|
СПОРТСКЕ
ДРУЖТВО "РУСИН"
Спорт у Руским Керестуре ма длугу традицию. Фодбалски клуб
"Русин" формовани 1923. року, а з нього виросло Спортске
дружтво "Русин" з вецей клубами у рижних спортских конарох.
Тераз у составе Спортского дружтва "Русин" ше попри
фодбалского клуба, находза и велї други клуби - рукометни
(хлопски и женски), шаховски, столно тениски, конїцки,
атлетски и карате клуб. Спортске дружтво "Русин" орґанизатор
традицийних спортских бавискох "Яша Баков" турнирских
змаганьох найуспишнєйших екипох медзи Руснацами.
Фодбалски клуб "Русин" формовала млада керестурска
интелеґенция 1923. року. Перше урядове змаганє "Русин" бавел
дома провиц Вепровачанох (нєшкайши Крущич). Конєчни резултат
того першого стретнуца бул 2:2. На початку "Русин" змаганя
бавел векшину зоз екипама зоз сушедних местох. Клуб ше
першираз уключує 1935. року до першенства Суботицкого
подсоюза.
У 1946. року почал ше бавиц рукомет у Керестуре алє на
фодбалскей площи. Терашнї рукомет ше у Руским Керестуре
почал бавиц од 1952. року, алє його бавенє нє було таке
орґанизоване. На орґанизоване бавенє ше прешло од
1960. року. Керестурски рукометаше 1964. вошли до
Покраїнскей лиґи, та на змаганьох було и понад 1.000
патрачох.
ЯША БАКОВ (1906-1974)
Яша Баков родзени 10. децембра 1906. року у Дюрдьове. Оцец
му 1914. року погинул у войни. Основну школу закончел у
Дюрдьове, до ґимназиї ходзел до Зренянину и Новим Садзе. По
мацеровим жаданю одходзи до Риму студирац теолоґию, алє
нєодлуга напущує теолошки факултет и уписує Филозофски
факултет у Беоґрадзе, дзе дипломира 1934. року на ґрупи за
югославянску кнїжевносц, серпскогорватски и француски язик.
Перше бул професор у Копривници, а од 1936. року професор
реалней ґимназиї у Зомборе. После ошлєбодзеня у фебруару
1945. року розпоредзени є до Руского Керестура. Послейше
роби у Новим Садзе, Сараєву, Панчеву, у Беоґрадзе на
Универзитету и на концу заш у Новим Садзе. Умар 21. октобра
1974. року. у Новим Садзе.
Бул югославянски шампион и рекордер у скоку зоз палїцу (3,70m
- 1936. року), участвовал на Олимпияди у Берлину 1936. року.
У периодзе кед бул професор у нїзшей реалней ґимназиї у
Руским Керестуре оформена атлетичарска екипа у 15
дисциплинох котра ше змагала вшадзи по держави. Тиж
допринєсол и розвою плїваня, "фодбала на води" (ватерпола) и
"шлїзканя" (хокею) у валалє. |
