|
|
Барз
вельке интересованє за дочек Нового року
31. децембер 2007. (Рутенпрес) - Два тижнї пред 31.
децембром, млади Руского Керестура розпредали шицки вязани
уходнїци-резервациї за дочек Нового року котри сами орґанизую.
Млади Руского
Керестура 31. децембра орґанизую дочек Нового, 2008. року у
керестурским кафичу "НС-плус", а цена резервациї (за пице и єдзенє)
виношела 300 динари.
То лєм єдна з
остатнїх активносцох младих Керестура у тим року, найвецей
позбераних коло "Пакта Рутенорум", алє и коло навиячох "Дзиви
швинї", та Форума младих и Младежского часопису "Мак".
У 2007. року
спомнути здруженя успишно орґанизовали Волонтерски камп, рок-концерт
"Водова фест", як и културну манифестацию "Дньовка", котра того року
була ювилейна - дзешата.
Потримовку за
свою роботу и оживйованє орґанизованя, млади мали од шицких
структурох валала, а найвецей од Месней заєднїци и Националного
совиту, гварел на преширеней схадзки Совиту МЗ предсидатель "Пакта
Рутенорум" Иґор Варґа.
Як єдна з перших векших активносцох и анґажманох
младих у 2008. року будзе
 ровнанє дильовох
у керестурским хотаре,
вєдно
з МЗ, гварел Варґа 28. децембра.
Коло 400
пакецики
 31.
децембер 2007. (Рутенпрес) - Вчера, внєдзелю 30. децембра
пополадню, керестурски дзеци и їх родичи, заєднїцки у центре
Керестура дочекали Дїда Мраза котри того року подзелєл коло 370
новорочни пакецики, як и прейґ 30 пакецики дзецом родичох слабшого
материялного стану и дзецом у потреби.
Дзень пред тим,
29. децембра, керестурски Каритас, у сотруднїцтве нєвладовима
орґанизациями, у Руским Керестуре подзелєл коло 120 новорочни
пакецики дзецом у потреби и слабшого материялного стану.
У тогорочним
пакецику, попри рижних лакоткох, дзеци у Руским Керестуре достали и
найновши компакт-диск зоз шпиванками за дзеци - "Нашо швето 4", у
виданю керестурского Дома култури.
Пригодну
програму на импровизованей бини у центре Керестура пририхтали дзеци
зоз керестурского Оддзелєня ПУ "Бамби" и Дзецинска шпивацка ґрупа
"Шкорванчок", котра шпивала шпиванки з найновшого компакт-диска
"Нашо швето 4".
Як и скорейших,
главни орґанизатор дочеку Дїда Мраза у центре валала була
Месна
заєднїца, у сотруднїцтве зоз Домом култури.
Орґанизовано у штирох погосцительних обєктох
31. децембер 2007. (Рутенпрес) - Попри того же Нови
2008. рок годни дочекац вєдно у центре Керестура,
орґанизовани дочек Нового року, 31. децембра, у Руским Керестуре
будзе у штирох погосцительних обєктох.
У Ресторану
"Русалка" конзумация за дочек виношела 1 800 динари, а у Ресторану
"Лонґов", на беґелю, 1 300 динари.
У обидвох
ресторанох будзе орґанизовани и такволани "бичак", 1. януара, дзе
уход безплатни.
Пре одказованє
єдних госцох, у "Русалки" 29. децембра були шлєбодни коло 10 места.
Дочек Нового
року будзе орґанизовани у Дискотеки "Амадеус" (у Младежским доме),
як и у кафичу "НС-плус", у орґанизациї младих Керестура.
На обидвох
местох, за младих цена резервациї виноши 300 динари.
Нєшка, 31. децембра,
скорей 24,00 г., у центре Руского Керестура започнє заєднїцки дочек
Нового,
2008. року, дзе, попри винчованкох, з тей нагоди заплановани и традицийни огньомет.
Совит Месней заєднїци сумировал свою роботу у 2007. року
 31.
децембер 2007. (Рутенпрес) – Традицийно 28. децембра, у
Руским Керестуре отримана шветочна преширена схадзка Совиту
Месней заєднїци Руски Керестур, на котрей сумировани резултати
роботи у 2007.року.
Попри членох
Совиту МЗ, пиятковей преширеней схадзки Совиту присуствовали
представителє векшини дружтвених и привредних орґанизацийох и
установох Руского Керестура.
Резултати роботи
Месней заєднїци винєсли предсидатель Совиту Желько Ковач
предсидатель Вивершного одбору Совиту Михайло Тиркайла и секретара
МЗ Йоаким Надь.О роботи своїх орґанизацийох у прешлим року
бешедовали керестурски парох. о Юлиян Рац, та Йоаким Рац, у функциї
секретара Националного совиту Руснацох.
Тиж так, єднорочну роботу своїх орґанизацийох винєсли др
Леона Доротич Ґутеша, предсидателька Еколоґийного руху "Желєни
персцень", Юлиян Чизмар, предсидатель ЛД "Ярабица" и Дюра Папуґа,
предсидатель Рускей матки.
На схадзки тиж
бешедовали член Совиту Юлиян Колошняї Ристо, котри и предсидатель
Комисиї за запровадзованє инициятиви же би Керестур бул општина;
Дюра Надь, предсидатель Здруженя ремеселнїкох и приватних
привреднїкох, Борис Шайтош, секретар СД "Русин" и Янко Хома,
директор ОШиҐ "Петро Кузмяк".
Резултати
єднорочней роботи своїх орґанизацийох винєсли и Мария Штайнфелд,
директорка Комбината, Блаженка Мецек, у мено ПУ "Бамби", Иґор Варґа,
предсидатель "Пакта Рутенорум", та Владимир Надь Ачим и Владимир
Малацко, чолни людзе РНТ "Петро Ризнич Дядя", односно керестурского
Дома култури.
Предсидатель
Вивершного одбору Совиту МЗ Михайло Тиркайла наглашел же 2007. рок
бул баржей як пририхтуюци за роботи у наступним, 2008., а окреме
визначел и похвалєл барз добру роботу и анґажованє секретара Месней
заєднїци Йоакима Надя, на витворйованю планованого у 2007. року.
Попри анализи
роботи у тим и предлогох за наступни рок, на тей преширеней схадзки
Совиту предложене же би ше запровадзело и єдно окремне припознанє
Руского Керестура за окремне доприношенє розвою валала на рижних
польох.
У буджету
керестурскей МЗ у 2007. року було порейґ 26 милиони динари.
У 2007. року
керестурска Месна заєднїца розполагала зоз коло 26 милиони 250 000
динари, гварел єй секретар Йоаким Надь на преширеней схадзки Совиту
МЗ, 28. децембра.
Як найудатнєйши
роботи у 2007. року, вон визначел успишне витворенє пилот-проєкта за
пречисцованє води за пице, витворенє медзинародного волонтерского
кампа, роботи на ушореню атмосферскей канализациї; асфалтованє часци
Русинскей улїци, алє и поставянє и барз успишне функционованє сайта
Месней заєднїци, котри свойофайтова трибина о роботох у валалє.
У тим року,
Месна заєднїца зоз своїма проєктами конкуровала на коло 15 рижни
конкурси, дзе на осем конкурсох достати средства од коло 6 милиони
динари.
Прилїв средствох
до месного самодоприносу виношел 7 750 000 динари, а од општинского
Заводу за вибудов 6,5 милиони динари.
Месна заєднїца у
2007. року витворела и власни приходи од коло 6 милиони динари, а
пририхтани и вецей проєкти за доставанє средствох у 2008. року.
Як гварел Надь,
у наступним, 2008. року робота МЗ будзе унапрямена на предлуженє
вибудови школско-спортскей гали, вибиє ше струднї на водоводу,
окончи ше реконструкция явного ошвиценя по валалє, а окреме
заплановане ришованє явного ошвиценя у главней керестурскей улїци,
на Вельким шоре.
Ґу тому,
заплановане асфалтованє драгох по улїцох од коло 7 000 квадратни
метери, започню роботи на санированю водоводней мрежи, алє и
завераню шмециска, а будзе предлужене ришованє атмосферскей
канализациї.
Тиж так, очекує
ше и витворенє того року подписаного контракта о асфалтованю драги
Руски Керестур-Крущич, од центра єдного, по центер другого сушедного
места.
У тим напряме,
керестурскей Месней заєднїца од Покраїнского фонду за капитални
укладаню у тим року одобрени средства од коло 57 милиони динари.
За дальши роботи
на вибудови школско-спортскей гали од Покраїнского фонду одобрени 36
милиони, за вибиванє новей студнї 9, за замену явного ошвиценя коло
7,
а за асфалтованє драгох
по улїцох коло 5 милиони динари.
Ришенє
висельованя индустрийна зона
31. децембер 2007. (Рутенпрес) - Єдно з найвекших
можлївосцох за зоперанє висельованя з Руского Керестура то цо швидше
формованє индустрийней зони и приводзенє инвеститорох за отверанє
нових роботних местох, цо на вецей заводи наглашовали присутни 28.
децембра на заєднїцкей схадзки Совиту Месней заєднїци.
Парох о. Юлиян
Рац винєсол податок же , керестурска парохия у 2007. року видала 91
кресцене писмо Керестурцом котри ше виселєли, лебо виселя до Канади,
а тото число и векше, понеже нє шицки и на Парохиї винїмали тот
документ.
Як гварене на
тим сходзе, Месна заєднїца як интересне здруженє гражданох нє моцна
зопрец висельованє з Керестура, медзитим, у напряме ришованя того
проблему, вельо може зробиц на злєпшованя инфраструктури у месце.
У тим напряме
вигласани и средства з месного самодоприносу, здогаднул предсидатель
Здруженя ремеселнїкох и приватних привреднїкох Керестура Дюра Надь,
наглашуюци же, крем ПК "Перши май", шицки други привредни субєкти
валала у 2007. року ослабли.
Понеже
усоглашени заєднїцки интереси, мож очековац же контракт о купованю
жеми од ПК "Перши май" за будуцу индустрийну зону будзе барз
пошвидко подписани - гварели на сходзе 28. децембра и Михайло
Тиркайла, предсидатель Вивершного одбору Совиту МЗ, и директорка
Комбината Мария Штайнфелд.
У напряме
злєпшованя квалитета живота, у 2008. року ше очекує и доводзенє ґазу
до Руского Керестура, цо нє завиши од Керестурцох, алє од висших
инстанцох, а проєкт за ґазификованє Керестура уж
виробени - гварели
чолнїки Месней заєднїци на преширеней схадзки Совиту 28. децембра.
Керестур зменшани за 139 особи
31. децембер 2007. (Рутенпрес) - До 28. децембра 2007.
року, у Руским Керестуре покресцени лєм 29-еро дзеци, гварел
рускокерестурски парох о. Юлиян Рац, на преширеней схадзки Совиту
Месней заєднїци 28. децембра.
На керестурскей
Парохиї у тим року покресцени 18 дзивчата и 11 хлапци. Источашнє на
Парохиї повинчани 25 пари, дзе 6 пари мишаней вири.
По 28. децембер,
у Керестуре умарли 77 особи, так же того року розлика медзи
народзенима и умартима виноши 48 особи, цо вельо менєй у одношеню на
скорейши роки.
З оглядом же на
Парохиї видате аж 91 кресцене писмо пре одход до Канади, та
на число
умартих особох, Руски Керестур
у 2007. року зменшани за 139 особи.
На
Пилот-проєкту аж 5 дохторски дисертациї
31. децембер 2007. (Рутенпрес) - На роботи
Пилот-постоєня за пречисцованє води од арсену у Руским Керестуре, у
цеку писанє аж пейцох дохторских дисертацийох младих науковцох котри
робели на пилот-проєкту - гварела др Леона Доротич Ґутеша,
предсидателька Комисиї за ришованє проблема води за пице при
керестурскей Месней заєднїци.
Доротичова як
найзначнєйши досяг у 2007. року у Керестуре визначела доставанє барз
здравей води за пице, дзекуюци науки и шмелосци МЗ поставиц
пилот-построєнє, котре єдине у Сербиї дало очисцену воду од арсену.
Як
предсидателька Еколоґийного руху "Желєни персцень", Леона Доротич
Ґутеша на преширеней схадзки Совиту МЗ, 28. децембра, наглашела
снованє општинского здруженя, односно, умрежованє ловарских,
еколоґийних и рибарских здруженьох кулскей општини - ЛЕР.
Еколоґия и єден
зоз значних сеґментох у виробки Стратеґиї отримуюцого розвою кулскей
општини, котра у цеку, гварела др Доротичова.
Як гварела, у
кулскей општини у 2007. року, еколоґийни здруженя посадзели прейґ 40
000 древка.
Доротичова
визначела и барз вельку активносц керестурского Еколоґийного руху
"Желєни персцень", зоз коло 380 членох, котри робя у штирох
секцийох, а медзи нїма и коло 80 жени.
Юлиян Чизмар,
предсидатель Здруженя керестурских ловарох гварел же у 2007. року
тото Здруженє, з помоцу вецей валалских структурох, посадзело коло
15 000 млади баґренки на Вельким Селищу, медзитим, пре знїщованє, з
нїх остали лєм коло 20 одсто древка.
Як гварел
Чизмар, Ловарске дружтво принєсло одлуку же кажди член Здруженя
ловарох Керестура у єдним року ма обовязку засадзиц пейц древка, а
тераз Здруженє
чишлї коло 100
активних и помагаюцих членох.
Заєднїцки дочек Дїда Мраза и Нового року
29.
децембер 2007. (Рутенпрес) - Зєднїцки дочек Дїда Мраза у
Руским Керестуре, будзе на нєдзелю 30. децембра на 14 годзин у
центре валала.
Месна заєднїца
ше остарала же би Дїдо Мраз и того року одредзене число пакецикох
подзелєл задармо - дзецом чежшого материялного стану, як и дзецом у
потреби, у сотруднїцтве з општинским Центром за социялну роботу и
керестурским Каритасом.
Керестурци и
нови 2008. рок годни дочекац вєдно, у центре валала, дзе вноци,
31.
децембра, попри винчованкох, Нови
рок привита и традицийни огньомет.
У
шветочней атмосфери два удатни концерти
27. децембер 2007. (Рутенпрес) - У окреме шветочней
атмосфери и пред числену публику, у Велькей сали керестурского Дома
култури, вчера, 26. децембра, отримани два Крачунски концерти
под назву "З нами Бог".
Перше пополадню, Крачунски концерт пририхтали дзеци - школяре ОШ,
односно виронаучних ґрупох при керестурскей церкви, котри шпивали
коляди, рецитовали, грали, танцовали, виведли даскельо пантомимиски
драмски слички - на тему найрадоснєйшого християнского швета -
Рождества Исуса Христа.
Пополадньови Дзецински концерт бул окреме масовни по числу
учашнїкох, а дзеци за наступ пририхтали шестри служебнїци Авґустина,
Арсения и Ґеорґина.
Вечаршому концерту "З нами Бог" присуствовал и предсидатель
Националного совиту Славко Орос, як и рускокерестурски парох о.
Юлиян Рац.
Винчуюци Крачун присутним, о. Юлиян Рац пренєсол поздрави и
винчованки апостолского еґзарха, владики кир Георгия, учашнїком и
пририхтовачом обидвох вчерайших крачунских концертох, здогадуюци и
поволуюци и на дарованє тим цо у потреби и з нагоди Крачуснких
шветох.
У
програми вечаршого концерта участвовали Хор ОШ "Петро Кузмяк",
школярски шпивацки ґрупи Дома култури, солистка Николая Сивч,
Дзивоцка, та Хлопска шпивацка ґрупа Дома култури котри шпивали
коляди, Вельки народни оркестер Дома култури, Мишани хор Дома
култури и керестурскей церкви св. о. Миколая котри, после одшпиваних
колядох, на концу вєдно з публику одшпивал "Пречистая дїва".
Рецитаторе Андрея Колєсар, Александра Живкович и Мирослав Малацко
читали пригодни духовни тексти з нагоди Крачуна, як и стихи Гавриїла
Костельника з Идилского венца "З мойого валала".
Вчерайши окреме удатни Крачунски концерет "З нами Бог" пририхтали
Лидия Пашова, Юлиян Рамач Чамо, Мирон Сивч и Редакция християнского
часопису "Дзвони".
После обидвох концертох - и пополадню и вечар - публика давала свойо
добродзечни прилоги котри наменєни дзецом у потреби.
Шветочна рочна схадзка Совиту
27. децембер 2007. (Рутенпрес) - Традицийна преширена
шветочна схадзка Совиту Месней заєднїци Руски Керестур, котру
ше орґанизує концом рока, того року будзе отримана 28. децембра у
Ресторану "Русалка".
На
схадзку Совиту МЗ поволани чолни особи и представителє шицких
привредних и дружтвених орґанизацийох, здруженьох и установох
Руского Керестура.
Преширена шветочна схадзка Совиту МЗ будзе
отримана
од 12 годзин.
У
Керестуре Крачун
26. децембер 2007. (Рутенпрес) - Преосвящени
владика Георгий Джуджар предводзел Всеночне у Вилїйовей ноци як
и вчерайшу крачунску Литурґию у катедралним храме у Руским
Керестуре, 24. и 25. децембра.
-
Нєшка ше здогадуєме на подїю столїтиями чекану и обецану, кед ше
всевични Бог народзел на Жеми як мале дзецочко. Ангели теди
нависцели же “з нами Бог, розумце народи, и покорце ше, бо з нами
Бог” - гварел владика у казанї з нагоди швета.
Вон
наглашел же ше за Крачун "пририхтуєме на вонкашнї способ, кед
попораїме обисца, оквециме ядловец, алє рихтаме и свою нукашньосц -
зоз споведзу приготовиме свойо шерцо, же би ше мали Исус и нєшка у
нїм могол народзиц ".
На
вчерайше Богослуженє пришли числени парохиянє и їх госци, а попри
домашнїх священїкох - пароха о. Юлияна Раца и капеланох о. Любомира
Семана, о. Зиновия Вовка и о. Тония Анґелова, вчерайшу Службу
сослужовали и о.Михайло Режак зоз Сримскей Митровици и о. Оливер
Тантушев зоз Коцура.
Крачунскей атмосфери у Катедралним храму допринєсол и Мишани хор
церкви св. о. Миколая и керестурского Дома култури, под
дириґентством Лидиї Пашовей.
Oкремне
дожице у Вилїйовей ноци бул сценски приказ живого Вертепу, у правим
жимским амбиєнту церковней порти, зоз живима актерами, од
баранчатох, голубох по пастирох у автентичних костимох.
Тото
нєкаждодньове дожице керестурским
парохияном по першираз пририхтали виронаучни дзеци на чолє зоз
шестрами Служебнїцами Арсению и Георгию.
З
костимами помогнул Дом култури и РНТ, а велї парохиянє помогли
обезпечиц сценски реквизити - од окреме за тоту нагоду виробеного
древеного Вертепа, по живи баранчата, звученє
и прикладну музику.
Вивоженє шмеца по Крачунє
25. децембер 2007. (Рутенпрес) - З оглядом же у Руским
Керестуре крачунски швета од 25. по 27. децембер, орґанизоване
вивоженє шмеца у валалє будзе после шветох, дознава Рутенпрес у
рускокерестурскей Месней заєднїци.
Комунална служба Месней заєднїци зоз збераньом шмеца по керестурских
улїцох предлужи на
пияток, 28. децембра, по планє
и розпорядку яки важи за пияток.
Комбинат
"Перши май" достал стандард ХАСАП
24. децембер 2007. (Рутенпрес) - Рускокерестурски ПК
"Перши май", од 22. децембра ношитель ХАСАП-стандарда,
гварене после пиятковей нащиви овласценого сертификацийного
оценьовача за ХАСАП-стандард.
Хладзальня керестурского Комбината, сертификат достал без єдней
пригварки, дознава Рутенпрес од директори Комбината Мариї
Штайнфелдовей.
-
Доставанє сертификата без пригварки у записнїку оценьовача значи же
зме добре поробели и витворели шицки потребни норми, законїтосци и
способ справованя у продукциї поживи - од поля, по мещок зоз
спакованим готовим продуктом, котри подрозумює тот значни
сертификат, односно, же пожива випродукована на єден безпечни способ
- гварела Штайнфелдова.
Керестурска Хладзальня сертификат достала од ино-жемней
фирми за даванє ХАСАП-сертификата "ТИВ-СЕРТ", односно єй предста-вительства
у Беоґрадзе.
До
инвестициї на реконструкциї Фабрики "АБЦ" и будованя новей
хладзальнї, капацитета коло 5 000 тони готового продукту,
керестурски Комбинат уложел коло 7 милиони еври.
Капацитет продукциї у Хладзальнї уж того року звекшани за два раз,
на 8 000 тони, а у 2008. року заплановане випродуковац три раз вецей
у одношеню на капацитети пред укладаньом -15 000 тони готового
продукту,
найвецей гращку и сладкей
кукурици.
ПК "Перши
май" пременєл мено
24. децембер 2007. (Рутенпрес) - Од 1. януара 2008.
року, керестурски Польопривредни комбинат "Перши май" ше будзе волац
"АБЦ фуд” А.Д., одлучене на Позарядовей скупштини акционерох
Комбината.
Друга Позарядова скупштина акционерох ПК "Перши май" отримана
пияток, 21.. децембра, а на Скупштини главна точка була пременка
назви того керестурского найвекшого привредного подприємства.
- З
оглядом же вивожиме вецей як дзеведзешат одсто наших продуктох,
завжали зме становиско ше бизме ше тому прилагодзели и прейґ мена
нашей фирми - гварела директорка Комбината Мария Штайнфелдова.
-
"АБЦ фуд”, лєбо “Ей-би-си” по анґлийски, уж препознатлїви знак
квалитета нашей змарзнутей желєняви пре назву нашей Хладзальнї, саме
"АБЦ" зме нє могли охабиц, та додате ище "фуд" ("food"
пожива по анґлийски), цо такой асоцирує на нашу дїялносц, а кратке є
и ясне - гварела Штайнфелдова.
После приношеня одлуки о пременки назви, у цеку вименка шицких
потребних актох, лоґа подприємства, веб-сайта, редизайнованє
амбалажи, як и други потребни роботи у складзе зоз тоту пременку, же
би ше од початку идуцого рока, Комбинат вшадзи зявйовал и
презентовал як "АБЦ фуд" АД.
Як
Рутенпрес дознава од директорки Штайнфелдовей, пременка назви нє
значи и пременку у структури
роботи и нукашнєй
орґанизациї дотерашнього ПК "Перши май".
У
Керестуре нєшка Крачунска Вилїя
24. децембер 2007. (Рутенпрес) - У Руским Керестуре
нєшка, 24. децембра, Крачунска Вилїя, пред ютрейшим шветом
Рождества Христового по грегориянским календаре.
На
Вилїю, нєшка рано од осем годзин, у керестурским Катедрални храме
будзе отримана Служба Божа святого Василия Велького.
На
вечар, од 23 годзин, Саночне у керестурскей Катедралней церкви будзе
служиц владика кир Георгий, апостолски еґзарх за грекокатолїкох у
Сербиї и Чарней Гори.
Саночне зоз владиком кир Георгийом буду сослужовац домашнї и
священїки зоз других наших парохийох, а пред Саночним, Мишани хор
керестурскей Церкви св. о. Миколая и Дома култури, под дириґенством
Лидиї Пашовей, у церкви будзе шпивац коляди.
На
Крачун, 25. децембра, Вельку архиєрейну Службу Божу од 10 г. будзе
служиц апостолски еґзарх кир Георгий, а Службу будзе провадзиц и
спомнути керестурски Мишани хор.
Першого и Другого дня Крачуна, 25. и 26. децембра, Богослуженя у
керестурским Катедрланим храме буду як на швето, так же тоти днї нє
будзе Служби на 11,30 годзин.
Другого дня Крачуна, 26. децембра, Богослуженє зоз мированьом, од 16
г., будзе отримане и у Манастире малих шестрох на Циґлашоре.
Остатнього дня Крачуна, 27. децембра, попри порядних, будзе отримана
и Служба Божа на 11,30 г., а у каждим Богослуженю будзе и мированє
вирнїкох.
Тиж
так, у Богослуженьох 27. децембра, млади священїк о.
Тони Анґелов,
нови рускокерестурски капелан, вирним будзе дзелїц свой неорейски
благослов.
Промоция кнїжки "Руска традиция"
22. децембер 2007. (Рутенпрес) - Нєшка, 22. децембра,
у Руским Керестуре будзе отримана промоция кнїжки Любомира Медєша
"Руска традиция", у виданю Дружтва за руски язик, литературу
и културу.
Промоция будзе отримана у просторийох Дома култури Руски Керестур,
на поверху, з початком на 18. годзин, а уход безплатни.
О
кнїжки будзе бешедовац автор Любомир Медєши, родом зоз Руского
Керестура, тераж жиє у Канади, етнолог по фаху, а пред одходом до
Канади бул єден з найактивнєйших културних роботнїкох Руснацох.
Попри представяня самого виданя "Руска традиция", на промоциї
запланована и
пригодна литературно-музична програма.
Школа як центер школованя руских кадрох
21. децембер 2007. (Рутенпрес) - Вчера, штварток 20.
децембра, у керестурскей Основней школи и Ґимназиї "Петро Кузмяк"
отримана пригодна шветочносц з нагоди означованя 30 рокох од
уселєня до терашнього будинку Школи.
З
тей нагоди, у голу Школи "Петро Кузмяк" орґанизована пригодна
фото-документацийна вистава, а отримани и кратши пригодни Округли
стол, на котрим ше бешедовало о чаше будованя и усельованя до
терашнєй, як ю
Керестурци
популарно волаю - “найновшей школи”.
Як
гварел Милан Бероня, котри бул секретар СИЗ за образованє Кула, як и
секретар тедишнього Медзиопштинского СИЗ за образованє Кула-Вербас,
у тедишнїм чаше у штреднєй Бачки збудовани аж 14 нови школи, медзи
нїма и керестурска.
Тиж
так, подкрипено з велїма фактами, алє и з емоциями, свойо
здогадованя на будованє и отверанє терашнього будинку Школи, винєсла
и Ирина Папуґа, єдна з тедишнїх найдиректнєйших и найактивнєйших
учашнїкох у тим поглядзе. Най здогаднєме, камень-фундамент за нови
школски будинок у Керестуре поставени 16. мая 1976. року.Шветочне
отверанє терашнього будинку було уж 22. децембра 1977. року.
За
тоти 30 роки, Школа добудовйована на вецей заводи, же би того року
було закончене єй адаптованє а у цеку и вибудов новей
школско-спортскей гали.
И на
тот завод наглашена значносц керестурскей Школи "Петро Кузмяк", як
центра за школованє руских кадрох. Пре постоянє интернату, ту
школовали штредньошколци зоз шицких наших местох з Бачкей и Сриму.
Як
гварене, терашнє намаганє же би керестурска Школа постала елитна по
квалитету, нє лєм за Руснацох у Сербиї, алє и у штреднєй Европи, з
тим вецей же уж
ма статус школи од окремного
значеня у Войводини.
Одобрени
средства кельо вимагане
20. децембер 2007. (Рутенпрес) - Месна заєднїца у
Руским Керестуру од Покраїнского секретарияту за польопривреду
достала 3,2 милиони динари на основи двох проєктох з котрима ше
конкуровало до Секретарияту.
За
ушоренє атмосферскей канализациї Керестур достал 2 милиони динари, а
за поставянє двох мульних пумпох 1,2 милиони динари.
Наменски средства з Покраїни буду преруцени до конца того рока, же
би роботи на поставяню двох мульних пумпох започали по новим року.
Проєкт ушореня атмосферскей канализациї будзе витворени тиж идуцого
року, а роботи започню накадзи будзе вигодна хвиля, гварел Йоаким
Надь за Рутенпрес.
З
оглядом на
доставанє средствох, Совит МЗ принєсол
и одлуку о явней набавки за тоти намени.
Хладзальня
би нєшка мала достац ХАСАП
20. децембер 2007. (Рутенпрес) - Фабрику змарзнутей
желєняви "АБЦ" рускокерестурского Польопривредного комбината "Перши
май", нєшка нащиви окремна комисия за стандардизованє и
представителє ТУВ, пре доставанє ХАСАП стандарду.
После тогорочних вельких укладаньох од прейґ 5 милиони еври до
реконструкциї постояцей и будованя ище єдней хладзальнї, у Фабрики
здобути условия за доставанє того високого и припознатого стандарда.
Стандард ХАСАП представя комплексни склоп мирох котри подрозумює
окремну гиґиєнску конторолу сировини - од поля, у шицких фазох єй
преробку, та по готови продукт, односно його пакованє и конєчно - по
утовар роби до камиона купца. Вязано за Комбинат, на ютре, 21.
децембра, будзе отримана и Скупштина акционерох ПК "Перши май", на
котрей би мал буц розпатрани и предконтракт Комбината и Месней
заєднїци Руски Керестур, о предаваню, односно купованю коло
10
гектарох жеми
за будуцу индустрийну зону у валалє.
Заинтересовани нємецки "Баєр"
20. децембер 2007. (Рутенпрес) - За роботу
пилот-построєня за пречисцованє води у Руским Керестуре
заинтересовала ше и шветово позната фабрика “Баєр” зоз Нємецкей,
гварене на остатнєй схадзки Совиту Месней заєднїци, 17. децембра.
За
роботу построєня ше интересує др Штефан Наймен зоз "Баєру", котри
вироятно пошвидко и придзе до Керестура. Його интересованє представя
и можлївосц за преходносц Керестура спрам одредзених фондох
пре
проєктованє и правенє будуцей фабрики
води.
Паприґаре
у просторийох МЗ
20. децембер 2007. (Рутенпрес) - Члени Здруженя
паприґарох Руского Керестура убудуце свойо сходи годни
отримовац у просторийох Месней заєднїци, одлучене на схадзки Совиту
МЗ 17. децембра.
Просториї Месней заєднїци Здруженю паприґарох буду дати на хаснованє
штири годзини до тижня, як то од
Месней
заєднїци Здруженє и вимагало.
Заєднїцки
дочек Дїда Мраза и Нового року
20. децембер 2007. (Рутенпрес) - Уплати за пакецики
дзецом за заєднїцки дочек Дїда Мраза у Руским Керестуре, мож окончиц
по 28. децембер, гварене на остатнєй схадзки Совиту Месней заєднїци,
17. децембра.
Уплацованє у готовим по тот датум мож окончиц на каси Месней
заєднїци, док прейґ рахункох - у "Юарбису", котри прави новорочни
пакецики, а цена єдного виноши 350 динари. Попри лакоткох, и того
року у пакецику будзе нови компакт-диск зоз шпиванками за дзеци
"Нашо швето 4", у виданю керестурского Дома култури.
Месна заєднїца ше остарала же би Дїдо Мраз и того року одредзене
число пакецикох подзелєл задармо - дзецом чежшого материялного
стану, як и дзецом у потреби, у сотруднїцтве з општинским Центром за
социялну роботу и керестурским Каритасом.
Заєднїцки дочек Дїда Мраза у оквиценим центра Руского Керестура з
нагоди крачунских и новорочних шветох будзе 30. децембра (нєдзеля),
на 14 годзин.
Керестурци и нови 2008. рок годни дочекац вєдно, у центре валала,
дзе вноци,
31. децембра, попри винчованкох, Нови
рок привита и традицийни огньомет.
Арсену
дзешец раз менєй од дошлєбодзеного
19. децембер 2007. (Рутенпрес) - Контиуновани квалитет
води и дзешец раз менєй арсену у води од дошлєбодзеного - главни
характеристики роботи пилот-построєня за пречисцованє води у Руским
Керестуре - гварене у Звиту о роботи пилота од марца по октобер того
року.
Звит
на основи анализи води у новембру поднєсол власнїк и идейни творец
пилот-построєня за пречисцованє води од арсену и других чкодлївих
материйох, беоґрадски Инстит за хемию, технолоґию и метали.
До
тераз третировани 3 300 кубики води за пице и квалитет води нє
осциловал, цо потвердзела и окремна анализа у суботицким Заводу за
защиту здравя, а раз мешачно, анализу тей пречисценей води окончує и
Завод за защиту здравя у Зомборе.
Попри того же арсен у води зменшани на 10 раз , вода ма и одличну
Пе-Ха вредносц, а як гварене на схадзки, присуство натриюма нательо
зменшане, же треба роздумовац и о пакованю тей води до фляшкох и єй
предаваня на велько.
Ґу
тому, ИХТМ у своїм звиту дал и рамикову цену коштаня єдного кубика
такей пречисценей води и вона тераз оценєна на 26,5 динари, з тим же
би у продукциї тей води на велько, цена требала буц и менша.
Беоґрадски Институт и надалєй будзе провадзиц роботу пилот-построєня
(безплатно), у змислу його модернизованя и применьованя нових
технолоґийох, а понеже сполнєти шицки вимоги зоз контракта, ИХТМ-у
буду виплацени ище 470 000 динари од цалосних 1,9 милиони, котри
Месна заєднїца длужна Институту.
Найзначнєйша препорука же би ше приступело активносцом за
проєктованє фабрики води, цо тераз и нормални шлїд после доставаня
позитивней анализи.
Окреме же то у Сербиї по першираз же єдно таке пилот-построєнє,
котре при продукциї тей води нє хаснує нїяки отровни хемикалиї, дало
позитивни резултати
виглєдованя, на основи
котрих мож будовац фабрику води.
Средства з
покраїни
19. децембер 2007. (Рутенпрес) - Вовторок, 18. децембра,
секретар керестурскей Месней заєднїци Йоаким Надь у
Покраїнским секретарияту за польопривреду подписал контракт о
доставаня средствох за два проєкти з котрима конкуровала Месна
заєднїца.
Керестур достал средства за ушоренє атмосферскей канализациї, за цо
вимагане 2 милиони динари, як и за поставянє двох мульних пумпох, за
цо вимаганє 1,2 милиони динари.
З
оглядом на доставанє средствох, Совит 17. децембра принєсол и одлуку
о явней набавки за тоти намени.
Тиж
так, за поставянє двоязичних таблох з назвами улїцох, МЗ од
Покраїнского секретарията за управу,
предписаня и национални
меншини тих дньох достала 30 000 динари.
Шветочносц
у ОШиҐ "Петро Кузмяк" з нагоди рочнїци уселєня
20. децембер 2007. (Рутенпрес) - Нєшка, штварток 20.
децембра, з початком на 12 годзин, у керестурскей Основней школи и
Ґимназиї "Петро Кузмяк" будзе отримана кратша пригодна шветочносц з
нагоди означованя 30 рокох од уселєня до терашнього будинку Школи.
З
нагоди означованя 30 рокох од уселєня до найновшого будинку
рускокерестурскей Школи, у голу Школи "Петро Кузмяк" будзе
орґанизована пригодна фото-документацийна вистава.
Зплановани и Округли стол, на котрим будзе бешеди о чаше будованя и
усельованя до терашнєй, як ю Керестурци популарно волаю - "найновшей
школи".
На
шветочносц з нагоди 30 рокох од уселнєя до найновшого будинку Школи
поволани велї госци, медзи нїма и директни учашнїки и активисти з
часу будованя терашнього будинку рускокерестурскей Школи "Петро
Кузмяк".
Камень-фундамент за нови школски будинок у Керестуре поставени 1976.
року, под час отримованя тедишнїх "Стретнуцох братства народох и
народносоцх Сербиї", котрим и керестурска Школа була порядни
учашнїк, а терашнї будинок Школи шветочно
отворени у децембре 1978. року.
Успишни
млади столнотенисере
19. децембер 2007. (Рутенпрес) - Двойо млади
столнотенисере СТК "Русин", прешлей соботи, 15. децембра, на
змаганю у Горґошу освоєли два медалї.
На
Мемориялним турниру у Горґошу София Ковач, школярка першей класи
керестурскей ОШ у своєй конкуренциї освоєла перше место и златну
медалю а Дамир Ковач, у конкуренциї школярох трецих и штвартих
класох ОШ освоєл треце место и бронзову медалю.
На
змаганю младих столнотенисерох у Горґошу, Керестурци ше змагали зоз
своїма парняками зоз Канїжи, Чоки, Суботици, Бачкей Тополї, Сенти,
Ади, Темерину и Горґошу.
Рускокерестурски Столнотениски клуб активно роби уж пейц роки,
младих столнотенисерох тренира Драґан Ковачевич, а пред вецей як
роком, Клуб вошол до
фамелиї клубох керестурского
Спортского дружтва "Русин".
Нови капеланє з Македониї
18. децембер 2007. (Рутенпрес) - На
роботу до парохийох у наших церквох у Руским Керестуре и Коцуре,
сцигли двоме нови капеланє зоз Македониї, дознава Рутенпрес од
керестурского пароха о. Юлияна Раца.
Дочасово, як капелан у Руским Керестуре будзе службовац неоєрей о.
Тони Ванґелов, а у Коцуре о. Оливер Тантушев.
Нови
капеланє до Руского Керестура и Коцура поставени зоз Декретом
апостолского еґзарха за грекокатолїкох у Сербиї, владики кир Георгия
Джуджара, а зоз допущеньом и согласносцу
апостолского еґзарха за
католїкох восточного обряду
Македониї, владики кир Киру Стоянова.
Звалєни криж будзе поопраяни
 18.
децембер 2007. (Рутенпрес) - Криж на уходзе до Руского
Керестура од Кули, котри 7. децембра звалєни у транспо-ртним
нєщесцу - будзе поопра-вяни
- дознава Рутенпрес зоз жридлох у керестурскей Парохиї.
Як
гварел рускокерестуски парох о. Юлиян Рац, икона котра була на крижу
дата на реновиранє, а керестурски каменяр Дюра Регак пооправя
постамент и сам криж.
Тиж
так, на основи записнїка транспортней полициї, Церковни одбор
превжал потребни крочаї на надополньованю чкоди за оправянє крижа.
После реновираня, криж ознова будзе поставени на исте место,
найвироятнєйше на яр 2008. року.
Як
дознава Рутенпрес, криж медзи терашню Економию ПК "Перши май" и
бензинску пумпу на уходзе до Керестура, 1928. року поставел
Керестурец Микола Рац Кренїцкого.
До
активносцох на реновираню крижа уключена и директна нашлїднїца
поставяча крижа, панї Агафия
Рамачова зоз Руского Керестура, котрей
Микола Кренїцки бул дїдо по оцови.
Нови компакт-диски у предаваню
18. децембер 2007. (Рутенпрес) - Од пондзелку, 17.
децембра, у Доме култури Руски Керестур мож купиц три компакт-диски
зоз нашима шпиванками. З друку вишол КД за дзеци "Нашо швето 4", дзе
22 шпиванки зоз тогорочного и скорейших “Червених пупчох”.
Тиж
так, обновени и КД "Нашо швето 3", на котрим 16 шпиванки за дзеци з
"Червеного пупча 06".
Дом
култури тиж обновел и компакт-диск "Шпиваночки мойо", на котрим 18
руски народни шпиванки у виводзеню Женскей жридловей ґрупи
керестурского Дома култури.
Цена
єдного компакт-диска 200 динари.
Змаганя штредньошколцох
18. децембер 2007. (Рутенпрес) - На Општинским змаганю
штреднїх школох з местох кулскей општини, 13. децембра у
Червинки, школярки рускокерестурскей Ґимназиї "Петро Кузмяк" завжали
перше место у малим фодбалу.
Ютредзень, 14. децембра, тиж у Червинки, отримане и змаганє
штредньошколцох у рукомету.
Школярки керестурскей Ґимназиї "Петро Кузмяк" на змаганю у рукомету
освоєли друге, док хлапци у змаганю у рукомету
освоєли треце место у
кулскей
општини.
Шветочносц
у ОШиҐ
"Петро Кузмяк" з нагоди рочнїци уселєня
18. децембер 2007. (Рутенпрес) - На штварток 20.
децембра, у керестурскей Основней школи и Ґимназиї "Петро Кузмяк"
будзе отримана шветочносц з нагоди означованя 30 рокох од
уселєня до терашнього будинку Школи.
З
тей нагоди у голу Школи "Петро Кузмяк" будзе орґанизована пригодна
фото-документацийна вистава.
У
рамикох означованя 30. рочнїци уселєня до новей школи, заплановани и
Округли стол, на котрим будзе бешеди о чаше будованя и усельованя до
терашнєй, як ю Керестурци популарно волаю - "найновшей школи".
На
шветочносц з нагоди 30 рокох од уселнєя до найновшого будинку Школи
поволани велї госци, медзи нїма и директни учашнїки и активисти з
часу будованя терашнього будинку рускокерестурскей Школи “Петро
Кузмяк”.
Камень-фундамент за нови школски будинок у Керестуре поставени 1976.
року, под час отримованя тедишнїх "Стретнуцох братства народох и
народносоцх Сербиї", котрим и керестурска Школа була порядни
учашнїк, а терашнї будинок Школи шветочно
отворени у децембре 1978. року.
Премиєра
у РНТ "Петро Ризнич Дядя"
15. децембер 2007. (Рутенпрес) - На нєдзелю, 16.
децембра, Руски народни театер "Петро Ризнич Дядя" премиєрно виведзе
представу “Приповедка о єдней страсци” Миґуела де Унамуна, у режиї
Владимира Надя Ачима.
Будзе то дзешати театрални проєкт нашого професийного руского
Театра, а як и дотерашнї, витворени є з помоцу Покраїнского
секретарията за образованє и културу ВР АП Войводини.
Драматизацию того виразно драмского тексту окончел Танкред Дорст,
адаптацию за наш Театер режисер Владимир Надь Ачим, сценоґрафию
виробел Далибор Тобджич зоз новосадского СНТ, а костими Таня Орос.
У
представи ґлумя Александра Лендєр, Иван Папуґа и Янко Лендєр зоз
Вербасу, та Славко Орос, Ксения Макаї Орос и Михайло Зазуляк зоз
Руского Керестура.
Премиєра найновшей представи РНТ "Приповедка о єдней страсци" будзе
отримана у Велькей сали керестурского Дома култури,
16. децембра од 19 годзин.
На
пондзелок схадзка Совиту
15. децембер 2007. (Рутенпрес) - Звит Института за
хемию, технолоґию и метали зоз Беоґраду о роботи пилот-построєня за
пречисцованє води, будзе єдна з главних темох наступней схадзки
Совиту Месней заєднїци Руски Керестуре, на пондзелок, 17. децембра.
Тиж
так, як наявене, Совит би мал розпатрац и предлог Предконтракта зоз
керестурским ПК "Перши май", о одкупу жеми од Комбината за будуцу
индустрийну зону.
Єдна
з точкох пондзелковей схадзки Совиту Месней заєднїци и дотерашнї и
будуци активносци на
пририхтованю и
орґанизованю заєднїцкого дочеку Нового року у центре валала.
Конкурованє за "Дньовку" и "Водова фест"
15. децембер 2007. (Рутенпрес) - Младежска орґанизация
Руского Керестура "Пакт Рутенорум", зоз своїма двома проєктами за
2008. рок, конкуровала до Покраїнского секретарията за образованє и
културу.
"Пакт Руетенорум” до Покраїнского секретарията за образованє и
културу конкуровал за доставанє средствох за орґанизованє
мултимедиялного фестивала младих и за младих “Дньовка”, як и за
орґанизованє и отримованє “Водова феста”, а обидва збуваня буду
орґанизовани у Руским Керестуре.
За
орґанизованє истих фестивалох у тим, 2007. року, "Пакт Рутенорум"
достал потримовку од спомнутого покраїнского секретарията, алє и од
Покраїнского секретарията за спорт и младеж, як и Секретарията за
управу, предписаня и национални меншини, прейґ Националного совиту
Руснацох.
Попри до покраїнских секретариятох, у "Пакт Рутенорум" зоз истима
проєктами планую конкуровац и до Републичного Министерства за спорт
и младеж, а тераз у цеку орґанизованє дочеку Нового року, нє лєм за
младеж Руского Керестура, алє и зоз
других наших местох.
Страдал
криж на виходзе з Керестура
15.
децембер 2007. (Рутенпрес) - Ище прешлого пиятку, 7.
децембра, на виходзе з Руского Керестура спрам Кули, у транспортним
нєщесцу страдал криж, котри цалком звалєни.
Як
Рутенпрес дознава од шведкох збуваня, пияток, 7. децембра коло 14
годзин, збили ше два превозки медзи такв. Управу (Економию) ПК
"Перши май" и бензинску пумпу, и резултат того транспортного нєщесца
звалєни криж котри там стал роками, алє покалїчених нє було.
Як
нєурядово дознаваме, обидва путнїцки авта ишли у напряме з Кулу
спрам Керестура и швидши, обеговал автомобил котри у тим чаше праве
круцел на спомнуту Економию.
Превозка котра обеговала, одбила ше од авта котри круцел и вдерела
до крижа, а гоч є цали з каменя, вдеренє було барз моцне и розбила
го.
На
щесце, анї єден вожач путнїцких превозкох нє покалїчени, а попри на
крижу, велька материялна чкода направена и на авту котри до ньго
вдерел.
Записнїк о транспортним нєщесцу направела полиция, а за тераз,
Рутенпрес нє дошол до инфомацийох
о велькосци материялней
чкоди и оправяню розбитого крижа.
Од
пондзелку у предаваню нови компакт-диски
 15.
децембер 2007. (Рутенпрес) - Од пондзелку, 17. децембра, у
Доме култури Руски Керестур годно купиц три нови
компакт-диски зоз шпиванками по руски.
Як
цалком нови, Дом култури видал компакт-диск "Нашо швето 4", зоз
новима шпиванками за дзеци зоз "Червеного пупча 2007", як и вибрани
шпиванки зоз скорейших дзецинских манифестацийох "Червене пупче".
На
ношачу звука "Нашо швето 4" находза ше аж 22 шпиванки за дзеци -
дзешец зоз тогорочного и дванац зоз скорейших "Червених пупчох".
Попри нового, Дом култури обновел и виданє (компакт-диск) "Нашо
швето 3", зоз шпиванками за дзеци з "Червеного пупча 2006".
Ґу
тому, обновени и компакт-диск под назву "Шпиваночки мойо", на котрим
18 руски народни шпиванки у виводзеню Женскей шридловей ґрупи
рускокерестурского Дома култури.
Шицки три компакт-диски годно купиц у Доме култури, а цена
єдного 200 динари.
Премиєра у РНТ "Петро Ризнич Дядя"
13. децембер 2007. (Рутенпрес) - На нєдзелю, 16.
децембра, Руски народни театер "Петро Ризнич Дядя" премиєрно виведзе
представу “Приповедка о єдней страсци” Миґуела де Унамуна, у режиї
Владимира Надя Ачима.
Будзе то дзешати театрални проєкт нашого професийного руского
Театра, а як и дотерашнї, витворени є з помоцу Покраїнского
секретарията за образованє и културу ВР АП Войводини.
Драматизацию того виразно драмского тексту окончел Танкред Дорст,
адаптацию за наш Театер режисер Владимир Надь Ачим, сценоґрафию
виробел Далибор Тобджич зоз новосадского СНТ, а костими Таня Орос.
У
представи ґлумя Александра Лендєр, Иван Папуґа и Янко Лендєр зоз
Вербасу, та Славко Орос, Ксения Макаї Орос и Михайло Зазуляк зоз
Руского Керестура.
Премиєра найновшей представи РНТ "Приповедка о єдней страсци" будзе
отримана у Велькей сали
керестурского Дома култури,
16. децембра од 19 годзин.
Промоция
Словнїка медицинских терминох
12. децембер 2007. (Рутенпрес) -Вчера, 11. децембра, у
музейней часци школского будинку Замок, отримана промоция
Словнїка медицинскей терминолоґиї, котри видало Дружтво за руски
язик, литературу и културу.
На
представяню того капиталного дїла з рускей лексикоґрафиї, о Словнїку
медицинскей терминолоґиї у котрим обробени прейґ 7 000 медицински
поняца по сербски, латински и руски, бешедовали др Никола Новта,
єден з иницияторох його видаваня и авторох, як и рецензент виданя,
др Весна Надь зоз Руского Керестура.
Як
гварене на представяню у Руским Керестуре, на твореню того Словнїка,
през длугши час анґажовани цали тим наших експертох з обласци
медицини и лексикоґрафиї.
Попри Руского Керестура, промоция Словнїка медицинскей
терминолоґиї отримана у вецей местох дзе жию Руснаци, а заплановане
його представянє и у Дружтве лїкарох Войводини.
Промоция Словнїка була нагода за представянє и других виданьох
Дружтва за руски язик, литературу и културу, о котрих присутним
бешедовала предсидателька Скупштини Дружтва Ирина Папуґа.
З
тей нагоди, Дружтво за руски язик, литературу и културу, Словнїк и
други свойо виданя, подаровало керестускому Оддзелєню кулскей
Народней библиотеки.
Вчерайша програма отримана у рамикох манифстациї " Днї Миколи М.
Кочиша", так же рецитаторки Цецилия Надь, Николина Бабич и Андрея
Дорошки пречитали стихи зоз Кочишеовей збирки поезиї "Ми ту нє
госци".
У програми участвовала и Женска
жридлова ґрупа рускокерестурскго Дома култури, а попри Оддзелєня
керестурскей Народней библиотеки, орґанизатор програми була и
рускокерестурска Подружнїца Дружтва за
руски язик, литературу
и културу.
Реґистровани случай жовтачки
12. децембер 2007. (Рутенпрес) - Спрам урядових
резултатох зоз компетентней лабораториї у Зомборе, потвердзене же и
у Руским Керестуре евидентовани єден случай вирусного “Хепатитису
А", односно жовтачки, дознава Рутенпрес од руководительки Амбуланти
у Руским Керестуре др Златани Надь.
Як гвари др Надьова, гоч тот
єден случай нє значи и преширйованє хороти до епидемийних розмирох,
барз важне обрациц увагу на превинтивни мири, же би до епидемиї анї
нє пришло. "Хепатитис А” вирусна хорота, преноши ше прейґ дотику, и
такволана є “хорота нєчистих рукох”.
Прето, увагу насампредз треба
дац на гиґиєнски мири, часто умивац руки под чечуцу воду, зоз
чечуцим мидлом и уцерац до паперових ручнїкох. Тото окреме важне
применьовац у колективитетох дзе пребуваю
вельо особи, як цо то
школи, дзецински
заградки и подобне.
У
цеку вецей акциї
12. децембер 2007. (Рутенпрес) - У Руским Керестуре у
цеку акция на браню креви од рогатого статку и контрола на хороти
котри ше зоз животиньох преноша на людзох.
Як Рутенпрес дознава од
руководительом керестурскей Ветеринарскей амбуланти др ветерини
Стевана Ромича, у Руским Керестуре тота акция перше окончена на
маєтку ПК "Перши май", дзе третовани коло 570 животинї.
На приватним секторе, иста
акция мала започац 10. децембра, будзе тирвац по конєц фебруара и
плановане обробиц коло 750 фалати рогатого статку
наменєного за карменє, або приплод.
Акция браня креви од рогатого
статку безплатна, власнїки статку длужни плациц лєм таксу за
означованє животиньох у виносу од 100 динари по глави (лєм за
нєозначени животинї), а у Ветеринарскей станїци препоручую
телефонску догварку о точним терминє обиходзеня статку з тей намени.
У Керестуре амбуланти у цеку и
вакцинованє швиньох процив швиньскей чуми на приватним секторе (цена
30 динари за фалат), виключно лєм по прияви власнїкох.
У цеку и обовазне вакцинованє
псох и їх означованє з микрочипом и, за розлику од скорейших, того
року власнїки псох длужни плациц лєм 100 динари на мено реґистрованя
пса. Вакцинованє и означованє псох у Руским Керестуре окончує и
приватна Ветеринарска амбуланта "Дуовет".
З оглядом же час и за колячки, у
Ветеринарскей амбуланти спозорюю на препатранє меса на трихинелу, цо
ше поряднє окончує по цени од 300 динари за єден прикладнїк, а з
оглядом же влонї у кулскей општини
реґистровани аж 7 случаї трихинелози,
тоти препатрунки и обовязни.
Нови ЦД зоз шпиванками за дзеци
12. децембер 2007. (Рутенпрес) - Тих дньох зоз друку
видзе нови ношач звука зоз нашима шпиванками - нови
компакт-диск зоз шпиванками наменєни дзецом - “Нашо швето 4”.
На новим ЦД-у зняти дзешец
найновши шпиванки за дзеци зоз тогорочного “Червеного пучеца” и
дванац шпиванки зоз скорейших.
Видавач найновшого
компакт-диска зоз шпиванками за дзеци "Нашо швето" керестурски Дом
култури, а и на тот завод його продуценти Юлиян Рамач Чамо и Мирко
Пап. Шпиванки виводза мали шпиваче зоз тогорочного “Пупча”, а
провадзи их ґрупа “Шкорванчок”. Дизайн рамикох виробел Михайло
Бодянец, фотоґрафию за насловни бок Любомир Дудаш, а перши тираж
нового ЦД-а 600 прикладнїки.
Дом култури обоновел и виданє
прешлорочного компакт-диска зоз шпиванками за дзеци - "Нашо швето
3", а обидва уж од початку идуцого тижня годно купиц у Доме култури,
по цени од 200 динари.
Як заплановане, найвироятнєйше до
конца рока Дом култури вида ище єден компакт-диск зоз нашима
шпиванками, под назву "Ружи, червени ружи" - зоз
композициями у
народним духу
з "Червених ружох" 2006. и 2007. року.
Рукометашки Школи перши у општини
11. децембер 2007. (Рутенпрес) - На змаганю у рукомету
школярох основних школох кулскей општини, рукометашки керестрскей ОШ
“Петро Кузмяк” освоєли перше место.
Як
гварел директор Школи, источасно и тренер рукометашкох Янко Хома, то
представя вельки успих, бо после двацец двох рокох, титула найлєпшей
основней школи у рукомету за дзивчата ознова припадла керестурскей.
Општинске змаганє у рукомету отримане 7. децембра у Червинки,
участвовали пейц екипи. У финалним змаганю, рукометашки ОШ "Петро
Кузмяк" були прешвечлїво лєпши од рукометашкох ОШ "Петефи бриґада"
зоз Кули, и победзели их з резултатом 8-2.
През
жиму, керестурски рукометашки ше буду прири-хтовац
за Зонске змаганє, котре у марцу будзе отримане у Червинки, а
найлєпши з того змаганя директно вибори
пласман на
Републичне змаганє дзивчатох основношколцох у рукомету.
Пририхтованя за Крачун и Нови рок
7. децембер 2007. (Рутенпрес) - Як то уж узвичаєне
после Миколая, у Руским Керестуре уж помали присутна атмосфера з
нагоди наступних крачунских и Новорочних шветох.
Як
наявене, на соботу, 8. децембра, заплановане квиценє центра Руского
Керестура зоз шветлоснима и другима украсами, а и того року
орґанизатор тей роботи Месна заєднїца, односно єй окремна Комисия за
тоту нагоду.
Ютредзень, на нєдзелю, 9. децембра, керестурски Каритас у своїм
будинку орґанизує "Крачунски вашар" на котрим, як наявене, годно
купиц шицко цо вязане за Крачун.
"Крачунски вашар” будзе отримани од 9 по 13 годзин, а заинтересовани
за предаванє рижних украсох, ґомбульох, икебанох, чоколадох и
лакоткох, винчованкох, можу ше приявиц о. Зиновийови Вовкови на тел
703-888, лєбо Анкици Рамачовей, на тел. 704-437.
Месна заєднїца и того року будзе орґанизовац заєднїцки дочек Дїда
Мраза и Нового року.
Пенєж за пакецики дзецом возросту по штварту класу ОШ уж мож уплациц
у Месней заєднїци, а цена єдного пакецика виноши 350 динари.
И у
тогорочним пакецику будзе компакт-диск зоз найновшима шпиванками за
дзеци зоз "Червеного пупча 2007", у виданю керестурского Дома
култури, а виробок нового ЦД-а уж при самим концу.
Ище
початком новембра, валалски погосцительни обєкти виложели плакати з
поволанками за дочек Нового року у своїх обєктох, та так у ресторану
"Русалка" дочек Нового року по особи кошта 1 800, а у Мензи 1 200
динари.
У
обидвох ресторанох запланована музика, богата вечера и рижнородна
вредна томбола, а за предпоставиц же и дзепоєдни други валалски
погосцительни обєкти
буду орґанизовац
дочек, як и репризу дочеку Нового рока.
Ивестицийни укладаня у Руским Керестуре
6. децембер 2007. (Рутенпрес) - Зоз ребаласном буджету
Општини Кула од 5. децембра, за рижни инвестициї у Руским Керестуре
буду унапрямени коло 7,5 милиони динари.
Велька часц тих средствох уж и витворена, а достата є и на основи
рижних конкурсох до компетентних покраїнских секретариятох и
Републичних министерствох.
Так,
у обласци образованя, за поробене асфалтованє двох спортских теренох
и паркинґу опрез будинку ОШиҐ “Петро Кузмяк” з буджету унапрамени
прейґ 1,7 милиони динари, а за кладзенє огради коло школского
будинку Замок у планє видвоїц 404 000 динари.
За
проєктну документацию потребну за реконкструкцию Дома култури, у
буджету кулскей општини унапрямени 450 000 динари.
У
обласци комуналийох, прейґ кулского ЯП "Завод за вибудов" милион
динари унапрямене за реконструкцию явного ошвиценя у Керестуре, а
750 000 динари за роботи на атмосферскей канализациї у валалє.
Тиж
так, за отримованє керестурского шмециска у општинским буджету
заплановани милион 30 000 динари, за пилот-построєнє за воду за пице
470 000; за реконструкцию водоводней мрежи 310 000, а за доконченє
роботох на каплїчки 1 440 000 динари.
Дзепоєдни роботи уж поробени, дзепоєдни у цеку, а за
дзепоєдни
роботи у цеку виробок потребней проєктней
документациї.
Миколай
подзелєл пакецики
 6.
децембер 2007. (Рутенпрес) - Нєшка, 6. децембра, у Руским
Керестуре швето Святого отца Николая, чийо мено ноши и
рускокерестурски Соборни храм нашого Апостолского еґзархата, так же
у церкви буду служени Богослуженя як на швето.
Як
то уж звичай, вчера вечар, пред шветом, 5. децембра, Миколай после
Вечурнї нащивел рускокерестурску церкву, дзе дзецом подзелєл
пакецики.
Миколай того року подзелєл 280 пакецики дзецом котрих родичи уписали
за тоту нагоду, а подзелєл и двацец пакецики задармо - дзецом у
потреби.
З
нагоди того швета, того року була новосц же Миколай насампредз
наградзел тройо дзеци котри му написали найкрасши писма, аж и у
стиху, зоз векшима, а потим ище и двацецеро дзеци за удатни писма,
зоз меншима дарунками.
Керестурски дзеци писма Миколайови могли писац цали мешац пред
шветом и охабяц их у церкви, а за найкрасши писма написани
Миколайови наградзени школяре нїзших класох керестурскей ОШ -
Ґабриєла Хома, Давид Шанта и Анабела Тома.
Пред
дзелєньом пакецикох, виронаучни дзеци Миколайови виведли пригодну
програму, котру пририхтали вєдно зоз шестрами служебнїцами, а после
шветочносци у церкви, дзеци ше радовали и дарунком
котри им Миколай
принєс дома, по обичаю
- до ципелкох.
|
|
