|
|
Символична пенєжна помоц спортистом
27. септемебр 2007. (Рутенпрес) - Национални совит
Руснацох тих дньох материялно допомогнул младим спортистом-Руснацом,
котри посцигли позарядово резултати у своЇх спортских дисциплинох.
Так, зоз по 10 000 динари допомогнута робота Ивана Лендєра, младого
плївача зоз Зренянину и Михаела Дудаша, атлетичара зоз Нового Саду.
Ище скорей, Национални
совит зоз исту суму участвовал у плаценю драги Єлени Геки Зарубици
зоз Руского Керестура, на шветове першенство до Русиї, дзе вона
постала и шампионка. Як гвари предсидатель Националного совиту
Руснацох Славко Орос, то за тераз перша, символична помоц нашим
спортистом, у рамикох терашнїх можлївосцох НС, а у планє окончиц
розгварки зоз одредзенима институциями и установами, пре ришованє
континуованого финансованя пририхтованьох тих спортистох за змаганя.
Тиж так, Национлани совит
планує орґанизовац и окремни приєм за спортистох з нашей националней
 заєднїци, котри посцигли добри резултати на рижних державних и
медзинародних спортских
змаганьох.
Орґанизацийни одбор "Костельниковей єшенї"
26. септембер 2007. (Рутенпрес) - На
ютре, 27. септембра, у Руским Керестуре у Доме култури, на 18 годзин
будзе отримана перша схадзка Орґанизацийного одбору за пририхтованє
тогорочней Културней манифестациї "Костельникова єшень".
У планє пририхтованє уж
Штернастей "Костельниковей єшенї", а на схадзки Орґанизацийного
одбору заплановане одредзованє термина єй отримованя, як и першей
концепциї програми тогорочней манифестациї.
Прешлого року, Културна
манифестация "Костельникова єшень" отримана од 10. по 18. новембер,
а спрам спознаньох, приблїжни термин отримованя плановани и того
року.
Найвироятнєйше же, як и
до тераз, програми "Костельниковей єшенї" буду отримани у Руским
Керестуре, Кули и Вербаше, як и по
других наших местох.
Евро-куп у боди-билдинґу
26. септембер 2007. (Рутенпрес) - У Руским
Керестуре, 29. септембра, будзе отримани Евро-куп, односно Вельке
отворене першенство Сербиї у боди-билдинґу у орґанизациї
керестурского атлетского клуба “Билдер Бачо”.
Змаганє будзе
орґанизоване у вецей дисциплинох боди-билдинґа за хлопи и жени,
боди-фитнесу, боди-моделсу, аеробику, фитнесу, змаганю парох, як и
других дисциплинох.
Заплановане же буду
участвовац змагателє зоз Шведскей, Ческей, Швайцарскей, Французкей,
Словениї, Мадярскей, Нємецкей, Горватскей, Словениї, Македониї,
Болгарскей, Румуниї и Сербиї, а медзи нїма и шветова и европска
шампионка у боди-билдинґу зоз Руского Керестура Илона Гека Зарубица.
Як
госци вечара наявени Ненад Росо, дохтор биомедицини и Шампион Европи
у боди-билдинґу.
Тиж так, наявене же госц
вечара будзе побиднїца "Биґ-брадера" з Болгарскей, односно їх
найпознатша
рок шпивачка Енджи, а соботово збуваня би мала провадзиц
и болгарска национална
телевизия.
СПОРТ
25. септембер 2007. (Рутенпрес) - У шестим змагательним
колє, фодбалере першей екипи керестурского "Русина" на домашнїм
терену, внєдзелю, 23. септембра, победзели екипу "Омладинца" зоз
Дироню зоз 2:0. Ґоли за "Русин" посцигли Живанов и Борис Шайтош.
Подросток "Русина" своїх парнякох зоз Дироню победзел зоз 3:2, а
ґоли за "Русин" посцигли Чизмар два и Чернок єден.
Перша екипа ФК "Русин"
зоз дзешец бодами тераз у верху таблїчки у Подручней лиґи Зомбор.
Рукометаше "Русина" у Першей
рукометней лиґи Сербиї-Войводина, прешлей нєдзелї дома звладали
"Синтелон1" зоз Бачкей Паланки зоз 31:25. Найвецей ґоли за "Русин"
дали Гафич осем, та Папуґа и Семан по седем.
Рукометашки "Русина" у остатнїм колє
страцели од "Спатрака" зоз Дебелячи зоз 32:25.
У идуцим колє фодбалере
"Русина" госцую у Ридїци, рукометаше у Чоноплї, а рукометашки у
Билей Церкви.
Под час викендох за нами, млади
атлетичаре керестурского "Русина" участвовали на двох змаганьох на
уровню Войводини.
Переше у Сенти, 15. септембра,
отримане першенство Войводини за младших пионирох, а ютредзень, 16.
септембра, у Новим Садзе Куп Войводини за старших пионирох.
Ґу тому, атлетичаре
"Русина" 22. септембра участвовали и на першенстве Войводини за
старших пионирох у Сенти. На першенстве Войводини за младших
пионирох хлапцовска штафета, котру творели Дарко Чернок, Мирко
Джуджар, Ґлориян Гарди и Дамир Хома, освоєли друге место и стриберну
металию. На истим змаганю, Зоран Колошняї, у обегованю на 800 метери
освоєл треце место и бронзову металию.
На Купу Войводини у Новим
Садзе участвовал тиж Зоран Колошняї, котри у змаганю зоз старшима од
себе - у обегованю на 2 000 метери, освоєл треце место. Борис Барна
ше змагал у скаканю до далєка, дзе освоєл штварте место, Тияна Гарди
ше обеговала на 100, а Желько Кршич на 300 метери.
Желько Кршич у Сенти, 22.
септембра, на Першенстве Войводини за старших пионирох, у скоку до
висока, зоз прескоченима 1,24 метери завжал треце место и бронзову
металию. У обегованю на 300 метери, Тияна Гарди у своєй ґрупи
завжала треце место, алє спрам резултату, нє вошла медзи перши три
змагательки.
Того викенду, 29. и 30. сепетембра,
атлетичаре и атлетичарки "Русина" планую участвовац на першенстве
Сербиї, у Сримскей Митровици, а за шицки змаганя пририхтує их
тренерка Саня
Тиркайлова,
професорка физичного у керестурскей Школи.
Премиєра "Кинґ Конґа" у Руским Керестуре
25. септембер 2007. (Рутенпрес)- Внєдзелю 23.
септембра Руски национални театер "Петро Ризнич Дядя" у Руским
Керестуре дал премиєру фалата Едґара Валаса "Кинґ Конґ" а у режиї
Цветина Аничича.
Пред полну салу керестурского Дома култури ґлумецка екипа РНТ
водзена зоз режийну руку Цветина Аничича одбавела у естетским и
сценским змислу нєзвичайну представу. Публика у керестурским Доме
култури була окреме нєсподзивана зоз ефектами и способом бавеня
представи, котра по своїм характеру мала прикмети мюзикла, бурлески
и сучасней дигитално подобовей технолоґиї.
Представа "Кинґ Конґ"
перша представа у новей театралней сезони РНТ у сезони 2007/08.
року, а спрам реакцийох публики котра кажду сцену випровадзела зоз
аплаузом, Аничичова представа приємне нєпсодзиванє за руски театер.
У представи бавела
ґлумецка екипа Михайло Зазуляк, Ксения Макаї-Орос, Дамир Провчи,
Дуня Ждиняк,
Иґор Ґрекса, Емил
Няради, Владимир Надь-Ачим, и Николая Сивч.
Пред формованьом Завода за културу
войводянских Руснацох
21. септембер 2007. (Рутенпрес) - Наютре, 22.
септембра, после Округлого стола, на схадзки Националного совиту
Руснацох, преширеним з його Одбором за културу, предвидзене
приношенє Одлуки о снованю Завода за културу войводянских Руснацох.
Предсдатель
Националного совиту Руснацох Славко Орос гварел же ше роби о новей
институциї, а намаганя же би ше под єдну институцию, обєдинєло
национални музей, архив, ґалерию и националну библиотеку, а фахово
людзе буду мац обовязку старац ше о тим.
- Покраїна
порихтана же би вєдно з националнима совитами Словацох, Румунох и
Руснацох, основала таки институциї. Мадярска национална меншина таку
институцию оформела пред даскельо роками и тераз то за нїх будзе и
формализоване-гварел Орос.
Тото цо
найзначнєйше, у буджету Покраїни буду заплановани ставки за
финансованє тих заводох.
У Заводу би як
стаємно заняти робели од 4 до 6 особи, а буду и гонорарно анґажовани
особи, як цо то музични сотруднїк, хореоґраф, дириґент, подобови
педаґоґ, критичар, етнолоґ, етноґраф, етно-музиколог.
- Мойо
роздумованє же би ше у таким Заводу окончовало и фахово роботи
вязани за нашо манифестациї, правелои одредзени проєкти за
конкурованє до фондацийох менаджерско-орґанизаторски роботи, рижни
файти семинарох, усовершованьох, пририхтованє кадрох за културу,
хтори нам нєобходни – наглашел Орос.
Финансийна
конструкция ище нє дефинована алє спрам калкукацийох средства за
роботу Завода виноша од 6 до 8 милиони динари до рока.
Зоз Одлуку
одредзиме и шедзиско будуцого Заводу, маюци у оглядзе дзе постоя
обєктивни условия за
тото - гварел Славко
Орос.
Представа "Кинґ Конґ"
19. септембер
2007. (Рутенпрес) - На нєдзелю 23. септембра Руски народни
театер "Петро Ризнич Дядя" премиєрно виведзе представу "Кинґ Конґ"
Едґара Валса у режиї Цветина Аничича. Премиєра почнє на 20 годзин у
велькей сали Дома култури у Руским Керестуре.
У представи бавя
Михайло Зазуляк, Ксения Макаї Орос, Емил Няради Дамир Провчи, Иґор
Ґрекса, Дуня Ждиняк и Владимир Надь Ачим.
Цена уходнїци 100 динари.
Можлївосц конкурованя до НИП за
фабрику води
19. септембер 2007. (Рутенпрес) - По 25. септембер би мало
буц виробене понуканє за виробок проєкта, як и главного проєкта за
будуцу фабрику води у Руским Керестуре, заключене на схадзки Комисиї
за ришованє проблема води за пице при керестурскей Месней заєднїци.
На
прешлотижньовей схадзки Комисиї спатрена дотерашня робота
пилот-построєня за пречисцованє води, а конкретни анализи и
резултати роботи того построєня буду познати до конца того тижня.
Як наявене у
Месней заєднїци, того тижня у Руским Керестуре будзе пребувац
руководителька проєкту пилот-посторєня др Милка Видович, котра би
мала сумировац и обєдинїц шицки резултати анализи води, односно
роботу пилот-построєня.
Од беоґрадского
Института за хемию, технолоґию и метали Месна заєднїца глєда
понукнице за сам проєкт, як и за проєкт вибудови фабрики води, а
идейни проєкт уж пририхтани.
Попри цени
вибудови фабрики води, у Месней заєднїци ше окреме инсистує на
преценьованю коштаня єдного кубного метеру пречисценей води котру би
ше масовно хасновало.
Термин за даванє
шицких понуканьох одредзени по 25. септембер, же би ше сцигло
порихтац прияви за
конкурс до Националного
инвестицийного плана.
Фабрика води єдине ришенє
14. септембер 2007. (Рутенпрес) - Нєобходно цо скорей
комплетовац шицку документацию и по конєц того мешаца конкуровац за
средства за вибудову фабрики води до Националного инвестицийного
плану (НИП) за наступни рок - основне зключенє на схадзки Комисиї
Совиту Месней заєднїци за ришованє проблему води за пице хтора
стреду отримана у Руским Керестуре.
Схадзку зволала
др Леона Доротич Ґутеша, предсидателька Комисиї пре, як гварела,
крадки час по одредзени рок за посиланє вимогох за средства зоз НИП
за 2008. рок.
Вона гварела же ше
активносци муша одвивац швидко же би ше нє запожнєло зоз
конкурованьом за обезпечованє средствох зоз НИП-у за наступни рок.
"Прешол уж єден
рок на ришованю проблему води, шейсц мешаци виглєдовацкей и
експерименталней роботи та мушиме вимагац же би нам тоти резултати
як и нєобходни информациї були цо скорей доступни - гварела др
Доротич Ґутеша и наглашела же вибудов фабрики води єдине ришенє же
би Керестурци достали здраву воду.
Же вибудов
фабрики води єдине ришенє за обезпечованє здравей води гражданом
Керестура зложела ше и др. Лиляна Соколова Дьокич зоз Заводу за
защиту здравя зоз Зомбору хтора гварела же пилот пошоренє дало добри
резултати води хтора по шицких здравствених параметрох одвитує
параметром зоз Правилнїка о здравствено исправней води.
Желько Ковач,
предсидатель Совиту Месней заєднїци наглашел же о вибудови фабрики
води годно бешедовац аж док ИХТМ да предрахунок за вибудов фабрики
води и за цену кубика.
"Аж док
достанєме тоти податки будземе знац чи треба правиц фабрику води,
або може буц исц на полнєнє фляшох зоз тоту воду хтору доставаме зоз
пошореня за пречисцованє и людзом предавац таку воду цо ше роби у
цалей Европи. Треба видзиц же цо будзе тунше людзом бо ше боїм же
зоз фабрики, вода будзе драга за каждодньове хаснованє за шицки нашо
потреби - гварел Ковач.
Йоаким Надь,
секретар Месней заєднїци Руски Керестур виявел же после законченя
експерименталного периоду хтори по контракту виходзи 27. септембра,
предстої проєктованє фабрики води и глєданє средствох за єй вибудов
и виражел наздаванє же керестурска Месна заєднїца будзе мац
потримовку и покраїнских и републичних орґанох.
Най здогаднєме.
Пре вельки количества арсену Покраїнска санитарна инспекция
забранєла у Руским Керестуре хасновац воду за пице и варенє зоз
месного водоводу.
Прешлого року
подписани контракт зоз Институтом за хемию, технолоґию и метали зоз
Беоґраду о поставяню пилот пошореня за пречисцованє води на хторим
фахови тим младих докторантох на чолє зоз др Милку Видович, зоз води
одклонєли арсен и други чежки метали.
Пред шейсцома
мешацами подписани контракт о предлужованю випитованя води у
периодзе од шейсцох мешацох же би ше утвердзело констатносц
квалитету, а ИХТМ по 27. септембер ма обовязку же би керестурскей
месней заєднїци дал, медзи иншим, и предрахунок за вибудов фабрики
як и цену
єдного
кубику води достатей по тей технолоґиї.
ПрEдсидатель општини подзелєл дарунки
першокласнїком
12. септембер
2007. (Рутенпрес) - На початку нового школского рока
предсидатель општини Кула, Светозар Буквич и його заменїк
Дамян Милянич, вовторок, 11. септембра нащивели керестурску ОШиҐ
“Петро Кузмяк”.
Вони стей нагоди
керестурским першокласнїком, котрих єст 50, медзи иншим подзелєли
пригодни буквар з основнима правилами справованя у транспорту,
флуоресцентни лайбики и наруквици, як и други пригодни дробнїци.
Светозар Буквич
и Дамян Милянич ше интересовали и за условия за роботу на початку
школского рока у шицких школох кулскей општини.През лєто до опарвяня
школох уложени значни материялни средства.До крестурскей школи
инвестовани три милиони динари.
У новим школским
року у шицких школох кулскей општини
до
першей класи основней школи уписани 482 школяре.
ЗОЗ ФОНДУ ЗА КАПИТАЛНИ УКЛАДАНЯ ВОЙВОДИНИ
ЗА КЕРЕСТУР КОЛО ШЕЙДЗЕШАТ МИЛИОНИ ДИНАРИ
05.
септембер 2007. -
Як и у шицких местох кулскей
општини, так и у Руским Керестуре, до конца того рока зоз Фонду за
капитални укладаня Войводини будзе реконстриоване явне ошвиценє, та
пооправяни дзепоєдни драги и дражки по валаласких улїцох. Медзитим,
за Руски Керестур з истого Фонду опредзелєни и пенєж за вибиванє
єдней цалком новей студнї на водоводу, як и за кладзенє закрица на
будову школско-спортскей гали, дознаваме од народного посланїка др
Дюру Мученския.
За вибиванє новей студнї на водоводу опредзелєни 9, а за
закрице на школско-спортскей гали 36 милиони динари, так же попри
роботох на явним ошвиценю и оправяню дражкох и драгох, до Руского
Керестура до конца рока будзе уложене коло 60 милиони динари.
- До конца рока по керестурских улїцох би терашнї лампи мали
буц заменєни зоз сучаснєйшима и моцнєйшима, а нєвязано за тото, ми у
Месней заєднїци вирабяме и проєкт за окремну реконструкцию явного
ошвиценя главней улїци, по Вельким шоре коло драги, цо озда и
найцмейши шор у валалє. За тото будземе конкуровац до другого кругу
у Покраїнским фонду за капитални укладаня, алє и до Националного
инвестицийного плана и верим же средства за тоту намену достанєме.
Будземе ше намагац же би роботи на тим започали уж того року, а кед
нє годно, вец идуцого - сиґурно. Кед слово о оправяню драгох и
дражкох, у Керестуре за тим єст вельо векши потреби у одношеню на
одобрени средства, алє ше мушело водзиц рахунку и на цалосни
средства котри у тей транжи опредзелєни за Керестур - гвари
Мученски.
Знаюци же студнї у Керестуре робя з минималним капацитетом, вибиванє
новей бул проєкт порихтани од скорей, та уж пошвидко будзе и вибита.
Ґу тому, Месна заєднїца уж пририхтує проєкт за наступни рок - за
вибиванє нових и оправянє постояцих студньох, як и оправяня цалей
водоводней мрежи. Того року, дзекуюци средством з Покраїнского
фонду, школско-спортска гала будзе закрита, а вредносц тей роботи
виноши 36 милиони динари. Идуцого року ше будзе конкуровац за
средства и до Националного инвестицийного плану и до Покраїнского
фонду, за дальши роботи на вибудови гали.
- Думам же Керестур може буц цалком задовольни з терашнїма достатима
средствами, бо 60 милиони нє мали пенєж, а ясно, треба водзиц
рахунку о шицких местох општини. А маме плани и за далєй, за други
конкурсни круг, та за НИП и думам же и того и идуцого року до
Керестура буду прицагнути значни
средства
- гварел др Дюра Мученски. (МЗ)
ҐАЗ ДО
КЕРЕСТУРА НА РОК
05.
септембер 2007. -
З оглядом же ище у цеку
доставанє шицких потребних дозволох и докончованє проєкту ґазней
драги од Кули по Оджак, та ришованє одредзених маєтних одношеньох на
напряме траси, гоч пенєжи одобрени, ґазна мрежа по Оджак, односно
крак за Руски Керестур, будзе поробена идуцого року. Проєкт у
закончуєцей фази, а министрови Дїласови зме предочели значносц
ґазоводного крака за Керестур, и достали зме твардзе обецанє же то
уходзи до НИП за 2008. рок. За тот ґазовод од Кули по Оджак
конкуровац будзе “Сербия ґаз” и очекуєме же початком идуцого рока,
то будзе єден з приоритетних проєктох. Накадзи роботи почню,
започнєме догварки коло ґазификованя Руского Керестура и Сивцу.
Мрежу по месце одроби даєдна заинтересована фирма, у сотруднїцтве
зоз “Сербия ґазом”, та реално мож очековац же по сезону зогриваня,
на рок ше у Керестуре годно огривац и на ґаз - гвари Мученски.
(МЗ)
ПРОЄКТИ ЗА
ВОДУ И КАНАЛИЗАЦИЮ
05.
септембер 2007. -
Зоз проєктом вредним коло 30
милиони динари, керестурска Месна заєднїца до НИП будзе конкуровац
за заменьованє цивох у водоводней мрежи. Ґу тому, будзе ше
конкуровац и за доставанє средствох пре виробок проєктней
документациї за канализацию Керестура, цо кошта до 7 милиони динари,
же би ше потим могло конкуровац и за вибудов самей канализациї, у
2009. року.
Закончованє роботох на
школско-спортскей гали тиж будзе проєкт на конкурсу НИП, алє и за
законченє роботох на жридлу водоводу - и за нови студнї и за
цалосне опреманє водоносного жридла.
Кед будзе готови идейни проєкт и
друга потребна документация за вибудов фабрики води, а на основи
випитованя цо у цеку, то тиж будзе єден з проєктох Месней заєднїци
за конкурованє до Националного инвестицийного плану. Тиж так, ту и
проєкт за индустрийну зону, алє, як гвари Мученски, єй витворенє
тераз завиши од ПК “Перши май”, понеже конкретни условия за одкуп
жеми понукнтуи и уж длугши час ше чека на
одвит
Комбината.
(МЗ)
ДРАГА ПО
КРУЩИЧ
05.
септембер 2007. -
Прелїванє драги у Русинскей
улїци, односно аж по центер Крущичу, завиши од вимирйованя длуствох
Дирекциї за драги спрам подприємства ”Войдраги” за рижни други
дотерашнї роботи. Робота на спомутей драги вредна коло 50 милиони
динари и од директора “Войдраги” дата информация же накадзи буду
вимерени стари длуства - почнє и прелїванє драги по Крущич. То будзе
поробене того року, лєм питанє часу кеди.
- Зоз предсидательом
општини мам догварку же би и ми, як општина, дали даяки аванс, же би
роботи могли почац, а у медзичаше поробя ище даєдну роботу.
Вихасновац красну хвилю, можебуц то будзе праве
кед и найвекши
роботи на полю, алє мож робиц
по фазох и за кратки час - гвари др Мученски.
(МЗ)
ДРАГА
КУЛА-КЕРЕСТУР ЗАВИШИ ОД НОВЕЙ СЕРБИЇ
05.
септембер 2007. -
Оправянє маґистралней драги
М-3, од Кули по Оджак будзе финансоване зоз средствох Шветовей
банки, пенєж обезпечени, медзитим, як гвари Мученски, єй
реконструкция планована аж за єшень идуцого року. А, за транспортну
инфраструктуру у Сербиї задлужена странка Нова Сербия.
- Прейґ Општинскохо
одбору тей странки тераз пробуєм дойсц до директора Дирекциї за
драги Йочича, и до самого министра Илича, же би ше тоту драгу
положело як приоритетну, за тот рок. Будзе поробена, медзитим, кеди
- завиши од странки Нова Сербия. Нажаль, ми ту нє маме таки вплїв и
сотруднїцтво, як на тоти министерства дзе министри, лєбо
предсидателє УО дзепоєдних ЯП з нашей странки, и вельо лєгчейше
доходзиме до жаданого цилю. Кед слово о тей драги - пита ше Нова
Сербия, та би коло того могли помогнуц и члени тей странки з нашого
штредку. (МЗ)
|
|
