ДОМ КУЛТУРИ У РУСКИМ КЕРЕСТУРЕ

           Културни живот у Руским Керестуре ше одвива од 1872. року кед основана перша читальня. Дом култури основани 1961. року, а нєшка чишлї коло 500 аматерох шицких возростох и професийох у рижних секцийох – музично-фолклорни ансамбл, хор, ґрупи шпивачох, соло-шпиваче, оркестри, рецитаторе, Драмски студио "АРТ" ... и представя културни центер нє лєм Руского Керестура, алє и Руснацох у нашей жеми. Дом култури нєпоштредни орґанизатор найвекших културних манифестацийох Руснацох у Сербиї – Фестивала култури "Червена ружа", Драмского меморияла Петра Ризнича Дядї и Културней манифестациї "Костельникова єшень", хтори ше каждого року отримую у Руским Керестуре.

          Музични и фолклорни ансамбли преважно пестую руски фолклор и музику, алє свой репертоар нєпреривно збогацую и зоз шпиванками и танцами других народох и националних заєднїцох – зоз сербскима, українскима, словацкима, мадярскима, влашскима итд, як и зоз духовним репертоаром. Ансамбл у своєй богатей историї госцовал у шицких крайох дакедишнєй СФР Югославиї, як и у вецей жемох Европи, у даєдних и по вецей раз: у Словацкей, Польскей, України, Нємецкей, Греческей, Мадярскей, Белґиї, Голандиї, Луксембурґу и Италиї. Остатнїраз Музично-фолклорни ансамбл госцовал у Риєки, у Горватскей, у априлу 2007. року.

       Музично-фолклорни ансамбл, рецитаторе и Драмски студио "АРТ" порядни, замерковани и успишни учашнїки на змаганьох и смотрох од општинского по републични уровень, дзе вельораз освойовали награди.

          За свою роботу и улогу котру успишно окончує Дом култури у Руским Керестуре достал високи припознаня у жеми и иножемстве, а ношитель є одликованя Орден заслугох за народ зоз стриберним венцом, Вуковей награди, наградох Искри култури и Зарйох култури, Октоберскей награди општини Кула и велїх других.
 

 Copyright © by BlueCode - webmaster Boris Provči
 Презентация оптимизована за IE6 и резолуцию 1024 х 768