|
НАЦИОНАЛНИ СИМВОЛИ И НАЦИОНАЛНЕ ШВЕТО
РУСКЕЙ
НАЦИОНАЛНЕЙ ЗАЄДНЇЦИ У РЕПУБЛИКИ СЕРБИЇ
ГЕРБ
Герб
змесцени до класичного штироуглого щиту французкого типа и
подзелєни є на два основни поли хтори го з вертикалну осу,
од глави ґу бази, дзеля на два поля. На його правей половки
приказани медведз основней червеней, односно цмей червеней
фарби у стояцим положеню котри патри на прави бок. По єдним
толкованю, медведз стародавни славянски символ хтори
Руснацох вяже за їх праотечество у Карпатох.
Друга
половка герба подзелєна на седем єднаки горизонтални поля.
На нїх ше зменюю пантлїки белавей и златно-жовтей фарби.
Описани
герб ма свою историйну традицию - його зявенє мож спатриц у
шветлє културно-националного руху Руснацох у
Австро-Угорскей. По законченю Першей шветовей войни ґу
новоформованей Чехословацкей републики були припоєни етнїчни
краї у подкарпатских обласцох бувшей Угорскей хтори
образовали автономну обласц "Подкарпатска Рус" зоз шедзиском
у Ужгороду. Спомнути символ, 30. марца 1920. року постал
урядови герб автономней єдинки у составе Чехословацкей
(1919-1938). По даєдних толкованьох на тим символу пантлїки
белавей фарби означую штири комитати, односно жупаниї (Унґ,
Береґ,Уґоча и Мараморош), хтори вошли до составу спомнутей
обласци, а три златно-жовти пантлїки - три златоносни рики з
тей обласци (Уж, Латорица и Тиса). Комбинованє белавей и
жовтей фарби вшелїяк присутне и у символох вецей жупанийох,
односно комитатох, подкарпатскей (закарпатскей) обласци, а у
историйним змислу белаво-златна комбинация фарбох и символ
Рюриковича, владарского дома Києвскей Русиї, першей
штредньовиковней держави Восточних Славянох, односно
Русинох.
После
Другей шветовей войни, 1945. року Подкарпатска Рус, зоз
урядовим меном "Закарпатска обласц" уходзи до сосатву
Українскей совєтскей републики СССР. Од 18. децембра 1990.
року герб формални символ Закарпатскей обласци України и
таки остал по нєшкайши дзень у рамикох України як нєзависней
держави.
Без
огляду на историйни контексти, односно пременки историйних
гранїцох, вон символ обласци зоз хторей ше доселєло вельке
число предкох тутейших Руснацох, та и найвекша часц од 200
фамилийох хтори на тото мали право по Контракту хтори
подписал совитнїк царици Мариї Терезиї и администратор
Кральовско- державного Бачкого дистрикту у Зомборе 17. 01.
1751. року.
Нєшка
тот герб представя общеприлапени символ векшини
руских/русинских орґанизацийох ширцом швета (Словацка,
Чешка, Польска, Україна, Мадярска, Румуния, Горватска,
Сербия, Немецка, ЗАД, Канада и други). Його историят и
применьованє уствари зєдинюю тоти орєнтациї и окремносци,
односно допущую найвекшому числу Руснацох же би го прилапели
як свой без огляду на їх дожице националного идентитету и
питаня матичней держави.
ЗАСТАВА
У случаю
Руснацох у Сербиї, герб положени на сербску трофарбнїци -
заставу Републики Сербиї. През тото злученє, направена
єдинствена символика. Зоз ню виражена ґеоґрафска и
психолоґийна припадносц Руснацох держави Сербиї и традиция
заєднїцтва зоз державотворним народом, а источасно и
нєспорна вязаносц за историйни край свойого походзеня.
НАЦИОНАЛНЕ ШВЕТО
За
националне швето Руснацох у Републики Сербиї предложени 17.
януар як здогадованє на тот датум кед 1751. року Франц Йозеф
де Редл, совитнїк царици Мариї Терезиї и администратор
Кралєвско - державного Бачкого дистрикту у Зомбору подписал
перши урядови документ - Контракт о насельованю 200 руских
греко-католїцких фамилийох на тедишню пусту Вельки Керестур.
Тот дзень уж вецей децениї прилапени як дзень урядового
досельованя Руснацох на тоти простори.
|
