Руски Керестур

Архива висткох - авґуст 2008.

Благослов пред початком школского рока
30. авґуста 2008. (Рутенпрес) - Початок нового школского року, у парохиї у Руским Керестуре ше сце першизар започац и зоз заєднїцку молитву и благословом школярох.
Прето на ютре, 31. авґуста, нєдзельова “дзецинска” Служба Божа будзе ше служиц за щешлїви початок и успишни школски рок за шицких керестурских школярох. Нєдзельова дзецинска Служба Божа у церкви св. оца Миколая почина на 11 годзин и 30 минути.

Школски рок у школи почина 1. септембра
30. авґуста 2008. (Рутенпрес) - На пондзелок, 1. септембра, почина нови школски 2008/9. рок и у Основней школи и Ґимназиї "Петро Кузмяк".
Перши дзень школяре од першей по пияту класу основней школи треба же би пришли до нового школского будинку на 8 годзин рано, як и ґимназиялци. Школяре першей и другей класи основней школи треба же би на 8 годзин пришли до школского будинку "Замок" дзе и того року буду мац наставу.
Школяре основней школи од шестей по осму класу у септембру наставу починаю у пополадньовей змени та треба же би на пондзелок, 1. септембра до школи пришли на 14 годзин.

Ище єдно керпенє
28. авґуст 2008. (Рутенпрес) - Роботи на оправяню маґистралней драги М3 Руски Керестур – Кула, хтори започали 26. авґуста на часци од залївней системи Компаниї АБЦ фуд ґу Кули, одноша ше на порядне отримованє драгох и буду тирвац два – три днї - дознаваме од виводзача роботох "Бачка драга".
Петар Боґданович зоз Дирекциї за драги, у чиєй компетенциї отримованє тей драги, нам потвердзел же слово о поставяню асвалту на крадших поцагох, односно керпенє дзирох, и гварел же за тот рок нє планована озбильнєйша санация тей часци драги.
Предсидатель општини Кула Светозар Буквич медзитим нєдавно у емисиї телевизиї Кула, одвитуюци на питаня патрачох, гварел же того року у першей фази буду закерпени дзири, а после того будзе окончене и комплетне асвалтованє драги, алє без преширйованя.

Закрита школско-спортска гала у Руским Керестуре
27. август 2008. (Рутенпрес)- Початком того тижня роботнїки БП "Слован" зоз Селенчи, подзвигли и остатню плочу на закрице Спортско-школскей гали у Руским Керестуре.
На тот способ шицки роботи коло закриваня гали закончени, а тирвали од мая кеди почало поставянє металней конструкциї закрица. Шлїдза роботи на дальшим нукашнїм ушореню гали.
Кладзенє закрица финансоване зоз средствох котри достати од Покраїнского фонду за капитални инвестициї, зоз котрого того року за тоту намену опредзелєни 36 милиони динари.

Шицко порихтане за нови школски рок
27. август 2008. (Рутенпрес)- По словох директора Основней школи и Ґимназиї "Петро Кузмяк" Янка Хому, шицко порихтане за нови школски рок понеже окончени роботи коло отримованя школского будинку, набавки наставних средствох, а тиж и кадрох.
        До першей класи ОШ руша 37 школяре, а до першей класи Ґимназиї єдно одзелєнє на руским язику дзе по тераз уписани 11 школяре и єдно оддзелєнє на сербским наставним язику зоз 30 школярами.
       Од технїчних роботох у Школи окончене билєнє спальньох у школским интернату и учальнох, по конкох и шицких учальньох положени нови ламинат, а на дослужених лавкох и карсцельох позаменьовани древени часци.
      Од наставних средствох у цеку набавка штирох лап топох и двох проєкторох котри буду поставени у кабинетох биолоґиї и физики.
       После длугшого часу ришени проблем кадра за английски язик понеже за Основну школу прията нова диплoмована професорка Мартина Ґшвенґ зоз Вербасу.

Отримани конїцки обегованя у друнґаню
26. авґуст 2008. (Рутенпрес) - Конїцки обегованя у орґанизациї Конїцкого клуба "Русин", прешлей нєдзелї, 24. авґуста, успишнє орґанизовани после двох рокох павзи, на керестурским гиподроме “Леї”.
       У вкупно 7 змагательних точкох од котрих 6 вожени у єднопрегу и єдна у двопрегу, участвовали попри домашнїх и коло 50 змагателє зоз велїх войводянских местох.
      У першей точки у котрей наступели и освоєли награди, аж троме керестурци: перше место припадло Владиславови Планчакови, друге - Янкови Планчакови, треце - Яношови Белийови з Милошева, а штварте - Желькови Малацкови.
       Внєдзелю посцигнути и нови рекорд "Леянского" гиподрома длугокого 1 800 метери, хтори виноши єдну минуту, 23 секунди и 9 стотинки, а посцигло го гарло “Алерво Еми” власнїка Роберта Хомоля зоз Чортановцох.
      Отримованє конїцких обегованьох на керестурским гиподрому "Леї", оможлївели числени спонзоре, од котрих вшелїяк треба визначиц: Скупштину општини Кула, Хладзальню "АБЦ-ФУД" Руски Керестур, СД "Русин" Р. Керестур, Друкарня "Руске слово" Руски Керестур, Керестурски приведнїки, Конїцки клуб "Деспотово" з Деспотова и МЗ Руски Керестур.
       На нєдзельово обегованя пре покус дижджовну хвилю нє пришли шицки приявени змагателє, та вироятнє прето анї публика нє була така числена як по другираз.

Успишна нащива волонтерох зоз Италиї
23. авґуст 2008. (Рутенпрес) - Пецеро млади волонтере италиянского Каритасу зоз Берґама, нєшка закончую свою нащиву нашим крайом, у рамикох котрей од 18. по 23. авґуст пребували госци парохийного Каритасу у Руским Керестуре.
       Циль приходи младих италиянских волонтерох було помогнуц людзом у рижних потребох и особом рижних ворзостох, од дзецох та по найстарших.
      През пейц днї вєдно зоз нашима волонтерами, госци водзели каждодньово роботнї за дзеци, дзе було рижни змисти; од приготовйованя италиянских єдлох, до вирабяня рижних прикраскох, до заєднїцких бавискох з котрима ше розвива дух заєднїцтва, почитованя и медзисобней помоци. Роботнї були у просторийох Каритасу, а єден дзень шицки вєдно були на друженю и бавеню и у Водици.
     През дзень волонтере зоз Италиї вєдно з домашнїма були нащивиц и пар старецки обисца дзе мали нагоди порубац древо за огрив, покошиц траву и подобне, а окреме цикаве друженє витворели зоз старима на штвартковим друженю у просторийох Каритасу.
       Попри у Руским Керестуре, волонтере з Италиї прубували у Мужлї и у Коцуре, а нащивели и Суботицу и Петроварадин.

25-рочнїца Женского рукометного клубу “Русин”
22. август 2008. (Рутенпрес) - Женски рукометни клуб "Русин" котри роби у рамикох Спортского дружтва "Русин", нєшка означи 25-рочнїцу свойого формованя.
       З тей нагоди отрима ше Турнир рукометашкох - пионирских и сениорских екипох "Русина", а до госцох им приду екипи Женского рукометного клубу "Мира" зоз Прєдору у Републики Сербскей, як и екипа ЖРК "Фекетич" зоз Фекетичу.
      Турнир ше отрима на терену "Русина" у Старей школи з початком на 19 годзин.
       Управа женского рукометного клубу "Русин" з тей нагоди поволує и шицки дакедишнї рукометашки, а за нїх порихтани и скромни дарунки. Друга часц означовня тей рочнїци отрима ше у октобру.

Спартак з Медзилаборцох на означованю
85-рочнїци Русина
22. август 2008. (Рутенпрес)- Нєшка, пияток 22 августа зоз Медзилаборцох до Руского Керестура требала би допутовац екипа Спартака зоз Медзилаборцох котра будзе госц Русина з нагоди означованя його 85-рочнїци иснованя.
Споpтске дружтво "Русин" 23. и 24. авґуста означи тоту значну рочнїцу. Вона будзе означена зоз приятельскима змаганями у котрих буду участвовац Фодбалски клуб "Спартак" зоз Медзилаборцох, а єдно змаганє Медзилаборчанє одбавя и зоз фодбалерами "Искри" зоз Коцура.
Змаганє у Коцуре ше отрима на соботу, 23. авґуста з початком на 17 годзин, а у Руским Керестуре на нєдзелю, 24. тиж з початком на 17 годзин.

Обновена фасада на Доме борцох и пензионерох
21. авґуст 2008. (Рутенпрес) - Будинок Дома борцох и пензионерох котри ше находзи у самим центру валала, тих дньох достал нови випатрунок понеже на нїм положена фасада, нови циви и нови уходни дзвери. Як дознаваме од Йоакима Еделинския Тошу, предсидателя Здруженя пензионерох тоту вельку роботу поробели дзекуюци закладаню др Дюру Мученския, народного посланїка Демократскей странки у Скупштини Сербиї, котри поряднє провадзи роботи тих Здруженьох.
За тоту намену Здруженє средства достало од Општини Кула у висини 60 тисячи динари, а похасновани су за кладзенє цивох и уходних дзверох. Малтерованє будинку и фарбенє фасади финансовала Демократска странка, як знак подзекованя за вельке число гласох котри єй дали гражданє Керестура.

Отримани Други Мемориялни турнир
21. авґуст 2008. (Рутенпрес) - Други мемориялни турнир у фодбалу за пионорох "Владимир Малацко Учо", отримани 19. и 20. авґуста у Руским Керестуре и Коцуре. У змаганю участвовали пионирски екипи "Баранїци" зоз Ужгороду у України, "Искра" зоз Коцура, "Бачка" зоз Дюрдьова и домашнї "Русин", док госци зоз Бардейова нє могли присц пре нєдавни вилїви котри знашли их край.
       Першого дня Турнира на керестурским Ярашу бавели екипи "Баранїци" - Русин з резултатом 2:6 и “Искра” - “Бачка” : 4:0. Вчера, 20. авґуста у Коцуре бавена друга часц турнира дзе за треце место бавели екипи "Баранїци" и "Бачкей" . При резултату 3:1 за дюрдьовчаньох, пришло до зраженя медзи бавячими, после чого змагательна комисия принєсла одлуку же ше тото стренуце закончує з резултатом 3:0 за госцох зоз чим вони освоєли 3. место на турниру.
       У змаганю за друге и перше место бавели пионирски екипи" "Искра" и "Русин". У виєдначеним бависку пионире "Искри " були лєпши и победзели парнякох "Русина" з резултатом 1:0 , и так освоєли перше место. Орґанизаторе турнира, коцурска "Искра" и керестурски "Русин" вєдно зоз Националним совитом шицким учашнїком обеспечели медалї и припознаня.
      Госци зоз Ужгороду були змесцени у интернату керестурскей школи, а окрем Коцура и Керестура нащивели и Вербас и Нови Сад.

Промоция програми роботи Завода за културу войводянских Руснацох
20. авґуст 2008. (Рутенпрес) - Вчера у прострорийох Дома култури отримана явна промоция предкладу програмованя и планованя роботи Завода за културу войдодянских Руснацох, котру отримал окончователь длужносци директора Заводу Мирослав Кевежди.
     Кевежди презентовал тоти документи котри лєм предкладаня, а у котрих дефиновани цилї Заводу, обласци його дїлованя та конкретни задатки рушаюци од широкого похопеня култири як способу живота, а нє лєм як уметносци.
       Тиж так Кевежди винєсол и анализу окруженя у яким Завод будзе дїйствовац, тє. терашнього стану при Руснацох, як и свойо видзенє предносцох и почежкосцох та можлївосцох у витворйованю мисиї Заводу. Дзепоєдни од нєвелького числа присутних зоз Коцура и Керестура реаґовали на даєдни видзеня праве у тей анализи, алє було и пар конкструктивни зауваги котри Кевежди прилапел.
       На промоциї бул присутни и Славко Орос предсидатель Националного совиту Руснацох, котри наявел же подобни явни промоциї у септембру плановани и по других наших местох.

Помоц за школски дзеци
19. авґуст 2008. (Рутенпрес) - Рускокрестурски парохийни Каритас и того року порушал акцию збераня помоци за обеспечованє школского прибору фамилийом зоз дзецми котри у потреби. По словох, одвичательного Янка Катону, понеже нови школски рок нєдалєко, жада ше помогнуц родичом у тих нємалих видаткох за їх дзеци. Най здогаднєме, влонї ше на таки способ помогло дзевец фамелийом.
Прето ше и на тот завод поволує шицких котри жадаю и можу помогнуц, чи поєдинцох чи подприємства, же би ше уключели до тей Каритасовей акдиї.
Заинтересовани ше можу явиц на керестурску парохию, ґу учительки Мариї Стриберовей, каритасовей волонтерки, або на телефон 063/802-11-65.

Дарко Рац пошвецени за священїка, а Владимир Медєши за чтеца, пивца и швичконошца
16. авґуст 2008. (Рутенпрес) - У катедралним храму св. оца Миколая, вчера 15. авґуста на швето Успения пресвятей Богородици, за священїка пошвецени керестурски син, диякон мр Дарко Рац, син терашнього керестурского пароха о. Юлияна Раца. Архиєрейску Литурґию и чин рукоположеня до св. Тайни Священства предводзел преосвящени владика Георгий Джуджар, наш еґзарх, а сослужели зоз нїм 25 священїки.
       Окрем паноцох нашого Еґзархату, возвеличац тоту радосну подїю пришол и представитель Крижевского владичества, грекокатолїцки священїки зоз Словацкей як и вецей паноцове римокатолїцкого обряду зоз околних местох предводзени зоз др Анрейом Копиловичом зоз Суботици.
       У преполней церкви домашнїх парохиянох и госцох, та родичох, супруги и родзини младого неоєрея, тоту шветочносц зоз своїм шпиваньом возвеличал и домашнї катедрални хор на чолє зоз дириґентку Лидию Пашову. Пред початком Литурґиї владика Георґий керестурскому богословови Владимирови Медєшовому подзелєл нїзши чини пострижения за чтеца, пивца и швичконошца. Од тераз вон годзен читац “Апостол”, шпивац и ношиц швички на богослуженьох.
       У своєй казанї владика Георгий висловел вельку радосц пре тоти подїї у мено цалей нашей Церкви, а наглашел же Дарко Рацов перши священїк пошвецени у керестурским храме одкеди вон постал катедрални. На концу Служби Божей новопошвецени паноцец Рацов шицким присутним подзелєл свой неоєрейски благослов и обращики, а будзе их дзелїц и шицким керестурским парохияном, на ютре 17. авґуста, на шицких штирох нєдзельових Службох Божих.

Закончене тогорочне зволанє Уметнїцкей колониї "Няради"
16. авґуст 2008. (Рутенпрес) - Вчера, 15. авґуста закончене тогорочне, 11. зволанє Уметнїцкей колониї "Няради" котра у тим нашим месце тирвала од 8. авґуста. Того року подобова колония чий снователь и уметнїцки директор Владо Няради познати руски уметнїк зоз Вербасу, робела у рамикох проєкта под назву "Рушанє сучасней подобовей творчосци.
      У роботи Конолиї участвовали 17 афирмовани уметнїки зоз нашей жеми и иножемства и цали час пребували у интернату керестурскей школи "Петро Кузмяк". И на тот завод мали нагоди нащиви найзначнєйши инстуциї, вирски и други места у тим нашим валалє. Медзи учашнїками були и три руски уметнїци: Еуфемия Новта и Биляна Роман зоз Руского Керестура як и млада Ґорана Бильня зоз Вербасу.
       Свойо импресиї преточели до своїх уметнїцких дїлох у рижних технїкох и обласцох, од малюнка, ґрафики до скулптури у древе. Витворели 30 роботи котри збогаца фундус тей успишней и припознатей подобовей Колониї.
       Шицки учашнїки зоз Руского Керестура одпутовали задовольни зоз тим цо видзели, дожили и поробели. По словох Владу Нярадия нє мали нїяки зауваги анї на орґанизацию Колониї цо нагадує же вона и надалєй предлужи свойо успишне иснованє.

Контракт за 400 000 динари
14. август 2008. (Рутенпрес) - Покраїнски секретарият за спорт и младеж Вивершней ради АП Войводини, зоз 400 000 динари поможе рускокерестурскому Атлетскому клубу "Русин". Вовторок, 12. августа, секретар Месней заєднїци Руски Керестур Йоаким Надь, у Покраї нским секретарияту за спорт и младеж подписал контракт о помоци од 400 000 динари за АК “Русин”.
Пенєж з того контракта, односно Секретарията, унапрямени за финансованє купованя потребней опреми за керестурски Атлетски клуб.
До контракта о финансованю АК пришло после вимоги руководства АК "Русин" о потреби набавки одвитуюцей опреми, вимогу потримала керестурска Месна заєднїца и прешлїдзела до Покраїнского секретарияту за спорт и младеж ВР АП Войводини, дзе є позитивно ришена.

Рочнїци двох клубох СД "Русин"
13. август 2008. (Рутенпрес) - Того мешаца, рускокерестурске Спортске дружтво "Русин" означи рочнїци двох своїх спортских клубох. Керестурски Фодбалски клуб "Русин" того року означи свою 85-рочнїцу од формованя, а свой перши ювилей - 25-рочнїцу од формованя - означи Женски рукометни клуб "Русин".
Як заплановане, з нагоди рочнїци фодбалерох и ювилею рукометашкох, 23. и 24. августа, у Руским Керестуре буду отримани спортски змаганя фодбалерох "Русина" и "Спартака" зоз Медзилаборцох, зоз Словацкей, а єдно змаганє Медзилаборчанє одбавя и зоз коцурску "Искру".
Истого викенду заплановани и турнир рукометашкох - пионирских и сениорских екипох - зоз нашей жеми, а можлїви приход и даєдней женскей рукометней екипи зоз иножемства.

"Фиксюґобет" побиднїк Ноцного турнира
13. август 2008. (Рутенпрес) - Фодбалска екипа Кладионици "Фиксюґобет", з вецей местох з кулскей општини, побиднїк тогорочного Ноцного турнира у малим фодбалу у Руским Керестуре.
      У вчерайших финалних змаганьох, "Фиксюґобет" победзел екипу Клуба демократскей младежи "Демократи", тиж з местох кулскей општини, зоз 3:2, так же "Демократи" освоєли друге место на керестурским Турниру. За треце место ше змагали рускокереатурска екипа "Тапетария еуро", котру зоз 4:1 победзела екипа младежи "Язас" (з вецей местох кулскей општини), так же "Язас" освоєл треце место на Ноцним турниру у Керестуре.
       Попри финалних змаганьох сениорох, вчера, 12. августа, на Ноцним турниру одбавени и финални змаганя за старших пионирох, та побиднїк Турнира у тей конкуренциї постала "Искра2" зоз Коцура, котра победзела керестурску екипу "Найки" зоз 4:1.
       Треце место припадло екипи зоз Керестура "Реаксем", а достате є пар-форфе - 3:0, понеже пионирска екипа кулского "Гайдука" нє пришла на вчерайше змаганє.
       За найлєпшого ґолґетера у конкуренциї младших пионирох на цалим Турниру преглашени Лука Краинович зоз Коцура; за найлєпшого бавяча Стефан Фа, а за найлєпшого ґолмана Мирко Джуджар, обидвоме з Керестура.
       У конкуренциї старших пионирох, за най-ґолґетера преглашени Дамир Костелник зоз Руского Керестура, за най-бавяча Дарко Юшкович зоз Коцура, а за найлєпшого ґолмана Ивица Няради зоз Керестура.
       У конкуренциї сениорох, за найлєпшого ґолґетера на керестурским Ноцним турниру преглашени Шинка з екипи "Демократох", за найлєпшого бавяча цалого Турнира преглашени Кузманович зоз "Юґобету", а за найлєпшого ґолмана Драґосавлєвич, з керестурскей екипи "Тапетария еуро".
       Традицийни Ноцни турнир у малим фодбалу, у орґанизациї керестурского СД "Русин", турвал од 14. юлия по 13. август, Турнир провадзело значне число публики, а лєм вчерайши финални змаганя провадзели прейґ 600 патраче.

Вчера у Руским Керестуре почало 11. зволанє Колониї "Няради"
9. август 2008. (Рутенпрес) – Вчера, 8. августа, у Руским Керестуре почала тогорочне 11. зволанє Уметнїцкей колониї “Няради”, котре будзе тирвац по 15. август. Того року подобова колония, чий снователь и уметнїцки директор познати руски уметнїк зоз Вербасу Владимир Няради, будзе робиц у рамикох Проєкта под назву "Рушанє сучасней подобовей творчосци".
Свою учасц потвердзели 18 уметнїки, и цали час буду пребувац у Руским Керестуре у интернату Школи "Петро Кузмяк". Вони ше упознаю з културу, традицию и обичаями Руснацох; нащивя музей, церкву, Водицу, околни салаши, рибалов, базен, беґель, упознаю ше з архитектуру Керестура и свойо упечатки пренєшу на свойо уметнїцки роботи.
На тогорочней Уметнїцкей колониї "Няради" участвую и нашо уметнїки: Еуфемия Новта и Биляна Роман зоз Руского Керестура, як и Ґорана Бильня зоз Вербасу. Под час тирваня Колониї, од 8. по 15. август, у голу ОШиҐ "Петро Кузмяк" будзе поставена и вистава подобових роботох зоз прешлорочного зволаня Уметнїцкей колониї "Няради".

Почали роботи коло каплїчки
7. август 2008. (Рутенпрес) - Вчера, 6. августа, на рускокерестурским теметове почали роботи на поставяню огради коло каплїчки.
За ограду коло каплїчки, як и други роботи, керестурска Месна заєднїца, на основи конкурса, од Покраїнского секретарията за локалну самоуправу и медзиопштинске сотруднїцтво ище скорей достала 1,4 милиони динари. На основи тендера, роботи на ушореню простору коло каплїчки зверени БП "Поп ґрадня" зоз Темерину.
Роботи буду координовани и зоз представителями Церковного одбору керестурскей церкви, понеже Церковни одбор од скорей започал зоз поставяньом огради коло теметова. Тих дньох бетонски греди на куполи каплїчки обложени зоз древеним мозаиком, котри задармо поробел майстор Миронь Костелник зоз Руского Керестура, а Месна заєднїца финансийно помогла з купованьом часци потребного материялу за тоту роботу.

Коло 3 000 нащивительох
5. август 2008. (Рутенпрес) - Спрам словох орґанизаторох зоз Младежскей орґанизациї "Пакт Рутенорум", прешлотижньови "Водова фест" на керестурским базену мала коло 3 000 нащивительох.
     Попри самих Керестурцох, Фестивал младих на керестурским базену нащивела публика зоз скоро шицких местох кулскей општини, з околних, алє и дальших општинох - зоз Нового Саду, Сербобрану, Бечею, а вчера о тей манифестациї замерковани обсяжнєйши звити дали и дзепоєдни водзаци новини у Сербиї. Найвецей було младих нащивительох, медзитим "Водова фест" провадзело и значне число старшей публики.
       На "Водова фесту" ше представели аж 11 менєй познати и познатши рок-ґрупи зоз вецей местох, медзи нїма найпознатша "Ортодокс Келтс” зоз Беоґраду, котри наступали 2. августа, а зоз Керестура на “Водова фесту” наступели ґрупи “Брейнлов”, “Крейзи казанс” и “Парадокс”. З нагоди Фестивала, по беґелю до Керестура припутовала и єдна ладя зоз нащивиталями, на хторей пред и по програми Фестивала орґанизовани барз нащивени журки.
      Єдна з главних провадзацих програмох було и стретнуце мото-байкерох, котре орґанизоване у сотруднїцтве зоз Моторкашским клубом Руского Керестура "Шаркань", а моторкаше всоботу пополадню отримали и дефиле през валал.
       Под час програми "Водова фесту", свойо програми роботи на окремних штандох представела нєвладова орґанизация "ЯЗАС", Фестивал "Еґзит", Младеж кулскей општини "ОКО", Младежска орґанизация "Пакт Рутенорум", як и позната керестурска ґрупа навиячох "Русина" - "Дзиви швинї”.
       Очиглядне же млади з "Пакта Рутенорум" з тогорочну орґанизацию "Водова фесту" указали високи ступень дозретосци и озбильносци, а як за Рутенпрес вчера виявел предсидатель "Пакта Рутенорум" Владимир Чизмар, указана озбильносц предпоставка же тота Младежска орґанизация достанє и свой окремни простор за роботу у Руским Керестуре.
      Чизмар очекує же Фестивал укаже и одредзени позитивни финансийни резултати, а "Водова фест" орґанизиовани и зоз финансийну потримовку Месней заєднїци Руски Керестур, Националного совиту Руснацох, Покраїнского секретарията за спорт и младеж, як и вельочислених рускокерестурских спонзорох, на чим им окреме подзековал.

Ограда коло каплїчки
5. август 2008. (Рутенпрес) - Як заплановане, того тижня би мали започац роботи на поставяню огради коло каплїчки на рускокерестурским теметове. За тоту намену керестурска Месна заєднїца, на основи конкурса, од Покраїнского секретарията за локалну самоуправу и медзиопштинске сотруднїцтво ище скорей достала 1,4 милиони динари.
На основи тендера, роботи на уишореню простору коло каплїчки зверени БП "Поп ґрадня" зоз Темерину.

Удатни фестивал младих на керестурским базену
4. август 2008. (Рутенпрес) - Прешлого викенду, 1. и 2. авґуста, на рускокерестурским базену отримани Други "Водова фест", у орґанизациї керестурскей младежскей орґанизациї “Пакт Рутенорум”. "Водова фест” отримани зоз финансийну потримовку Месней заєднїци Руски Керестур, Националного совиту Руснацох, Покраїнского секретарията за спорт и младеж, алє и вельочислених керестурских спонзорох.
      Простор за отримованє и тогорочного фестивала младих ушореле волонтере на Волонтерским кампу младих "Лєто у Руским Керестуре", од 19. юлия по 2. август. Под час Фестивала були поставени три бини за учашнїкох, а представели ше аж 11 менєй познати и познатши рок-ґрупи зоз вецей местох и зоз самого Керестура, а медзи нїма найпознатша "Ортодокс Келтс" зоз Беоґраду, котри наступали 2. августа.
       З нагоди Фестивала, по беґелю до Керестура припутовала и єдна ладя зоз нащивиталями, на хторей пред и по програми Фестивала орґанизовани журки. Єдна з главних провадзацих програмох було и стретнуце мото-байкерох, котре орґанизоване у сотруднїцтве зоз Моторкашским клубом Руского Керестура "Шаркань", а моторкаше всоботу пополадню отримали и дефиле през валал.
       Под час програми "Водова фесту", свойо програми роботи на окремних штандох представели младежски часопис "МАК", нєвладова орґанизация "ЯЗАС", гуманитарна орґанизация "Каритас", Младеж кулскей општини "ОКО", Младежска орґанизация "Пакт рутенорум", як и позната керестурска ґрупа навиячох "Русина" - "Дзиви швинї".
     Треба похвалїц добру орґанизацию цалого "Водова фесту", паркинґ простор бул орґанизовани, як и служба обезпеченя.

Поховани Силвестер Ґача
4. август 2008. (Рутенпрес) - Вчера, 3. августа, на керестурским теметове поховани Силвестер Ґача, наш визначни хореоґраф, ґлумец и роботнїк у култури, котри после длугшей чежкей хороти умар 2. августа у своїм 69. року живота.
      Обряд хованя водзел рускокерестурски парох о. Юлиян Рац, а у мено Националного совиту Руснацох, керестурского Дома култури, РНТ "Петро Ризнич Дядя", Рускей матки, СД "Русин", алє и у мено Руснацох зоз шицких местох у Бачкей и Сриме и з просторох дакедишнєй Югославиї, та културних роботнїкох у Войводини и Сербиї, од того визначного Руснака одпитал ше Михайло Зазуляк.
      На його остатню драгу, Силвестера Ґачу, попри найблїзшей фамелиї и Керестурцох, випровадзели и представителє наших КУД зоз Коцура и Нового Орахова, зоз КПЗ општини Кула, спред Союзу Русинох и Українцох Горватскей з Вуковару, як и представителє КУД дзе робел - зоз Бачкей Тополї, Кикинди и других местох.
       Силвестер Ґача народзени 11. априла 1939. року у Петровцох, свою лабов ґу фолклору, почал виражовац ище як школяр ґимназиї у Вуковаре у тамтейших дружтвох, танцовац предлужел у Беоґрадзе.На Висшей педаґоґийней школи бул руководитель танєчней секциї и єдини Руснак котри положел авдицию за танцоша у професийним и окреме познатим ансамблу "Коло" зоз Беоґраду.
      За свой роботни вик, автор є коло 130 кореоґрафийох за старших и за дзеци - найвецей руских и українских, алє и барз велького числа других народох и народносцох у бувшей Югославиї. О його фаховосци у тей обласци шведочи квалификация интернационалного хореоґрафа од Союзу музичних дружтвох Войводини.
       За свою роботу, Силвестер Ґача достал значни припознаня и награди од Фестивала култури "Червена ружа"; добитнїк є "Искрох култури", та "Зарйох култури" од Културно-просвитней заєднїци Войводини, односно Општини Кула, Златней значки тедишнього Социялистичного союзу РН Войводини.

Закончени тогорочни Волонтерски камп у Руским Керестуре
2. август 2008. (Рутенпрес) - Нєшка, 2. августа, волонтере на тогорочним Кампу младих у Руским Керестуре закончую роботи котри почали 19. юния. Под час тирваня Кампу у Руским Керестуре два тижнї пребували млади волонтере од 20 до 34 рокох - зоз Французкей, Росиї, зоз Данскей, Словениї, Италиї и зоз Польскей, єден омладинєц аж зоз Америки, зоз Калифорниї. Учашнїком Волонтерского кампу представителє медзинародней нєвладовей орґанизациї за юговосточну Европу "Сава", у Руским Керестуре орґанизовали роботню на тему мира, толеранциї и интеркултуралного диялоґу, у рамикох такв. "Драги мира", котра того року рушела з Македониї, так же Камп бул домашнї и двом волонтерком з Македониї и Греческей.
      Попри волонтерох зоз иножемства, у Руским Керестуре пребували и волонтере зоз Нового Саду и Беоґраду, а под час Волонтерского кампа робели и млади зоз Керестура.
       И пори нєвигодней хвилї, волонтером ше удало ушориц простор на базену и на керестурским пияцу а треба наглашиц же керестурци волонтером пожичели и бициґли, же би цо лєгчейше одходзели на каждодньову роботу.
       Под час Волонтерского кампа, його учашнїкох приял предсидатель Националного совиту Руснацох Славко Орос, нащивели Рибалов а.д. “АБЦ ФУД”, фабрику сокох “Сторк” у Кули, а єден дзень за нїх бул орґанизовани и вилєт до Нового Саду.
       Покраїнски секретарията за спорт и младеж ВР АПВ за Волонтерски камп опредзел 90 000 динари, так же стреду 30. юлия, Волонтерски камп у Руским Керестуре нащивела помоцнїца секретара того Секретарията Александра Бабич, як и народни посланїк Дюра Мученски.
       Вечар, 1. августа, волонтере нащивели и керестурску Катедралну церкву св. о. Миколая, музей у Замку, а на кочох Конїцкого клуба, поопатрали валал.
      На законченю, волонтере виражели вельке задовольство зоз пребуваньом у интернату керестурскей Школи, роботу и приємом у Руским Керестуре, а лидерки тогорочного Волонтерского кампа були млади Марина Гайдук з Керестура и Сташа Йойкич зоз Вербасу, з колидерками - Сандру Няради зоз Керестура и Сандру Ґоворчич зоз Беоґраду.

Нєшка и ютре на керестурским базену "Водова фест"
1. август 2008. (Рутенпрес) - Друга манифестация "Водова фест", у орґанизациї керестурскей младежскей орґанизациї "Пакт Рутенорум”, почина нєшка, пияток, 1. авґуста, а будзе тирвац и на ютре, 2. авґуста - на рускокерестурским базену. На ушореним просторе на базену по час тогорочного Волонтерского кампа, за "Водова фест" поставени три бини за учашнїкох - "Главна бина", "Водова електро" и "Реґе бина".
      Першого дня Фестивала, односно 1. авґуста, у главней програми наступя два ґрупи - "Квин трибют бенд" зоз Беоґраду и "Биґ систерс" зоз Нового Саду", а як предґрупи, наступаю "Дзвери раю" зоз Дюрдьова, "Иґнис" зоз Нового Саду и "Дарк темптейшн" зоз Червинки.
       Другого дня Фестивала, на ютре, 2008. августа, на главней сцени на керестурским базену наступя познати бенд - "Ортодокс Келтс" зоз Беоґраду, та "Зайон кру" зоз Зомбора, а пред нїма, як предґрупи, представя ше три рускокерестурски бенди - "Брейнлов", "Крейзи казанс" и “Парадокс”.
        Наступи предґрупох починаю од 19, а главних ґрупох од 22 годзин, док уходнїца за програми єдного вечара виноши 200 динари.
     Як заплановане, нєшка пред вечаром по беґелю до Керестура припутує и ладя зоз нащивиталями, на хторей пред и по програми Фестивала буду орґанизовани журки, як гваря орґанизаторе - до рана.
        Од нєшка на базену Под час "Водова фесту" предвидзене и кампованє, а гоч урядова програма почина од 19 годзин, уж и през дзень на керестурским базену будзе друженє з музику.
       Єдна з главних провадзацих програмох будзе стретнуце мото-байкерох, котре орґанизоване у сотруднїцтве зоз Моторкашским клубом Руского Керестура "Шаркань". На ютре, 2. авґуста, моторкаше отримаю и дефиле през валал, а дефиле моторокох и моторкашо почнє на 14,30 годзин.
        Под час програми "Водова фесту", свойо програми роботи на окремних штандох представя младежски часопис "МАК", нєвладова орґанизация "ЯЗАС", гуманитарна орґанизация "Каритас", Младеж кулскей општини "ОКО", Младежска орґанизация "Пакт рутенорум", як и позната керестурска ґрупа навиячох "Русина" - "Дзиви швинї".
       Нєшка и на ютре, под час отримованя "Водова фесту", змаганя на ноцним турниру у малим фодбалє нє буду отримовани.