|
|
Успишне госцованє и поволанка на
школованє до Керестура
31. октобер 2007.
(Рутенпрес) - На основи вчерайшей информациї о освойованю першого
места на Першим медзинароднм турнире русинскей младежи у малим
фодбалу, у Мукачове, Рутенпрес дознава деталї вязани за одбуванє
того медзинародного збуваня.
На змаганю у
Мукачове участвовали фодбалере пионирскей екипи рускокерестурского
"Русина", односно школяре седмих и осмих класох керестурскей
Основней школи "Петро Кузмяк", а екипу творели Деян Павлович, Борис
Гарди, Александер Чизмар, Борис Орос, Мирко Хома, Борис Барна и
Дамир Костелник.
Екипу з
Керестура предводзели Янко Хома, директор ОШиҐ "Петро Кузмяк" и
предсидатель СД "Русин", як и Боприс Шайтош, тренер и секретар СД
"Русин".
Змаганє младих
фодбалерох отримане 27. октобра у Мукачове, у України, под
покровительством Шветового конґреса Руснацох, а зоз потримовку
месного уряду города Мукачова у Закарпатскей обласци України.
Источасно, Перши
медзинародни турнир у малим фодбалу отримани у рамикох означованя
Дня Русинох у України, так же ше намага постац традицийни, вше з
нагоди 27. октобра.
Орґанизатор
турнира у Мукачове було Обласне здруженє подкарпатских Русинох.
Як гварел
директор керестурскей Школи и предсидатель СД "Русин" Янко Хома,
шицко отримане на барз високим уровню, зоз наисце окремну
орґанизацию. Шветочне отверанє провадзели даскельо ТВ екипи,
присуствовали му тамтейши терашнї и дакедишнї познати спортисти, так
же ше Керестурци задовольни врацели зоз госцованя у Мукачове.
Задовольство ище
векше, з оглядом же су и побиднїки того Першого медзинародного
турнира, а млади бавяч керестурского "Русина" Деян Павлович
преглашени за найлєпшого бавяча на цалим турниру.
Керестурци у
предзмаганю бавели зоз прешовску "Карпатию", котру победзели зоз
єден нула, а ґол за "Русин" дал Дамир Костелник. У финалним змаганю,
керестурски "Русин" зоз два єден победзел домашнї, мукачовски
"Русин", а ґоли дали Деян Павлович и Дамир Костелник.
Ютредзень, 28.
октобра, Керестурци нащивели Мукачовски замок, та други знаменїтосци
у Мукачове и Ужгородзе, дзе того дня отримована и културно-уметнїцка
програма з нагоди Дня Русинох.
Директор
керестурскей Школи Янко Хома вихасновал тоту нагоду и за промоцию
керестурскей, єдиней Ґимназиї по руски.
У тим напряме,
зоз чолнїками Обласного здруженя Русинох догварене о можлївосци
безплатного школованя до пейцох штредньошколцох зоз Закарапатскей
обласци у Руским Керестуре, цо з боку домашнїх барз позитивно
привитане.
Одход младих
фодбалерох до Мукачова помогли Национални совит Руснацох, Школа
 "Петро Кузмяк", Месна заєднїца Руски Керестур, як
и Спорске дружтво "Русин".
Вибудов каплїчки коло Катедралного
храму
30. октобер 2007.
(Рутенпрес) - При Катедралним храме св. оца Миколая прешлого тижня у
Руским Керестуре почала вибудов каплїчки зоз крипту за хованє
владикох.
Як дознаваме од
пароха керестурского катедралного храму о. Юлияна Раца, каплїчка,
односно крипта, будзе мац поверхносц 57 квадратни метери. Каплїчка
предвидзена и за отримованє богослуженьох за менше число людзох як и
за каждодньове хаснованє у жимским периодзе.
З тим подняцом,
церква св. оца Миколая, як Соборни храм Апостолского еґзархату за
грекокатолїкох у СЧГ, достанє и таки простор, яки звичайни у храмох
катедралного ранґу.
У керестурскей
церкви поховани троме крижевски владикове: 1940. року преосвящени др
Дионизий Няради, 1981. преосвящ. архиепископ др Гавриїл Букатко,
2004. преосвящ. архиепископ др Йоаким Сеґеди и 2005. преосвящ.
владика др Йоаким Гербут, владика Скопско-призренски и еґзарх за
католїкох восточного обряду у Македониї.
Вибудов крипти и
каплїци при керестурским храме окончує Будовательне подприємство
"Слован" зоз
Селенчи, а дзвиганє обєкта
под закрице би мало буц готове за два мешаци.
Керестурци перши на медзинародним
турниру
30. октобер 2007.
(Рутенпрес) - Подросток фодбалского клуба "Русин", на Першим
медзинародним турнире младих спортистох-Руснацох у малим
фодбалу, у України, освоєли перше место.
У орґанизациї
Обласного здруженя подкарпатских Русинох зоз Ужгороду, у Мукачове
прешлей соботи, 27. октобра, отримани Перши медзинародни русински
турнир у малим фодбалу за младих.
На турниру
участвовали фодбалски екипи зоз Прешова, Ужгороду и Мукачова, и
Руского Керестура.
Керестурски
млади фодбалере перше з єден нула победзели парнякох зоз Прешова, а
потим, у финалу, и екипу з Мукачова - зоз два-єден.
Екипу младих
фодбалерох зоз Руского Керестура предводзели директор керестурскей
ОШ и Ґимназиї
"Петро Кузмяк", источасно и предсидатель СД "Русин" Янко Хома, як и секретар
СД "Русин" Борис Шайтош.
Министер польопривреди отворел Фарму швиньох-прашачкох
27. октобер 2007. (Рутенпрес) - Фарма приплодних
швиньох у Руским Керестуре допоможе же би Сербия викрочела ґу
европским стандардом и квалитету, гварел вчера министер
польопривреди у Влади РС Слободан Милосавлєвич на отвореню тей
фарми.
- Нам крочаї ґу
квалитету яки Европа глєда нєобходни, бо Сербия през розвой
польопривреди, односно продукцию поживи и творенє своїх робних
маркох пошвидша економски розвой нашей жеми и олєгчала уключованє
Сербиї до европских интеґрацийох - гварел Милосавлєвич у Руским
Керестуре.
Здогаднїме, иста
фарма шветочно отворена пред трома роками, после укладаня од прейґ
1,5 милиони еври, же би ю инвеститор и дотерашнї власнїк Велимир
Хома зоз Руского Керестура, у юлию того року предал свойому
дїловному партнерови Боривою Яковлєвичови.
Попри нового
власнїка фарми Яковлєвича, на шветочносци у Руским Керестуре
присуствовали и дїловни партнере його подприємства - "Бонида Аґрару"
- Кристоф Нойман, директор фирми “Прикс” и Ґергард Ленґгауер,
директор предавяня за централну и юговосточну Европу фирми “Аку
функи”, обидвоме зоз Нємецкей.
Фарма у Руским
Керестуре ма сертификати "Хасап" и ЮС ИСО 9001:2001, з чим
потвердзує же шицки єй обєкти и поступки занятих усоглашени з
найстрогшима вимогами хованя швиньох, яки мож видзиц у жемох ЕУ.
Робота на фарми заснована на найновших наукових
досцигнуцох и технолоґийох и попри злєпшованя власного стада,
оспособена є за злєпшованє квалитету основних стадох и на других
фармох, так же будзе злєпшани расни состав на фармох у Сербиї, котри
нє обйовйовани коло 15 роки.
Капацитет фарми будзе 250 швинї-прашачки, а понеже "Бонида
Аґрар" и ґенерални заступнїк Нємецкого здруженя продуковательох и
виховательох швиньох - ЕГЗХ, на фарми у Керестуре буду заступени
раси швиньох як цо то: нємецки ландрас, нємецка племенїта била
швиня, як и раси Пиетрен зоз изолованим ґенетским стресом.
Карменє и
вентилация на фарми автоматизована, а рочно будзе випродуковане 2
000 приплодни швинї-прашачки, з опредзелєньом и за вивоз до Чарней
Гори и Босни и Герцеґовини.
Контролу приплодного материялу, будзе окончовац
Институт ЕГЗХ зоз Ґрубу и Шварценауу у Нємецкей, а "Бонида Аґрар"
сотрудзує и зоз Польопривредним факултетом у Новим Садзе и Науковим
институтом
за ветеринарство Сербиї з Беоґраду.
За
шмециско 850 000 динари
24. октобер 2007. (Рутенпрес) - На остатнєй схадзки
Совиту ище раз наглашена потреба за винаходзенє даякого другого
ришеня за вивоженє шмеца у самим валалє и зоз Руского Керестура.
Спрам
финансийного звиту за перши дзевец мешаци того року за роздрильованє
шмециска утрошене уж коло 850 000 динари, цо оценєте як вельки
трошок, та ше муши роздумовац о иншаких ришеньох.
Шмеце ше у
Руским Керестуре одклада на депонию котра нє по законских санитарних
стандардох, и
тераз ше ю водзи як депония
порихтана за гашенє, односно за заверанє.
Можлївосци за канализацию
23, октобер 2007.
(Рутенпшрес) - На остатнєй схадзки Совиту Месней заєднїци Руски
Керестур, бешедоване о виробки проєктней документациї за
канализацию, и за главну канализацийну трасу.
На основи
конфиґурациї терену, найвигоднєйше место за кладзенє пречисцовача за
канализацию було би по концу Русинскей улїци, спрам Косанчичу.
Керестурска
Месна заєднїца будзе конкуровац до покраїнского фонду за капитални
укладаня, пре доставанє средствох за виробок шицкей потребней
документациї за пречисцовач,
а потим и за цалу канализацийну мрежу.
Отримана ювилейна, Дзешата "Дньовка"
 23.
октобер 2007. (Рутенпрес) - Младежска културна манифестация
"Дньовка", того року дзешата по шоре, отримана од 19. по 21.
октобер, у Руским Керестуре и принєсла вецей интересантни културно-забавни
змисти зоз котру презентована творчосц младих у Керестуре
Ношителє
орґанизациї манифестациї и на тот завод була младежска орґанизация
"Пакт рутенорум", а того року ше єй придружели младежски часопис
"Мак", як и ґрупа младих навиячох рускокерестурского "Русина" -
"Дзиви швинї".
Ювилейна
"Дньовка" почала пияток, 19. октобра, зоз отвераньом вистави
подобових роботох младих у голу Дома култури, котру пририхтала
Биляна Романова, наставнїца у керестурскей ОШ и Ґ "Петро Кузмяк".
Роботи виложели
Златко Чизмар, Михайло Сабадош и Александра Мецек, Ана Костичова и
Виолета Сопкова.
У велькей сали
Дома култури свойо ґлумецки схопносци указал Иґор Ґрекса, котри з
тей нагоди виведол монодраму "Шекспир, метла, кабел, и пар динари".
Истого дня, у
кафичу "НС" ушлїдзела промоция компакт-диску младих рок-ґрупох
"Демони", у виданя "Мак-у".
Главна
програма ювилейней, Дзешатей културней манифестациї младих
"Дньовка", отримана всоботу, 20. октобра, на велькей сцени
рускокерестурского Дома култури и очиглядне же "Дньовка", од
скромней, постала єдна цалком озбильна манифестация.
Свойо поетски
твори пречитали уж доказани млади керестурски поетеси - Ася
Папуґова, Златка Чизмарова и Наташа Регакова, та, з вибором темох
свойого писаня окремни Андрей Рац, як и Владислав Цап.
Наташа Регак
соло одтанцовала єден стилизовани танєц, на музику и зоз
провадзеньом на ґитари Сашу Палєнкаша, иншак єдного з главних
орґанизаторох тогорочней "Дньовки".
Же гушля цалком
пасує и до забавней и популарней музики, удатно доказали Олеся и
Оксана Рамачово, а публика окреме щиро и гласно привитала вше
популарнєйши млади керестурски состав "Крейзи казинс"котрого творя
Дориян Чизмар, Андрей и Иван Симуновичово и Алексей Макаї.
Луцидносц и
знаходлївосц младосци указана и з єдну нєзвичайну музичну точку:
ад-гок позберани бенд "Припейд" на мобилних телефонох одграл
"Симфонию за седем мобилни телефони", под "дириґенством" Мирка
Горняка Колея, котри вєдно зоз Борисом Папуґом водзел и конферансу.
Дзешата
"Дньовка" закончена внєдзелю, 21. октобра, на керестурским Ярашу,
дзе, попри стаємних навиячох "Дзивих швиньох", млади поволани дац
потримовку фодбалером керестурского "Русина".
Радує и податок
же ше коло орґанизациї тогорочней ювилейней "Дньовки" позберали и
обєдинєли млади зоз "Пакта Рутенорум", "Дзивих швиньох" и
младежского часопису "Мак", а млади на найлєпши способ указали
свою
креативносц и интересованя, котри були презентовани на способ
прилагодзени младежи.
Перша "Чукияда"
23. октобер 2007. (Рутенпрес) - Внєдзелю, 21. октобра,
на беґелю, здруженє керестурских рибарох "Коляк" орґанизовало перше
змаганє рибарох у лапаню чуки на дуґов, такволану "Чукияду".
У змаганю
участвовали 19 рибаре, но, улов нє бул на завидним уровню, так же
влапени лєм штири чуки котри уходзели до конкуренциї за меранє и
награди.
Перше место у
лапаню чукох на дуґов освоєл Владо Гарди,
друге
Михал Фекете, а треце место завжал Мирко Фекете.
Задлужованє и прейґ банки
19. октобер 2007. (Рутенпрес) - Як Рутенпрес дознава
од власнїка подприємства "Юарбис" Славка Раца, попри
задлужованя на основи паритетох, тей єшенї керестурским землєдїлцом
понукнута можлївосц задлужованя за польопривредни култури, и то
прейґ банки.
- Предкладам же
би ше людзе задлужовали у динарох, прейґ Хипо Алпе Адрия банки, дзе
на основи оцени маєтку, фаховци з банки одредза можлївосц
задлужованя, односно, до якей суми ше мож задлужиц, зоз камату од 1
одсто на мешачним уровню - гвари Рац.
- Задлужованє
тирва до 12 мешаци и на тот способ, без огляду на тарґовищни цени,
кооперант точно зна кельо ма длуство, а свой продукт будзе предавац
там дзе му будзе найвигоднєйше. Паритети вецей нє буду важни - гвари
Рац.
Задлужованє
прейґ банки мож окончиц прейґ "Юарбису", а акция тирва од 1.
октобра, док ше динарске длуство враца до
12 мешаци.
Приключованє на АДСЛ
19. октобер 2007. (Рутенпрес) – Однєдавна ше и
Керестурци можу приключиц на АДСЛ интернет-вязу, виявел Тихомир
Фейди, систем-унжинєр у керестурскей "Елкомедиї".
У провайдеру
"необее", за котри роби "Елкомедия", уключованя почали 24..
септембра и перши на тоту систему интернету приключена управа ПК
"Перши май".
Хаснованє АДСЛ
конкретно значи же по телефонских дротох, паралелно зоз телефонску
аналоґну линию, иду и податки за интернет, односно за диґиталну
линию АДСЛ.
Вязи єдна другей
нє завадзаю, цо значи же источасно мож буц на интернету, а при тим
фиксна телефонска линия шлєбодна, односно нормално мож телефоновац.
Як гвари Фейди,
дополнююца вигодносц АДСЛ же з нїм интернет-вяза минимално дзешец
раз швидша як на обичним интернету
Приключованє у цеку, а
у "Елкомедиї" найтуньша цена такого интернету 750 динари за 30
годзини мешачно (у предплати), лєбо 1 350 динари за цали мешац -
нєпреривно 24 годзини.
Опрему за АДСЛ
ше достава на реверс, а мож ю и купиц.
Телефонски рахунок нє
обтерховани, а за интернет вецей нє треба уплацовац годзини, як за
класични интернет, шицко мож прейґ АДСЛ-а.
Пошвидко, АДСЛ линию
годно уводзиц и за диґитални - АСДН телефонски линиї.
АДСЛ
интернет-линию мож набавиц и прейґ Телеком Сербиї, котра, без огляду
на
провайдера, скапчує хаснователя
на вязу зоз АДСЛ.
Керестурски атлетичаре у Червинки
17. октобер 2007. (Рутенпрес) - Млади атлетичаре
керестурского АК "Русин" освоєли дзевец медалї на змаганю зоз
своїма парняками, котре всоботу, 13.октобра, отримане у Червинки. Уж
треци рок, Атлетски клуб "Червинка" орґанизує змаганє зоз
керестурским "Русином", а попри младих, свойо моци у атлетики
одмерюю и атлетичаре-ветеранє.
Змаганя за
младших и старших пионирох були орґаниозовани у такв. тробою, котри
облапял скаканє до далєка и обегованя од 60, та до 600 метери, у
зависносци од катеґориї змагательох.
Зоз Червинчанями
ше змагали 18 атлетичаре з Керестура и у младшим возростуи (друга и
треца класа ОШ), Мирко Джуджар завжал перше место. Помедзи
дзивчатох у истей катеґориї, Антония Тиркайла завжала друге, а
Светлана Балїцки треце место.
У катеґориї
хлапцох з пиятих и шестих класох, Зоран Колошняї завжал перше, Давид
Катона друге, Дамир Хома треце место у тробою, а од дзивчатох, у тей
катеґориї перше место освоєла Кристина Шепински.
У змаганю старших
пионирох (седма и осма класа ОШ), Борис Барна освоєл перше, а Желько
Кршич треце место.
У змаганю
ветеранох, дзе ше руцало копию, скакало до далєка и бежало на 50
метери, Михайло Тиркайла завжал друге место, а шицки змаганя
провадзели и родичи младих атлетичарох, так же то було и єдно красне
друженє двох атлетских клубох.
Прешлого тижня, 11.
октобра, керестурски АК по другираз нащивел наш познати атлетичар
Михаил Дудаш и у барз нащивеним роботним тренинґу, младим
керестурским атлетичаром пренєсол свойо искуства зоз пририхтованьом
и змаганьох у "кралїци спортох".
Приказани и ДВД
зоз дзепоєдних змаганьох дзе участвовал, а понеже ше робело у сали,
окремна повага була дата на технїку скаканя до висока. Керестурци з
одушевийом привитали Дудаша, а и вон виражел задовольство зоз
поробеним, з обецунку же на яр ище раз нащиви АК "Русин".
Зоз соботовим
наступом у Червинки, АК "Русин" закончел тогорочну сезону
змаганьох,
а през жим, ушлїдза пририхтованя за наступну.
Акция на збераню старого паперу
18. октобер 2007.
(Рутенпрес) - У рамикох "Дзецинского тижня", школяре од першей по
осму класу ОШ "Петро Кузмяк" участвовали у акциї “Зачувай свойо
щешлїве древо” и шицки вєдно назберали 3 102 кили старого паперу.
Найвреднєйши були школяре "штвартого в" оддзелєня, котри назберали
509 килограми старого паперу.
З нагоди 16.
септембра, Шветового дня защити озонского обмотку, акцию на уровню
Сербиї орґанизовала Видавательна хижа "Клет" зоз Беоґраду, з цильом
едукованя дзецох о значеню чуваня свойого животного штредку,
розвиваня свидомосци о тим, а з акцию розвивани и змагательни дух,
заєднїцтво, та и старанє о своєй школи. Школи
сами орґанизовали и одкуп старого паперу, а достати средства буду
вихасновани на хасен школи и дзецох.
Назберани папер,
Школа предала по цени од 3,5 динари за килограм, а акция
подрузумює
и конкурованє за награду за Най-еко
школу.
Можлївосц студираня у Прешове
18. октобер 2007. (Рутенпрес) - Приватна Висока школа
медзинародного поднїмательства зоз Прешова, котра роби з нємецким
партнером -Интернационалну школу за менаджмент зоз Дортмунду, од
идуцого академского 2007/08. року понука студиранє и ґимназиялцом з
Ґимназиї “Петро Кузмяк” зоз Руского Керестура, та и другим
заитересованим Руснацом.
Вовторок, 16.
октобра, у керестурскей Ґимназиї окончена презентация прешовскей
Високей школи ґимназиялцом руских оддзелєньох и їх родичом.
Студиї ше
одвиваю по болоньскей декларациї и за перши ступень тирваю три роки,
а у пририхтованю и маґистерски студиї.
Наставни язик
студийох словацки, алє ше през шицки семестри вельку повагу дава и
виучованю двох странских язикох - обовязному английскому и
нємецкому, лєбо русийскому, цо студентом и законченим младим
фаховцом дава ище векшу мобилносц.
Прияви за школу
мож посилац уж од януара идуцого року, а вибор будуцих студентох
школа окончує на основи свидоцтва и оценох у штреднєй школи, цо
значи же нєт примаци испити.
Школарина за
студиранє на Високей школи за медзинародни менаджмент у Прешове
виноши 1 300 еври рочно, обезпечене змесценє у интернату кошта 80
еври, костиранє ище 120 еври, а за студиранє нашим студентом
потребна и рочна виза, цо ище коло 100 еври.
За потенциялних
студентох зоз наших крайох приманє до тей прешовскей Високей будзе и
на основи препоруки керестурскей Ґимназиї, котра заинтересованим
може дац и шицки други информациї о студираню у Прешове, а о шицких
подробносцох заинтересовани ше можу информовац и на сайту школи
www.ismpo.sk
ДАСКЕЛЬО ПОДАТКИ О ПРЕЗЕНТАЦИЇ
ruskikerstur.org
О
атмосферскей и води за пице
5. октобер 2007. (Рутенпрес) - За коло єден рок, пре
одводзенє атмосферскей и пожемних водох, у Руским Керестуре
вичисцени коло 10 километри ярки - гварел секретар Месней заєднїци
Йоаким Надь на остатнєй схадзки Совиту МЗ.
Роботи на ушореню атмосферскей канализациї буду предлужени и
надалєй, окреме на ключних местох, а тераз у цеку роботи у улїци
Ирини Провчи, по Лонґов. Ґу тому, заплановане преглїбиц ярок од
пошти по Ресторан, положиц пайпи, же би ше и ту направело места за
парикарованє.
Предложене же би проблематични септични дзири опрез Дома здравя и
коло квартельох на Новим шоре убудуце чисцела МЗ, а тоту роботу би
ше наплацовало прейґ комуналних рахункох, о чим зоз жителями
квартельох на тих локацийох пошвидко будзе бешедовац Комунални одбор
МЗ.
З
оглядом же ше закончел законтрачени шейсцмешачни пробни период
роботи пилот-построєня за пречисцованє води, после дорученого звиту
о роботи з боку Института за хемию, технолоґию и метали, Комисия за
ришованє проблематики води предложи дальши активносци по тим питаню.
У
наиходзацим перидозе, трошки коло роботи пилот-построєня пребера
Месна заєднїца.
На
поволанку за явни набавки, за поставянє мульних пумпох, до МЗ сцигли
штири понуканя, у виносу од милион 720 000, по 1,5 милион динари. За
виводзача роботи вибране найменше понуканє "Панакви" зоз
Нового
Саду, у висини од милион и пол динари.
Проблеми зо з шмециском
4. октобер 2007. (Рутенпрес) - Совит Месней заєднїци
на остатнєй схадзки розпатрал и проблеми вязани за керестурску
депонию шмеца.
Так
розаптрена петиция гражданох котри биваю коло шмециска, як и допис
єдного Керестурца котри у часци шмециска направел рибалов.
У
одвиту на допис, власнїк рибалова ма з потребнима документами
доказац же рибалов направени реґуларно, та ше потим превежню
потребни крочаї, а у одвиту на петицию ше гвари же Совит порихтани
на кажде сотруднїцтво зоз гражданами у ришованю проблема шмециска.
Праве у цеку активносци на виробки проєкта санациї шмециска,
зґурованє шмеца окончує ше плански и порядно, цо вимага и озбильни
средства, а часц ше загарта и зоз глїну. Уровень насипаней жеми нє
будзе висши од заградох, а на месце дзе ше хвильково депонує шмеце
завадза и направени рибалов.
Коло шмециска викопани одводни ярок зоз долїни, вон будзе и
вичисцени, а од улїци Народного фронта тиж будзе охабени єден ярок
за одводзенє води - гвари ше медзи иншим у одвиту на петицию
гражданох.
На
Совиту заключене же ше одредзи точну гранїцу медзи шмециском и
заградами, за цо потребне и ґеодетске меранє, медзитим, за проблем
шмециска потребне тирваце ришенє.
Покля ше на уровню реґиї нє розриши депонованє шмеца на єдно место,
Совит муши озбильно розпатриц предлог же би ше за вивоженє шмеца
анґажовало даєдно явне комуналне подприємство.
Найблїзше то ЯКП "Комуналац" зоз Кули и на єдней з наступних
схадзкох о тим будзе окремней бешеди, з тим вецей же опредзелєня
держави иду у напряме творенє реґионалних депонийох рециклованого
шмеца.
Одредзену власну депонию, валал би мушел мац и надалєй, алє нє на
тим месце дзе є тераз, гварене на
схадзки Совиту
Месней заєднїци.
Єшеньски роботи при концу
5. октобер 2007. (Рутенпрес) - У керестурским хотаре у
цеку ламачка кукурици и гоч було нагадованя же урожаї буду менши пре
сушу, вони приблїжни як и прешлого року, лєбо су за трецину менши од
прешлорочних.
Як
Рутенпрес дознава у керестурских задруґох, штреднї урожай кукурици у
чуткох виноши коло 50 метери по гольту, а лупаней кукрици од 50 до
55 метери по гольту, зоз штредню влагу од 16 до прейґ 20 одсто.
У
подриємстве "Юарбис" наглашую же ше велї Керестурци опредзелєюю за
лупанє кукурици уж на полю, котру ше такой предава, лєбо охабя на
сушенє.
У
зависносци од влаги, цена лупаней кукуруци виношела 13, 12,5 и 12
динари за килограм, а у "Юарбисовей" сушари, по 3. новембер сушенє
кукурици ше нє
наплацує, а после того датума почнє
наплацованє сушеня кукурици.
Пошвидшац инициятиву о Руским Керестуре як
општини
5. октобер 2007. (Рутенпрес) - После
свойофайтовогто розмаху у витворйованю инициятиви же би Руски
Керестур постал општинске место, остатнї даскельо мешаци ше стануло
зоз дальшима активносцами на планє витворйованя тей инициятиви -
гварене на остатнєй схадзки Совиту рускокерестурскей Месней
заєднїци, 3. октобра.
Здогаднїме - у прешлорочней анкети, аж коло 90 одсто Керестурцох ше
позитивно вияшнєло же би Руски Керестур бул општина.
Предсидатель Комисиї за запровадзованє инициятиви, Юлиян Колошняї
Ристо, виявел же час же би Совит Месней заєднїци завжал тварде
становиско по питаню витворйованя тей инициятиви - о Руским
Керестуре як општинским месце.
З
оглядом же на остатнєй схадзки нє присуствовали шицки члени Совиту,
а таке питанє завредзує озбильну розправу и заєднїцке опредзелєнє,
догварене же по
ше отрима окремну Схадзку
Совиту, на тоту тему.
За Волонтерски камп утрошене коло 216 000 динари
4. октобер 2007. (Рутенпрес) - За роботи на базену под
час Волонтерского кампу, утрошене коло 216 000 динари, гварене на
схадзки Совиту Месней заєднїци, 1. октобра.
Прейґ конкурса, од Еколоґийного општинского фонду за тоту намену
достати 120 000, а Месна заєднїца видвоєла ище коло 96 000 динари.
Под
час Волонтерского кампу, коло базену розчисцени терен, насипани
писок на дражку и на терен за одбойку, пополньовани дзири, офарбени
метални часци оградох и драбинкох, направени польски тоалет,
поробена конструкцию за слункобрани и розчисцени позарастани часци
коло базену.
Попри младих, волонтерски анґажовани баґер Любослава Еделинския
Славчеца, превозки "Юарбиса", утоварйовач ПК "Перши май", майстор
Янко Виславски направел туш, Яким Надь направел дзвери за тоалети
котри буду положени идуцей сезони, як и слункобрани, котри шиє
Александра Надь, а отримованє волонтерского кампа допомогли и велї
други Керестурци.
Еколоґийни рух Руского Керестура од Општинского еколоґийного фонду
будзе конкуровац за потребни средства за фарбенє цалого базену зоз
окремну фарбу, як и
за орґанизованє школи
плїваня за школярох нїзших класох основней школи.
Анализа вивоженя шмеца
3. октобер 2007. (Рутенпрес) - На остатнєй
схадзки Совиту Месней заєднїци Руски Керестур, пондзелок, 1.
октобра, найвецей бешедоване о вивоженю шмеца, од кеди тоту роботу
Месна заєднїца наплацує.
Пре
пригварки гражданох, заключене же би Месна заєднїца, односно єй
Комунална служба мушела буц дакус флексибилнєйша при збераню шмеца
опрез керестурских обисцох.
Опредзелєнє же ше шмеце муши паковац до мехох - будзе важиц и
надалєй, медзитим,
годно викладац и шмеце спаковане до даякей другек амбалажи, алє таке
шмеце муши буц прикладно запаковане и велькосци и чежини єдного
меха.
Ґу
тому, Комуналней служби Месней заєднїци будзе наложене же би
позберала шицки мехи и шмеце виложене опрез єдного обисца, а нє же
би ше притримовали опредзелєня же єдна особа з обисца до тижня може
виложиц єден мех.
Зберанє пластичних фляшох, у за тото окремних мехох котри мож
задармо
достац у МЗ, будзе и надалєй, а вивоженє пластичней
амбалажи безплатне.
|
|
