Место

УПОЗНАЙЦЕ „ДЗВОНИ”

Яки то часопис „Дзвони”?

„Дзвони” то християнски часопис котри виходзи таз мешачно, а видава го Грекокатолїцка парохия св. О. Миколая у Руским Керестуре. Часопис виходзи по Руски, з тим же ше у каждим чишлє находза и даскельо боки по Українски. Читаю го вирни у шицких наших грекокатолїцких парохийоху нашей жеми, алє и нашо людзе жадних духовного слова котри одселєли до швета. 

Цо мож пречитац у „Дзвонох”

У часопису мож пречитац стат`ї котри читательови оможлївюю же би преглїбел свою духовносц, як цо рубрики  "Духовне заренко", "Спознаванє своєй души", "Слово живота". Як окремни додаток того часопису иснує и "Богословска думка", прилог християнскому часопису „Дзвони”, чию єдну часц ушорює о. мр Михайло Малацко у котрих обрабя рижни питаня и проблеми цикави каждому християнови, а у котрих на каждому розумлїви способ глїбше розрабя рижни теми з теолоґиї. Друга часц Богословскей думки ше одноши на наш Обряд, у котрим ше обрабяю богослужебни елементи, а котри пририхтує протоєрей ставрофор о. Йоаким Холошняй.

Попри тих рубрикох, у часопису исную и рубрики як цо "Актуалне", у котрих ше обрабяю теми хтори, як саме слово гутори, дотикаю актуални проблеми у животу каждого християна, та бок котри пошвецени християнскей фамилиї, боки на хотрих ше преставяю особи котри зоз своїм активним хирстиянским животом  шведоча Євангелиє и свою любов ґу ближньому и Господу.

У „Дзвонох” мож найсц и "Историйни куцик", у хотрим ше на интересантни и розумлїви способ обрабя теми з нашей историї. Заинтересовани можу цошка нове дознац о "Вельких женох Старого завиту", а у часопису єден бок пошвецени Каритасу и його дїялносци по наших местох.

Цо ше случує у наших парохийох мож пречитац на бокох "Вредзи призначиц". Окрем збуваньох у парохийох нашого Еґзархату, алє и интересантни вистки зоз нашого окруженя, висти котри значни за екуменски живот, висти котри християнох информую о паповим живоце и подобне.

Окреме интересантни боки за младих, на котрих сами млади пробую обробиц им интересантни теми, проблеми котри карактеристични за їх возрост, вше попреплєтани з фотоґрафиями котри прицагую тоту попоулацию. "Дзвончки" то боки котри пошвецени наймладшим, а на нїх вше мож дознац цошка  нове з катехизму, та пречитац висти котри пишу дзеци з наших парохийох, а котри бешедую о нїх самих. На тих бокох мож пренайсц и рубрику "Витамин Г" котра поможе каждому же би з ошмихом патрел на животни проблеми

Зоз парохиялих матрикулох з наших парохийох мож видзиц хто покресцени, хто ше  повинчал и хто поховани за предходни период.  На остатнїх бокох часописа обявюю ше "Смутни здогадованя" на тих котори ше преселєли до вичносци.

Предостатнї и остатнї боки вше у колору, а на нїх представяме подїї котри ше збули у наших парохийох и у нашим окруженю.

Фотоґрафиї у часопису нам дарую нашо сотруднїки-фотоґрафи, котри на своїх апаратох зазначую подїї зоз  духовного живота наших людзох, як и фотоґрафиї котри маю уметнїцку вредносц. Єден з найпознатшпих наших фотоґрафох Владимир Колєсар – Дадо часто любел подаровац свойо фотоґрафиї „Дзвоном” , а його окремна любов ґу Водици була очиглядна на шицких фотоґрафийох котри там висликовани.

Хто роби на „Дзвонох”

Одвичателни редактор  часопису о. Владислав Варґа, редактор о. Михайло Малацко а заменїк о. Михайло Режак. За видавателя, як назначене и у импресуму, о. Юлиян Рац, док члени рдакциї о. Владислав Рац, ш. Михаила Воротняк СНМД, Мария Афич, Мария Стрибер, Оленка Живкович и Дюра Семан. За компютерски обробок часопису задлужени Дюра Семан и Славко Папуґа. 

Окрем начишлєних, до часопису пишу скоро шицки нашо паноцове, велї часни шестри, мали шестри, богослове, як и лаики – вирни котри жадаю сотрудзовац зоз часописом и у нїм обявйовац свойо твори. У часопису свойо роботи обявюю велї авторе котри визначни, познати и признати нє лєм при Руснацох, алє и ширше. Так за „Дзвони” писал тераз уж покойни Михал Ковач, та Михал Рамал, Янко Рамач, Юлиян Пап, Мирон Жирош, др Микола Новта и велї други. Велї теми обробени у „Дзвонох”, вше спатрани з боку духовного.

Часопис „Дзвони” успишно сотрудзує зоз „Руским словом”, часописом „Нови швет” зоз Беоґраду, часописом „Звоник” зоз Суботици, часописом „Мисионар” зоз України, та з велїма другима.

Кажди вирни з каждей нашей парохиї поволани писац за тот часопис, кед же то жада, зна и може. Написане треба послац на слїдующу адресу: М. Тита 64, 25233 Руски Керестур, або на E-mail адресу часописа „Дзвонох” dzvoni@eunet.rs. Попри текстох, на адресу часописа мож послац и интересантни фотоґрафиї зоз особного фамилийного, та духовного живота, або уметнїцки фотоґрафиї котри би могли буц обявени у „Дзвонох”.