Руски Керестур

Архива висткох - новембер 2007.

Кампаня за вибор найзначнєйших Руснацох
27. новембер 2007. (Рутенпрес)– Национални совит рускей националней меншини порушал акцию же би ше до конца рока вибрало найзначнєйших поєдинцох у рускей заєднїци.
         Совит поволал шицких поєдинцох, институциї, орґанизациї и здруженя рускей националней меншини же би по 31.12.2007. року предложели поєдинцох и колективи хтори по їх думаню найбаржей афирмовали нашу заєднїцу у 2007. року у рижних обласцох живота.
         Предкладаня и обгрунтованя хтори буду обявени на бокох "Руского слова"" лєбо директно доручени Националному совиту помогню членом Совиту же би лєгчейше принєсли одлуку о тим и на одредзени способ визначели и верификовали тоти досяги.
         Писмени предкладаня и обгрунтованя шицки котри жадаю участвовац у тей своєфайтовей анкети можу посилац на адресу новинох "Руского слова" ruske@eunet.yu або на адресу Националного совиту rusovit@eunet.yu

У виробки контракт о одкупу жеми
24. новембер 2007. (Рутенпрес) - Тих дньох, представителє Совиту Месней заєднїци посцигли догварку зоз ПК "Перши май", о одкупу жеми за формованє индустрийней зони на уходзе до Руского Керестура, гварене на остатнєй схадзки Совиту МЗ, 21. новембра.
       Як гварене, место глєданих 20, зоз Комбинатом посцигнута догварка о одкупу 10 гектарох жеми за индиструйну зону по цени од 5 200 еври по гектаре.
       Виробени и Нарис контракта о условийох одкупа жеми, котри того тижня розпатрал и општински явни правобранитель.
      На Совиту заключене же за тоту роботу потребне анґажовац фахову правну помоц, же би после виробку конєчней верзиї, контракт о одкупу 10 гектарох жеми за индустрийну зону, пошвидко бул и подписани.

"Дньовки” 7 000 динари
24. новембер 2007. (Рутенпрес) - Младежскей културней манифестациї "Дньовка" Совит Месней заєднїци Руски Керестур помогнул зоз 7 000 динари.
Совит од младежскей орґанизациї "Пакт Рутенорум" будзе вимагац же би доручели план своїх активносцох за наступни рок, же би ше и тоту орґанизацию могло плански финанасовац з буджету Месней заєднїци. Ґу тому, заключене же при Месней заєднїци потребне оформиц єдно окремне цело котре би ше занїмало лєм зоз младима и роботу младих, як пре їх уключованє до роботи Месней заєднїци, так и пре уключованє Месней заєднїци до активносци младих у валалє.

Вибрани виводзаче роботох
24. новембер 2007. (Рутенпрес) - На своєй остатнєй схадзки, 21. новембра, Совит Месней заєднїци Руски Керестур вибрал вицей виводзачох роботох, котри конкуровали на основи явней набавки за дзепоєдни комуналниу роботи у валалє.
     Так, за проєктованє явного ошвиценя у главней керестурскей улїци, у Маршала Тита (Вельки шор), спомедзи трох понукачох, як найтуньши вибрани "Ателє" АД зоз Темерину, чия робота виноши 240 000 динари и будзе плацена зоз комуналних средствох.
         За будовательни роботи на докончованю каплїчки вибрани "Поп ґрадня" зоз Темерину, котра спомедзи трох понукачох дала найвигоднєйшу цену од 1 881 000 динари.
         "Поп ґрадня” коло каплїчки вибудує паркинґ за превозки, дражку за пешакох, а будзе поставена и часц огради коло теметова.
        За ошвиценє коло каплїчки на теметове, Совит вибрал рускокерестурску "Електромонтажу", котра за тоти роботи дала найвигоднєйше понуканє од 265 150 динари.

Нєшка "Вечар приятельох Каритасу"
24. новембер 2007. (Рутенпрес) - Нєшка, 24. новембра, у Руским Керестуре будзе отримани "Вечар приятельох Каритасу" котри задумани як друженє особох и представительох установох, орґанизацийох и подприємствох котри на рижни способи потримую роботу Каритасу.
Источасно, "Вечар приятельох Каритасу" будзе нагода и за презентованє дотерашнєй роботи тей гуманитарней церковней орґанизaциї, котра успишно зажила у Руским Керестуре.
"Вечар приятельох Каритасу" почнє на 18 годзин у будинку Каритасу у церковней порти.

Будзе жимска служба
24. новембер 2007. (Рутенпрес) - По швидким поступку ше оправи превозку валалского Добродзечного огньогасного дружтва, котру ше хасновало и за розгартанє шнїгу по керестурских улїцох, одлучене на остатнєй схадзки Совиту Месней заєднїци Руски Керестур.
         Здогаднїме, єден огньогасни камион оспособени же би ше на ньго монтирало роздрильовач шнїгу за потреби Комуналней служби Месней заєднїци.
        Як гварене на остатнєй схадзки Совиту МЗ, Комунална служба Месней заєднїци длужна чисциц шнїг опрез на явних поверхносцох у центре валала котри отримує, а опрез других будинкох, шнїг длужни чисциц власнїки будинкох и киоскох.
      У тим напряме, и на єдну вельку косачку (як мотокултиватор), будзе положени менши роздрильовач шнїгу, за цо вона опремена и оспособена.

Ришованє атмосферскей води
24. новембер 2007. (Рутенпрес) - Совит Месней заєднїци принєсол одлуку же би ше до ярку опрез будинку Добродзечного огньогасного дружтва, положело пайпи и ярок загарло, а за тоти роботи будзе опредзелєне 221 000 динaри.
У тей часци центра, у Русинскей улїци предвидзени и други потребни роботи на ушореню одводзеня атмосферских водох, а при вимиваню пайпох и шахтох помагаю и рускокерестуски огньогасци, зоз свою опрему. Ґу тому, на одводну циву до септичней дзири опрез валалского Дома здравя, будзе положени вентил, пре ефикаснєйше полнєнє и чисценє тей септичней дзири.

иНТЕРНЕТ РАДИО руски керестур
Од 30. октобрa вшадзи у швеце можеце слухац Интернет Радио Руски Керестур на адреси (линку) mms://82.208.224.101/rrk Достаточно кликнуц на тот линк и отвори ше Windows Media Player лєбо Winamp у нїм аутоматски ше слуха радио.
Кед постої даяки проблем и нє сце ше аутоматски отвориц линк, вецка пробуйце у єдним од тих двох програмох прициснуц File и вибрац Open URL ... и унєсц або прекопирац линк и прициснуц ОК.
Tиж на шлїдуюцим линку http://118511.netguestbook.com/ отворена кнїжка за шицких слухачох интернет радия Руски Керестур дзе можеце дац вашо коментари, предкладаня, критики, думаня ...

Вибране руководство Здруженя паприґарох
21. новембер 2007. (Рутенпрес) - На остатнїм сходзе керестурских продуковательох паприґи, 19. новембра, конєчно вибране и руководство Здруженя паприґарох "Капсикум анум", котре реґистроване пред даскельо роками, медзитим, без руководства нє могло функционовац.
         Так вибрани Управни одбор, котри творя Славко Малацко, Михайло Джуня, Микола Винаї, Юлиян Медєши, Янко Планчак, Владимир Колєсар и Владимир Надь Ачим. Прилапене предкладанє же би УО вибрал предсидателя Здруженя и його заменїка.
         На пондзелковей схадзки вибрани и Надпатраюци одбор Здруженя, до котрого вошли Михайло Надь Беда, Владимир Варґа и Янко Чизмар Чими. Єдна з перших обовязкох нового руководства будзе и виберанє банки у котрей Здруженє отвори свой жиро рахунок, же би и формално-правно було припознате и могло окончовац свою функцию.
       Нова схадзка Здруженя паприґарох заказана за 26. новембер, кеди би мало буц познате и рамикове количество паприґи керестурских паприґарох за контраченє зоз Фабрику змарзнутей желєняви "АБЦ".

Можлївосц контраченя паприґи за керестурску Хладзальню
21. новембер 2007. (Рутенпрес) - Фабрика змарзнутей желєняви "АБЦ" керестурского ПК "Перши май" понука контраченє продукциї паприги, алє и сладкей кукурици, винєшене на сходзе Здруженя керестурских паприґарох и Хладзальнї, пондзелок, 19. новембра у Руским Керестуре.
         Хладзалня понука контраченє паприґи сорти "Амфора" и "Слоново ухо", а законтраченим количестве треба же би ше було 70 одсто червеней, 10 одсто "шатираней", а 20 одсто желєней паприґи.
        Одкупна цена вязана за евро и виноши 0,20 евра за червену, 0,10 за "шатирану" и 0,15 евра за желєну паприґу. Винєшена и будуца динамика плаценя за придату паприґу, та би так 20 одсто од випорученого количества було виплацане о 15 днї, 40 одсто од випорученей паприґи о 60 днї, а 40одсто о 90 днї. Керестурскей Фабрики змарзнутей желєняви потребне од 500 по 700 тони паприґи, новосц же ю годна одкупйовац уж накадзи перша дойдзе, тє. од половки авґуста, а нє од 15. септембра, як було по тераз.
        Контраченє паприґи подрозумює же Хладзальня одкупи шицки класи паприґи - од першей по остатню, а паприґа за Хладзальню будзе ше паковац до мрежастих мещкох.
        Янко Планчак, спред Фабрики "АБЦ", винєсол и други вигодносци и условия контраченей продукциї, як цо то прикармйованє на основи оконченей анализи жеми, хаснованє точно предписаней защити пре вивоз до ЕУ, обезпечованє нашеня и штучних гнойох по вигоднєйших ценох итд.
          На сходзе заключене же би ше продукователє у чаше од седем дньох роздумали, та потим, зоз познатим количеством, руководство Здруженя паприґарох видзе пред руководство Фабрики "АБЦ". Медзитим, будзе ше пробовац глєдац и векшу цену за паприґу, од 0,25 еври за червену паприґу, а паприґаре предложели же би ше до контракту додало и авансованє за пресадзованє и оберанє паприґи.

Виплацене коло 5 милиони динари за побиту паприґу
19. новембер 2007. (Рутенпрес) - Прешлого тижня, штварток, 15. новембра, покля бул и термин, ДДОР Нови Сад керестурским заградкаром виплацел и остатнє очокодованє за осиґурану паприґу, котру того лєта побил каменец.
        Як Рутенпрес дознава од Елемира Рамача, заступнїка керестурского Оддзелєня кулскей филияли ДДОР Нови Сад, очкодованя на основи премийох за осиґуранє почало 15. октобра, а тирвало по 15. новембер.
        Керестурске Оддзелєнє ДДОР-у Нови Сад керестурским паприґаром виплацело очкодованє чия цалосна сума виноши коло 5 милиони динари.
      Здогаднїме, 4. авґуста того року, у вецей часцох керестурского хотара барз побило паприґу, так же очкодованє приявели аж 27 паприґаре, а паприґа од каменцу була побита на коло 15 гектарох.
         Окремна комисия ДДОР Нови Сад за оценньованє чкоди од ляду оценєла же аж 22-ом заградкаром, парпиґа на полю цалком - стоодстотно побита, док пейцом чкода оценєта на од 60 одсто та на висше.
      Як Рутенпрес дозанава од Елемира Рамача, премия осиґураня за єден гольт паприґи виношела коло 17 500 динари, а достате очкодованє за исту пооверхносц под паприґу виношело коло 200 000 динари.

Покраїнски фонд превжал тогорочни роботи
15. новембер 2007. (Рутенпрес) - Покраїнскому фонду за капитални инвестициї дати овласценя за предлуженє роботох на вибудови школско-спортскей гали у Руским Керестуре, дознава Рутенпрес од Йоакима Надя, секретара Месней заєднїци.
         Така догварка посцигнута вовоторок, 13. новембра, кеди Йоаким Надь, у мено Месней заєднїци и пренєсол овласценя на Покраїнски фонд, як финансиєра тогорочних дальших роботох на вибудови гали.
         Як познате, Покраїнски фонд за капитални инвестици за вибудов закрица на керестурскей школско-спортскей гали одобрел 36 милиони динари. Спрам того, Покраїнски фонд тераз розпише пошвидшани поступок явней набавки за виводзача роботох на поставяню закрица на галу.
          После вибору виводзача, роботи на поставяню закрица на керестурскей школско-спортскей гали мали би почац ище того року.

Сновательна схадзка ЛЕР
15. новембер 2007. (Рутенпрес) - На инициятиву Еколоґийней секциї зоз Руского Керестура и єй предсидательку др Леону Доротич Ґутеша, у Руским Керестуре, пондзелок, 12. новембра, отримана сновательна схадзка нового здруженя гражданох у општини Кула - Асоцияциї ловарох, еколоґох и рибарох - ЛЕР.
         Спрам Статута новей Асоцияциї, основни цилї роботи будзе защита правох чловека як еколоґийного єства, охрана, очуванє и унапредзенє животного штредку, та розвиванє еколоґийней свидомосци. Кажде здруженє и надалєй затримує свою автономию, а зоз Статутом Асоцияциї предвидзене и орґанизованє фахових сходох, семинарох з тей обласци, як и видаванє публикацийох, фахового усовершованя та сотрудзованє зоз фаховима институциями з обласци занїманя Асоцияциї.
          Главне цело Асоцияциї будзе єй управни одбор составени зоз представительох шицких ловарских, еколоґийних и рибарских здруженьох зоз шицких местох кулскей општини, котри войду до тей Асоцияциї.
     На сновательней схадзки нє присуствовали лєм представителє орґанизацийох зоз Липару и Червинки, алє предпоставка же ше и вони придружа до членства у новей Асоцияциї.

Од покраїни достати милион динари
13. новембер 2007. (Рутенпрес) - Роботнїки кулского Будовательного подприємства "Блашко" бетоновали дражку опрез Дом здравя, а будзе положена и окремна риґола за одводзенє атмосферских водох опрез амбуланти у центре валала. Роботи финансую керестурска Месна заєднїца и кулски Дом здравя.
У Руским Керестуре пошвидко започню и роботи коло каплїчки на теметове, понеже прешлого тижня од Покраїнского секретарията за локалну самоуправу и медзиопштинске сотруднїцтво, керестурска Месна заєднїца достала милион динари. З того пенєжу предвидзене вибудовац дражку за пешакох коло каплїчки, прешириц паркинґ-места за авта и бициґли, положиц ошвиценє, а можлїве кладзенє и часци огради коло каплїчки.
Як Рутенпрес дознава у Месней заєднїци, у пририхтованю и потребна документация за роботи на вецей локацийох у валалє, за котри Керестур тей єшенї достал средства од Покраїнского инвестивийного фонду.

Програми "Костельниковей єшенї"
12. новембер 2007., (Рутенпрес) - Зоз стретнуцом з писателями у рускокерестурскей ОШиҐ "Петро Кузмяк", пияток, 9. новембра, у Руским Керестуре започала тогорочна Штернаста Културна манифестация “Костельникова єшень”, абудзе тирвац по 17. новембер. Школяром основней школи и керестурскей Ґимназиї, свойо найновши твори, у виданю НВУ "Руске слово" Нови Сад и у присуству редактора Видавательней дїялносци "Руского слова" Миколи Шанти, школяром представели Ирина Гарди Ковачевич, Дюра Латаяк, Михеон Хун Кан, та Серафина и Силвестер Макайово.
        З нагоди "Костельниковей єшенї", у голу рускокерестурскей Школи пририхтана и вистава старих образох, котри позберала и виставу пририхтала педаґоґ у Школи "Петро Кузмяк” Любица Няради. Програма "Костельниковей єшенї" предлужена з ище єдну виставу - виставу рисункох професорки подобого воспитаня у ОШиҐ "Петро Кузмяк", младей уметнїци Биляни Романовей зоз Руского Керестура, иншак дипломки беоґрадского Факултета применєних уметносцох, напрям дизайн текстилу.
          Виставу у керестурским Доме култури, пияток вечар, 9. новембра, спред "КЄ" шветочно отворели Микола Шанта и Владимир Малацко, предсидатель Орґанизацийуного одбору "Костельниковей єшенї".
        Пияток, 9. новембер, на "Костельниковей єшенї" бул пошвецени младим, понеже после отвераня вистави, у Доме култури отримани литературно-музични вечар младих, под назву "Предлужуюци нїтку".
          Манифестация младих "Предлужуюци нїтку" була и нагода за уручованє награди "Литературного слова" найлєпшому младому поетови у тим року.Тогорочни лауреат тей награди, з меном "Мирослава Стрибера" - Михайло Сабадош зоз Руского Керестура, котри тераз жиє и роби у Новим Садзе.
       Под час пиятковей манифестациї, орґанизация "Млади кулскей општини" (ОКО), пригодно представела початок виробки Локалного акцийного плана о младих, у рамикох широкей акциї Покраїнского секретарията за спорт и младеж, под назву "Хто - кед нє ми, кеди - кед нє тераз".
         Творчосци нашого припознатого писателя Штефана Гудака, та представяню його найновшей збирки вибраних приповедкох "Скарби и утрати", була пошвецена перша часц Литературно-музичного вечара, всоботу, 10. новембра, у просторийох керестурского Дома култури. Попри самого писателя, о творчосци Штефана Гудака бешедовал Микола Шанта, редактор Видавательней дїялносци у НВУ "Руске слово", а Микола М. Цап, редактор "Шветлосци" и пририхтовач того виданя, представел ище єдну кнїжку "Руского слова" - позберани писнї Гавриїла Надя "Триски". У Другей часци соботовей програми представени Мома Димич, Предраґ Боґданович Ци и Давид Кесман Дако, писателє зоз Здруженя писательох Сербиї, з чим предлужене добре сотруднїцтво "Костельниковей єшенї" и Здруженя писательох Сербиї.
          После представяня своїх найновших творох, представителє Здруженя писательох Сербиї "Костельниковей єшенї" уручели Медалю з нагоди пред двома роками означеней 100-рочнїци од снованя Здруженя, а зачатнїком сотруднїцтва "КЄ" и беоґрадского Здруженя, Меланиї Николичовей и Владимирови Бесерминьови, у мено подзекованя на тим сотруднїцтве, писателє з Беоґраду подаровали кнїжки у виданю Здруженя. У музичней часци соботовей програми, даскельо свойо композициї инспировани зоз Войводину, на клавиру виведол познати войводянски композитор и пияниста Александар Дуїн зоз Нового Саду.
        Тогорочна "Костельникова єшень" будзе предлужена на стреду, 14. новембра у Новим Садзе, дзе у Студия "М" Радио Нового Саду будзе отримани концерт уметнїцкей музики з нагоди 70-рочнїци од народзеня нашого композитора и музичного педаґоґа Ивана Ковача.

Нєшка почина "Костельникова єшень"
9. новембер 2007. (Рутенпрес) - Зоз стретнуцами з нашима писателями у керестурскей школи"Петро Кузмяк", нєшка, 9.. новембра, почна тогорочна, Штернаста Културна манифестация ”Костельникова єшень”.
         У рамикой "Костельниковей єшенї", Школу нащивя Ирина Гарди Ковачевич, Серафина Макаї, Мирон Канюх, Силвестер Макаї, Дюра Латяк и Саня Тиркайло, котри школяром и просвитним роботнїком представя свойо найновши виданя. З нагоди "Костельниковбей єшенї", у голу рускокерестурскей Школи поставена и вистава старих образох, котру порихтала педаґоґ Школи Любица Няради.
         Нєшка вечар, 9. новембра, зоз початком на 21 годзин, у просторийох Дома култури будзе отворена вистава рисункох Биляни Романовей, а у просторийох Дома култури, музично-литературна програма младих "Предлужуюци нїтку".
          На ютре, 10. новембра, у просторйох керестурского Дома култури, зоз початком на 19 годзин, будзе отримани литературно-музични вечар, пошвецени писательови Штефанови Гудакови, котри представи свою найновшу збирку позбераних приповедкох "Скарби и утрати". Тиж так, "Руске слово" представи и збирку позбераних роботох Гавриїла Надя "Триски", а наявени наступ писателя зоз Беоґраду Моми Димича, як и писателя зоз Зомбора Давида Кецмана.
        У музичней часци ютрейшей програми наявени наступ познатого пиянисти и композитора Александра Дуїна.

Роботи на каплїчки и явним ошвиценю
7. новембер 2007. (Рутенпрес) - Совит керестурскей Месней заєднїци на своєй остатнєй схадзки, 5. новембра, розписал явну набавку за роботи на докончованю каплїчки на теметове, бо ше од Секретарията за локалну самоуправу очекує 1,5 милиони динари.
        З тих средствох заплановане положиц ошвиценє коло каплїчки, вибудовац дражку за пешакох, дополнїц места за парикированє, а можлїве и поставянє огради коло каплїчки. Явна набавка за реконструкцию явного ошвиценя у главней улїци пошвидко будзе закончена, а за виводзача роботох за санированє шмециска и виробок Елабората о идейним ришеню за место одкаль ше будзе брац глїну, спомедзи трох понукнуцох вибрана "Прима Рес" зоз Беоґраду. Понуканє тей фирми за тоти роботи було найвигоднєйше и виноши 330 000 динари, котри би Месна заєднїца мала достац зоз Покраїнского секретарията за польопривреду.
         На Совиту вибрани и виводзач роботи за реконструкцию часци валалскей водоводней мрежи, цо пороби новосадска "Пан аква", а вредносц тей роботи виноши нє цали 2,5 милиони динари. Совит принєсол и одлуку же би ше у дзепоєдних кратших, крижних валалских улїчкох злепшало улїчне ошвиценє як и у дворе фодбалского стадиона на Ярашу и на базену.
         У кулским Заводу за вибудов, Керестуру за явне ошвиценє припада милион динари, так же за тоти роботи тиж будзе розписана явна набавка, а часц тих средствох останє и за кладзенє явного ошвиценя на Вельким шоре.

Мишани хор госцовал у Словацкей
7. новембер 2007. (Рутенпрес) - Мишани хор Дома култури Руски Керестур, як и керестурскей Катедралней церкви св. о. Миколая, 3. и 4. новембра, госцовал у Словацкей републики. Керестурци у Словацкей участвовали на Седемнастим фестивалє духовней писнї, котри отримани у Снїни, и попри дзевец домашнїх хорох и шпивацких ґрупох з тамтейших местох и грекокатолїцких парохийох, бул єдини госцуюци хор зоз иножемства.
          Як дознаваме од дириґентки Лидиї Пашовей, пририхтованя за госцованє у Словацкей були наисце интензивни, а наступи у иножемстве удатни.
          -То драгоцине искуство, як за членох Хору, так и за мнє, понеже зме ше могли поровнац и з другима хорами, гварела Пашова, и тото госцованє оценєла як окреме задоволююце.
          З оглядом на там успоставени контакти, можлїве же то нє будзе остатнї наступ керестурского Хора у иножемстве. Тото госцованє витворене прейґ Союзу Русинох Українцох Сербиї, понеже орґанизатор Фестивала духовней писнї у Снїни Союз Русинох Українцох Словацкей.

Cхадзка Совиту
5. новембер 2007. (Рутенпрес) – На нєшкайшей схадзки Совиту МЗ Руски Керестур будзе поднєшени звит о розгварки зоз министром за державну управу и локалну самоуправу Миланом Марковичом о дальших активносцох на проєкту Руски Керестур-општина.
Попри подношеня звита, на Совиту буду вибрани и виводзаче роботох по розписаних явних набавкох а розпише и конкурс за виводзенє роботох коло каплїчки на керестурским теметове.
Cовит будзе розпатрац и проблематику вязану за преходзенє наплацованя месного самодоприносу прейґ буджету Општини Кула.

Положена часц огради коло теметова
5. новембер 2007. (Рутенпрес) - Всоботу, 3. новембра, од главного уходу на керестурски теметов положена часц новей огради зоз капуру, а з часом будзе положена цалосна ограда. Члени Церковного одбору керестурскей церкви, гражданє и керестурски майстрове, всоботу положели 20 метери огради и нову капуру, а роботи окончени добродзечно.
       Пенєж за нову капуру подаровал Дюра Паплацко, Керестурец на роботи у Швайцарскей, док ограду безплатно виробел Янко Кишмишка зоз Ветернику.
         Средства за будовательни и други потребни материял за ограду опрез теметова назберали сами Керестурци зоз добродзечних прилогох за тоту намену, а хаснує ше и пенєж Церковного одбору, з такволаних "теметовских" средствох.
          У планє положиц вецей як 100 длужни метери огради, за цо ище скорей до жеми уляти фундамент.

Програма тогорочней "Костельниковей єшенї"
1. новембер 2007. (Рутенпрес) – Тогорочна "Костельникова єшень" почнє на пияток, 9. новембра у Руским Керестуре, зоз промоцию нових кнїжкох по руски и стретнуцом з писателями а вечар истого дня будзе отворена вистава рисункох Биляни Роман, зоз Р. Керестура.
           Пияткова програма будзе закончена зоз литературно-музичну програму младих под назву "Предлужуюци нїтку".
           На соботу, 10. новембра, у просторийох Дома култури госцую еминентни писателє зоз Здруженя писательох Сербиї, як и госци, писателє Руснаци зоз Мадярскей.У музичней часци предвидзене госцованє познатого музичного творителя Александра Дуїна.
           У Новим Садзе, на стреду, 14. новембра, у Студию "М" Радио Нового Саду будзе отримани концерт з нагоди 70-рочнїци од народзеня Ивана Ковача, под назву "Serenata bucolica".
           У Коцуре, на пияток 16. новембра, на програми "Костельниковей єшенї" вистава малюнкох зоз Подобовей колиниї у Коцуре, як и литературно-музични вечар, у сали коцурского Дома култури.
           Ютредзень у Кули, 17. новембра, у просторийох ОШ "Петефи бриґада" будзе отримане Стретнуце рецитаторох, на котрим, попри наших, стихи буду рецитовац и е-Руснаци зоз Словацкей и Горватскей.
           Предостатня манифестация тогорочней "Костельниковей єшенї" будзе Стретнуце хорох, у Вербаше, у ОШ "Светозар Милетич", дзе, у истим просторе, будзе поставена и вистава рисункох Биляни Роман. Попри хорох зоз наших руских местох, на Стретнуцу хорох участвує и Грекокатолїцки хор при храме св. апосотол Петра и Павла зоз Бардейова, зоз Словацкей републики, та єден реномовани хор зоз Сербиї. Тогорочна Кулурна манифестация "Костельникова єшень" будзе закончена зоз цаловечаршим концертом госцуюцого Грекокатолїцкого хора зоз Бардейова, у Руским Керестуре на нєдзелю, 18. новембра.