|
|
НОВА ЦЕНА ВОДИ
19,44 ДИНАРИ
27. юлий 2007.
- Од 1, авґуста Керестурци за кубик потрошеней води буду плациц 18
динари плус порция на додату вредносц (8 одсто) цо виноши 19, 44
динари - одлучене на схадзки Совиту Месней заєднїци хтора отримана
25. юлия.
Од першого
авґуста Месна заєднїца почина наплацовац и услуги виношеня шмеца.
Мешачно за виношенє шмеца будзе ше плациц 1 динар по метеру
квадратним бивацого простору цо просеково виноши 35 динари по особи
мешачно.
Рахунки за воду
и за шмеце будзе ше доставац нараз и то кажди мешац. На схадзки
Совиту одлучене  же хто нє вимири длуства по 1. авґуст, воду будзе
плациц по новей, висшей цени.
ВОДА БУДЗЕ
ВИКЛЮЧЕНА ПЕЙЦОМ ОБИСЦОМ
27. юлий 2007
- Розпатраюци информацию о запровадзеней акциї на вимирйованю
длуствох за потрошену воду на схадзки Совиту месней заєднїци
констатоване же велька векшина длужнїкох вимирели длуства, єдна часц
ше догварела з Месну заєднїцу о вимирйованю длуствох на рати, тройо
длужнїки нє були доступни за уручованє ришеньох, док ше пецеро
вообще нє явели до Месней заєднїци, а нє вимирели анї длуства.
Члени Совиту
заключели же би ше пейцом обисцом воду виключело, цо будзе поробене
того або наступного тижня, а же би ше тим хтори нє були доступни
зняло водомери и однєсло до Месней заєднїци на чуванє. После
вимирйованя длуствох водомери буду врацени.
ВЛАСНЇКОМ ЖЕМИ
САМОДОПРИНОС БУДЗЕ ОБРАХОВАНИ ПО 11 ДИНАРИ ЗА КИЛОГРАМ ЖИТА
27. юлий 2007.
- Совит Месней заєднїци принєсол заключенє же би ше власнїком жеми
месни самодопринос обраховало по 11 динари за килограм жита. Тих
дньох служба Месней заєднїци доручи ришеня власнїком жеми о суми
хтору треба же би уплацели на мено месного самодоприносу и уплатнїци
зоз хторима свойо обовязки годни вимириц на пошти або у банкох.
По одлуки о
розписованю месного самодоприносу за период од 2007. по 2011. рок,
власнїки жеми на мено месного самодоприносу маю обовязку видвойовац
динарску проци-вредносц 28,5 килограмох жита по гольту рочно.
НЄШКА СХАДЗКА
СОВИТУ МЗ
25. юлий 2007. -
Желько Ковач, предсидатель Совиту Месней заєднїци за нєшка заказал
схадзку Совиту на хторей будзе слова о применьованю Одлуки о ценох
комуналних услугох, а будзе поднєшени и звит о акциї за наплацованє
длуствох за воду. Тиж так члени Совиту на нєшкайшей схадзки треба же
би утвердзели цену жита хтору ше будзе применьовац за наплацованє
месного самодоприносу од власнїкох жеми, же би принєсли одлуку о
розписованю явней набавки за купованє двох мульних пумпох як и
одлуку о набавяню хлоринатора за водовод.
Схадзка Совиту
Месней заєднїци будзе отримана на 20,30 годзин у просторийох Месней
заєднїци.
ҐЕНЕАЛОҐИЯ - ФАМИЛИЙНЕ СТЕБЛО
 22. юлий 2007.
- Ґенеалоґия то наука котра преучує
походзенє, розвой и розконарйованє фамелиї. Поняце ґенеалоґия
настало од греческого слова genea -
род, племе, колєно и logos
- бешеда, слово. Як резултат преучованя и виглєдованя походзеня фамелиї
настава ткв. родослов лєбо фамелийне стебло.
Пре вельку заинтересованосц, окреме
Руснацох у швеце котри сцу знац свойо походзенє, отворели зме тот
бок дзе шицки котри маю даяке фамелийне стебло можу послац го на наш
е-маил (у форми слики). Фамелийни стебла
буду поставени на нови отворени бок под Рижне - Ґенеалоґия
>>>.
НЄШКА ПОЧИНА
МЕДЗИНАРОДНИ ВОЛОНТЕРСКИ КАМП
 17. юлий 2007. - Зоз приходом волонтерох єшка почина Медзинародни
волонтерски камп "Лєто у Руским Керестуре" хтори будзе тирвац по
конєц мешаца. Волонтере зоз даскелїх державох и зоз Руского
Керестура буду робиц на ушореню базена и його околїска, а у
шлєбодним часу млади буду уключени до роботи вецей роотньох.
Предвидзени и богати културни живот волонтерох, забава и друженє.
На
законченю Кампа будзе отримана музична манифестация "Водова фест",
дакедишня рок фешта, хтора будзе тирвац три днї. Плановани наступ
вецей познатих бендох як и тих хтори ище вше нє афирмовани, а
остатнього дня на безену ше отрима стретнуце мото байкерох.
ВЧЕРА ПОЧАЛ
НОЦНИ ТУРНИР У МАЛИМ ФОДБАЛУ
17. юлий 2007. - Вчера у Старей школи почал ноцни трунир у малим
фодбалу на хторим участвую 11 сениорски, осем пионирски и штири
екипи младших пионирох. Перше ше бавя змаганя по ґрупох, а после на
випадованє.
Наградни фонд за сенирох 55.000 динари хтори наменєни найлєпше
пласованим екипом. Першопласована екипа на турниру достанє 40 одсто
од тих средствох, другопласована 30, а трецепласована екипа 15 одсто
средствох. Наградни фонд у пионирскей конкуренциї виноши 16.000, а у
конкуренциї младших пионирох 8.000 динари.
Змаганя починаю на 20 годзин. Перши наступаю младши пионире, потим
пионире, а после 21 годзин сениоре. Уходнїца за турнир кошта 50
динари за старших и 20 динари за дзеци, а кажди вечар орґанизована и
томбола за публику за хтору награди обезпечели спонзоре.
1,5 МИЛИОНИ
ДИНАРИ ЗА ВОДОПОДМИРЙОВАНЄ
13. юлий 2007. - Зоз Покраїнского секретарияту за польо-привреду, водопривреду и лєсарство АП Войводиникерестурска Месна заєднїца
достала, по конкурсу, безповратни средства за ришованє проблему
водоподмирйованя у виносу од 1.500.000 динари.
Йоаким Надь, секретар Месней заєднїци гвари же средства
найвироятнєйше буду потрошени за ришованє проблемох атмосферскей
канализациї. Векши проблем представя водоводна мрежа до чиєй
ревитализациї треба уложиц коло 34 милиони динари, алє средства по
тим проєкту зоз Покраїнского секретарияту нє достати - гвари Надь.
НОВИ "CHAT"
11. юлий 2007. -
Пре каждодньово проблеми зоз
"chat"-ом
(а пре вельку заинтересованосц), пришло до реализациї ново
"chat"-у
котри дакус напреднєйши и визуелно и функционално. Попробуйце тот
"chat"
тих дньох та увидзиме як ше справує у реалних обставинох. Тиж тих
дньох будзе обявене даяке кратке упутство за роботу зоз тим
"chat"-ом
за тих цо ше нє знаходза найлєпше (окреме за тих цо нє знаю
английски).
За нови
"chat"
потребна мац инсталирани
Flash
player на
компютеру. Кед го нємаце можеце го зняц на шлїдуюцей адреси
http://www.adobe.com/products/flashplayer
и виберце
Download Now, а потим
Install Now.
Инсталация велька 1,1
MB.
ҐАЗИФИКОВАНЄ РУСКОГО КЕРЕСТУРА КОНЦОМ РОКА
10. юлий 2007. - По конєц рока будзе
подписани контракт о дїловно-технїчним сотруднїцтве на
ґазификованю Руского Керестура - виявел Райко Симин,
помоцнїк директора Явного подприємства "Сербияґаз" прешлого
пиятку у Кули знагоди подписованя контракту о початку
роботох на поставяню дистрибутивней ґазней мрежи нїзкого
прициску у Кули хторе почало вчера, а ма буц закончене по
20. новембер.
Вон гварел же средства у виносу од 850.000 еври
за ґазификованє заплановани у Националним инвестицийним
плану за тот рок.
Райко Симин ище початком того року обецал у
Руским Керестуре же роботи на ґазификованю валала почню у
априлу, алє до того нє пришло понеже ище вше нє обезпечени
шицки нєобходни согласносци.
НОЦНИ
ТУРНИР У МАЛИМ ФОДБАЛУ ПОЧИНА 16. ЮЛИЯ
10. юлий 2007. - Спортске дружтво "Русин"
и того лєта орґанизує ноцни турнир у малим фодбалу хтори
почнє 16. юлия.
Турнир будзе орґанизовани за сениорох, пионирох
и младших пионирох. Кажда екипа будзе мац 10 бавячох, а
екипи зоз прияву упалцую по 5.000 динари сениоре и 2.000
динари пионире.
Награди за побиднїкох пенєжни. За освоєне перше
место награда виноши 45 одсто од уплацених средствох, за
друге 30, а за треце место 15 одсто.
ПРИЯВЦЕ ШЕ ЗА
КАМП
13. юлий 2007.
- За Медзинародни волонтерски камп "Лєто у Руским
Керестуре" хтори почина на вовторок, 17. юлия, шицко порихтане, алє
потребни ище волонтере. Сандра Няради и Сандра Ґоворчич,
лидерки Кампу гваря же зоз иножемства место 12 за тераз сиґурни
пецеро волонтере та поволую шицких заинтересованих зоз Руского
Керестура и других местох же би ше приявели за участвованє на Кампу.
Приявиц ше мож особни при лидеркох Кампа и на телефон 063/ 71 - 43 -
502 , або 062/ 477 - 019.
Волонтере под час Кампа буду змесцени у Интернату, а робиц ше будзе
на
ушореню керестурского базена.
УМЕТНЇЦКА
КОЛОНИЯ НЯРАДИ ПО ДЗЕШАТИРАЗ У РУСКИМ КЕРЕСТУРЕ
5.
юлий 2007. - Нєшка у Руским Керестуре почина з роботу 10. Уметнїцка
колония "Няради" хтора будзе тирвац по 12. юлий. У Колониї буду
частвовац 18 подобово уметнїки медзи хторима Янош Месарош зоз
Беоґраду, Боґомил Карлаварис зоз Горватскей, Гелена Канюх зоз
Ветернику, Еуфемия Новта и Биляна Роман зоз Руского Керестура и велї
други афирмовани и менєй афирмовани подобово уметнїки зоз
Смедеревскей Паланки, Нового Саду, Крушевцу, Суботици и других
местох зоз цалей Сербиї.
Уметнїцка колония "Няради" будзе отримана у ОШ и Ґимназиї "Петро
Кузмяк", а уметнїки ше упознаю зоз културу и традицию Руснацох,
нащивя Церкву, Водицу, Музей, рибняк, базен и други места у валалє и
околїску, и свойо упечатки пренєшу на слики хтори ище баржей збогаца
уж богати фондус Уметнїцкей колониї
"Няради" хтора
того року означує
ювилей, дзешец рочнїцу постояня.
ТИРНИР У МАЛИМ
ФОДБАЛУ ПОЧИНА 16. ЮЛИЯ
5.
юлий 2007. - Спортске дружтво "Русин" и того лєта орґанизує традийни
турнир у малим фодбалу. Турнир будзе орґанизовани за сениорох,
пиониох и младших пионирох, почнє 16. юлия.
Сениоре екипно зоз прияву плаца 5.000, а пионире 2.000 динари.
Побиднїки турнира достаню пенєжни награди: за освоєне перше место 45
одсто од вкупней уплати, за друге 30, а за освоєне треце место 15
одсто. Як и по други роки буду наградзени и найлєпши бавяч, ґолман и
ґолґетер.
Прияви ше будзе примац по 15. юлий.
ИЛОНА ЗАРУБИЦА
ПЕРША И У ПРОФЕСИЙНЕЙ КОНКУРЕНЦИЇ
 4.
юлий 2007. - Илона Зарубица перша на швеце у бодибилдинґу зоз Руского
Керестура прешлого викенду посцигла ище єден вельки успих на
шветовей сцени. На Шветовим купу у бодибилдинґу, фитнесу и боди
фитнесу у болгарским городзе Балчик на Чарним морю, у професийней
конкуренциї освоєла перше место у бодибилдинґу за жени.
Илона Зарубица и
єй супруг Бачо гваря же перши Еуро куп у бодибилдинґу и фитнесу у
орґанизациї Шветовей федерациї бодибилдинґу и фитнесу, и
керестурского Боди билдинґ клубу "Билдер Бачо" будзе отримани у
октобре того року у Руским Керестуре.
роботня Волонтерского
центра
 3.
юлий 2007.
- У просторийох Дома култури у Руским Керестуре дня
07.07.2007.
року отрима ше роботня Волонтерского центра Войводини и
Pact Ruthenorum-a на тему роботного кампу
"Лєто у Керестуре 2007".
Присуствовац можу шицки хтори би сцели дознац дацо вецей о
волонтерским кампу. После роботнї, од 22:00 годзин на
базену
ше отрима промо-журка, а цени напою буду права
дробнїца.
ПРЕШИРЕНЄ
КАПАЦИТЕТОХ
3.
юлий 2007. - До преширеня постояцих и вибудови нових капацитетох у
Фабрики змарзнутей желєняви АБЦ Польопривредни комбинат "Перши май"
АД того року уложи прейґ 5 милиони еври. Слово о преширйованю
линийох за преробок гращку и сладкей кукурици и вибудови новей, ище
єдней хладзальнї за змесценє од 4,5 до 5 тисячи тони змарзнутей
желєняви. Средства за нови инвестициї обезпечени зоз Фонду за розвой
Републики Сербиї, прейґ кредитох и и зоз власних жридлох Комбината.
Того року запланована продукция од 8.000 тони змарзнутей желєняви,
цо аж за 1.500 тони вецей як прешлого року.
ГЕЛЕНКА БУЧКО И
ИҐОР ГРЕКСА ПОБИДНЇКИ ЗМАГАНЯ
ЗА НАЙКРАСШИ ГЛАС
 3.
юлий 2007. - Кошарку червених ружох и стилизовану дзивоцку ладу за
найкрасши женски глас достала Геленка Бучко зоз Миклошевцох хтора
шпивала шпиванку "Ище нєшка", а Иґор Ґрекса зоз Шиду зоз шпиванку
"Мацерова Мушкатла" освоєл перше место и чобольов за найкраши
леґиньски глас на змагательней манифестациї "Червена ружа" хтора у
рамикох 46. Фестивала рускей култури отримана внєдзелю. За найкрасши
женски и леґиньски глас змагали ше 14 учашнїки, а попри побиднїкох
похвалєни и Иван Надь и Андрея Бучко зоз Руского Керестура.
Од
12 нових композицийох у народним духу по оцени жирия першу награду
достала Агнета Тимко за композицию "Цмонєбово очи" у интерпретациї
Лїляни Барна Никитович, другу Владислав Надьмитьо за шпиванку "Стари
орех" у интерпретациї Мирослави Даждиу, а трецу Саня Полдруги за
композицию "Кажде рано" хтору одшпивала сама авторка.
Пияток на "Червеним пупчу" виведзени 10 нови композициї. Першу
награду освоєл Мирон Сивч за композицию "Любов у души" у
интерпретациї Николаї Сивч хтора преглашена и за найлєпшого
интерпретатора на дзецинскей манифестациї. Другу награду освоєла
композиция Мирослава Папа "Гунцут витор" хтору шпивал Александер
Сивч, а трецу награду достала композиия "Мали Яни" Мирослава
Еделинския у интерпретациї Адрияни Еделенски.
На
"Червеним пупчу", Шветочним концерту "На штред шорокей ровнїни" и на
"Червеней ружи" у трох Фестивалских дньох, 29. и 30. юния и 1. юлия
наступели коло 1.200 учашнїки зоз шицких местох у хторих жию Руснаци
як и госци зоз Петровцох и Миклошевцох зоз Горватскей и Музично
фолклорни ансамбли зоз Гуменого
и Прешова
зоз Републики Словацкей.
|
|
