Руски Керестур

Архива висткох - юний 2008.

Фестивал рускей култури идуцого викенду
28. юний 2008. (Рутенпрес) - Зоз отвераньом вистави подобових роботох з Уметнїцкей колониї "Няради", идуцого викенду, на пияток, 4. юлия, у Руским Керестуре почина тогорочни Штерацец седми фестивал рускей култури “Червена ружа”.
        "Ружа” будзе тирвац од 4. по 6. юлий, а єй програму творя Вистава подобових роботох, музично-танєчна манифестация дзецох “Червене пупче”, ревиялни концерт ансамблох зоз руских местох “На штред широкей ровнїни”, як и музична манифестация “Червена ружа”.
        Под час тирваня Фестивала, од 4. по 6. юлий, у голу керестурскей Школи "Петро Кузмяк" буду виложени роботи 15 уметнїкох з нашей жеми и иножемства, зоз прешлорочного - Дзешатого зволаня Колониї "Няради", а з отвераньом тей вистави, на пияток, 4. юлия, започнє тогорочни Фестивал.
        Шицки манифестациї Фестивала наступного викенду буду отримани отвореней бини у дворе керестурскей Школи "Петро Кузмяк", а у случаю подлей хвилї - у сали керестурского Дома култури.
      Перша музично-танєчна манифестация на "Ружи" будзе уж штерацета манифестация дзецох "Червене пупче" - на пияток, 4. юлия, од 19 годзин.
        На штерацетим "Червеним пупчу" буду виведзени 13 нови руски шпиванки за дзеци, котри шпиваю дзеци зоз Руского Керестура, Нового Саду, Бачинцох, Коцура и Вербасу. Часц програми "Пупча" будзе пошвецена наступу ансамблох зоз наших местох, дзе свою роботу того року представя шпиваче и танцоше зоз Суботици, Руского Керестура, Коцура, Вербасу, Нового Саду, Дюрдьова, Шиду и Бачинцох.
       "Червене пупче” будзе мац и госца зоз иножемства - Дзецински музично-танєчни ансамбл “Хемлонячик” з Гуменого, зоз Словацкей републики.
        На соботу, 5. юлия, у рамикох "Ружи" будзе отримани ревиялни концерт ансамблох и КУД зоз наших местох - "На штред широкей ровнїни". Програму "На штред широкей ровнїни" творя ансамбли зоз Кули, Коцура, Нового Саду, Дюрдьова, Суботици, Нового Орахова, Руского Керестура, Коцура, Сримскей Митровици, алє и зоз Миклошевцох - зоз Републики Горватскей. Миклошевчанє источасно буду и єдини иножемни госци на тей манифестациї, понеже пре пременку термина Фестивала, плановани госцуюци ансамбл зоз Словацкей нє може присц.
       Госц Ревиялного концерта "На штред широкей ровнїни", на соботу, 5. юлия, будзе реномовани Фолклорни ансамбл "Вила" зоз Нового Саду,
       Зоз свою традицийну манифестацию под назву "Червена ружа", на нєдзелю, 6. юлия, будзе закончени 47. фестивал рускей култури. У змаганю на найкрасши дзивоцки и леґиньски глас, односно за традицийни награди - кошарку червених ружох и чобольов - того року на "Червеней ружи" наступя 11 млади шпиваче-змагателє зоз Вербасу, Коцура, Руского Керестура, Бачкей Паланки, Нового Саду, Шиду и Дюрдьова. Шпивачох у змаганю за найкрасши глас будзе провадзиц Вельки народни оркестер керестурского Дома култури.
        На тогорочней "Червеней ружи" буду виведзени 12 нових руски композициї у народним духу, а шпивачох у тей часци "Ружи" будзе провадзиц Тамбурови оркестер Радио Нового Саду.

После "Ружи" - нови ЦД-и
28. юний 2008. (Рутенпрес) - Початком того тижня, у Радио Новим Садзе уж було при концу знїманє матрицох оркестри и вокалох зоз 12 новима шпиванками у народним духу, котри буду виведзени на тогорочним Фестивалє рускей култури “Червена ружа”, на єй истоменей манифестациї, 6. юлия.
Ґу тому, аранжере нових шпиванкох за дзеци - Юлиян Рамач Чамо и Мирко Пап, того тижня закончовали знїманє матрицох з 13 новима композициями за дзеци, котри буду виведзени на тогорочним "Червеним пупчу", 4. юлия.
Так, и того року Фестивал рускей култури вида два ношачи звука зоз новима рускима шпиванками - у народним духу зоз "Червеней ружи" и нови шпиванки за дзеци зоз "Червеного пупча".

Штреднї урожай жита на польох керестурского готара 40 метери по гольту
27. юний 2008. (Рутенпрес) - Спрам податкох зоз двох керестурских задруґох - подприємства "Юарбис" и ЗЗ "Польопривреда АБЦ фуд", у керестурским хотаре штреднї урожай жита на польох парастох виноши аж и до 40 метери по гольту.
      У зависносци од применєних аґротехнїчних мирох на польох индивудуалних продуковательох, штреднї урожай законтраченеого жита у "Юарбису" виноши од 25 по 30 метери по гольту, дознава Рутенпрес од дипл. инґ польопривреди Владимира Тиркайлу.
     Як Рутенпрес дознава од руководителя у ЗЗ "Польопривреда АБЦ фуд" Владимира Ороса, штреднї урожай тогорочного роду жита, тиж у зависносци од примєенєних аґротехнїчних мирох, на польох їх кооперантох виноши од 25, та аж и до 40 метери жита по гольту.
      У ЗЗ "Польопривреда" под житом єст законтрачене прейґ 200 гектари, а у самей дїловней єдинки "Польопривреда АБЦ фуд" 200 гектари жита. На польох "АБЦ фуд" вчера жито кошене лєм на менших парцелох, штреднї урожай ту виношел коло 5 тони по гектаре, но у "АБЦ фуд" очекую же там дзе жито пошате на векших поверхносцох, урожай будзе и векши.
       У Подприємстве "Юарбис" законтрачене коло 350 гектари жита, а на власних польох єст коло 150 гектари .Жито за тераз кошене лєм на польох кооперантох.
       У цалей кулскей општини, под житом єст прейґ 8 000 гектари, од чого коло 1 000 гектари у керестурским хотаре.

За комбайнованє вецей як три метери жита по гольту
27. юний 2008. (Рутенпрес) - Цена комбайнованя тогорочного роду жита иста и у подприємстве "Юарбис" и у ЗЗ "Польопривреда АБЦ фуд", и виноши 306 килограми жита по єдним гольту, односно 560 кили жита за єден гектар.
        За превоз жита у велькей 8-тоновей приколици, у ЗЗ "Польопривреда" наплацую по 200 килограми жита а воно ше одвожи до кулскей "Житобачки". Попри порядного комбайнованя жита, у "Юарбису" парасти жито можу витлачиц и з комбайном зоз шечку за сламу, а таке комбайнованє наплацує ше 350 килограми жита по єдним гольту.
       Превоз жита у "Юарбису" ше наплацує 100 кґ - єден метер жита по гольту. Приманє жита у силосох "Юарбису" окончує ше кажди дзень, од 8 годзин рано, та покля тирва косидба того дня.
        Парастом важна информация же "Юарбис" того року нє мера квалитет жита, так же ше нє окончує нїяки анализи, крем на влагу, а бере ше жито влаги до 15 одсто.
        За тераз ище вше нє позната цена тогорочного роду жита, продукователє очекую же то будзе коло 20, а спрам позавчерайших виявох министра польопривреди Слободана Милосавлєвича, його препорука же би ше жито виплацовало медзи 16 и 18 динари за килограм.

Почало ровнанє дильовох
26. юний 2008. (Рутенпрес) - Землєдїлска задруґа "Зарно" зоз Коцура, котру пре найвигоднєйше понуканє Совит керестурскей Месней заєднїци вибрал за виводзача роботох, вчера, 25. юния, почала ушорйовац дильови у рускокерестурским хотаре. Вредносц тей роботи виноши милион динари, котри Месна заєднїца достала зоз Покраїнского секретарията за польопривреду.
Спрам понуканя, коцурске "Зарно" поровна и цалосно ушори прейґ 90 километри дильовох у керестурским хотаре. Як Рутенпрес дознава од секретара МЗ Руски Керестур Йоакима Надя, до тераз за тоту роботу витрасироване коло 60 километри дильовох, будзе ище коло 30 км, а за тоту роботу Месна заєднїца анґажовала и окремного ґеодету.
Ґеодета анґажовани пре точносц мераня поверхносци и траси дильовох, же би ше нїкому нє одрезало од жеми, алє, як гвари Надь, у ситуацийох дзе ше укаже же власнїки жеми одорали од дильова, тота одорана поверхносц будзе врацена дильову.

Гека по треци раз за шором перша на швеце
25. юний 2008. (Рутенпрес) - Илона Гека Зарубица зоз Руского Керестура, вироятно найпознатша и найвитирвалша боди-билдерка Сербиї, ознова постала абсолутна шампионка швета у боди-билдинґу за жени.
       Свою уж трецу титулу абсолутней шампионки швета у боди-билдинґу, у високей катеґориї "физикал" за жени, Гека освоєла прешлого викенду у Греческей, дзе у познатим лєтовалїщу Фаралия Катарини, 20. и 21. юния отримане Шветове першенство у боди-билдинґу. То трецираз за шором же Илона Гека Зарубица на шветових першенствох за аматерох, котри орґанизує найстарша шветова боди-билдинґ федерация НАБА, освоює титулу абсолутней шампионки.
      Шветова шампионка у боди-билдинґу за жени, Гека постала перше 2006. року на першенстве тиж у Греческей, потим прешлого, 2008. року у Русиї, и того року ознова, на Шветовим першенстве боди-билдерох у Греческей. На Шветовим першенстве у боди-билдинґу у Греческей, у орґанизациї НАБА федерациї участвовали змагателє зоз прейґ 50 жемох, котри ше змагали у 13 рижних катеґорийох, а медзи нїма були и дзевецеро змагателє зоз Сербиї.
       Тренер, менаджер и муж Илони Геки Зарубица - Раденко Зарубица, на Шветовим першенстве у Греческей источасно бул и судия у пейцох катеґорийох на змаганьох боди-билдерох. Одход до Греческей на тото Шветове першенство, Илони и Раденкови Зарубицовим финансовал Герцен Радонїч Кека зоз Червинки, предсидатель Странки желєних.
     Як Рутенпрес дознава од Раденка Зарубици, шлїдуююце векше змаганє у тим спорту будзе отримане у Лондону, медзитим, пре финансийни почежкосци, за тераз нє познате чи абсолутна шветова шампионка зоз Руского Керестура Илона Гека Зарубица, на нїм будзе участвовац. Як гвари Зарубица, гоч є позната у цалим швеце, а источасно ище вше витирвала и барз успишна у тим спорту, найвекши проблем за Илону и єй тренера и менаджера представя нєдостаток потребних средствох за пририхтованя и финансованє одходох на змаганя, праве у своїм штредку. Зарубица, вєдно зоз Червинчанями, будзе орґанизатор Другого евро и шветового купу за боди-билдерох и змагательох у фитнесу, у Червинки, 11. октобра.

Нєшка би мала почац жатва жита
25. юний 2008. (Рутенпрес) – Нєшка би требала почац жатва жита на польох керестурского подприємства "Юарбис” дзе под житом єст 150 гектари власного и коло 350 гектари жита котре законтрачене у “Юарбису”. Як за Рутенпрес гварел власнїк "Юарбису" Славко Рац, у тим подприємстве рахую же того року витлача коло 500 гектари под житом.
       - Будземе тлачиц зоз своїма трома комбайнами, у жатви буду анґажовани и комбайни з индивидуалного сектору и кажде рано з єдного места будзе правени розпорядок виходу до хотара - гварел Рац за Рутенпрес.
       Спрам його нагадованьох, тот рок будзе єден з лєпших за жито, як по питаню урожайох, так и по квалитету, та за очековац штреднї урожай понад 25 метери по гольту и векшину тогорочного роду як першей класи.
       - Кед слово о цени, рахуєме же ше будзе рушац дзешка медзи 15 и 16 динари, плус 5 одсто ПДВ за парастох. По моїм думаню, кед досцигнє 16,5 динари, то будзе релативно добра цена. Реално, цена од 16 динари, лєбо 20 еври за метер жита, була би задоволююца - гвари Рац.
        Як наявене, на схадзки у Суботици, нєшка, 25. юния, жито-млїнски орґанизациї би мали принєсц конєчну цену тогорочного роду жита. Спрам словох Раца, понеже хвиля добре провадзела дозреванє жита, очекує ше и барз добри квалитет зарна, та за розлику од прешлого, "Юарбис" того року нє будзе робиц анализи жита. При одкупу жита ше єдино будзе мерковац на шнїц.
       - Ми парастом понукнєме два вариянти - виплацованє у чаше од даскельо днї, по цени яка будзе хвилькова, лєбо можлївосц лаґерованя у силосу и вец го предавац по тарґовищней цени - гвари Рац вязано за виплацованє за жито.
       Од нього дознаваме же за перши 15-20 днї, лаґерованє у силосох "Юарбису" будзе задармо, а за длужей од того, трошки лаґерованя ше будзе наплацовац.

Добри урожаї ярцу
25. юний 2008. (Рутенпрес) - У керестурским хотаре прешлого тижня закончена жатва олєйового репченю, а вироятно того тижня будзе закончена и жатва ярцу. Подприємство "Юарбис" на своїх польох мало 37 гольти олєйового репченю и коло 17 гольти тей култури на польох кооперантох.
      Шицки поверхносци под олєйовим репченьом скошени прешлого тижня, а штреднї уржай на польох "Юарбису" бул коло 18 метери по гольту, док на польох кооперантох урожай бул дакус слабши. Того тижня у "Юарбису" почала косидба ярцу на власних польох, дзе ярец зашати на 60, а у "Юарбису" кооперанти маю законтрачено тиж коло 60 гольти ярцу. Спрам словох дипл. аґронома "Юарбису" Владимира Тиркайли, на значней часци польох кооперантох ярец уж и скорешени, а штреднї урожай виношел коло 3 тони по гольту.
       У Землєдїлскей задруґи "Польопривреда" подприємства "АБЦ фуд" того року ярцу нєт законтрачено, а на самих польох "АБЦ фуд", ярец уж скошени концом прешлого тижня. На польох "АБЦ фуд" ярец барз добре плацел, так же штреднї урожай виношел 6,4 тони по гектаре, а под ярцом було 9 гектари. У дакедишнїм Комбинату покошени и олєйов репчень, котри бул на 36 гектарох, а штреднї урожай репченю виношел коло 3,7 тони по гектаре. Як Рутенпрес дознава у "АБЦ фуд", вироятно концом того тижня започнє и косидба жита.
       У тим подприємстве под житом зашати 200 гектари, а тиж коло 200 гектари жита єст и законтрачено у Землєдїлскей задруґи "АБЦ фуд".

Русин у Словацкей будзе бавиц приятельски змаганя и участвовац на Турниру
25. юний 2008. (Рутенпрес) - Перша екипа фодбалерох рускокерестурского Русина, од 25. по 29. юний госцує у Словацкей Републики, дзе з тамтейшима екипами одбави вецей змаганя. Рускокерестурски фодбалере переше буду госци фодбалерох "Бранїска" зоз Широкого, з котрима од скорей успоставене сотруднїцтво и одбавя з нїма приятельске змаганє.
      Того викенду, керестурски ФК Русин будзе участвовац и на 46. фестивалє култури и спорту у Медзилаборцох, дзе ше будзе змагац на Медзинародним турниру у фодбалу. Спортска часц Фестивала у Медзилаборцох будзе отримана 28. и 29. юния, а попри домашнього "Спартака", на турниру участвую ище три екипи зоз Словацкей, єдна зоз Польскей, як и спомнути керестурски “Русин”.
      Попри фодбалерох першей екипи Русина зоз своїм тренером Борисом Шайтошом, на госцованє до Словацкей одпутовал и предсидатель СД Русин и директор керестурскей ОШиҐ "Петро Кузмяк" Янко Хома, як и предсидатель ФК "Русин" Яким Грубеня Бора.
       З нагоди одходу до Словацкей, керестурске подприємство "АБЦ фуд" Русину подаровало маїци зоз своїм знаком, так же фодбалере Русина на одредзени способ у Словацкей буду и рекламовац продукти дакедишнього Комбинату, тераз "АБЦ фуд".

Нешка схадзка УО Театра
19. юний 2008. (Рутенпрес) - У Руским Керестуре, вчера, 18. юния, отримана порядна схадзка Управного одбору Руского народного театра "Петро Ризнич Дядя".
На схадзки розпатрени информациї о терашнїм фина-нсийним стану Театра и констатоване же стан чежки и же треба винайсц модел по котрим би проблем финасованя РНТ "Петро Ризнич Дядя" требал буц ришени на системски способ.
Управни одбор на вчерайшей схадзки принєсол одлуку же 12. проєкту Руского професийного театру будзе представа "Гамлет у пикантней мажанки", италиянского пистеля Алда Николая. Режисер представи будзе Владимир Надь Ачим.

Рецитаторе участвую на манифестациї "Духновичов Прешов"
19. юний 2008. (Рутенпрес) - Тройо рецитаторе зоз Руского Керестура, медзи нїма и єден млади поета, 20. юния буду участвовац на Литературно-рецитаторскей манифестациї "Духновичов Прешов", у Прешове, у Словацкей Републики. На манифестациї "Духновичов Прешов", на пияток, 20. юния участвую Андрей Орос, Мирослав Малацко и Андрея Колєсар, як рецитаторе, а Мирослав Малацко у Прешове будзе участвовац и зоз двома своїма авторскима писнями.
      "Духновичов Прешов" - як змаганє у рецитованю и власней поетскей и прозней творчосци школярох основних и штреднїх школох, та студентох котри у Словацкей виучую руски язик, по 9. раз орґанизує Русинска оброда Словацкей Републики.
       Як заплановане, нашо рецитаторе ше буду ровноправно змагац зоз рецитаторами, односно младима авторами литературних творох Руснацох зоз цалей Словацкей, а попри Руснацох зоз Сербиї, наявена и учасц Лемкох зоз Польскей.
       У ревиялней часци манифестациї "Духновичов Прешов", дзе на програми виводзенє кратших драмских формох Аматерского театра "Квит" зоз Прешова, заплановане же наш ґлумец и рецитатор Михайло Зазуляк, будзе участвовац зоз гутореньом поезиї Дюри Папгаргая.
      Манифестацию "Духновичов Прешов" Русинска оброда орґанизує зоз финансийну потримовку Министерства култури Словацкей Републики, з програми "Култура националних меншинох".

Покладанє приємних испитох
19. юний 2008. (Рутенпрес) - Вчера, 18. и нєшка, 19. юния, у рускокерестурскей ОШиҐ "Петро Кузмяк", будуци штредньошколци покладаю приємни, квалификацийни испити за упис до штреднєй школи.
     Вчера дополадня маломатуранти покладали испит зоз мацеринского язика, а нєшка зоз математики. Як дознава Рутенпрес, спомедзи 46 школярох котри у Керестуре того року закончели основну школу, за покладанє приємних испитох пре упис до штреднєй школи приявели трицец тройо.
        Найвекше интересоване при будуцих штредньошколцох виражене за упис до нового образовного профилу - туристични технїчар - за котри ище вше нє познате чи од Министерства просвити РС будзе достата согласносц за його отверанє, место єдного оддзелєня Ґимназиї общого напряму.
       Спрам терашнїх спознаньох у Школи, за упис до оддзелєня з руским наставним язиком керестурскей Ґимназиї заинтересовани до коло 15 школяре. Прелиминарни резултати приємних, квалификацийних испитох, буду познати на соботу, 21. юния, а конєчни 25. юния.
        После того, 26. и 27. юния, школяре маю придац лїстини своїх жаданьох за упис до штреднєй школи, же би 3. юлия були обявени кноєчни лїстини жаданьох школярох, а обявени буду у основних школох. Розпорядок школярох по школох, напрямох, ґимназийох и образовних профилох будзе 5. юлия, а 7. и 8. юлия и сам упис до штреднєй школи, як перши уписни термин.
        Други уписни термин за будуцих штредньошколцох заплановани за 11. юлий.

Вибрани виводзаче роботох.
Глєда ше нови цени води и за виношенє шмеца
17. юний 2008. (Рутенпрес) - Роботи коло каплїчки на керестурским теметове окончи подприємство "Попградня" зоз Темерину, одлучене на вчерайшей схадзки Совиту месней заєднїци Руски Керестур.
     Спомедзи трох понуканьох на основи розписаней явней набавки, темеринска "Попґрадня" дала найвигоднєйшу вимогу од 2 милиони 105 000 динари - за поставянє коло 350 длужни метери огради медзи теметовом и каплїчку, та за вибудов коло 350 квадратни метери дражки од каплїчки през такв. штредню капуру, по криж на теметове.
      Керестурска Месна заєднїца средства за тоти роботи достала од покраїнских орґанох, у висини 1,4 милиони динари, з тим же дополююци пенєж за спомнути роботи, найвироятнєйше буду дофинансовани зоз средствох Месней заєднїци.
       Вчера, 16. юния, Совит вибрал и виводзача роботох за ровнанє и ушоренє дильовох, и тоту роботу окончи Землєдїлска задруґа "Зарно" зоз Коцура. На явну набавку сцигли пейц понуканя - спомнутей ЗЗ "Зарно", "АБЦ Фуд" зоз Руского Керестура, БП "Блашко" зоз Кули и двох подприємствох зоз Веррбасу.
       Месна заєднїца Руски Керестур за ушоренє дильовох од Покраїнского секретарията за польопривреду достала милион динари, так же за тоту суму була розписана и явна набавка, односно и кельо километри и по якей цени мож ушориц дильови у хотаре до вредносци од милион динари.
       ЗЗ "Зарно" зоз Коцура вибране за виводзача тих роботох пре понуканє од 10 244 динари по єдним километру, лєбо 5 900 динари за єдну годзину роботи, алє з тим же за вредносц од милион динари ушори аж 98 километри дильови у керестурским хотаре.
       Рускокерестурска "АБЦ Фуд" за исту вредносц понукла же ушори 40 километри дильовох по 25 000 динари за километер, лєбо по 5 000 динари за годзину; кулски "Блашко" понукнул поробиц 68 километри по 14 705 динари за км, односно 6 050 динари за годзину роботи, а придата документация понукачох двох подприємствох з Вербасу нє була подполна.
       Попри найвигоднєйшого понуканя, Совит ше за за коцурске "Зарно" опредзелєл и пре уж здобуте искуство и указани квалитет у тей роботи, як у коцурским хотаре, так и у хотарох у других општинох. Реґенерованє трох керестурских студньох на водоводу окончи подприємство "Ґеоинжинєринґ" зоз Беоґраду, котре вибране спомедзи трох понуканьох.
      Вредносц тей роботи виноши 349 650 динари, з тим же кед реґенерованє студньох нє да звекшанє кашпацитету води за 20 одсто, роботу "Ґеоинжинєринґа" ше нє будзе плациц. Исте подпиєство - "Ґеоинжинєринґ", тиж спомедзи трох понуканьох, вибране и за цалосне заверанє, односно гашенє єдней керестурскей студнї на водоводу, такв. "Б-2", за 235 000 динари.
       Совит на вчерайшей схадзки принєсол одлуку же би ше од општинских орґанох вимагало звекшанє цени води и вивоженя шмеца, у складзе зоз законскима можлївосцами од 6-8 одсто, а и у складзе з виєдначованьом цени яку применюю комунални подприємства у кулскей општини.
        Вимага ше же би ше цену єдного кубика води зоз терашнїх 18, звекшало на 20 динари, а цену вивоженя шмеца з єдного динара за квадратни метер бивацого простору ґаздовствох, на 1,5 динари.
        Пре поровнанє, на схадзки винєшене же ше у Кули воду тераз наплацує по 21 динар за кубик, а вивоженє шмеца по 3 динари за квадратни метер.
      На схадзки дата и информация о сходзе членох двох совитох МЗ - керестурского и коцурского, 11. юния, а членїца Совиту др Леона Доротич Ґутеша вимагала же би ше пошвидшало роботи коло виробки идейного проєкта и елобаората за вибудов фабрики води у Руским Керестуре.
        Спрам толкованя секретара керестурскей МЗ Йоакима Надя, на основи скорейших одлукох Совиту, Месна заєднїца беоґрадскому Институту за хемию, технолоґию и метали, котри успишно виробел пилот-посторєнє за пречисцованє води од арсену и других чкодлївих материйох, послала вимогу же би дал идейни проєкт и студию о виводлївосци, медзитим, по тераз од ИХТМ нє достати нїяки одвит.

Основношколци закончели школски рок
14. юний 2008. (Рутенпрес) – Як и у других местох у Войводини, и у Руским Керестуре, вчера, 13. юния, коло 400 школяре основней школи закончели школски 2007/08. рок. Ище скорей, осму класу у керестурскей Школи того року закончели 46 школяре, котри од 18. юния у Школи започню покладанє квалификацийних испитох за упис до штреднєй школи.
Як заплановане, идуцого тижня школяром ОШ буду подзелєни свидоцтва, а школяре од першей по трецу класу керестурскей Ґимназиї, школски рок закончую 20. юния.
Идуцого тижня, тиж 18. юния, матурантом керестурскей Ґимназиї шветочно буду уручени дипломи о законченю штредньоишколского школованя.

Законченє настави и у ШОМО
14. юний 2008. (Рутенпрес) – И школяре Школи за основне музичне образованє у Кули, концом того тижня закончели школски 2007/08. рок.
У кулскей ШОМО школски рок закончели вєдно 146 школяре, медзи котрима и 28 у керестурским Оддзелєню ШОМО. Шесту класу ШОМО, односно основне музичне образованє, у цалей кулскей музичней школи закончели 14 школяре, а у Оддзелєню у Руским Керестуре, шесту класу закончели штверо школяре.
Приємни испит за упис до першей класи ШОМО положели 33 будуци першокласнїки, спомедзи хторих дзешецеро у керестурским Оддзелєню.

Нєшка Керестурци у Шидзе
14. юний 2008. (Рутенпрес) - Зоз представу "Перша любов" Силвестера Дорокхазия, у режиї Ксениї Бодянец, Дзецинска ґрупа Драмского студия “АРТ” рускокерестурского Дома култури, нєшка, 14. юния, госцує у Шиду.
Представа Керестурцох "Перша любов" нєшка, соботу, 14. юния, у Шидзе будзе виведзена на сцени КУД "Дюра Киш", зоз початком на 19. годзин.

Ище єст вигляди за нови образовни профил
13. юний 2008. (Рутенпрес) – Як дознава Рутенпрес у Националним совиту, ище вше єст вигляди же би ше достало согласносц за формованє образовного профилу “туристични технїчар”.
    После "Найоштрейшого протесту " пре нєдоставанє согласносци од Министерства просвити за нови образовни профил, котри Национални совит Руснацох и рускокерестурска Ґимназия "Петро Кузмяк" 10. юния послали на найвисши державни и покраїнски адреси, вчера, 12. юния, о тим проблему предсидатель Националного совиту Рунацох Славка Орос бешедовал зоз Петром Ладєвичом, деректором Републичней служби за людски и меншински права.
       Тиж так, предсидатель нашого НС и директор ОШиҐ "Петро Кузмяк" Янко Хома, директно бешедовали и зоз помоцнїком министра просвити, задлуженим за штредньошколске образованє, Боґолюбом Лазаревичом. Як потолковане помоцнїкови министра просвити Боґолюбови Лазаревичови, место двох оддзелєньох зоз сербским наставним язиком, як то було до тераз, керестурска Ґимназия жада отвориц єдно оддзелєнє нового образовного профилу, за школованє туристичних технїчарох.
       Так би Ґимназия у Руским Керестуре и надалєй мала два оддзелєня общей Ґимназиї - єдно з руским и єдно зоз сербским наставним язиком, як и єдно оддзелєнє нового образовного профилу, з можлївосцу упису истого числа школярох як и до тераз – по 30 до каждого оддзелєня.
      Тиж так, наглашене же керестурска Школа технїчно, алє и кадрово, барз добре опремена и за тот евентуални нови образовни профил, а наглашене и постоянє можлївосци пребуваня школярох у сучасним интернату коло Школи. Помоцнїк министра просвити, як и други представителє министерства поволани, же би ше особнє прешвечели до можлївосцох и условийох школованя и роботи у керестурскей Школи "Петро Кузмяк".
       Попри предлужованя каждодньових интензивних контактох зоз Републичну службу за людски и меншински права, та спомнутим Министерством, можлїве же тота нащива тих дньох и будзе витворена, та предпоставка же после того ушлїдза конкретни ришеня зоз даваньом, лєбо нєдаваньом согласносци на нови образовни профил – туристични технїчар.
        Як наглашел предсидатель НС Славко Орос, було би барз добре кед би тото намагнє було и витворене, а кед нє, керестурска Ґимназия и за наступни школски 2008/09. рок упише школярох до першей класи у трох оддзелєньох – до єдного з руским и до двох зоз сербским наставним язиком.

За заєднїцки проєкти двох найвекших руских местох
13. юний 2008. (Рутенпрес) – Стреду, 11. юния, отримане друге стретнуце членох совитох Месних заєднїцох наших найвекших местох - Руского Керестура и Коцура.
       На стретнуцу, котре отримане у Руским Керестуре, присуствовали предсидатель Совиту коцурскей МЗ Славомир Русковски, та члени Совиту - Юлиян Русковски, Владимир Салонски и Рафаил Русковски, як и секретарка МЗ Коцур Славица Штрбац.
     Своїх колеґох зоз Коцура у Керестуре дочекали предсидатель Совиту МЗ Руски Керестур Желько Ковач, подпредсидатель Совиту Йоаким Рац Мими, члени Совиту Янко Хома, Дюра Сабадош, Борис Шайтош и Юлиян Колошняї Ристо, як и секретар керестурскей МЗ Йоаким Надь.
     Як Рутенпрес дознава од секретара керестурскей МЗ Йоакима Надя, на сходзе членох двох совитох бешедоване о можлївосцох повязованя асфалтней драги Руски Керестур-Косанчич зоз драгу Коцур-Змаєво, з чим би Керестур и Коцур були вельо лєпше повязани, а скрацело би ше и путованє Керестурцох до Нового Саду.
        Як гвари Надь, з боку членох Совиту МЗ Коцур виражена порихтаносц же би ше у наиходзацим периодзе по тим питаню бешедовало у Општини Вербас и тот проєкт и витворело. Бешедоване и о злєпшованю комуналней инфраструктури и на тему можлївосци прикапчованя будуцого фекалного канализацийного пречисцовача зоз Керестура на главни колектор за цалу вербаску општину, з интенцию же би бул медзиопштински.
     - Руски Керестур по питаню канализациї тераз достал средства за два проєкти – за проєктованє фекалней канализациї и за проєктованє фекалного пречисцовача, а спрам спознаньох, у Вербаше ше пририхтує централни колектор за їх цалу општину, аж постої можлївосц же ше на ньго приключи и часц кулскей општини – гвари Йоаким Надь.
    Як Рутенпрес дознава од Надя, на инициятиву представительох Совиту МЗ Коцур, на сходзе предста- вительох двох совитох МЗ, 11. юния у Керестуре, бешедоване и о руководзацкей и ушорйовацкей политики новинох "Руске слово" Нови Сад.
       - По тим питаню, насампредз, бешедоване о сотруднїцтве “Руского слова” зоз МЗ Коцур, а я урядово виявюєм же ми, як МЗ Руски Керестур, барз задовольни зоз сотруднїцтвом з новинарами “Руского слова” котри покриваю Руски Керестур и тото нашо сотруднїцтво цалком у порядку и барз добре функционує – гварел Надь.
     - Очиглядне же МЗ Коцур ма одредзени пригварки на дїялносц “Руского слова”, ми ше до тей пробле-матики нє упущовали, алє зме прилапели єдно предложене роздумованє Совиту МЗ Коцур и даме заєднїцку суґестию Националному совиту Руснацох, як сновательови НВУ “Руске слово” Нови Сад, же би розпатрел єй дїлованє, ушорйовацку политику, та и тоти потенциялни проблеми и одношеня спрам Коцура з боку одвичательних у “Руским слове” – гварел Надь за Рутенпрес.
       - Без упущованя до даяких подробнєйших анализох на тоту тему, думам же Национални совит Руснацох права адреса котра би мала дац одвит на питанє же цо Руснаци очекую од єдного нашого такого медию як цо “Руске слово” – гварел Надь.

"Найоштрейши протест” пре нєдоставанє согласносци на образовни профил
11. юний 2008. (Рутенпрес) - На найвисши державни и покраїнски адреси, Национални совит Руснацох и керестурска Ґимназия "Петро Кузмяк" вчера, 10. юния, послали "Найоштрейши протест" пре нєдоставанє согласносци од Министерства просвити за нови образовни профил, гоч шицки потребни согласносци на тото дала АП Войводина.
      "Протест” послати предсидательови Републики Сербиї Борисови Тадичови, предсидательови Влади РС Воїславови Коштуницови, министрови просвити Зоранови Лончарови и директорови Служби за людски и меншински права Петрови Ладєвичови. Надалєй, тото протестне писмо послате и предсидательови Скупштини АП Войводини Боянови Кострешови, предсидательови ВР АП Войводини Боянови Пайтичови, покраїнскому секретарови за образованє Золтанови Єґешови и предсидательови општини Кула Светозарови Буквичови.
      Тиж так, з тим протестом, и вообще, проблемематику коло нового профилу у керестурскей Школи упознати и нови народни посланїки у Скупштини РС др Дюра Мученски и Олена Папуґа. До вчера, 10. юния, Министерство просвити Републики Сербиї, нє дало согласносц за отверанє нового образовного профилу у Ґимназиї "Петро Кузмяк"– туристични технїчар – тераз з руским наставним язиком, як то на скорейших розгваркох у истим Министерстве було и порадзене.
      Гоч дзень пред тим, 9. юния, покраїнски секретар за образованє Золтан Єґеш ознова пре тото реаґовал у Министерстве просвити, вовторок, 10. юния, у Школи и Националним совиту Руснацох дознали же анї у повтореним Конкурсу Министерства просвити за упис до штреднїх школох, того образовного профилу – нєт.
     Ище 15. мая того року, у Службеним глашнїку АП Войводини, дзе обявена мрежа штреднїх школох и дополнєнє з новима образовнима профилами у школским 2008/09. року, приказана и керестурска ОШиҐ "Петро Кузмяк", дзе предвидзене же тота Школа будзе уписовац по 30 школярох до Ґимназиї общого типу зоз сербским и руским наставним язиком, як и 30 школярох до нового образовного прифилу – туристични технїчар – зоз сербским язиком.
        После першого вихабяня того нового профилу керестурскей Школи у Конкурсу Министерства просвити, а без даякого толкованя, чолнїком нашого Националного совиту и Школи, на приєму у Министерстве просвити концом мая суґероване же постої можлївосц доставаня согласносци за спомнути профил, алє з руским наставним язиком.
       Як то суґероване у Министерстве, Школа аж окончела и анкету о заинтересованосци школярох за нови профил, медзитим, лєм усмено, вовторок, 10. юния, з Министерства просвити потолковане же нє можу достац согласносц, бо Школа за тот нови профил по руски нє ма согласносц од Покраїни, алє лєм за наставу по сербски.
       Рускокерестурска ОШиҐ "Петро Кузмяк" за формованє нового образовного профилу покончела шицки роботи и пририхтала цалосни потребни материял и документи, достала согласносц на тото од найкоментнєйших покраїнских орґанох, аж и самей Скупштини АП Войводини, а до того бул уключени и сам покраїнски секретар за образованє. Керестурска Школа преглашена и за Школу од окремного значеня у Войводини, як єдина така по руски, кед у питаню штреднє образованє.
     У "Найоштрейшим протесту", як наволани допис Националного совиту и Школи, потолковане шицко цо вязане за творенє нового образовного профилу, як найадекватнєйшого за отриманє капацитетох штреднєй школи, алє и на ширшим планє – значносц за затримованє младих кадрох у Руским Керестуре, як штредку Руснацох у Сербиї.
      После посиланя того "Протесту" найвисшим державним и покраїнским державнїком, у Школи и НС до конца того тижня очекую одредзени конєчни одвит вязано за нови образовни профил у Школи "Петро Кузмяк".

Ище єст места у ШОМО
11. юний 2008. (Рутенпрес) – До першей класи Школи за основне музичне образованє Кула до тераз уписани вєдно 43 нови школяре. До ШОМО у Кули уписани 33 першокласнїки, а до Оддзелєня ШОМО у Руским Керестуре уписани 10-еро школяре.
До першей класи ШОМО, Оддзелєня у Руским Керестуре найвекше интересованє було за клавир и тамбуру, так же за тоти инструменти уписани найвецей дзеци першей класи.
За упис до першей класи ШОМО ище вше єст места, крем за клавир у Кули, и заинтересовани за упис за инструменти гармоника, тамбура, кларинет, труба и виолина, можу ше приявиц до конца юния, лєбо по 10. септембер.

Поозначовани дзири на керестурских драгох
10. юний 2008. (Рутенпрес) – Як Рутенпрес дознава од секретара Месней заєднїци Руски Керестур Йоакима Надя, можлїве же нєшка, 10. юния, почнє оправянє, односно “платанє” дзирох на асфалтних драгох по керестурских улїцох.
Подприємство "Бачкадраги" вчера, 9. юния, "зняло" ситуацию и поозначовало шицки векши дзири и очкодованя на керестурских драгох, так же ше очекує и швидке починанє роботох на їх оправяню.
Заплановане же буду поплатани коло 150 квадратни метери драгох по Керестуре, вредносц роботи виноши коло 300 000 динари, а средства обезпечени з месного самодоприносу, зоз ставки за порядне отримованє драгох. Попри тей роботи, у Керестуре у цеку и оправянє бетонскей драги котра водзи на Яраш, а тоту роботу окончує БП "Блашко" зоз Кули.

Дзецинска танєчна ґрупа зоз Керестура на Фестивалу у Таванкуту
10. юний 2008. (Рутенпрес) – Дзецинска виводзацка танєчна ґрупа и Народни оркестер керестурского Дома култури, внєдзелю, 8. юния, госцовали у Таванкуту. Рускокерестурски танєчнїки, вєдно з представителями словацкей, мадярскей и горватскей националней меншини, у Таванкуту участвовали на Тринастим дзецинским фолклорним фестивалє под назву "Дзеци то украс швета".
Орґанизатор Дзецинского фолклорного фестивала "Дзеци то украс швета" було горватске КУД "Матия Ґубец" зоз Таванкуту, а Керестурце на тим Фестивалє виведли танєц "Нє до нас, нє до нас", хореоґрафа Йоакима Раца.

Маскенбал у Дзецинскей заградки
10. юний 2008. (Рутенпрес) - Дзень еколоґиї, 5. юний, дзеци у Предшколскей установи "Бамби" у Кули, та и його рускокерестурским оддзелєню “Цицибан” означели зоз маскенбалом. Масекнбал дзеци пририхтали вєдно зоз своїма виховательками и родичами, та попри креативносци, источасно є и одредзени порушовач еколоґийней свидомосци, котру ше з дзецми пестує през цали рок.
После представяня своїх маскох у дворе Дзецинскей заградки, дзеци маски указали и Керестурцом прейґ шпациру през центер валала, а кажде дзецко достало припознанє "Желєни лїсток".
Предшколска ґрупа виховательки Емилиї Костичовей, 5. юния участвовала и у централней програми означованя Дня еколоґиї за кулску општину, у керестурским Доме култури. Иста ґрупа пред тим участвовала и у двомешачним еколоґийним проєкту "Белави кридла" котри витворени у сотруднїцтве ПУ "Бамби" и керестурского Еко-руху "Желєни персцень". Циль проєкту бул одмалючка розвивац свидомосц дзецох о важносци здравого штредку и здравя вообще.

Джуджар найлєпши у лапаню риби на дуґов
10. юний 2008. (Рутенпрес) – Яким Джуджар освоєл перше, Янко Фекете друге, а Дюра Костелник треце место на змаганю у лапаню рибарох на дуґов, котре внєдзелю, 8. юния отримане у Руским Керестуре. Змаганє у лапаню рибох на дуґов отримане на керестурским беґелю у орґанизациї Здруженя спортских риболовцох "Коляк" зоуз Руского Керестура.
Побиднїк змаганя Яким Джуджар перше место освоєл зоз влапенима 1 290 ґрамами риби; други, Янко фекете влапел 1 200 грами, а треци, Дюра Костелник – 1 040 грами риби.

Концерт "Шаришанчка" зоз Прешова
7. юний 2008. (Рутенпрес) – Зоз щирима громкима аплаузами, рускокерестурска публика вчера, 6. юния, привитала кажди танєц и шпиванку Дзецинского фолклорного ансамбла “Шаришанчок” зоз Прешова, зоз Словацкей републики.
       Дзецински фолклорни ансамбл "Шаришанчок", вчера, 6. юния, у врацаню з госцованя у Турскей, зашол до Руского Керестура, дзе у Велькей сали Дома култури отримал свой цаловечарши концерт. После стилизованого сценского танєчного блоку под назву "Стретнуце з будучносцу", штерацец двойо члени танєчного ансамбла, оркести и дзивчатска ґрупа шпивачкох Керестурцом представели богати фолклор Шаришского реґиону у восточней Словацкей.
        Хореоґраф векшини танцох з котрима ше "Шаришанчок" представел у Керестуре Алена Паулусова, потим Якуб Клучяр, як и Милан Гвижджар. Дзецински ансамбл "Шаришанчок" оформени 1986. року при Парку култури у Прешове, а творя го коло 60 дзеци и млади, возросту од 6 до 18 рокох и источасно є и пририхтуюци за перши, познати прешовски Фолклорни ансамбл "Шаришан".
      "Шаришанчок” нєшка єден з найлєпших дзецинских танєчних ансамблох у Словацкей, о їх квалитету шведоча и числени госцованю у рижних жемох Европи, а наступ у Керестуре им бул други у Сербиї, понеже пред даскельо роками госцовали и у Кисачу.

Означени Дзень защити животного штредку
6. юний 2008. (Рутенпрес) – Централна шветочносц з нагоди 5. юния - Дня защити животного штредку, за кулску општину отримана вчера у Руским Керестуре.
       Главни орґанизаторе означованя 5. юния , праве на сам Дзень защити животного штредку, бул Еколоґийни рух "Желєни персцень" Руского Керестура, котри того року означує и 15-рочнїцу од свойого формованя и роботи. Вчерайшей програми з нагоди означованя Дня животного штредку присуствовал предсидатель Општини Кула Светозар Буквич, проф. др Райко Иґич зоз Чикаґу, як госц програми наступела и поетеса Ксения Макаї Орос зоз Р. Керестура, други визначни госци.
        Предсидатель кулскей општини Светозар Буквич визначел задовольство зоз присутносцу того дня, праве у Руским Керестуре, дзе ше, як гварел, дзекуюци и велькому ентузиязму др Леони Доротич Ґутеша, еколоґиї дава вельку увагу.
        З нагоди Дня защити животного штредку, вчера уручени и окремни припознаня за доприношенє еколоґиї, а за пропаґированє еколоґиї и свидомосци о защити чловекового штредку, Еколоґийни рух наградзел редактора Рускей редакциї ТВ Нови Сад Мирка Канюха и новинара и фоторепортера кулского ИПЦ "Кула" Любомира Дудаша.
       Як каждого, и того року на тей шветочносци уручени награди за найкрасше ушорени керестурски заградки, а того року тото припознанє достали Мария Планчак, Звонимир Катона, Еуфемия Жирош, Леона Виславски и Наталия Семан.
       З нагоди Дня охрани животного штредку, дзеци з младшей ґрупи керестурского обєкта "Цицибан", привреднїкови Звонимирови Хомови уручели Подзекованє "Желєни лїсток", за ушоренє и украшованє центра валала.

Уж єст заинтересованих за нови напрям
5. юний 2008. (Рутенпрес) – На основи до тераз оконченей анкети, уж коло 14 школяре з вецей руских местох заинтересовани уписац ше до нового образованого профилу туристични технїчар котри будзе мац керестурска ґимназия.
Спрам словох директора керестурскей Школи "Петро Кузмяк" Янка Хому, до нового профилу у керестурскей Ґимназиї можу ше уписац и будуци штредньошколци котри нє Руснаци.
Шицки заинтересовани за упис до образовного профилу "туристични технїчар", можу ше обявиц до керестурскей Школи. Як Рутенпрес дознава, початком того тижня за упис до Ґимназиї з руским наставним язиком за тераз були заинтересовани 12 школяре.

"Ружа” тидзень познєйше
5. юний 2008. (Рутенпрес) - 47. фестивал рускей култури “Червена ружа”, будзе отримани тидзень познєйше як цо то було першобутно заплановане. До пременки датума зоз остатнього викенду у юнию (од 27. по 29. юний), на перши викенд у юлию – од 4. по 7. юлий, пришло после розгваркох орґанизаторох зоз компетентнима у Радиодифузней установи Войводини-РТВ Войводини.
       Остатнього викенду у юнию технїка, екипи и Тамбурови оркетер РТВ Войводини буду уж завжати на першим медзинародним фестивалє тамбурових оркестрох у Дироню, так же нє годни участвовац у технїчней и програмней потримовки нашому Фестивалу рускей култури "Червена ружа".
        Пре тоту причину, орґанизатор "Ружи" ше опредзелєл за пременку термина отримованя, односно, же би тогорочни Фестивал рускей култури бул отримани тидзень познєйше – од 4. по 6. юлий.
        У твореню "Ружи" вельку улогу ма и РТВ Войводини, понеже участвує зоз своїм цалосним озвученьом и ошвиценьом, а єй Тамбурови оркестер виводзи нови шпиванки у народним духу, котри продукує кажди Фестивал рускей култури.

Зоз Керестура штверо одборнїки
3. юний 2008. (Рутенпрес) – Штверо одборнїки зоз Руского Керестура буду у новим зволаню Скупштини општини Кула. Спред Демократскей странки, одборнїки буду Ґабриєла Саянкович, Славко Рац и Михайло Тиркайла а спред Сербскей радикалней странки, одборнїца у новим зволаню СО Кула будзе Мария Шепински, тиж зоз Руского Керестура.
У Општини ище вше у цеку розгварки о будуцей скупштинскей векшини у кулским парламенту, а од 37 одборнїцких мандатох, ДС достала 16; СРС 15; ДСС-НС 3; Странка желєних-Герцен Радонїч 2 и єден мандат Мадярска коалиция. Велибор Милоїчич, як предсидатель Дочасового орґану Општини Кула, за пондзелок, 16. юний, заказал конститутивну схадзку Скупштини општини у новим зволаню.

Концерт и упис до ШОМО
3. юний 2008. (Рутенпрес) - Нєшка, зоз початком на 20 годзин, у Велькей сали Дома култури Руски Керестур, школяре Школи за основне музичне образованє зоз Руского Керестура и Кули, отримаю свой рочни концерт. Ютредзень, 4. юния, у рускокерестурским Оддзелєню ШОМО, дополадня и пополадню, будзе отримани упис заинтересованих школярох до першей класи Школи за основне музичне образованє. Заинтересовани школяре ше у керестурским Оддзелєню можу уписац за ученє гармоники, клавира и тамбури, а попри спомнутих инструментох, за гушлю, кларинет и трубу у ШОМО у Кули.

Нєшка почина оправянє драги и закриванє гали
3. юний 2008. (Рутенпрес) - Нєшка, 3. юния, у Руским Керестуре почнє оправянє бетонскей драги, котра идзе по улїцох Русинска и Дюри Кишюгаса, спрам Ярашу. Спрам словох секретара керестурскей Месней заєднїци Йоакима Надя, тих дньох почню и роботи на будованю мурика коло керестурского шмециска.
редносц наявених роботох на инфраструктури Керестура виноши коло 500 000 динари, а виводзач роботох будзе БП "Блашко" зоз Кули. Средства за тоти роботи обезпечени зоз комуналних средствох, як и зоз месного самодоприносу.
Ище прешлого тижня, на спортскей гали у Руским Керестуре почало поставянє металней конструкциї за закрице, а най здогаднєме – поставянє закрица на гали финансує ше зоз средствох АП Войводини.

Ютре програма за осмакох
3. юний 2008. (Рутенпрес) – На ютре, 4. юния, за школярох осмих класох у керестурскей Школи будзе отримана пригодна шветочносц з нагоди законченя основношколского образованя. Пригодну програму за тоту нагоду пририхтую школяре седмих класох, а после того, у Керестурским Ресторану "Руслака", за школярох и наставнїкох будзе отримани матурски вечар. У Руским Керестуре школованє у основней школи того року закончую 46 школяре, осмих класох.

иНТЕРНЕТ РАДИО руски керестур
Од 02.06. ознова вшадзи у швеце можеце слухац Интернет Радио Руски Керестур на адреси (линку) http://RuskiKerestur.primcast.com/RuskiKerestur Достаточно кликнуц на тот линк и отвори ше Windows Media Player лєбо Winamp у нїм аутоматски ше слуха радио.
Кед постої даяки проблем и нє сце ше аутоматски отвориц линк, вецка пробуйце у єдним од тих двох програмох прициснуц File и вибрац Open URL ... и унєсц або прекопирац линк и прициснуц ОК.
Tиж на шлїдуюцим линку http://118511.netguestbook.com/ отворена кнїжка за шицких слухачох интернет радия Руски Керестур дзе можеце дац вашо коментари, предкладаня, критики, думаня ...

Папуґова и Мученски народни посланїки
2. юний 2008. (Рутенпрес) – Спрам урядово придатей лїстини за народних посланїкох Коалациї за европску Сербию-Борис Тадич, у новим зволаню Скупштини Републики Сербиї Руснаци буду мац аж двох народних посланїкох.
      У новим зволаню Народней скупштини, дотерашнї народни посланїк др Дюра Мученски зоз Руского Керестура, и у новим републичним скупштинским зволаню будзе окончовац тоту функцию, спред Демократскей странки (ДС).
        Спред Лиґи социялдемократох Войводини (ЛСВ) народна посланїца у новим зволаню Скупштини Републики Сербиї будзе и Олена Папуґа, новинарка "Руского слова" зоз Нового Саду, родом зоз Руского Керестура.
     У новим зволаню Скупштини АП Войводини, покраїнска посланїца будзе Леона Виславски зоз Дюрдьова, спред ДС, з єй пропорцийней лїстини, як представнїца рускей националней меншини у Войводини. Як дознава Рутенпрес, медзи 65 народнима посланїками з ДС, осемнацецеро зоз Войводини, а зоз Заходно-бачкого округу др Дюра Мученски з Керестура и Драґомир Цимеша зоз Зомбора.