Витайце  Место  Месна заєднїца  Руснаци  Инфо сервис  Рижне
 
Архива висткох - юлий 2008.

 

 
 


Закончени роботи на базену
 31. юлий 2008. (Рутенпрес) - Млади волонтере у Руским Керестуре тих дньох закончели прешлого року започати роботи на ушореню керестурского базену, и од вчера ушорюю простор на керестурским пияцу.
         Попри главних роботох на ушореню базена, за волонтерох орґанизовани и вецей креативни роботнї, як цо то фолклорна, та етно-роботня, нащивели вецей институциї и подприємства у Керестуре и у Кули, а єден дзень були и у Новим Садзе.
      Вчера и позавчером, 29. и 30. юлия, Медзинародна нєвладова орґанизация за юговосточну Европу "Сава", под час Волонтерского кампа у Керестуре орґанизовала и роботню на тему мира, толеранциї и интеркултуралного диялоґу, у рамикох такв. "Драги мира", котра того року рушела з Македониї, так же од вчера учашнїци Кампа и два волонтерки з Македониї и Греческей.
        Вшелїяк, учашнїки Волонтерского кампу буду и госци на тогорочней манифестациї младих - "Водова фест", котри на керестурским базену будзе отримани 1. и 2. авґуста.
 

Конєчно хвиля за роботу
 29. юлий 2008. (Рутенпрес) - После прешлого тижня кед диждж онєможлївел роботи, учашнїки тогорочного Волонтерского кампу у Руским Керестуре, вчера предлужели ушорйовац базен у Руским Керестуре.
       Спрам словох секретара керестурскей Месней заєднїци Йоакима Надя, волонтере тих дньох законча пораєнє простору на базену, а очекує ше же обиля и ушоря мурик на пияцу.
        Дзекуюци и роботи волонтером, керестурски базен будзе пририхтани и за наступну манифестацию младих “Водова фест”, того викенду.
       У тижню за нами, учашнїкох Волонтерского кампу приял предсидатель Националного совиту Руснацох Славко Орос, нащивели Рибалов а.д. "АБЦ ФУД", фабрику сокох "Сторк" у Кули, а єден дзень за нїх бул орґанизовани и вилєт до Нового Саду.
        Наявене же найвироятнєйше на ютре, стреду 30. юлия, Волонтерски камп у Руским Керестуре нащиви и помоцнїца секретара Покраїнского секретарията за спорт и младеж Александра Бабич. Волонтерски камп у Руским Керестуре тирва од 19. юлия по 2. авґуст.

Умар керестурски капелан о. Любомир Семан
29. юлий 2008. (Рутенпрес) - Вчера рано, 28. юлия, после краткей хороти у седемдзешатим року умар отец Любомир Семан, длугорочни керестурски капелан.
        о. Любомир Семан народзени у Руским Керестуре 1. януара 1938. року, як перше од троїх дзецох Амали и Янка Семана. Основну школу закончел у родним месце, а дальше священїцке школованє закончел у Заґребе.
       За священїка у целибату, пошвецени є тиж у Руским Керестуре, 6. децембра 1969. року. Службовал у Раєвим Селу, на пар заводи у Канади, и у своїм родним Руским Керестуре. За свою пожертвовну пастирску роботу, о. Семан од преосвященого владики кир Георгия Джуджара, 2. октобра 2004. року, приял унапредзенє до протоєрея хрестоносного.
        Отец Любомир Семан будзе поховани нєшка, 29. юлия, на рускокерестурским теметове.

Прилапени Предконтракт за купованє жеми од "АБЦ ФУД"
 26. юлий 2008. (Рутенпрес) - Совит Месней заєднїци Руски Керестур, вчера, 24. юлия, прилапел предложени Купопредавацки предконтракт о купованю жеми од керестурского Акционерского дружтва “АБЦ ФУД”, за будуцу индустрийну зону у Руским Керестуре.
       Спрам Предкупопредавацкого контракта, Месна заєднїца, односно держава прейґ Општини Кула, єден гектар жеми за будуцу индустрийну зону одкупи по 8 000 еври по гектаре, у динарскей проциввредносци, а на схадзки Совиту споминана и можлївосц черанки приватней за одвитуюцу державну жем.
       Вязано за цену, у Предконтракту назначене же у случаю значнєйшого порушованя тарґовищней вредносци нєрухомосцох, предложену цену за гектар жеми мож кориґовац до 10 одсто вредносци, цо будзе прецизоване зоз Купопредавацким контрактом.
       Як на вчерайшей схадзки Совиту наглашене, подписованє того Предконтракта значи перши крочай у доходзеню до индустрийенй зони, а на "АБЦ ФУД" обовязка же би ше з тей жеми, односно нєрухомосци, зняло гипотекарне обтерхованє, цо оможлїви єй щипанє на два парцели по 10 гектари, и укнїжованє у катастру нєрухомосцох.
       Як предложене у Предконтракту, знїманє гипотеки и щипанє на два часци, "АБЦ ФУД" би мала окончиц у чаше од 120 днї. После того ушлїдза дальши крочаї коло самого купованя, односно преношеня тей жеми з приватней до державней власцносци, прейґ Дирекциї за маєток Републики Сербиї, а спомнута парцела уж од скорей урбанїстично дефинована як индустрийна зона.
       Месна заєднїца, односно держава, од "АБЦ ФУД" одкупи коло 10 гектари жеми - прейґ бензинскей пумпи, односно Фабрики змарзнутей желеняви "АБЦ", на виходзе з Керестура спрам Кули, з тим же други коло 10 гектари тиж буду наменєни за индустийну зону, алє за продукцийни програми "АБЦ ФУД".
       Вязано за тото, як ше гвари у Предконктракту, купец, односно МЗ, обовязни же при комуналним опреманю индустрийней зони, "АБЦ ФУД" оможлївел потребну комуналну инфраструктуру, як цо то приходна драга, приключки за воду, струю и ґаз, комунални одводи, под истима условиями и з исту динамику як и за других будуцих власнїкох обєктох на индустрийней зони.
       Тиж так, як то догварене, купец ше обовязує же на своїх парцелох на будуцуцей индустрийней зони нє дошлєбодзи поставянє продукцийних технолоґийох котри би завадзали продукциї здравей поживи предавача тей жеми, односно технолоґийох котри нє задоволюю основни предписаня вязани за обласц еколоґиї и очуваню животного штрдку.
       З оглядом на цалосну процедуру, шицки спомнути потребни роботи буду тирвац длугши час, як оценєте, и коло пол рока. Зоз терашню предложену цену, вредносц того проєкту виноши коло 6,5 милиони динари, дзе 4 милиони опредзелєни у керестурским месним самодоприносу, а дополнююци 2,5 милиони динари би ше обезпечело зоз Општини Кула, односно держави, котра би и комунално опремела будуци простор за индустрийну зону.

У Керестуре Канцелария Аґенциї каждей стреди
 26. юлий 2008. (Рутенпрес) - Каждей стреди, у чаше од 9 до 12 годзин, у просторийох керестурскей Месней заєднїци будзе робиц окремна Канцелария Аґенциї за розвой Општини Кула.
       Канцелария Аґенциї за розвой Општини у тим чаше заинтересованих Керестурцох будзе информовац о актуалносцох вязаних за доставанє войводянских кредитох з обласци привреди и польопривреди.
       Як ше гвари у информациї Аґенциї, тераз актуални конкурси за вецейрочне кредитованє розвойних програмох у Войводини, а кредити ше будзе одобрйовац у обласци продукциї и услугох и у обласци польопривреди. У обласци продукциї и услугох, конкуровац мож за набавянє основних средствох, односно за опрему и лиценцни права, а конкуровац можу мали и штреднї подприємства з векшинским приватним капиталом и поднїмаче, шицки зоз шедзиском у Войводини и котри дїлую вецей як три роки.
       У обласци польопривреди тераз актуални два конкурси, дзе перши за набавянє польопривредней опреми и механїзациї, як и за набавку основного стада и матичного рою.
        Други конкурс ше одноши на финансованє опреманя мини-фармох, вонка з населєного места.
       На перши конкурс, право конкурованя за кредити маю мали и штреднї подприємства з векшинским приватним капиталом, поднїмаче и землєдїлски задруґи котри маю здружену власносц - шицки зоз шедзиском у Войводини и котри дїлую длужей як три роки.
       На други конкурс - за финансованє опреманя мини-фармох - право конкурованя маю и физични особи, односно шицки парасти - ношителє реґистрованого польопривредного ґаздовства.
       Можлїва одобрена вредносц кредиту виноши од 500 000 до 30 милиони динари, з тим же власна учасц найменєй 50 одсто од предрахунковей вредносци предмету кредитованя. Камата на тоти кредити виноши 2,8 одсто на рочним уровню за кредити обезпечени з ґаранцию дїловней банки, лєбо з менїцами од дїловней банки и 4,2 одсто на рочним уровню за кредити обезпечени прейґ гипотеки.
       Попри доставаня информацийох каждей стреди од 9-12 г. у просторийох керестурскей Месней заєднїци, шицки дополнююци информациї мож достац и на телефон Аґенциї за розвой кулскей Општини - (025) 729-650.

Обрахованє самодоприносу по 14,5 дин. за кґ жита
 26. юлий 2008. (Рутенпрес) - Месни самодопринос за власнїкох жеми того року будзе обраховйовани по 14,5 динари за килограм жита - одлучел Совит керестурскей Месней заєднїци, на своєй остатнєй схадзки, 24. юлия.
       До тей вредносци ше дошло на основи тогорочней цени по хторей парасти виплацовани за жито, а у Руским Керестуре вона була 15,54 динари за килограм, зоз ПДВ. Без ПДВ, єден килограм жита при виплацованю виношел 14,80 динари, так же ше Совит опредзелєл за обрахункову вредносц од 14,5 динари за килограм жита.
       Спрам Одлуки о заводзеню, власнїки жеми месни самодопринос плаца у процивредносци 28,5 килограмох жита по гольту, односно 50 кґ жита по єдним гектаре.
       Як гварене на схадзки Совиту МЗ, ришеня о наплати месного самодоприносу тераз видава и наплацує Буджет Општини Кула, а за очековац же перши ришеня за плаценє самодоприносу, власнїком жеми буду доручени у половки авґуста.

Вибрани виводзач роботох за ушоренє яркох
 26. юлий 2008. (Рутенпрес) - Подприємство "Панаква" д.о.о. зоз Новог Саду вибране за виводзача роботох на ушореню атмосферскей канализациї у вецей часцох Руского Керестура, одлучене на остатнєй схадзки Совиту Месней заєднїци, котра отримана штварток, 24. юлия.
       На основи розписаного тендера, "Панаква" вибрана пре найвигоднєйше понуканє за предвидзени роботи, дзе вредносц їх понуканя виноши 2 милиони 660 000 динари. Явну набавку за ушоренє атмосферскей канализациї, керестурска Месна заєднїца розписала на основи достатих средствох од 2 милиони динари, од Покраїнского секретарията за польопривреду.
       Як заплановане, найвекша робота будзе на ушореню яркох у Фрушкогорскей улїци - од Русинскей, коло Майсторского дому; потим у Дюри Кишюгаса, Йовґена Сивча, та на главней улїци - од Пошти ґу центру, як и опрез будинку ПУ "Бамби" и на других потребних местох у валалє.
       Предвидзене и кладзенє цивох у яркох дзе то потребне, риґолох за одвод атмосферскей води, єдна з векших роботох будзе и копанє окремного ярку медзи шмециском и заградами хижох у улїци Народного фронта, а роботи на ушореню яркох би мали започац у половки авґуста.

Фестивал преложени за тидзень
25. юлий 2008. (Рутенпрес) - Пре нєвигодну хвилю, Други “Водова фест”  у Руским Керестуре преложени за тидзень и  будзе отримани 1. и 2. авґуста на базену у Руским Керестуре. Як Рутенпрес дознава од орґанизаторох “Водова фесту” - Младежскей орґанизациї Руского Керестура “Пакт Рутенорум”, до одкладаня пришло пре диждж котри того тижня онєможлївел пририхтованє бинох, як и других роботох на базену. Як гваря орґанизаторе, и того викенду - 25. и 26. юлия (кеди мал буц отримани “Водова фест”) ше, спрам спознаньох зоз метеоролиґийних службох, тиж очекує дижджовну хвилю. 
       Наступного викенду - 1. и 2. авґуста, “Водова фест” на керестурским базену будзе отримана з исту главну и провадзацу програму як то заплановане.

Совит о предконтракту за индустрийну зону
 24. юлий 2008. (Рутенпрес) - Розпатранє купопредавацкого предконтракта зоз керестурским а.д. "АБЦ ФУД" о купованю жеми за будуцу индустрийнуи зону, будзе главна точка нєшкайшей схадзки Совиту Месней заєднїци Руски Керестур.
        Попри того, на дньовим шоре Совиту Месней заєднїци Руски Керестур нєшка, 24. юлия, будзе и вибор виводзача роботох по розписаних явних набавкох за роботи на атмосферскей канализациї.
       Тиж так, Совит Месней заєднїци би нєшка мал принєсц и одлуку о цени єдного килограма жита, пре обраховйованє и наплацованє месного самодоприносу на основи власнїцтва жеми.

Волонтерох приял предсидатель НС Руснацох
 24. юлий 2008. (Рутенпрес) - Учашнїкох другого Волонтерского кампу у Руским Керестуре, вчера, 23. юлия, у просторийох керестурского Дома култури приял предсидатель Националного совиту Руснацох Славко Орос.
       Вєдно зоз предсидательом Националного совиту, приєму присуствовал и о.д. директора Руского народного театра "Петро Ризнич Дядя" Владимир Надь Ачим.
        Приєму у Националним совиту присуствовали коло 15 од коло 30 учашнїкох тогорочного Волонтерского кампу - волонтере котри до Керестура припутовали зоз иножемства, як и з дзепоєдних местох у нашей жеми.
      Приєму присуствовали и даскельо млади керестурски волонтере, на чолє зоз лидерками и колидерками тогорочного Волонтерского кампу - Марину Гайдукову и Сандру Нярадийову зоз Керестура, Сташу Йойкич зоз Вербасу, та Сандру Ґоворчич зоз Беоґраду.
        На Волонтерским кампу у Керестуре од 19. юлия по 2. авґуст пребуваю волонтере зоз Росиї, Данскей, Французкей, ЗАД, Словениї, Польскей и Италиї, главни язик спорозумйованя им анґлийски, та так було и на приєму у НС, док ше два волонтерки з Росиї, єден волонтер зоз Польскей и єдна волонтерка зоз Словениї, представели на своїх мацеринских язикох.
      Предсидатель НС Руснацох Славко Орос младих з иножемства и з нашей жеми, упознал зоз историю, традицию, културу и образованьом Руснацох у Сербиї и швеце, Орос и Надь одвитовали на поставени питаня вязани за Руснацох, а младим подзелєни маїци и други промотивни материял з националнима ознаками Руснацох у Сербиї.
      Од самого початку тогорочного Волонтерского кампу, заплановани роботи на ушореню базена претаргнул диждж, так же волонтрере маю вецей шлєбодного часу за обиходзенє Керестура и рижни плановани роботнї у нукашнїм просторе.

Того виокенду - Други "Водова фест"
23. Юлий 2008. (Рутенпрес) - Дзешец рок-ґрупи, мото-байкере, кампованє, ладя, штанди - нагадую добру забаву и розвагу на керестурским базену през два днї викенду пред нами на “Водова фесту” - 25. и 26. юлия у Руским Керестуре. "Водова фест” орґанизує керестурскей младежскей орґанизациї “Пакт Рутенорум”, а на керестурским базену за тоту нагоду предвидзене поставянє аж трох бинох за учашнїкох. Першого дня Фестивала, на пияток, 25. юлия, у главней програми "Водова фесту" наступя два ґрупи - "Квин трибют бенд" зоз Беоґраду и "Перпетум мобиле" зоз Суботици, док як предґрупи буду участвовац "Дзвери раю" зоз Дюрдьова, "Иґнис" зоз Нового Саду и "Дарк темптейшн" зоз Червинки.
        Другого дня Фестивала, на соботу, 26. юлия, на главней сцени на керестурским базену наступя познати бенди - "Ортодокс Келтс" (Нови Сад-Беоґрад) и "Зайон кру" зоз Зомбора.
      Як предґрупи, того дня ше представя три рускокерестурски бенди - "Брейнлов", "Крейзи казанс” и “Парадокс”. Заплановане же на базену на пияток и соботу цали час буду даяки збуваня, а главна програма на трох бинох - "Главней бини", "Водова електро" и "Реґе бини" починаю од 19 годзин, з наступом предґрупох.
        Наступ главних ґрупох заплановани од 22 годзин, та до двох по пол ноци. Пред и после програми - публику буду забавяц ди-джейове. По беґелю, зоз преводнїци на новосадскей Клиси, по керестурски базен припутує и єдна ладя зоз нащивиталями Фестивала, на котрей, пред и по програми, буду орґанизовани журки, як гваря орґанизаторе - до рана.
       Ладя привеже нащивительох зоз рижних местох, котри за "Водова фест" дознали и на нєдавно законченим "Еґзиту", а у Керестуре будзе пребувац од початку по конєц Фестивала. Под час тей манифестациї младих, на базену предвидзене и кампованє, а єдна з главних провадзацих програмох будзе стретнуце мото-байкерох.
       Под час програми "Водова фесту", свойо програми роботи на окремних штандох представя младежски часопис "МАК", нєвладова орґанизация "ЯЗАС", Младеж кулскей општини "ОКО", Младежска орґанизация Керестура "Пакт рутенорум", як и позната керестурска ґрупа навиячох "Русина" - "Дзиви швинї".  Обезпечени штанди погосительних обєктох за ошвиженє и окрипенє под час отримованя "Водова фесту".

Дефиле мото-байкерох
 23. юлий 2008. (Рутенпрес) - Под час отримованя тогорочного "Водова фесту", на соботу, 26. юлия, мото-байкерох отримаю дефиле през валал, котри почнє на 14,30 годзин.
        После дефилеа, байкере у центре Керестура, од 16 годзин, отримаю и свою окремну програму, дзе буду представени їх рижни акробациї на моторкох. На соботу, 26. юлия, пре дефиле моторкашох и акробациї, транспорт по главней драги коло єдну годзину будзе заварти од ґимназиї по церкву.

Спонзоре
 23. юлий 2008. (Рутенпрес) - Зоз вецей проєктами за наступни "Водова фест" и за свойо програми, "Пакт Рутенорум" конкуровал на рижни адреси, так же финансийна потримовка лєбо уж достата, лєбо обецана од Општини Кула, Националного совиту Руснацох, Месней заєднїци Руски Керестур, Еколоґийного фонду Општини Кула.
      Тиж так, потримовка достата и од двох покраїнских секретариятох - за Спорт и младеж и за Управу, предписаня и национални меншини, а орґанизаторе очекую и финансийну потримовку од Републичного Министерства за младеж и спорт. Ґенерални спонзор "Водова фесту" то Компания "Фриком" зоз Беоґраду, а приятелє Компания "Родич", та керестурски "Електромонтажа", "Юарбис" и "Изґлед".
       Млади окреме наглашую и дзекую на материялней помоци скоро шицких рускокерестурских подриємствох и рижних роботньох, приватнїкох, котри им помогли, у рамикох своїх можлївосцох.

Рекордне число учашнїкох Ноцного турнира
 23. юлий 2008. (Рутенпрес) - На тогорочним популарним Ноцним турниру у малим фодбалє, котри прешлого тижня започал у Руским Керестуре у орґанизациої СД "Русин", участвую аж 24 екипи, цо до тераз рекордне число, та ше дньово бави по 4 змаганя.
        Змаганя ше бави на рукометним стадионє у Старей школи, а починаю од 19,30 г., з наступом младших пионирох.
       У змаганю младших пионирох участвую штири екипи - "Холстен", "Лионс", "Бомбардере” зоз Керестура и “Искра 2" зоз Коцура.
        Од 20,15 годзин бавя пионире, дзе ше змагаю пейц екипи, зоз Керестура, Кули и Коцура - "Старс", "Найки", "Гайдук", "Искра 1" и "Реаxем".
        У конкуренциї сениорох наступаю 14 екипи подзелєни до двох ґрупох, а змаганя старших починаю од 21 и од 22 годзин. Попри екипох зоз Керестура, на тогорочним турниру ше змагаю и фодбалере з вецей местох кулскей општини, а од 21 годзин бавя КДО "Демократи", Тапетария "Тина", "Хитро са стилом", "Клад Фикс-югобет", Младеж "Язас-у", "Червени маїци" и Друкарня "Борец".
       У другей ґрупи сениорох, котри ше змагаю од 22 годзин, бавя екипи "Сплав Вериґе", "Там Фунзи", Тапетария "Мая", "Зеленґора", Тапетария "Еуро", "Креативо 17" и "Фру бойси".
         У ґрупох ше бави кажде з каждим, так през 21 дзень, а змаганя орґанизовани кажди дзень крем соботи.
        Наступного викенду, пре отримованє "Водова фесту" змаганя нє будзе, а и того року под час змаганьох орґанизована томбола за патрачох, котру обезпечую рижни спонзоре.

Атлетичаре на Купу Войводини
 23. юлий 2008. (Рутенпрес) - Штири атлетичарки и штирме атлетичаре керестурского "Русина", участвовали на Купу Войводини за пионирох, котри 13. юлия отримани у Новим Садзе, дзе посцигли замерковани резултати.
        У поєдинєчней конкуренциї у скаканю до висока, Марґита Хома завжала друге место зоз прескоченима 140 см. Валентина Барна була друга у обегованю на 300 метери, а у конкуренциї пиониркох участавовали и Долореас Ґовля у обегованю на 100 и 300 метери, та Кристина Шепински, котра ше обеговала на 600 метери.
        У конкуренциї пионирох, Борис Барна зоз скоком до далєка од 5,68 метери завжал друге место, а исти пласман освоєл и у обегованю на 100 метери, котри пребегнул за 12 секунди.
       Зоран Колошняї у обегованю на 800 метери, з резултатом од 2,20 минути, освоєл друге место, Желько Кршич у скаканю до висока освоєл треце место зоз прескоченима 160 см, а у обегованю на 800 метери участвовал и Дамир Хома.
        У екипней конкуренциї, атлетичаре керестурского Русина, у конкуренциї хлапцох, завжали 5. место од 12 клубох зоз Войводини.

"Русин” пред початком новей сезони
 23. юлий 2008. (Рутенпрес) - Пондзелок, 21. юлия, у Зомборе отримана схадзка Подручней лиґи Зомбор, на котрей принєшена одлука о екипох- учашнїкох и початку новей фодбалскей сезони.
        Нове першенство у Подручней лиґи Зомбор почина 16. и 17. авґуста, буду ше змагац 16 екипи, кельо було и влонї, алє спрам оцени спортских фаховцох, тогорочна лиґа будзе квалитативно моцнєйша.
        У новей сезони, у Подручней лиґи Зомбор ше буду змагац пейц екипи котри пришли зоз Войводянскей лиґи - "Полєт" зоз Сивцу, "Кордун" зоз "Кляїчева", "Младосц" зоз Крущичу, "Єдинство" зоз Вельких Салашох и "Раднички" зоз Раткова.
        Надалєй, Лиґу творя "Борец" з Бачкого Ґрачцу, ЖАК зоз Зомбора, ПИК "Приґревица" з истоменого места, "Кула" зоз Кули, керестурски "Русин", "Омладинєц" з Буковцу, БСК з Бачкого Брестовцу, "Гранїчар" з Ридїци, "Липар" з Липару, "Задруґар" зоз Сербского Милетичу и "Єдинство" з Колуту.
        По пейц фодбалски екипи єст зоз кулскей и зомборскей оштини, штири зоз оджацкей и два екипи зоз апатинскей општини. У прешлей сезони, фодбалере керестурского Русина завжали одличне 6. место, а на Русиновим вечару, котри отримани прешлей соботи, 19. юлия, за найлєпшого бавяча ФК "Русин" у прешлей сезони преглашени капитен екипи Денис Югик.

Осмеро зоз иножемства
 22. юлий 2008. (Рутенпрес) - Пондзелок рано, 21. юлия, у Руским Керестуре, почали роботи на тогорочним Волонтерским кампу младих, котри до Керестура сцигли всоботу, 19. юлия, а Камп тирва по 2. авґуст.
        На Волонтеррским кампу участвую вєдно коло 30 млади, а зоз иножемства сцигли осмеро млади воло-нтере од 20 до 34 рокох - зоз Французкей, Росиї, зоз Данскей, Словениї, Италиї и зоз Польскей, єден омладинєц аж зоз Америки, зоз Калифорниї. Интересантне же после пребуваня у родзини у Нємецкей, волонтера зоз Америки до Руского Керестура на авту привезли його родичи, котри цали час тирваня Кампу буду пребувац у Кули.
       Попри госцох зоз иножемства, учашнїки Кампу и млади зоз Беоґраду, Нового Саду и самого Руского Керестура. Млади волонтере предлужа прешлого року започати роботи на ушореню керестурского базену, волонтере змесцени у интернату школи Петро Кузмяк, а од Керестурцох достали и бициґли за одход на роботу под час тирваня Кампу.
        Попри роботох на ушореню базена, заплановани и вецей роботнї, як цо то фолклорна, та етно-роботня, нащива вецей институцийом у Керестуре, под час тирваня Кампу, волонтере з нашей жеми и иножемства нащивя Фабрику сокох "Сторк" у Кули, а єден дзень будзе орґанизовани и вилєт до Нового Саду.
        Вшелїяк, учашнїки Волонтерского кампу буду и госци на тогорочней манифестациї младих - "Водова фест", котри на керестурским базену будзе отримани у дньох викенду пред нами - 25. и 26. юлия.
        Тиж так, заплановане же при концу Кампа, медзинародна нєвладова орґанизация за юговосточну Европу "Сава", у Керестуре орґанизує роботню на тему мира, толеранциї и интеркултуралного диялоґу, у рамикох такв. "Драги мира", котра того року руша з Македониї.
        Волонтерски камп ше финансує зоз средствох Министерство за спорт и младеж Републики Сербиї, одкаль за тоту намену опредзелєни 90 000 динари, Младежска орґанизация "Пакт Рутенорум" од спонзорох обезпечела коло 50 000 динари, а керестурска Месна заєднїца обезпечує нєобходни материял и алат за роботу под час Волонтерского кампу.

Почал преробок сладкей кукурици
22. юлий 2008. (Рутенпрес) - У Фабрики змарзнутей желєняви Компаниї АБЦ фуд у Руским Керестуре прешлого штвартку почал преробок сладкей кукурици хтори будзе тирвац 3 мешаци.
        Мария Штайнфелд, ґенерална директорка Компаниї АБЦ фуд гвари же сладку кукурицу треба преробиц зоз 1.600 гектарох кельо за потреби Фабрики зашате у порядней и посцерняковей шатви.
       - Обчекуєме продукцию коло 7.000 тони готового продукту цо барз амбицийни план, и значно векши у одношеню на прешли рок, алє и найвекши кед слово о других продуковательох у окруженю. Перши количества указую же сладка кукурица одличного квалитету цо зме и обчековали, а и урожаї обецую – гвари Штайнфелдова.
        Сладку кукурицу ше будзе прерабяц и змарзовац у зарну и у чутки, а паралелно ше будзе прерабяц и паприґу и мархву понеже то прешлорочни инвестициї до преширйованя капацитетох оможлївюю. Прешлого року Компания АБЦ фуд до вибудови новей хладзальнї и преширеня капацитетох инвестовала коло 7 милиони еври.

Пред ришеньом за индустрийну зону
 19. юлий 2008. (Рутенпрес) - Представителє керестурского Акционерского дружтва "АБЦ ФУД" и керестурскей Месней заєднїци, штварток, 17. юлия, зоз предсидательом Општини Кула Светозаром Буквичом, догварели дальши крочаї коло подписованя контракту за купованє, односно предаванє жеми за будуцу индустрийну зону у Руским Керестуре.
       Як Рутенпрес дознава од секретара МЗ Руски Керестур, зоз "АБЦ ФУД" догварени условия и цена за купованє 10 гектарох жеми од того подприємства, з тим же би 10 гектари, на истим просторе - прейґ бензинскей пумпи на виходзе з Керестура спрам Кули, тиж були наменєни за индустийну зону, алє за продукцийни програми “АБЦ ФУД”.
        Спрам догваркох у предисдателя Општини Кула, обовязка а.д. "АБЦ ФУД" же би ше з тей жеми, односно нєрухомосци, зняло гипотекарне обтерхованє, же би ше потим окончело щипанє тей жеми на два парцели по 10 гектари, пре укнїжованє. О шицких крочайох коло купованя жеми за индустрийну зону од "АБЦ ФУД", вчера розправял перше Вивершни одбор Совиту Месней заєднїци, а идуцого тижня, конєчни одлуки о тим би мали буц принєшени и на самим Совиту МЗ.
        Аж после того, Општина Кула, односно єй предсидатель, та керестурска Месна заєднїца, зоз а.д. "АБЦ ФУД" подпишу контракт о купованю жеми за индустрийну зону.
       У медзичаше, кулска Општина, вєдно зоз Дирекцию за маєток Републики Сербиї, окончи преношенє структури власносци над жему - зоз приватного до державного власнїцтва.
        Средства за тоту намену опредзелєни у месним самодоприносу, а як гвари Надь, кед придзе до витвореня нєдавна наява подпредсидателя новей Влади РС и министра економиї Младяна Динкича, же держава поможе при купованю жеми за индустрийни зони, будзе вихаснована и тота можлївосц.

Нєшка сход учашнїкох, на пондзелок початок роботи
19. юлий 2008. (Рутенпрес) - Нєшка, соботу, 19. юлия, зоз приходзеньом до Керестура и змесцованьом учашнїкох до интернату керестурскей Школи "Петро Кузмяк", у Руским Керестуре започина Други волонтерски камп младих, котри будзе тирвац по 2. авґуст.
        На ютре, нєдзелю, 20. юлия, учашнїки Волонтерского кампу нащивя Водицу, односно Богослуженє котре того дня будзе отримане з нагоди християнского швета Илиї пророка, а там за нїх источасно будзе орґанизовани и полудзенок першенствено з єдлами з нашей рускей кухнї. Зоз конкретнима роботами на ушореню керестурского базену, волонтере почню на пондзелок, 21. юлия.
        Як Рутенпрес дознава од секретара керестурскей МЗ Йоакима Надя, волонтере предлужа прешлого року започати роботи на ушореню простору коло базену, як цо то розкерчованє и чисценє лєшика, оправянє дражкох, преширйованє места за паркинґ, кладзенє лавочкох и подобне. Файти и численосц роботох буду завишиц од структури и числа учашнїкох младих волонтерох, як и од динамики самих роботох, гвари Надь.
       Як Рутенпрес дознава од лидерки и колидерки Кампу - Марини Гайдуковей и Сандри Нярадийовей - на керестурским Волонтерским кампу того року буду участвовац коло 30 млади з нашей жеми и иножемства. Зоз иножемства, до Руского Керестура приходза два млади особи зоз Французкей, два зоз Росиї, та по єдна зоз Данскей, Словениї, Италиї и Польскей, єден омладинєц зоз Америки, вецей млади з местох у Сербиї, а волонтирац буду и сами Керестурци.
       Попри роботох на ушореню базена, заплановани и вецей роботнї, як цо то фолклорна, та етно-роботня, дзе ше будзе вишивац и правиц бабки зоз кукуричанки; запланована нащива вецей институцийом у Керестуре; опатранє валала на кочох у сотруднїцтве зоз Конїцким клубом, нащива рибалову и лапанє рибох...
      Под час тирваня Кампу, волонтере з нашей жеми и иножемства нащивя Фабрику сокох "Сторк" у Кули, а єден дзень будзе орґанизовани и вилєт до Нового Саду. Вшелїяк, учашнїки Волонтерского кампу буду и госци на тогорочней манифестациї младих - "Водовафест", котри праве на керестурским базену будзе отримани наступного викенду - 25. и 26. юлия.
     Концом юлия, лєбо початком авґуста, медзинародна нєвладова орґанизация "Сава" (за юговосточну Европу) у Руским Керестуре под час Кампу орґанизує роботню на тему мира, толеранциї и интеркултуралного диялоґу, у рамикох такв. "Драги мира", котра того року руша з Македониї.
       Волонтерски камп ше финансує зоз средствох Министерство за спорт и младеж Републики Сербиї, одкаль за тоту намену опредзелєни 90 000 динари, Младежска орґанизация "Пакт Рутенорум" од спонзорох обезпечела коло 50 000 динари, а керестурска Месна заєднїца обезпечи нєобходни материял и алат за роботу под час Волонтерского кампу.

Ровнанє дильовох и роботи коло каплїчки
19. юлий 2008. (Рутенпрес) - После кратшей павзи у роботи, предлужене ровнанє дильовох у керестурским хотаре, а тоту роботу вредну милион динари, окончує ЗЗ “Зарно” зоз Коцура. Як заплановане, початком идуцого тижня почню и роботи на поставяню огради коло каплїчки на керестурским теметове.
       За тоту намену керестурска Месна заєднїца, на основи конкурса, од Покраїнского секретарията за локалну самоуправу и медзиопштинске сотруднїцтво ище скорей достала 1,4 милиони динари. На основи тендера, роботи на ушореню простору коло каплїчки зверени БП "Поп ґрадня" зоз Темерину.

Скупштина акционерох Друкарнї
 16. юлий 2008. (Рутенпрес) - Керестурска друкарня "Руске слово", векшинского власнїка Звонимира Хому, прешли дїловни рок закончела зоз позитивним салдом, котри виноши коло 100 000 динари - винєшене на Скупштини акционерох Друкарнї.
       На порядней Рочней скупштини акционерох Друкарнї, котра отримана всоботу, 12. юлия, винєшене же Друкарня у прешлим дїловним року нє була обтерхована зоз кредитами, а докупена и єдна часц машинох пре посцигованє векшей конкурентносци на тарґовищу.
      Друкарня "Руске слово" тераз ма 12 занятих роботнїкох, а як винєшене на Скупштини, пре рационализованє трошкох, того року преградзена велька продукцийна сала и єдна єй часц простору видата под закуп.

 

Уж коло 25 приявених за Волонтерски камп у Руским Керестуре
15. юлий 2008. (Рутенпрес) – На соботу 19. юлия у Руски Керестуре почина Волонтерски камп котри по други раз будзе домашнї младим з рижних крайох швета и нашей жеми. Як заплановане, учашнїки тогорочного Кампа предлужа роботи на ушореню керестурского базена, почати прешлого року на истим Кампу.Тиж предвидзени и вецей рижни провадзаци змисти, односно роботнї, дзе ше млади упознаю и з историю и традицию Руснацох.
        Як Рутенпрес дознава од лидерох и колидерох Кампу, до конца прешлого тижня за учасц на керестурским Волонтерским кампу уж були приявени дзешецеро млади зоз иножемства, кельо Камп и приїма. Приявели ше два млади особи зоз Французкей, два зоз Росиї, та по єдна зоз Данскей, Словениї, Италиї и Польскей, аж и єден омладинєц зоз Америки.
       До початку того тижня, за волонтерску роботу ше приявели и вецей Керестурци, так же уж єст коло 25 приявених волонтерох.
        Лидерки Кампу очекую и прияви младих з нашей жеми, же би тогорочни Волонтерски камп мал коло 30 учашнїкох. Єдна з вельких новосцох Волонтерского кампу же концом юлия, як госци, медзинародна нєвладова орґанизация "Сава", за юговосточну Европу, у Руским Керестуре под час Кампу орґанизує роботню на тему мира, толеранциї и интеркултуралного диялоґу, у рамикох такв. "Драги мира”, котра того року руша з Македониї.
        Лидерка тогорочного Кампу будзе млада Марина Гайдуковей зоз Руского Керестура, попри нєй, лидерка Кампу и Сташа Йойкич зоз Вербасу, док колидерки, прешлорочни руководителє Кампу - Сандра Няради и Сандра Ґоворчич.

Почало поставянє конструкциї закрица
15. юлий 2008. (Рутенпрес) - Пондзелок, 14. юлия, почало поставянє металней конструкциї будуцого закрица над бину рускокерестурского Дома култури.
       Поверхносц котра будзе поробена у першей фази роботи на реконструкциї закрица виноши коло 260 квадратни метери а вредносц терашнїх роботох виноши три милиони 157 186 динари и вони обезпечени у цалосци.
      Найвекша часц средствох обеспечена зоз буджету Скупштини АП Войводини, 2 милиони 590 000 динари. Интересантне же тот пенєж обезпечени дзекуюци и младому Керестурцови Янкови Мудрийови, котри за технїчне опрявянє керестурского Дома култури, початком рока участвовал и танцовал у популарней емисиї на ТВ "Пинк" - "З танцом до снох". При концу того серияла, явно, прейґ ТВ "Пинк", предсидатель Вивершней ради Войводини др Боян Пайтич Янкови Мудрийови, односно Дому култури, обецал средства за тоту намену.
       Остаток потребного пенєжу за реконструкцию закрица над бину обезпечени зоз буджету Скупштини општини Кула. Як предвидзене, нове закрице над бину Дома култури будзе поставене за коло 30 роботни днї.

Упис до керестурскей Ґимназиї
 15. юлий 2008. (Рутенпрес) - После другого уписного термину до штреднєй школи, до керестурскей Ґимназиї общого напряму уписани вєдно штерацец школяре.
        До оддзелєня Ґимназиї з руским наставним язиком уписани дзешецеро, а до оддзелєня зоз сербским наставним язиком трицецеро школяре.
        Спомедзи уписаних школярох до руского оддзелєня - дзевецеро зоз Руского Керестура и єден школяр зоз Вербасу, док до оддзелєня зоз сербским наставним язиком уписани школяре зоз Вербасу, Коцура, Кули, Крущичу, Липару, Сивцу, Червинки, Дюрдьова и зоз Нового Саду.
        Спрам словох директора керестурскей ОШиҐ "Петро Кузмяк" Янка Хому, векшина будуцих керестурских ґимназиялцох уписана зоз високу штредню оцену з основней школи, так же коло 30 школяром, праве керестурска Ґимназия була и перша школа на лїстини жаданьох при упису.

Волонтером треба бициґли
 15. юлий 2008. (Рутенпрес) - Орґанизаторе и лидере Волонтерского кампу, котри у Руским Керестуре будзе тирвац од 19. юлия по 2. авґуст, замодлєли Керестурцох же би учашнїком Кампу помогли коло обезпечованя старших бициґлох, котри би вец хасновали за одход на каждодньову роботу.
      З оглядом на прешлорочне искуство, кед ше вельо часу трацело у одходу на роботу пешо, лидере Волонтерского кампу модля Керестурцох же, кед маю, най волонтером пожича старши бициґли, котри буду хасновац под час тирваня Кампу, а после того им буду врацени.
      О тей пожички бициґлох за потреби Волонтерского кампу, шицки информациї мож достац и доручиц лидерки Кампу Марини Гайдуковей, на телефон 064 29 42 353.

Почал Ноцни турнир
 15. юлий 2008. (Рутенпрес) - Вчера, 14. юлия, у Руским Керестуре започал традийни, популарни Ноцни турнир у малим фодбалє, у орґанизациї Спортского дружтва “Русин”. Ноцни турнир у малим фодбалє орґанизовани за сениорох, пионирох и мадших пионирох, а приявени 14 сениорски екипи - зоз Керестура, Кули, Крущичу и Червинки, як и вєдно 9 пионирски екипи, зоз Керестура, Кули и Коцура.
        Уплата по екипи за сениорох виношела 5 000 динари, за пионирох и младших пионирох по 2 000 динари, док наградни фонд за побиднїкох турнира у трох катеґорийох виноши - 40 одсто од уплати за сениорох, 30 одсто од уплати за пионирох и 20 одсто од уплати за младших пионирох.
        Як гваря орґанизаторе, Турнир будзе тирвац можебуц и мешац, перше ше будзе бавиц по ґрупох, потим по куп-системи, а як и до тераз, шицки змаганя ше бави на рукометним стадионє у Старей школи.
        Змаганя за младших поионирох починаю од 19,30 г., а од 20 и 15 за старших пионирох. Кажди дзень, крем нєдзелї, буду одбавени по два змаганя сениорох - од 21 и од 22 годзин, з тим же аж шлїдуюцого викенду, пре "Водова фест", змаганя на Турниру нє будзе.
      Як и скорейших рокох, и на тогорочним Турниру будзе орґанизована томбола за публику, котру обезпечели керестурски подприємства, так же кажди дзень на полчаше другого змаганя сенирох, буду вицаговани доботнїки рижних наградох.
         Уходнїци за Ноцни турнир виноша 20 динари за дзеци и 50 динари за старших. 

Славко Орос: з винчованку на успихох и обовязка дальшей потримовки
 12. юлий 2008. (Рутенпрес) - З нагоди найновших позарядових успихох наших младих спортистох на шветових юниорских першенствох - освоєного другого места у плїваню Ивана Лендєра, та бронзовей медалї Михаела Дудаша у дзешетобою, у атлетики, алє и нєдавно ознова освоєней титули шампионки швета Илони Геки Зарубица у боди-билдинґу и златней медалї Давида Папа на Державним першенству у весланю, предсидатель Националного совиту Руснацох їм прейґ средствох информованя упутел винчованки:
        - Попри найщирших винчованкох Лендєрови, Дудашови и Зарубицовей на посцигнутих окремних успихох у своїх спортох и дисциплинох, з пиху констатуєме же шицки тройо початком того рока достали и окремни припознаня Националного совиту Руснацох за свойо позарядово успихи у 2007. року у спорту, алє и за афирмованє нашей рускей заєднїци.
        - Национални совит Руснацох бул єдна з ридких институцийох хтора и материялно допомогла у їх роботи - гоч скромно и у рамикох своїх можлївосцох.
       - Очиглядне же нашо спортисти на найкрасши можлїви способ и у тим року предлужую посцигованє вершинских резултатох у своїх дисциплинох и то нам наклада обовязку и надалєй их потримовац - морално и материялно - як и шицких других талантованих людзох у рижних обласцох нашого живота - гварел у винчованки спортистом Руснацом предсидатель Националного совиту рускей националней заєднїци у Сербиї Славко Орос.

Нєшка Скупштина Друкарнї "Руске слово"
 12. юлий 2008. (Рутенпрес) - Нєшка, 12. юлия, у Руским Керестуре будзе отримана Рочна скупштина акционерох Друкарнї "Руске слово", котрей векшински власнїк керестурски привреднїк Звонимир Хома. Порядна Рочна скупштина акционерох будзе отримана у просторийох Друкарнї, зоз початком на 18 годзин, а на дньовим шоре будзе звит о роботи, як и звит о финансийним дїлованю за прешли, 2007. рок.

Прияви за Ноцни турнир до нєдзелї
 12. юлий 2008. (Рутенпрес) - Приявйованє екипох за участвованє на тогорочним Ноцним турниру у малим фодбалє, тирва по ютре - нєдзелю, 13. юлий, до 21 годзини. За участвованє на Ноцним турниру у малим фодбалє прявиц ше мож дополадня при Борисови Шайтошови, а вечар у просторийох СД "Русин", а до вчера пополадню ше приявели коло 20 екипи у трох возростох, як зоз Керестура, так и зоз околних местох.
        Ноцни турнир у малим фодбалє у Руским Керестуре почнє на пондзелок, 14. юлия, а на Турнир ше можу приявиц екипи сениорох, пионирох и мадших пионирох.
        Уплата по екипи за сениорох виноши 5 000 динари, а за пионирох и младших пионирох - по 2 000 динари.
        Наградни фонд за побиднїкох турнира у трох катеґорийох виноши - 40 одсто од уплати за сениорох, 30 одсто од уплати за пионирох и 20 одсто од уплати за младших пионирох.
        И того року орґанизатор традийного и популарного Ноцного турнира у малим фодбалє - Рускокерестурске Спортске дружтво "Русин".

Почало ше реконструкцию закрица Дома култури
 11. юлий 2008. (Рутенпрес) - Такой после законечня "Червеней ружи", у рускокерестурским Доме култури 9. юлия почали роботи на цалосним оправяню закрица над бину Дома култури. Роботи на закрицу перша фаза реконструкциї Дома култури, а поверхносц котра з тей нагоди будзе поробена виноши коло 260 квадратни метери.
      Вредносц роботи виноши три милиони 157 186 динари а интересантне же средства за тоти роботи обезпечени у стоодстотним виносу. Зоз буджету Скупштини АП Войводини, за реконструкцию закрица над бину керестурского Дома култури уплацени 2 милиони 590 000 динари.
        Средства зоз Покраїни обезпечени дзекуюци и младому Керестурцови Янкови Мудрийови, котри за технїчне опрявянє керестурского Дома култури, початком рока участвовал у популарней емисиї на ТВ "Пинк" - "З танцом до снох", а при концу того серияла, явно, прейґ ТВ "Пинк", предсидатель ВР АПВ Боян Пайтич обецал тот пенєж за тоту намену.
       Остаток потребного пенєжу за реконструкцию закрица над бину обезпечени зоз буджету Скупштини општини Кула. Роботи на реконструкциї закрица окончує кулска "Услуґа", и заплановане же нове закрице над бину керестурского Дома култури будзе поставене за коло 30 роботни днї.

И того року Волонтерски камп
 11. юлий 2008. (Рутенпрес) - Волонтерски камп у Руским Керестуре того року будзе тирвац од 19. юлия, по 2. авґуст, дзе буду предлужени роботи на ушореню керестурского базена, започати прешлого року на истим Кампу.
       Як Рутенпрес дознава од лидерох и колидерох Кампу, до вчера за учасц на керестурским Волонтерским кампу уж були приявени дзешецеро млади зоз иножемства. Приявели ше два млади особи зоз Французкей, два зоз Росиї, та по єдна зоз Данскей, Словениї, Италиї и Польскей, аж и єден омладинєц зоз Америки, а очекує ше прияви и младих зоз нашей жеми, же би було коло 30 учашнїкох тогорочного Кампу.
        Под час отримованя Волонтерского кампу буду робиц и вецей интересантни роботнї, а млади нащивя и интересантносци Руского Керестура. Єдна з вельких новосцох тогорочного Волонтерского кампу же концом юлия, як госци, медзинародна нєвладова орґанизация "Сава", за юговосточну Европу, у Руским Керестуре под час Кампу орґанизує роботню на тему мира, толеранциї и интеркултуралного диялоґу, у рамикох такв. “Драги мира”, котра того року руша з Македониї.
       Заинтересовани за учасц на Волонтерским кампу можу ше приявиц єдней з лидерки Кампу - Марини Гайдуковей зоз Руского Керестура, на тел. 064 29 42 353, лєбо на мейл-адресу volonteri@vodovafest.org .
       Попри Гайдуковей, лидерка Кампу будзе и Сташа Йойкич зоз Вербасу, а колидерки - Сандра Няради и Сандра Ґоворчич. Орґанизаторе и лидере Волонтерского кампу замодлєли Керестурцох же би учашнїком Кампу помогли коло обезпечованя старших бициґлох, котри би вец хасновали за одход на каждодньову роботу а после того им буду врацени.
       И о тей пожички бициґлох за потреби Волонтерского кампу, шицки информациї мож достац и доручиц лидерки Кампу Марини Гайдуковей, на горе спомнути телефон.

У цеку виплацованє за жито
 10. юлий 2008. (Рутенпрес) - И вчера, 9. юлия, керестурске подприємство "Юарбис" предлужело виплацованє за тогорочни род придатого жита. Воно ше виплацує по 15,54 динари за килограм, вєдно зоз ПДВ, спрам цени яка достата зоз кулскей “Житобачки” котра одкупює жито.
        Значне надпомнуц же керестурски "Юарбис" жито виплацує без одбиткох, такволано "тел-кел".Того року, "Юарбис" од кооперантох одкупел коло 250 ваґони жита, а на своїх парцелох накошене коло 50 ваґони жита.
        Як Рутенпрес дознава у "Юарбису", кооперанти хтори жито думаю предац до того подприємства, а жито зохабя пре чеканє вигоднєйшей цени - лаґерованє будзе задармо. Кооперанти ше за тераз подєднак опредзелюю - як за плаценє, так и за лаґерованє, а спрам вчерайшей вияви власнїка “Юарбису”, Славка Раца, його совит же би ше жито лаґеровало.
       Спрам його словох, цена жита у Сербиї будзе 18 динари за килограм, алє аж даґдзе о два-три мешаци, та совитує же би, хто може, нє понаглял зоз браньом пенєжу за жито. Як гваря у "Юарбису", хто тераз будзе виплацени за жито, по цени од 15,54 динари, нє ма право на доплацованє у случаю векшей цени, лєм тоти котри жито охабя на лаґеру, односно, котри чекаю векшу цену жита.

Виплацованє за жито у ЗЗ “Польопривреда”
 10. юлий 2008. (Рутенпрес) - У  керестурскей ЗЗ “Польопривреда АБЦ ФУД”, найвироятнєйше нєшка, 10. юлия, почнє виплацованє за тогорочне жито. Информациї о початку виплацованя за жито, як и о дальших потребних крочайох вязаних за тото, буду виложени на огласним месце у централним будинку “АБЦ ФУД”, на Новим шоре.
        Як дознава Рутенпрес, жито будзе виплацоване по цени яку дала кулска “Житобачка” - 15,54 динари за килограм, зоз одбитакми од 2,2 одсто на нєчистоту. Як гваря у ЗЗ “Польопривреда”, виплацованє до тераз нє почало пре вельке количество придатого жита, понеже сама Задруґа прияла прейґ 350 ваґони, а тиж и  кооперанти ЗЗ “Дукат”, дзе  придате 50 ваґони жита.
       И у ЗЗ “Польопривреда” ше годно вияшнїц о виплацованю - за доставанє пенєжу такой, лєбо за лаґерованє жита и чеканє вигоднєйшей цени. Лаґерованє жита у силосох кулскей “Житобачки”, дзе змесцене жито кооперантох ЗЗ “Польопривреда” и ЗЗ “Дуакат”, будзе задармо, кед ше го преда до “Житобачки”.

До керестурскей Ґимназиї уписани штерацец школяре
 9. юлий 2008. (Рутенпрес) - У першим уписним термину до штреднєй школи, пондзелок, 7. юлия, до Ґимназиї общого напряму рускокерестурскей Школи “Петро Кузмяк” уписани вєдно штерацец школяре.
       До оддзелєня Ґимназиї з руским наставним язиком уписани дзешецеро, а до оддзелєньох зоз себским наставним язиком трицецеро школяре.
       Медзи школярами котри ше уписали до руского оддзелєня - дзевецеро зоз Руского Керестура и єден школяр зоз Вербасу, док до оддзелєньох зоз сербским наставним язиком уписани школяре зоз Вербасу, Коцура, Кули, Крущичу, Липару, Сивцу, Червинки, Дюрдьова и зоз Нового Саду. Спрам словох директора керестурскей ОШиҐ "Петро Кузмяк" Янка Хому, векшина будуцих керестурских ґимназиялцох уписана зоз високу штредню оцену з основней школи, так же коло 30 школяром, праве керестурска Ґимназия була и перша жадана школа на лїстини жаданьох при упису.
        Други уписни термин за упис до штреднїх школох будзе на пияток, 11. юлия, та мож очековац же число уписаних будзе и векше, а спрам словох директора Хому, ище вше постої можлївосц же од єшенї заш лєм будзе робиц нови образовни профил - туристични технїчар.

Прияви за Ноцни турнир у малим фодбалє
 9. юлий 2008. (Рутенпрес) - Керестурске Спортске дружтво "Русин" и того року будзе орґанизатор традицийного Ноцного турнира у малим фодбалє. Як плановане, Ноцни турнир у малим фодбалє у Руским Керестуре почнє 14. юлия, а приявйованє екипох тирва по нєдзелю, 13. юлий, до 21 годзини.
        На турнир ше можу приявиц екипи сениророх, пионирох и младших пионирох. Уплата по екипи за сениорох виноши 5 000 динари, за пионирох и младших пионирох - по 2 000 динари.
        Наградни фонд за побиднїкох турнира у трох катеґорийох виноши - 40 одсто од уплати за сениорох, 30 одсто од уплати за пионирох и 20 одсто од уплати за младших пионирох.
        За участвованє на тогорочним Ноцним турниру у малим фодбалє приявиц ше мож кажди дзень до поладня при Борисови Шайтошови, а вечар у просторийох СД "Русин"

Шпиванка "Шипшина, тарчина" - побиднїцка
8. юлий 2008. (Рутенпрес) - Композиция Юлияна Бучка, на текст Агнети Папгаргаї и у аранжману Бранислава Тубича - "Шипшина, тарчина" - достала першу награду фахового жирия у змаганю за найлєпшу нову шпиванку компоновану у народним духу, на тогорочним Фестивалє рускей култури “Червена ружа”, а шпивал ю дует Ана и Геленка Бучково.
        Змаганє нових композицийох отримане, 6. юлия, остатнього дня 47. фестивала рускей култури "Червена ружа”, а у нїм участвовали дванац нови шпиванки котри того року сцигли на конкурс. Друге место у змаганю нових композицийох освоєла шпиванка "Ой, писньо моя", автора музики и тексту Владислава Надьмитю, у аранжману Юлияна Рамача, котру шпивал Михайло Бодянец. Треце место освоєла композиция "Ярня писня" композитора и аранжера Мирона Сивча, на текст Мирослави Даждиу, котра ю и одшпивала.
       Шпивачох у змаганю нових композицийох провадзели и Дзивоцка и Леґиньска шпивацка ґрупа Дома култури Руски Керестур.
      Як госци, на манифестациї "Червена ружа" наступела Женска шпивацка ґрупа Руского културно-просвитного дружтва зоз Нового Саду, под фаховим руководством Мирослава Папа.
        Руководителє манифестациї "Червена ружа" - змаганя шпивачох за найкрасши глас и нових композицийох у народним дугху - були Юлиян Рамач Чамо, Агнета Тимко и Михайло Бодянец, конферансу водзели Марина Рамач и Владимир Бодянец, котри бул и єй автор, а и остатню манифесатацию Фестивала рускей култури, вчера, 7. юлия, провадзело вельке число публики на отвореней сцени у дворе керестурскей Школи.

"Ружа” - змаганє за глас
8. юлий 2008. (Рутенпрес) - Брат и шестра - Николая Сивч и Алексей Сивч, обидвойо зоз Руского Керестура, побиднїки тогорочного змаганя за найкрасши дзивоцки и леґиньски глас на “Червеней ружи”, котре 6. юлия. Николая Сивчова у змаганю за найкрасши глас - за традицийну награду - кошарку ружох и дзивоцку ладу - шпивала шпиванку "Златни одкоси". Побиднїк змаганя за традицийну награду "Ружи" за леґиньски глас - чобольов - Алексей Сивч, титулу найлєпшого освоєл зоз шпиванку “Керестурски тополї”. У змаганю младих шпивачох-аматерох за найкрасши дзивоцки и леґиньски глас на найстаршей манифестациї Фестивала рускей култури, того року участвовали шейсц соло-шпивачки, двоме соло-шпиваче, та єден дзивоцки и єден леґиньски дует.
       Попри побиднїкох - Николаї и Алексея Сивчових, за традицийни награди "Червеней ружи" змагали ше Валентина Югас зоз Коцура, Гелена Папуґа зоз Вербасу, Боян Горняк зоз Дюрдьова, Рената Надь зоз Руского Керестура, Ирена Скубан зоз Вербасу, Наташа Цирба зоз Шиду, Ана Римар зоз Нового Саду, дует Иван Надь и Владимир Тиркайла зоз Руского Керестура и дует Оксана Рамач зоз Керестура и Ивана Пейович зоз Бачкей Паланки.
        Шпивачох у змаганю за найкрасши дзивоцки и леґиньски глас провадзел Вельки народни оркестер Дома култури Руски Керестур, котрому дириґовал Юлиян Рамач Чамо.

Госци "Червеней ружи"
8. юлий 2008. (Рутенпрес) - Попри подпредсидательки Народней скупштини Републики Сербиї Ґордани Чомич, програми тогорочного Фестивала рускей култури провадзел и перши секретар Амбасади України у Беоґрадзе Олександр Кириченко.
       Вшелїяк, програми "Ружи" провадзели и нашо народни посланїки др Дюра Мученски и Олена Папуґа. Програмом "Ружи" присуствовали и Боро Кецман, зоз Покраїнского секретарияту за управу, предписаня и национални меншини, як и Драґан Сречков, спред Покраїнского секретарияту за образованє и културу ВР АП Войводини.
        Тиж так, програми Фестивала провадзели и чолнїки Општини Кула - предсидатель Општини и його заменїк - Светозар Буквич и Дамян Милянич, як и заменїк предсидателя СО Вербас Мирослав Алексич. Манифестацийом Фестивала присуствовали и чолнїки РУВ-РТВ.
        Попри представительох КУД, орґанизацийох и установох зоз наших местох, госци тогорочней "Червеней ружи" були и предсидатель Дружтва Руснацох и Українцох "Рушняк", Приморско-ґоранскей жупаниї зоз Риєки Владимир Провчи, та секретар прешлого року оформеней Заєднїци Руснацох городу Заґребу Йоаким Павлович Павле.
        Програмом "Червеней ружи" присуствовали и даскельо