|
|
РОБОТИ ПРЕД ПОЧАТКОМ ШКОЛСКОГО РОКА У
КЕРЕСТУРСКЕЙ ШКОЛИ
24.
авґуст 2007. -
Тих дньох у рускокерестурскей Основней школи и
Ґимназиї “Петро Кузмяк” у цеку, лєбо уж закончени, роботи на
пририхтованю Школи за початок настави у новим 2007/08. школским
року. Так стреду, 22. авґуста, у школским дворе закончене прелїванє
з новим асфалтом двох спортских теренох - рукометного и
кошаркашского, а з асфалтом прелята и дражка за розбегованє за скок
до далєка.
Виасфалтована повехносц виноши коло 1 500
квадратни метери, инвестиция вредна коло 1,4 милиони динари, а
обезпечена є зоз средствох Општини Кула за инвестицийни укладаня до
образованя. Попри асфалтованя, у цеку и роботи на реконструкциї
ошвиценя у школским дворе, односно на спортских теренох.
Од будовательних роботох, на школским будинку
Замок, як и на закрицу интерната, по початок школского рока буду
положени нови, метални циви за одводзенє атмосферскей води, уж
вимуровани єден мурик коло Замку, дзе того лєта обилєни и шицки
учальнї.
Ошвижени дзепоєдни учальнї и у главним будинку
школи, дзе попри билєня и фарбеня, злєпшане зогриванє и водовод,
ушорени и побилєни дзепоєдни хижи у интернату, а у септембре будзе
опремена ище єдна компютерска учальня. У планє дальше кладазенє
видео-надпатрунку - у Замку и главним будинку, на ище коло двацец
такволаних критичних местох у просторийох и дворе Школи.
Шицки поробени, лєбо роботи котри буду
закончени по початок школского рока вредни коло три милиони динари.
Средства обезпечени зоз буджету Општини Кула - зоз средствох за
инвестициї, як и зоз власних, односно пенєжу за порядне отримованє
 у
образованю, наменєни за рускокерстурску ОШ и Ґ “Петро Кузмяк”.(МЗ)
ПЛАНОВАНЕ ИДУЦОГО РОКУ
24.
авґуст 2007. -
Рускокерестурска Основна школа и Ґимназия
“Петро Кузмяк” Покраїнскому секретарияту за образованє и Општини
Кула тих дньох поднєсла вимоги, односно план инвестицийних роботох у
наступним року. У планє цалосна реконструкция закрица на главним
будинку Школи, односно заменьованє постояцих трицецрочних
плочох зоз новима. У главним школским будинку у учальньох
потребне заменїц тиж трицецрочни линолеумох, а место нїїх положиц
ламинат. Ґу тому, у просторийох интерната плановане вибудовац
зоблєкальнї за пораячки, та дополнююци туш-кабини, тоалети, як и
єден лифт
за дзвиганє опреми и потребного до интернату.(МЗ)
ПРЕЛЯТА ЧАСЦ ДРАГИ У РУСИНСКЕЙ
24.
авґуст 2007. -
После вецеймешачного наявйованя, и лєм за три
днї, штварток, 23. авґуста, законечене прелїванє драги з новим
асфалтом у часци Русинскей улїци у Руским Керестуре, на цо ше вельо
длужей чекало як цо сама робота тирвала.
Прелїванє часци драги у Русинскей улїци
поробене на основи ище прешлорочного контракта котри Месна заєднїца
подписала зоз Републичну дирекцию за драги и подприємством
“Вой-драги”.
Роботи окончело Подриємство “Вой-драги” зоз
Суботици, а з новим асфалтом, грубини 4 цм, преляти 610 длужни
метери, од крижаня Русинскей з улїцу ЮНА, по центер. Прелята
поверхносц од коло 3 500 квадратни метери, за цо було потребне коло
350 тони асфалту.
Вредносц роботох виноши три милиони динари, дзе
половку средствох зноши Дирекция за драги, а милион и пол динари
керестурска Месна заєднїца зоз комуналних средствох - прейґ кулскей
општини.
У планє прелїванє драги з новим асфалтом и у
другей часци Русинскей улїци - од центра спрам Крущичу, та аж и по
Крущич, о чим тиж подписани контракт прешлого
року, алє ше у
Дирекциї за драги чека на доставанє средствох за тоту намену.(МЗ)
 |
 |
АСВАЛТОВАНА ЧАСЦ
РУСИНСКЕЙ
24.
авґуст 2007. - Подприємство "Вой драга" зоз Суботици вчера закончело
асвалтованє драги на Русинскей улїчки од ЮНА по центер. Керестурска
Месна заєднїца тоту роботу догварела ище прешлого року, алє роботи
поробени аж тераз.
Нови
асвалт преляти на длужини од коло 650 метери, вредносц роботох коло
3 милиони динари од хторих половку обезпечела Месна заєднїца зоз
комуналного доприносу, а другу половку финансовала Републична
дирекция за драги.
Догварени и роботи на асвалтованю драги у Русинскей од центру по
конєц валала ґу Крущичу, алє тоти роботи буду поробени вєдно зоз
реконструкцию драги
Руски Керестур - Крущич док Дирекция за драги
обезпечи средства.(KM)
МЕХИ ЗА ПЛАСТИЧНИ ФЛЯШИ
24.
08. 2007.
-
Концом того тижня, Месна заєднїца Руски Керестур набавела окремни
мехи до котрих Керестурци годни класц пластични фляши за одношенє на
шмециско.
До тих мехох мож класц лєм пластични фляши за одношенє на шмециско,
а нє и даяке друге шмеце.
За тераз, у Комуналней служби Месней заєднїци
мож достац по два таки
окремни, векши мехи за шмеце, а познєйше то
будзе спрам потреби.
(МЗ)
БУДЗЕ ШЕ РОБИЦ
ПРОЄКТ ЗА ЯВНЕ ОШВИЦЕНЄ
23.
08. 2007. - За явне ошвиценє того року зоз средствох комуналного
доприносу у плану инвестованя за тот рок Месна заєднїца зоз Заводом
за вибудов у Кули плановала милион динари и вони буду вихасновани за
виробок проєкту явного ошвиценя у улїци Маршала Тита.
Реконструкция явного ошвиценя Велького шору будзе поробена кед
општина обезпечи средства за тоти намени зоз других жридлох.
Тиж
плановане же би ше виробело и проєкт ришованя транспортней
сиґнализациї, а средства за тоту намену би требали буц обезпечени
зоз Завод за вибудов хтори за ришованє проблема транспортней
сиґнализациї кулскей општини нєдавно, по конкурсу, зоз покраїнского
буджету достал прейґ 3 милиони
динари.(KM)
ВИКАЗАНИ ПОТРЕБИ
ЗА ТРИ ПРОЄКТИ
21.
авґуст 2007. - На вимогу Покраїнского секретарияту за урбанизем,
комунално квартельни роботи и защиту животного штредку, керестурска
Месна заєднїца приявела потребу за виробок трох проєктох.
Слово о проєкту за вибудов канализациї зоз пречисцовачом, проєкту за
фабрику води за пице и проєкту за вибудов комплетней инфраструктури
за индустрийну зону у Руским Керестуре.
По
словох Йоакима Надя, секретара Месней заєднїци потреби за виробком
тих трох проєктох Покраїнскому секретарияту доручени прейґ Оддзелєня
за урбанизем, комунално-квартельни роботи, защиту животного штредку
и инспекцийни надпатрунок Општинскей управи у Кули.
ПОБИДНЇК
ФОДБАЛСКОГО ТУРНИРУ КОЦУРСКА "ИСКРА"
13. авґуст 2007. - Фодбалски клуб "Искра" зоз Коцура завжал
перше место на Медзинародним турниру у фодбалу хтори у Руским
Керестуре отримани соботу 11. и нєдзелю 12. авґуста у рамикох
Спортских бавискох "Яша Баков". У финалним змаганю "Искра" победзела
керестурски "Русин" на пенали понеже змаганє закончене зоз нєришеним
резултатом 1 : 1.
У змаганю за
треце место "Бачка" зоз Дюрдьова победзела екипу "Бранїско" зоз
Словацкей з резултатом 2 : 1. Так фодбалером "Искри" зоз Коцура
додзелєни златни, "Русину" зоз Руского Керестура стриберни, а
фодбалером "Бачки" зоз Дюрдьова бронзово металиї, док фодбалеле
"Бранїска" зоз Словацкей преглашени за най фер бависко на турниру та
им додзелєни погар.
За найлєпшого
баявяча на Турниру преглашени Драґан Країнович зоз побиднїцкей
екипи, а за йалєпшого ґолмана Желько Орос хтори бранї за домашнї
"Русин".
После законченя
турнира за госцох и домашнїх пририхтани дружтвени вечар на
хторим
побиднїком уручени металиї и погари.
ХЛЄБ ДРАКШИ ЗА 5
ДИНАРИ ПО ВЕКНИ
11.
авґуст 2007. - У предавальньох Пекари Макаї векна хлєба чежка 500
ґрами з муки типа 500 од нєшка кошта 30, док ше такволани народни,
односно чарни хлєб предава по 25 динари. Нови, висши цени хлєба у
тим виносу догварели представителє двох найвекших пекарох у кулскей
и вербаскей општини кулскей "Житобачки" и вербаского "Тривипеку", а
применюю их и други пекари на подручу тих двох општинох.
Гоч
наявени висши, таки цени хлєба буду применєни у Пекари ПП "Юарбис",
односно дакесишнєй
Кооперативовей самоуслуги, алє за розлику од
других ту хлєб подракши од пондзелку, 13. авґуста.
ОД ПОНДЗЕЛКУ ДРАКШИ ХЛЄБ
10. авґуст 2007. - Пекара приватного подприємства "Юарбис"
у Руским Керестуре хлєб по новей, висшей цени будзе предавац од
пондзелку, 13. авґуста. Векна хлєба од муки типа 500 будзе коштац 35
динари, а по тей цени ше будзе предавац и франциски хлєб и ципов.
Векна хлєба од муки типа 850, односно чарни хлєб будзе коштац 30
динари.
Михайло Бучко, шеф "Юарбисовей пекари, хтора дньово
випродукує и випоручи коло 400 векни хлєба шицких файтох, гвари же
од пондзелку подракша и печива, алє їх цена за тераз ище вше нє
утвердзена.
ЗА ОСЕМ НОВИ МЕСТА ЗА
ОШВИЦЕНЄ ПОТРЕБНИ 482.000 ДИН
10. авґуст 2007. -
Же би кажда, та и найкрадша улїчка у Руским Керестуре була ошвицена
треба положиц ище 8 грушочково места и то три на драги ґу Каплїчки,
3 од улїчки Янка Тота Бокмека ґу базену, и по два у улїчкох
Шайкашкого одряду и Сримского фронту на часци од улїци Маршала Тита
по Фрушкогорску при Церкви.
За поставянє осем грушочкових местох на основу
предрахункох потребне обезпечиц 482.000 динари хтори хвильково у
Месней заєднїци нєт за тоту намену та, як заключене на остатнєй
схадзки Совиту Месней
заєднїци, тот проблем будзе ришени кед ше
средства обезпечи зоз других жридлох.
ПОДНОШЕНЄ
ВИМОГОХ ЗА СУБВЕНЦИЇ
ПОЛЬОПРИВРЕДНЇКОМ
9.
авґуст 2007. - Прешлого пиятку у кулскей филияли Управи трезору
почали примац вимоги за доставанє субвенциї хтори Министерство за
польопривреду додзелює реґистрованим польопривредним
продуковательом.
Министерство за польопривреду обезпечує субвенцищї у виносу од 8.000
динари по гектару жеми за обрабянє и то за дизел гориво3.500 динари,
за штучни гної 2.500 и за нашенє 2.000 динари.
Реґистровани польопривредни продукователє хтори маю до 11 гектари
жеми нє муша мац фискални рахунки о купованю нєобходного
репроматериялу, а тоти хтори маю од 11 по 100 гектари жеми муша
приложиц и фискални рахунки.
Вимогу мож поднєсц по 30. новембер, а попри вимоги треба доручиц и
потвердзенє о виплаценей порциї за 2006. рок и ознова пополнєни
формулар о структури шатви за тот рок.
(КМ)
ЗАМЕНЄНИ
ХЛОРИНАТОР
9.
авґуст 2007. - На жридлу керестурского водоводу заменєни хлоринатор
за хтори видвоєни 78.000 динари. Як сообщене на остатнєй схадзки
Совиту Месней заєднїци потерашнї уж бул дотирвали, а почим велька
векшина Керестурцох хаснує воду зоз водоводу и попри тим же є
забранєна за пице и варенє пре звекшани количества арсену и других
чежких металох, воду ше муши хлоровац та тота инвестиция була
нєобходна.
На
истей схадзки принєшена и одлука о розписованю тендера за набавку
двох мульних пумпох.
(КМ)
ЕКИПА "КРЕАТИВО
17" ПОБИДНЇК НОЦНОГО ТУРНИРУ
 8.
август 2007, - Екипа "Креативо 17" зоз Руского Керестура освоєла
перше место у сениорскей конкуренциї на вчера законченим Ноцним
турниру у малим фодбалу хтори ше у Старей школи отримовал од 16.
юлия. Друге место освоєла екипа "Демократи" зоз Кули, а треце "Мая
ин точак" зоз Крущичу.
За
найлєпшого бавяча турниру преглашени Денис Югик зоз побиднїцкей
екипи.
У
конкуренциї младших пионирох перше место освоєла екипа "Дакс" зоз
Коцура, а друге екипа "Старс" зоз Руского Керестура.
У
конкуренциї старших пионирох перше место освоєла екипа "Ґаучоси" зоз
Крущичу, а друге "Гайдук" зоз Кули.
Вчерайши финални змаганя Ноцного турниру у малим фодбалу провадзели
вецей од 600 патрачох.
НОВА ЦЕНА ВОДИ, А ПОЧНЄ И
НАПЛАЦОВАНЄ ВИВОЖЕНЯ ШМЕЦА
 08.
авґуст 2007.
-
Служба Месней заєднїци нєшка доручела шицким гражданом
обвисценя о окончованю комуналних услугох, цени и способе доручованя
рахункох, плаценя и розпорядку виношеня шмеца.
Рахунки за комунални услуги, потрошену воду и виношенє шмеца, служба
Месней заєднїци будзе видавац кажди мешац, а воду ше будзе очитовац
раз у двох мешацох. Длужнїком чийо длуства буду векши од 3.000
динари престанє ше давац комунални услуги, односно виключи ше им
воду.
ЦЕНИ ВОДИ И
ВИНОШЕНЯ ШМЕЦА ОД 1. АВҐУСТА 2007. РОКУ
- За
потрошену воду 19,44 динари по кубним метеру
- за
виношенє шмеца 1,08 динари по квадратним метеру бивацого простору
мешачно, односно 37,80 динари по члену фамилиї
ТИЖНЬОВО МЕХ ПО
ОСОБИ
Шмеце муши буц положене до мехох и завязане, а єден мех може буц
чежки до 30 кили. Єдна особа зоз обисца може тижньово винєсц 1 мех
зоз шмецом.
Кед
гражданє маю вецей шмеца цо ше окреме одноши на индустрийни одрутки
можу поволац комуналну превозку на телефон 703-330 и шмеце им будзе
вивежене по цени од 500 динари по приколици без утоваряня. Гражданє
можу и сами вивесц шмеце на шмециско и то влєце од 16 по 20 годзин,
а вжиме од 12 по 16 годзин.
Подприємства, роботнї, тарґовини и други можу зоз Месну заєднїцу
направиц окремну догварку о виношеню шмеца.
МЕХИ ЗОЗ
ПЛАСТИЧНИМА ФЛЯШАМИ ШЕ НЄ БУДЗЕ НАПЛАЦОВАЦ
Служба Месней заєднїци обвисцує гражданох же би пластични фляши
кладли до окремних мехох хтори можу достац у Месней заєднїци. Число
винєшених мехох зоз пластичну амбалажу нє огранїчене и нє будзе ше
наплацовац
РОЗПОРЯДОК
ВИНОШЕНЯ ШМЕЦА ОД 13. АВҐУСТА 2007.
ПОНДЗЕЛОК:
Вивоженє шмеца по поволанки
ВОВТОРОК: Перша
штварцина валалу спрам сиверу и улїци М. Тита и Русинска од центра
по конєц ґу Кули и Крущичу.
СТРЕДА: Друга
штварцина валалу спрам сиверу и улїца М. Тита од центру по конєц ґу
Лалитю.
ШТВАРТОК: Треца
штварцина валалу спрам востоку
ПИЯТОК: Штварта
штварцина валалу спрам югу и улїца Русинска од центру по конєц ґу
Косанчичу.
(КМ)
З АКТИВНОСЦИ
НАЦИОНАЛНОГО СОВИТУ РУСНАЦОХ
08.
авґуст 2007.
- З нагоди информациї о
приватизованю кулского Информативнои-пропаґандного центру, котри ше
на аукцийним предаваню ма найсц 20. септембра, Славко Орос,
предсидатель Националного совиту Руснацох ше прейґ писма Иштванови
Пасторови, секретарови Вивершней ради Войводини за привреду и
приватизацию, заложел за одкладанє наявеней приватизациї ИПЦ Кула.
- ИПЦ Кула информує гражданох кулскей општини три децениї на штирох
язикох - сербским, мадярским, руским и українским и на тот способ
професийно роби на витворйованю єдного з основних гражданских правох
- на информованю националних меншинох на мацеринским язику, прейґ
радио-програми и двотижньових новинох.
- Як указую искуства других медийох подобней структури,
наиходзаце приватизованє вироятно националним меншином огранїчи тото
право, з оглядом же програма на язикох националних меншинох нє
комерциялна и потенциялному власнїкови нє будзе у интересу же би
предлужел з тоту файту информованя.
- Нє треба окреме наглашовац значносц обстояня того медию у
форми општинского сервису, односно яки би нєспатраюци пошлїдки и
чкоди нанєсло огранїчованє того основного гражданского права
националних меншинох котри жию на териториї кулскей општини.
- З цильом
же бисце ше заложели за одкладанє приватизованя, а познєйше, и за
можлївосц обстояня ИПЦ як явного сервису, модлїме вас за помоц. З
тим вецей же подобни заключеня принєшени и на нєдавно отримани
округлим столє у Беоґрадзе о приватизованю електронских медийох на
локалним и реґионалним уровню, котри орґанизовало Министерство
култури и медийох Републики Сербиї, дзе представителє Министерства
дали тварди обецунки же ше винайдзе задоволююци модус за ришованє
того проблему - гвари ше у писму Славка Ороса Иштванови Пасторови.
Здогаднїме, ИПЦ Кула каждодньово емитує радио-програму прейґ
Радио Кули на сербским, руским и мадярским язику, тижньово и на
українским, а у новинох “Кулска комуна” (два раз до мешаца) по єден
бок друковани и по руски и мадярски. (МЗ)
У ЧАСЦИ ХОТАРА КАМЕНЄЦ ПОБИЛ ПАПРИҐУ
08.
авґуст 2007.
-
Окремна комисия ДДОР Нови Сад за оценьованє настатей чкоди, нєшка,
8. авґуста, окончи перше оценьованє чкоди после очкодованя паприґи
од каменцу, котри часци керестурского хотара залапел всоботу, 4.
авґуста.
Як Рутенпрес дознава од одвичательних
у руско-керестуским оддзелєню кулскей филияли ДДОР, чкоду од ляду
приявели аж 25 од вкупно 64 керестурских заградкарох, котри того
року у ДДОР осиґурали паприґу. Чкоди на паприґи приявели заградкаре
котри маю жем на Малим Селищу, на Вепровацкей и Сейкох, а єдна менша
часц и на Медєшу - вкупно прейґ трицец гольти под паприґу.
Премия за осиґуранє паприґи того року
виношела коло 17 000 динари за єден гольт, мало ше ю виплациц аж на
єшень, так же после оценьованя, осиґураним чкода будзе надоплнєна
зоз одбиваньом їх премиї.
Спрам жридлох у ДДОР, крем за паприґу, прияви
за чкоди на других польопривредних културох нє було, гоч и вони
осиґурани.
Нєшка будзе окончене перше преценьованє чкоди
од ляду, потим ушлїдза ище два оценьованя, так же аж после трецого
будзе конєчна оцена чкоди од ляду, же би, спрам проценту
очкодованосци, паприґаром було
виплацене осиґуранє.
(МЗ)
 |
 |
ТУРНИР У
ФОДБАЛУ
 08.
авґуст 2007.
- Наступного викенду,
11. и 12. авґуста, у Руским Керестуре на Ярашу, на фодбалским
стадионє Фодбалского клуба “Русин”, будзе отримани турнир у вельким
фодбалу, у рамикох Спортских бавискох “Яша Баков”.
На турнире у фодбалу участвую штири екипи - “Бачка” зоз
Дюрдьова, “Искра” зоз Коцура”, “Русин” зоз Руского Керестура, як и
госцуюца екипа зоз Словацкей републики - “Бранїско” зоз Широкого.
Полуфинални змаганя, на соботу, 11., як и финални, на
нєдзелю, 12. авґуста, на Ярашу буду одбавени од 15 и од 17 годзин, а
после нєдзельового финалного змаганя, на заєднїцким друженю
фодбалерох и
спортских роботнїкох, буду уручени припознаня
побиднїком. (МЗ)
ПРЕМИЇ ОД 100
ЕВРИ РЕҐИСТРОВАНИМ ПОЛЬОПРИВРЕДНЇКОМ
08.
авґуст 2007.
- У кулскей Експозитури
Управи трезору, пияток, 3. авґуста, започало подношенє вимогох за
доставанє премиї од по 100 еври по гектаре за реґисторвани
польопривредни ґаздовства. Подношенє вимогох за доставанє премиї од
100 еври за гектар орачей жеми тирва по 30. новембер того року, а
право доставаня премиї маю реґисторвани польопривредни ґаздовства за
польодиїлски заградкарски култури.
Ґаздовством котри маю до 11 гектари орачей жеми при подношеню
вимоги за доставанє премиї, односно за доставанє субвенцийох за
дизел-гориво, штучни гної и нашенє - нє потребни фискални рахунки за
тот репроматериял.
Ґаздовством з прейґ 11 гектари жеми при подношеню вимоги за
премию и субвенциї потребни и фискални рахунки за купене гориво,
штучни гной и нашенє, з тим же премию и субвенциї достаню лєм за 100
гектари жеми, а нє и за жем прейґ того.
При подношеню вимоги за премию, реґисторвани польопривреднїк
муши дац потвердзенє о вимиреней порциї за 2006. рок, котре достанє
у општинскей Порцийней управу, у Управи трезору потребне ознова
виполнїц формулар за структуру рошлїнскей продукциї (структуру
шатви) у тим року и виполнїц вимогу за доставанє премиї.
На основи Уредби Министерства польопривреди, субвенция за
дизел гориво виноши 3 500 дин. по гектаре, за штучни гної 2,5, а за
нашенє 2 000 динари.
У Управи трезору ше подноши вимогу лєм за орачу жем, док
субвенциї за статок иду директно прейґ Министерства польопривреди, з
тим же у кулскей Експозитури Управи трезору даваю о тим инфомациї и
числа потребних телефонох.
За тераз, шицки роботи коло подношеня вимогох за доставанє
премиї мож покончиц лєм у Кули, а постої
можлївосц догварки же би ше
дзепоєдни формулари
виполньовало и у даєдних керестурских задруґох.
(МЗ)
МЕСНА ЗАЄДНЇЦА И КОНКУРСИ
03.
авґуст 2007.
-
Месна заєднїца
Руски Керестур тих дньох конкуровала до Покраїнского инвестицийного
фонду за три проєкти, односно за средства у висини од коло 65
милиони динари.
За доконченє
вибудови школско-спортскей гали конкуроване за доставанє 51 милион
динари, за вибиванє єдней студнї за потреби водоводу (на жридлу
водоводней мрежи) за 9 милиони динари, як и за асфалтованє вецей
валаских улїцох, поверхносци од 7 000 квадратни метери, цо виноши
коло 5 милиони динари.
До Покраїнского
инвестицийного фонду рускокерестурска Месна заєднїца конкуровала
прейґ општинского Заводу за вибудов Кула.
|
|
