Руски Керестур

Архива висткох - юний 2007.

ПОЧИНА ФЕСТИВАЛ РУСКЕЙ КУЛТУРИ "ЧЕРВЕНА РУЖА"
28. юний 2007. - Зоз отвераньом вистави малюнкох зоз Колониї "Няради" и отримованьом дзецинскей манифестациї "Червене пупче" на ютре у Руским Керестуре почина 46. Фестивал рускей култури "Червена ружа" хтори будзе тирвац по нєдзелю, 1. юлий.
     Отверанє вистави малюнкох зоз прешлорочней Колониї "Няради" заказане за 18,30 годзин, а на "Пупчу", хторе почнє на 19 годзин, наступя дзецински музично-танєчни ансамбли зоз наших местох, и зоз Миклошевцох и Петровцох зоз Горватскей як и дзецински ансамбл зоз Словацкей. На "Червеним пупчу" буду виведзени и 10 нови дзецински композициї хтори сцигли на розписани конкурс.
         На соботу, 30. юния на 21 годзин будзе отримани Шветочни концерт на хторим попри музично-танєчних ансамблох зоз наших руских местох наступя и ансамбли зоз Миклошевцох и Петровцох зоз Горватскей, як и ансамбли зоз Гуменого и Прешова зоз Словацкей.
        Остатнього дня Фестивала, на нєдзелю зоз початком на 20 годзин будзе отримана змагательна манифестация за найкрасши женски и хлопски глас. За тото змаганє ше приявели 14. шпиваче, а буду виведзени и 12 нови композициї у народним духу. Шпивачох будзе провадзиц Велька тамбурова орхестра Радиодифузней установи Войводини. "Червену ружу" од 20 по 22,30 годзин будзе директно преношиц Телевизия Войводини.

ДЗЕШАТИ ШВЕТОВИ КОНҐРЕС БУДЗЕ ОТРИМАНИ У РУСКИМ КЕРЕСТУР
26. юний 2007. - На 9. Шветовим конґресу Руснацох-Русинох- Лемкох хтори од 21. по 24. юний отримани у Сиґету у Румуниї вибрани нови члени Шветовей ради хтору творя представителє руских орґанизацийох зоз дзевец жемох Европи и Сиверней Америки. За предсидателя Шветовей ради знова вибрани др. Павел Роберт Маґочи зоз Торонта, а за подпредсидателя Дюра Папуґа зоз Руского Керестура.
На 9. Шветовим конґресу прилапена резолуция штиродньовей роботи, преглашена застава и герб, а за гимну Руснацох швета преглашена шпиванка "Я Русин бул, єсм и буду" Александра Духновича. Принєшена и одлука же би 10. Шветови конґрес Руснацох бул отримани 2009. року у Руским Керестуре.
На конґресу младим поетом зоз Сербиї додзелєна награда за найлєпше написану кнїжку на руским язику за остатнї пейц роки, а награду Слександар Духнович за кнїжку поетски триптих достали Славко Винаї, Наташа Рибович и Иван Медєши.

ВИПРОВАДЗЕНИ МАТУРАНТИ ҐИМНАЗИЇ
26. юний 2007. - Прешлого тижня маторунтом керестурскей Ґимназиї на шветочни способ уручени дипломи о законченим штирирочним школованю. Того року Ґимназию у Руским Керестуре закончели 47 школяре. За школяра ґенераци преглашени Боян КолошняЇ хтори источасно достал и Вукову диплому. Попри Колошняя, Вукову диплому достали и Сандра Няради, Силвия Орос и Мирослав Виславски зоз оддзелєня з руским, и Мая Обрадович, Дияна Лукишич и Станислав Трнинич зоз оддзелєня зоз сербским наставним язиком.

СПОЗОРЕНЄ ПЧОЛАРОМ
26. юний 2007. - Ветеринарска станїца зоз Кули наютре, 27. юния у Руским Керестуре окончи третированє суньоґох та спозорює пчоларох же би вимесцели пчоли на два до 3 километри зоз населєного места.
Третированє будзе окончене у периодзе од 18 по 24 годзин, а у случаю дижджу акция будзе одложена, о чим гражданє буду на час упознати - гваря у кулскей Ветеринарскей станїци.

РОЗПИСАНИ КОНКУРС ЗА ПРОЄКТИ ЗА ЗАЩИТУ ЖИВОТНОГО ШТРЕДКУ
26. юний 2007. - Управни одбор Фонда за защиту животного штредку општини Кула принєсол одлуку о розписованю конкурса за додзельованє средствох за програми защити и унапредзенє животного штредку.
Конкурс будзе отворени од 28. юния по 23. юлий, а буду розподзелєни коло милион динари
Конкуровац можу явни подприємства, установи, здруженя гражданох, месни заєднїци, ловарски и рибарски здруженя и други за активносци на защити животного штредку як цо то ушоренє желєних поверхносцох за спортски активносци, ушоренє купалїщох як и за знїчтожованє амброзиї.

ФОДБАЛЕРЕ ФК "РУСИН" ОРҐАНИЗОВАЛИ ДРУЖЕНЄ
26. юний 2007. - Прешлей соботи Фодбалски клуб "Русин" орґанизовал дружтвени вечар на хтори поволани шицки фодбалере хтори бавели за тот Клуб.
На таки способ означене и успишне законченє ярнєй часци першенства у Зомборскей подручней лиґи у хторей "Русин" завжал високе шесте место, а за найлєпшого бавяча у сезони преглашени Борис Шайтош.

РЕКОРДНИ УРОЖАЙ ГРАЩКУ
22. юний 2007. - У Фабрики змарзнутей желєняви АБЦ приводзи ше ґу концу преробок гращку хтори, за потреби Хладзальнї, того року бул зашати на 660 гектарох.
Витворени барз добри урожай и попри нєвигодней хвилї за тоту желєняву та на парцелох Польопривреди ПК "Перши май" випродуковани рекордни 8,6 тони по єдним гектару.
Преробок сладкей кукурици хтора за потреби Фабрики АБЦ зашата на коло 1.000 гектарох би требал почат о мешац днї.

ШКОЛЯРЕ И ПРОСВИТНИ РОБОТНЇКИ У СЛОВАЦКЕЙ
22. юний 2007. - Школяре и просвитни роботнїки Основней Школи и Ґимназиї "Петро Кузмяк" вчера отпутовали до Медзилаборцох до Словацкей дзе по 25. юний буду госци медзилаборскей Основней школи.
До Словацкей одпутовали 35. школяре и 12 наставнїки хтори у Словацкей буду пребувац под час отримованя Фестивала култури и спорту на хторим наступи и Николая Сивч як соло шпивачка.
Зоз медзилаборску Основну школу керестурска Школа успишно сотрудзує уж дзешец роки.

ДЛУЖНЇКИ ВИМИРЮЮ ДЛУСТВА ЗА ВОДУ
21. юний 2007. - Од пондзелку по тераз служба Месней заєднїци видала коло 70 ришеня за виключованє води, медзитим по тераз вода ище нїкому нє виключена понеже длужнїки по доставаню ришеньох вимирюю длуства - гвари Йоаким Надь, секретар Месней заєднїци.
- Єст лєм даскельо особи хтори анї после достатих ришеньох нє вимирели длуство и кед то нє зробя вода им сиґусрно будзе виключена, алє нам першенствени циль же би зме воду наплацели, а нє же би зме ю людзом виключели. На вимогу длужнїкох дали зме можлївосц вимиряня длуства на вецей рати. Одлука Совиту будзе до конца випочитована, бо ше воду муши плациц, алє уж тераз ясне же зоз водоводней мрежи буду виключени, кед нє вимиря длуства, вельо менєй обисца як цо на початку випатрало - гвари секретар Надь.

ДЕЛЕҐАЦИЯ РУСКЕЙ МАТКИ ОТПУТОВАЛА ДО РУМУНИЇ НА ШВЕТОВИ КОНҐРЕС РУСНАЦОХ
21. юний 2007. - Делеґация Рускей матки на чолє зоз предсидательом Матки Дюром Папуґом нєшка одпутовала до Сиґету до Румуниї дзе будзе участвовац на дзевятим Шветовим конґресу Руснацох/Русинох/Лемкох хтори будзе тирвац по 24. юний. Попри Папуґу на Конґресу буду участвовац и Любомир Дудаш зоз Руского Керестура, Ярослав Сабол, Владимир Гаргаї и Янко Пап зоз Нового Саду, Ксения Медєши и Мария Шкрбич зоз Коцура, Владимир Бучко зоз Кули, Мирослав СиладЇ и Юлиян Горняк зозВербасу, а як госци Славко Орос зоз Руского Керестура, о. Йоаким и о. Михаил Холошняйово зоз Дюрдьова, Иґор Варґа зоз Руского Керестура и Славко ВинаЇ зоз Нового Саду.
Источасно у тим румунским месце будзе отримани и треци Шветови форум младих Руснацох/Русинох/Лемкох у чиєй роботи буду участвовац и млади Руснаци зоз нашей жеми: Микола Медєши зоз Коцура, Татяна Силадї зоз Вербасу, Владислав Цап зоз Руского Керестура и Анита Ґовля зоз Шиду.

КОНСТИТУОВАНИ УПРАВНИ ОДБОР РНТ "ПЕТРО РИЗНИЧ ДЯДЯ"
21. юний 2007. - За предсидателя Управного одбору РНТ "Петро Ризнич Дядя", на конститутивней схадзки хтора 19. юния отримана у Руским Керестуре, вибрани Мирон Канюх, привреднїк и кулурни роботнїк зоз Нового Саду, а за подпредсидателя Владимир Варґа, економиста зоз Руского Керестура.
Снователь Театра, Национални совит Руснацох на своєй остатнєй схадзки меновал 9 членох Управного одбору, а за окончователя длужносци директора Руского народного театра меновал Владимира Надя Ачима.
Управни одбор на своєй першей схадзки до Уметнїцкого одбору меновал: Штефана Гудака, писателя зоз Нового Саду, Даниєлу Штайнфелд, апсолвентку ґлуми на Академиї у Беоґрадзе зоз Руского Керестура, Владимира Балащика, дипл. ґлумца зоз Сримскей Митровици, професора Владимира Бесрминя зоз Руского Керестура, Цветина Аничича, режисера зоз Шиду, Олґу Карлаварис и Славка Виная, новинарох зоз Нового Саду.

ОТРИМАНА СКУПШТИНА КЦИОНЕРОХ ДРУКАРНЇ
"РУСКЕ СЛОВО"
20. юний 2007. - И попри вельких почежкосцох у дїлованю, на сам предз пре вельку конкуренцию, Друкарня "Руске слово" прешлого року купела нову машину зоз чим витворени лєпши условия за роботу - гварене на Скупштини акционерох "Руского слова" хтора отримана 18. юния и на хторей прилапени закончуюци рахунок за прешли рок.
Векшински власнїк Друкарнї Звонимир Хома гварел же дїлованє очежане пре вельку конкуренцию бо лєм у Руским Керестуре робя ище два друкарнї, а кажда векша компания друкарски роботи окончує у власних друкарньох, гварел Хома. Други вельки проблем на хтори указал Хома то очежане наплацованя за поробени роботи.
Мали акционере хтори маю 30 одсто акцийох Друкарнї "Руске слово" на Скупштини вимагали же би ше и їх акциї нашли на берзи цо тераз нє случай, а терашня вредносц єдней акциї виноши 500 динари.

ПОСЛЕ ЯРЦУ ПОЧИНА ЖАТВА ЖИТА
20. юний 2007. - Жито у керестурским хотаре того року треба покошиц на прейґ 1.000 гектарох. Пре хвилю яку зме мали жатва того року почина вельо скорей як скорейших рокох, алє польопривреднїки, по шицким судзаци, добре порихтани за тоту роботу.
        У Приватним подприємству "Юарбис" и Землєдїлскей задруґи "Кооперативи" хтори того року заєднїцки контрачели продукцию жита порихтани за косидбу жита хтора почнє за дзень-два, односно док ше закончи жатва ярцу.
       Аґроном Владимир Тиркайла гвари же за жатву жита порихтани два комбайни, шицок урожай будзе змесцени до "Юарбисових" силосох, а порихтана и сушарня кед затреба.
     "Юарбис" и "Кооператива" продукцию жита зоз кооперантами законтрачели на 350 гектарох, а на власних поверхносцох "Юарбис" ма зоз житом зашати 85 гектари. На основу терашнього стану жита ту обчекую просекови урожай яки бул у остатнїх даскелїх рокох, гвари Тиркайла.

КЕРЕСТУР НАЩИВЕЛ НОВИНАР ТВ КАНАЛУ НТВ ЗОЗ МОСКВИ
20. юний 2007. - Руски Керестур пондзелок нащивен Александар СтупнЇков, новинар телевизийного каналу НТВ зоз Москви хтори з тей нагоди знял прилог о Руснацох. Вон бешедовал зоз Славком Оросом, предсидательом Нацио-налного совиту рускей нацио-налней заєднїци, Владимиром Надьом Ачимом, окончовательом длужносци директора РНТ "Петро Ризнич Дядя" и Михайлом Зазуляком, новинаром - дописовательом "Руского слова".
Прилог о Руснацох зняти у Руским Керестуре будзе емитовани на московскей НТВ у емисиї новинара Ступнїкова под назву "Швет - нєшка и тераз" хтору ше на росийским язику емитує за цали швет.

ПОЧАЛО ВИКЛЮЧОВАНЄ ВОДИ
19. юний 2007. - Служба Месней заєднїци вчера видала 35 налоги за виключованє води найвекшим длужнїком хторе окончує специялизована фирма зоз Дироню.
На основи одлуки Совиту Месней заєднїци вода будзе виключена шицким чийо длуства векши од 3.000 динари.
Зоз Месней заєднїци апелую на гражданох и власнїкох фирмох же би вимирели длуства, бо лєм на таки способ обкерую допольнююци трошки за нове уключованє хторе буду плациц 3.000 динари, алє аж после вимирйованя длуства. Керестурци и фирми за потрошену воду длужни Месней заєднїци коло 1.600.000 динари.

ПРЕ ИНЦИДЕНТ ПРЕТАРГНУТЕ ФОДБАЛСКЕ ЗМАГАНЄ
19. юний 2007. - У остатнїм колу ярнєй часци першенства у Зомборскей подручней лиґи змаганє медзи домашнїм "Русином" и "Омладинцом зоз Буковцу претаргнуте у 72. минути пре инцидент до хторого пришло кед фодбалер "Русину" Штранґар , нє нароком, чежше покалїчел фодбалера "Омладинца" Сеченїя. На терену пришло до вербалного и физичного контакту фодбалерох и публики после чого судия Парипович претаргнул змаганє при резултату 0 : 2 за "Омладинєц".
Фодбалер Сеченї зоз зламану ногу одвежени до шпиталю, а Штранґар достал червени картон.
У предзмаганю, подросток керестурского "Русину" победзел екипу подростку "Омладинца" з резултатом 6 : 2. Голи за подросток "Русину" дали Дарко Надь 2, Борис Орос 3 и Дориян Чизмар 1.

АСВАЛТОВАНЄ ДРАГИ У РУСИНСКЕЙ
15. юний 2007. - Асвалтованє драги у Русинскей улїчки почнє док виводзач роботох "Вой драги" зоз Суботици закончи будовательни роботи у Оджаку. По словох секретара Месней заєднїци Йоакима Надя, спрам розгваркох зоз руководством того подприємства, драга у Русинскей улїчки би могла буц асвалтована у другей половки юния.
Асвалт будзе преляти од центру по Партизанску, док друга часц Русинскей од Центру ґу Крущичу би требала буц преширена и асвалтована источасно зоз реконструкцию драги Руски Керестур - Крущич. Тоти роботи ше годно окончиц аж после прилапйованя републичного буджету.

АСВАЛТОВАНЄ МАҐИСТРАЛНЕЙ ДРАГИ КУЛА - ОДЖАК
15. юний 2007. - Постоя тварди обецунки компетентних же того року будзе асвалтована маґистрална драга М3 од Кули по Оджак - виявел Светозар Буквич, предсидатель општини Кула на остатнєй схадзки Општинскей ради општини Кула.
Вон тиж гварел же того року будзе реконструована драга Руски Керестур - Крущич и асвалтована драга у Русинскей улїчки.
Бешедуюци о тогорочних капиталних инвестицийох у кулскей општини, Буквич медзи иншим гварел же би того року требало предлужиц зоз вибудову Спортскей гали у Руским Керестуре и положиц на ню кров.

ПРИРИХТОВАНЄ ЗА ҐАЗИФИКОВАНЄ
15. юний 2007. - Пририхтованя за ґазификованє Руского Керестура ше одвиваю без векших проблемох, а информация же ґазификованє приведзене до питаня нє точна, понеже нїяки урядово информациї од "Сербия ґазу" нє сцигли - гвари секретар Месней заєднїци Йоаким Надь.
- Тих дньох достата и согласносц за поставянє Мерней ґазней станїци, а остало же би ше обезпечело ище дзепоєдни согласносци. Початок роботох пожнї у одношеню на дати обецунки же то будзе у априлу, алє я ше наздавам же Керестур достанє ґаз по конєц того року - гвари секретар Надь.

ВРЕДНОСЦ АКЦИЇ ПК "ПЕРШИ МАЙ" 2.850,00 ДИНАРИ
14. юний 2007. - Вредносц акциї Польопривредного комбинату "Перши май" на Беоґрадскей берзи вчера зменшана за 10,94 одсто та место 3.200 тераз виноши 2.850.
Вчера предани 50 акциї и витворени вкупни обток од 142.000 динари. На берзи ше за предаванє понука 345 акциї, а глєда лєм 50.

МОНОДРАМА "БАРОН МИНХАУЗЕН" ПЕРША НА ВОЙВОДЯНСКИМ ФЕСТИВАЛУ
12. юний 2007. - Монодрама "Варон Минхаузен - Война з Турками и Путованє на Мешац" Драмского студия АРТ Дома култури зоз Руского Керестура, преглашена за найлєпшу монодраму на Войводянским фестивалу малих сценох и монодрами хтори од 6. по 10. юний отримани у Сенти. На истим Фестивалу Емил Няради у улоги Барона преглашени за найлєпшого ґлумца, а режисер Владимир Надь Ачим за найлєпшого режисера у конкуренциї режисерох професионалцох.

СЛАБШИ ПРИЛЇВ СРЕДСТВОХ
11. юний 2007. - За перши пейц мешаци того року витворени вельо менши прилїв средствох у Месней заєднїци у одношеню на плановани и то по шицких основох. Так место планованих 9,2, витворени прилїв средствох у суми од 5 милиони динари - констатоване на схадзки Совиту Месней заєднїци хтора отримана 8. юния.
      Вельки проблем представя нє плаценє месного самодоприносу од занятих, окреме у приватних фирмох, углавним пре нєприявйованє роботнїкох, алє єст случаї же аж анї сами приватнїки нє плаца самодопринос. У Руским Керестуре єст приявени 110 приватни и дружтвени фирми, а прилїв од занятих за пейц мешаци виноши лєм 1.368.000 динари. Анї шицки пензионере котри подписали вияви же сцу видвойовац до месного самодоприносу по стопи од 1,5 одсто на пензиї, у перших шейсцох мешацох, нє видвойовали средства понеже Пензийни фонд нє одбива стопу и попри тим же му доручена шицка нєобходна документация. За пейц мешаци пензионере на мено месного самодоприносу видвоєли коло 360.000 динари.
        Пре таку ситуацию на схадзки Совиту заключене же би служба Месней заєднїци превжала шицки потребни мири же би ше злєпшало наплацованє самодоприносу и од занятих и од пензионерох.
         Совит принєсол и одлуку же би ше 4 милиони динари зоз комуналних средствох преруцело до средствох самодоприносу хтори буду унапрямени за купованє жеми за индустрийну зону.

СОВИТ ФОРМОВАЛ КОМИСИЮ ЗА РЕФЕРЕНДУМ
11. юний 2007. - На остатнєй схадзки Совит Месней заєднїци меновал Комисию за запровадзованє референдума на хторим ше гражданє маю вияшнїц чи су за тото же би Руски Керестур достал статус општини.
За членох Комисиї меновани: Еуфемия Сабадош, Яков Салак, Владо Русковски, Мая Колошняї, Ксения Миячич, Желько Ковач и Юлиян Колошняї. Комисия утвердзи дальшу динамику шицких нєобходних активносцох у складу зоз законом, а Совит орґанизує збор гражданох и розправу у даскелїх дружтвених орґанизацийох и здруженьох пре упознаванє гражданох зоз Елаборатом о уставно-правних, економских и социялних условийох Руского Керестура за формованє власней општини.
Референдум будзе запровадзени зоз писменим вияшньованьом цо у согласносци зоз терашнїма законскима предписанями.

ВИКЛЮЧОВАНЄ ВОДИ ДЛУЖНЇКОМ ОД 18. ЮНИЯ
11. юний 2007. - Од 18. юния Месна заєднїца почнє виключовац воду длужнїком хтори нє вимиря длуства векши од 3.000 динари. Совит ше за таки подцаг одлучел прето же прейґ 700 керестурски обисца, привредни и дружтвени орґанизациї за утрошену воду длужни вецей як 1.646.470 динари. Єст вельо обисца хтори длужни прейґ 10.000 динари, а коло 100 ґаздовствавекши од 4.000 динари.
      За виключованє води Месна заєднїца анґажує специялизовану фирму за окончованє тих роботох "Данис" зоз Дироню котра дньово може виключовац по 30 обисца, а цена их роботи виноши 15.000 на дзень.
        Воду ше нє будзе виключовац на водомеру, алє опрез обисца зоз одрезованьом доводней циви, а цала акция будзе координована зоз полицию.
         Зоз Месней заєднїци ище раз апелую на гражданох же би по 15. юний вимирели длуства за потрошену воду бо у процивним, попри вимирйованя рахункох за воду, буду мушиц плациц и 3.000 динари за укапчованє води.
       Убудуце, рахунки за воду служба Месней заєднїци гражданом будзе уручовац мешачно, а нє квартално як по тераз.

ЗА УСПИШНЄЙШЕ ПРОВАДЗЕНЄ КОНКУРСОХ
11. юний 2007. - Месна заєднїца подпише контракт зоз Аґеницию "Аґротейп консалтинґ" зоз Нового Саду о технїчним сотруднїцтве и информованю о конкурсох за проєкти на хтори може конкуровац нє лєм Месна заєднїца, алє и польопривцредни продукователє, привредни и дружтвени фирми и здружня гражданох зоз валалу.
Услуги "Аґротейп консалтинґу" Месну заєднїцу буду коштац 12.000 динари рочно, а дальши активносци вязани за сотруднїцтво зоз тоту Комисию превежнє Комисия Совиту Месней заєднїци за розвой валалу и єй предсидатель Павле Малацко.

ПЕРШУ ПРИЧАСЦ ПРИЯЛИ 37 ДЗЕЦИ
11. юний 2007. - Внєдзелю, 10. юния у Катедралней церкви Святого оца Миколая у Велькей, Архиєрейней Служби Божей першу причасц прияли 37. дзеци (16 дзивчата и 21 хлапец), школяре другей класи основней школи.
Дзецох причащал владика кир Георгий Джуджар после чого шицким подзелєни памятки на першу причасц.
После Велакей Служби Божей коло Церкви була процесия зоз Святима Тайнами и "свят".

ОД 51 ШКОЛЯРА ОСМИХ КЛАСОК 13. ЗОЗ ВУКОВУ ДИПЛОМУ
10. юний 2007. - Прешлого тижня школяре осмих класох Основней школи "Петро Кузмяк" закончнє основношколского образованя означели зоз пригодну програму у школи и матурким вечаром у Ресторану "Русалка".
Од 51. школяра осмих класох за школярку ґенерациї преглашена Ваня Дудаш хтора и найлєпша школярка у своїм оддзелєню, а за найлєпши школярки у других двох оддзелєньох преглашени Андрея Колєсар и Александра Торжич.
Шицки три школярки достали и Вуково дипломи, а попри нїх Вуково дипломи достали и Кристина Сабадош, Соня Виславски, Соня Мученски, Светлана Няради, Терезка Катона, Иван Емейди, Мартина Шепински, Александра Живкович, Валерия Горват и Иван Киш.

ОТРИМАНИ РОЧНИ КОНЦЕРТ КЕРЕСТУРСКОГО ОДДЗЕЛЄНЯ ШОМО
10. юний 2007. - Знагоди успишного законченя школованя у керестурским оддзелєню Школи за основне музичне образованє зоз Кули, у Руским Керестуре прешлого тижня отримани закончуюци концерт на хторим наступели 16 школяре од першей по шесту класу музичней школи. На концерту наступела и вокална шпивацка ґрупа як и вельки мишани орхестер под руководством дириґента и аранжера Мирона Сивча.
Була то и нагода за окремне подзекованє Олесї Рамачовей зоз Руского Керестура, школярки штвартей класи гушлї за освоєне друге место на Републичним фестивалу музичних школох.

У "ЮАРБИСУ" ПОЧАЛА ЖАТВА
10. юний 2007. - У приватним подприємству "Юарбис" 7. юния почала жатва ярцу хтори зашати на 110 гольтох на польох кооперантох и на коло 60 гольтох на власних попверхносцох.
Жатва жита хторе того року у "Юарбису" маз покошиц на коло 350 гектарох найвироятнєйше започнє уж коло 20. юния.

ВЕБ КАМЕРА И "CHAT"
7. юний 2007. - Нєшка на будинку "Руского слова" поставена веб камера у реализациї Елком медиї зоз Руского Керестура. Тих дньох док ше витворя ище даяки технїчни условия почнє ше зоз приказованьом сликох зоз центру Руского Керестура на тим сайту.
Тиж пре вашу вельку заинтересованосц шицких вас, роби ше и на полєпшаню "Chat"-у, так же тих дньох придзе и до пременки на тим полю на задовольство шицких нащивительох того сайту и "Chat"-у. Шицки зауваги коло камери и "Chat"-у можеце охабиц на нашим форуму.

ВРЕДНОСЦ АКЦИЇ ПК "ПЕРШИ МАЙ" 3.200 ДИНАРИ
6. юний 2007. - Нєшка на Беоґрадскей берзи вредносц акциї ПК "Перши май" опадла за 8,57 одсто та тераз место 3.500, виноши 3.200 динари.
На берзи ше за предаванє понука 99, а глєда 55 акциї. По цени од 3.200 динари за єдну акцию, нєшка предани 5.

ОЗНАЧЕНИ ШВЕТОВИ ДЗЕНЬ ЗАЩИТИ ЖИВОТНОГО ШТРЕДКУ
5. юний 2007. - Нєшка у Руским Керестуре у присустве вельочислених госцох означени 5. юних Шветови дзень защити животного штредку. Означованє того дня орґанизовал Еколоґийни рух "Желєни персцень" и його предсидателька др. Леона Доротич Ґутеша.
        На шветочней академиї на хторей участвовали дзеци зоз Предшколскей установи "Бамби", школяре Основней школи и Ґимназиї "Петро Кузмяк", школяре Школи за основне музичне образованє и аматере Дома култури, як и дзеци зоз Оджаку, уручени припознаня и пригодни дарунки младим науковцом зоз Институту за хемию, технолоґию и метали зоз Беоґраду за успишне реализованє проєкта доставаня здравей води за пице у Руским Керестуре. Припознаня достали:Далиборка Николич, Илия Томич, Далибор Маринкович, Елена Крстич и Никола Младенович.
        За власне доприношенє унапредзеню защити чловекового штредку припознаня достали: Ирина Гарди Ковачевич, Ана Планчак, Ана Винаї, Славко Орос и Любица Няради.
        Еколоґийни рух "Желєни персцень", односно його секция "Ружова заградка" за найкрасше ушорени заградки наградзели Йоску Регак, Марию Семан, Ану Козар, Емилку Костич и Ану Рац.
        На шветочносци у Руским Керестуре були присутни госци зоз Зомбора, Беоґраду, Коцура, Оджаку, Лалитю як и представителє еколоґийних рухох зоз Заходно бачкого реґиону.

РЕВИТАЛИЗОВАНЄ ВОДОВОДНЕЙ МРЕЖИ
4. юний 2007. - Месна заєднїца будзе конкуровац за доставанє безповратних средствох зоз Покраїнского секретарияту за польопривреду, водопривреду и лєсарство АП Войводини за Проєкт ревитализованя водоводней мрежи.
За ревитализованє водоводней мрежи на основу виробеного Проєкту треба обезпечиц 34 милиони динари. З оглядом же слово о вельких средствох роботи ше будзе окончовац фазно у зависносци од средствох хтри ше обезпечи.
За потримовку проєктом Покраїнски секретарият за польопривреду, водопривреду и лєсарстрво обезпечує 60 одсто средствох.

ВИБРАНИ НАЙ ШКОЛЯРЕ
4. юний 2007. - Ваня Дудаш, школярка ґенерациї у основней, а Боян КолошняЇ, школяр ґенерациї у Ґимназиї за школски 2006/2007. рок.
        Така одлука принєшена на схадзки Наставнїцкей ради Основней школи и Ґимназиї "Петро Кузмяк" хтора отримана прешлого пиятку.

"РУСИН" КОНЄЧНО ПОБЕДЗЕЛ
4. юний 2007. - После двох пораженьох, Фодбалере "Русину" вчера на своїм терену у 28. колу першенства у Зомборскей подручней лиґи победзели екипу "Омладинца" зоз Дероню зоз резултатом 3:1 (полчас 2:0).
        Ґоли за "Русин" дали Шайтош 2 и Живанов 1. "Русин" после 28. кола дзелї штварте место на першенственей таблїчки зоз екипу Кули зоз 40 освоєнима бодами, а на нєдзелю госцує у Кули дзе одбави змаганє зоз истоменову екипу.
       У предзмаганю вчера подросток "Русина" победзел екипу подростку "Омладинца" зоз резултатом 4:1. Ґоли за подросток дали Борис Орос 3 и Борис Папуґа 1.
        Рукометаше и рукометашки СД "Русин" страцели змаганя як и шахисти хтори госцовали у Приґревици.

ЗА РОЗВАГУ И УЧЕНЄ
02. юний 2007. - За шицких тих цо ше любля дакус побавиц и уключиц розум, положели зме познате бависко "вишадла"' котре комплетно написане по руски и котре тестира знанє руского язику и правопису на интересантни способ. Попробуйце поцильовац глєдане слово - животиню, предмет, превозку...