Место

        ОБРАЗОВАНЄ У РУСКИМ КЕРЕСТУРЕ

     Традицию школства - основного образованя - Руснаци принєсли зоз собу до Бачки зоз старого краю. Так же пар роки после присельованя до Керестура, основали школу котра почала робиц 1753. року. То була народна тривиялна школа у хторей ше учело читац, писац и раховац, и розуми ше, виронауку, на народним руским язику. Як перши учитель за котрого ше зна же робел у керестурскей школи то Янко Палїнкаш. Тривиялна народна школа на руским язику нє давала вельке образованє, алє за велїх то було цалком досц же би научели читац, писац, найосновнєйше о своєй вири, церкви и шпиваню.
     На почетку XIX вика руска тривиялна школа у Керестуре добре робела. Вше векше число дзецох шорово ходзи до школи. Державни школски власци дзбали о тим же би учительску длужносц окончовали способни и квалификовани за тоту роботу учителє. Предмети котри ше учело у школи то була Християнска наука, Библийна история, Силабизация (складанє буквох), Руски язик, Мадярски язик, Сербски язик, Аритметика, Писанє, Шпиванє (церковне).

     У маю 1855. року до школи у Керестуре на длужносц главного учителя пришол Петро Кузмяк зоз Горнїци и препорвадзел ту скоро штири децениї.

     У Керестуре 1873. року у школи єст 1000 школярох, два учальнї, єдного учителя и єдного под учителя. Познєйше ше почали будовац нови три учальнї. Окремни проблем бул у малим числу квалификованих учительох. Познєйше до школи ше уводза 6 класи як цо то Закон накладал.

     Школа у Керестуре почала робиц як державна од єшенї 1899. року. По даяких документох учителє мушели буц грекокатолїки и треба же би знали руски язик. У нєй ше шицко учел по мадярски, а руски язик, хтори скоро 150 роки бул наставни, постал факултативни. У школи барз чежко ишла настава на мадярским язику, як дзецом так и учительом.

     Зоз снованьом Кральовини Сербох, Горватох и Словенцох 1918. року школа у валалє знова почина робиц по руски. Руске народне просвитне дружтво о своїм трошку друковало учебнїки на руским язику, Буквари и Читанки. Под час войни 1941-1944. ознова ше роби у школи на мадзрским язику.

     По ошчєбодзеню 1945. року школа у валалє знова почина робиц на руским язику.Того року основана перша ґинмазия на руским язику и интернатом. Од теди ше шицки потребни учебнїки друковало на руским язику.

        ОШ И ҐИМНАЗИЯ “ПЕТРО КУЗМЯK” НЕШКА

      У Основней школи и Ґимназиї "Петро Кузмяк" образованє орґанизоване образованє у обовязней основней школи од першей по осму класу на руским язику и у штреднЇм образованю у Ґимназиї на руским и сербским наставним язику. У Основней школи єст 22 оддзелєня од першей по осму класу зоз 414 школярами.

      Ґимназия общого напряму зоз наставу на руским язику у Руским Керестуре постоЇ од 1970. року, а од 1990. року и на сербским язику. Того 2006/2007. року до першей класи Ґимназиї уписани 58 школяре од котрих 21 до руского (єст 30 места) и 37 до двох сербских оддзелєньох (єст 60 места). Вєдно од першей по штварту класу Ґимназиї єст вєдно 260 школярох. Керестурска Ґимназия специфична и єдинствена є у нас и у швеце кед слово о штредньошколским образованю по руски.