 10 и 13 годзин, а бавя ше на спортских теренох у найновшей Школи.

Подписи на контракти за проєкти
8. май 2008. (Рутенпрес) - Секретар керестурскей Месней заєднїци Йоаким Надь, вчера, 7. и нєшка, 8. мая, у Вивершней ради Войводини подписал контракти за финансованє проєктох з боку покраїнских секретариятох.
      Вчера у ВР Войводини подписани контракти о финансованю роботох коло каплїчки на керестурским теметове, котри финансує Покраїнски секретарият за локалну самоуправу и медзиопштинске сотруднїцтво. Тиж так, подписанми и контракт зоз Покраїнским секретариятом за польоприввреду, водопривреду и лєсарство, за средства за ровнанє дильовох у керестурским хотаре.
       Нєшка, 8. мая, Надь попдише ище два контракти котри будзе финансовац Покраїнски секретариято за польопривреду - за санированє водоводней мрежи и ушоренє атмосферскей канализациї у Руским Керестуре.

Концерт двох школярох гушлї
8. май 2008. (Рутенпрес) - Олеся Рамач зоз Руского Керестура и Александра Надь зоз Сивцу, школярки кулскей Школи за основне музичне образованє, вечар 7. мая, у Хорскей сали керестурского Дома култури отримали заєднїцки цаловечарши концерт на гушльох.
      Олеся Рамачова школярка пиятей класи ШОМО и седмей класи керестурскей ОШ "Петро Кузмяк", а Александра Надьова зоз Сивцу, школярка другей класи ШОМО и штвартей класи основней школи. Обидва школярки ШОМО гушлю уча у класи професорки Лїляни Барна Никитович.
        Як у привитним слове гварел директор ШОМО Кула Йозеф Квинтус, и попри того же є ище млада, Олеся Рамачова уж добре позната музичней явносци, як у Руским Керестуре и кулскей општини, так и ширше, а под час свойого потерашньго школованя зоз свою гушлю поосвойовала и вецей високи награди на рижних музичних змаганьох. Александра Надьова лєм прешлого року почала учиц гушлю, алє зоз позарядовим талантом и роботу, того року уж освоєла и два високи награди на змаганьох, а уж наступа и на концертох.
       Тераз ше обидва вчерайши солистки на виолини, зоз свою професорку, пририхтую и за учасц на Пиятим фестивалє виолини - медзинародним змаганю школярох музичних школох, котри идуцого тижня будзе отримани у Сримскей Митровици. Олеся Рамачова и Александра Надьова вчера на репертоаре мали дїла Баклановей, Перґолезия, Комаровского, Моцарта, Ридинґа и Елґара, а на клавиру их провадзела професорка у ШОМО Кула Ева Епер.

Караван ЛДП путуюцу кампаню закончел у Керестуре
7. май 2008. (Рутенпрес) - Караван Либерално-деморатскей партиї "Шир далєй", свою путуюцу политичну кампаню закончел праве у Руским Керестуре вчера вечар, 6. мая.
       Милован Ст. Протич пред численима Керестурцами у сали Дома култури насампредз висловел пребаченє же предсидатель ЛДП Чедомир Йованич нє могол особнє присц до Керестура, алє, як гварел, и ту у Керестуре и у кулскей општини и вшадзи по Сербиї єст надосц людзох з котрима ше ЛДП барз добре розуми.
       - Приблїжели зме ше ґу концу ище єдней кампанї и ми и нєшка вериме до побиди, баржей як гоч кеди и знаме же идея европскей Сербиї на концу заш лєм победзи - гварел Милован Ст. Протич, кандидат за народного посланїка зоз лїстини ЛДП, у Руским Керестуре.
      Протич на метафорични способ, приповедаюци як сказку о богатстве єдного чловека, критиковал Велимира Илича, котри ше, як гварел зоз своєй вили з базеном "барз стара за Сербию и за Косово".
      - Таки людзе вецей нє шму водзиц Сербию, а анї гевти котрим, з оглядом на професию з котру ше занїмали, облюбени роман “Час шмерци”, а нє шму ю водзиц анї гевти котри у Сербиї видза лєм тото цо траґичне, тоти котри трешу з руку и ногу кед тримаю бешеду, котри нам предавя драги слова, а нє робя нїч.
       - Сербию муша водзиц и до нєй вериц людзе як цо то ви, як цо ми, котри знаю дзе єй место и знаю як там ма дойсц - гварел Милован Ст. Протич, наглашуюци же зна же у Керестуре, у кулскей општини, як и вшадзи у Сербиї, єст надосц людзох котри ше з ЛДП розумя и треди кед нє бешедую, бо исто думаю и жадаю и знаю же вєдно то и витворя.
       Весна Пешич, тиж канидидатка за народну посланїцу з лїстини ЛДП, у своєй бешеди пред Керестурцами наглашела же праве у Керестуре закончую свою трецу путуюцу кампаню по Сербиї за єден рок.
       Весна Пешич з тей нагоди визначела же ЛДП преросла до странки котра самостойно виходзи на виберанки на шицких уровньох, нє приключуюци ше анї єдней другей, бо ма свою програму, та так то и у кулскей општини, а на лїстини кандидатох за одборнїкох до СО Кула и штирме кандидати зоз Руского Керестура. ЛДП насампредз обрацена ґу людзом и ришованю їх конкретних проблемох у шицких обласцох, гварела Пешичова у Керестуре, критикуюци националну политику СРС, ДСС и СПС и їх обраценосц лєм ришованю питаня Косова.
       Тиж так, Весна Пешич у своєй бешеди пред Керестурцами критиковала и ДС и Бориса Тадича, же ше справую "як ратоваче, а у ствари нє ратую", а Борис Тадич би мушел шмело висц пред людзох и повесц правду и о Косове. Як гварела Пешичова, ЛДП ше заклада за деполитизованє и децентрализованє Сербиї на шицких уровньох, та так и статус Войводини, односно єй сущни потреби муша буц уставно и законски реґуловани, бо, як гварела, Войводина и историйно, и ґеоґрафски и привредно дефинована.

Концерт Олесї Рамачовей и Александри Надь
7. май 2008. (Рутенпрес) - Нєшка, 7. мая, Олеся Рамачова зоз Руского Керестура и Александра Надь зоз Кули, школярки Школи за основне музичне образованє отримаю концерт озбильней музики у Руским Керестуре. Нєшкайши концерт двох школяркох котри граю на гушлї у класи проф. Лїляни Барна Никитович будзе отримани у Хорскей сали керестурского Дома култури.
        Рамачову и Надьову на клавире провадзи проф. Ева Епер, а концерт почина на 19 годзин.

На соботу Општинска смотра музично фолклорней тврчосци
7