Место

ОРҐАНИЗОВАНОСЦ ГРАЖДАНОХ РУСКОГО КЕРЕСТУРА

ОРҐАНИ КУЛТУРНЕЙ САМОУПРАВИ, ИНСТИТУЦИЇ, УСТАНОВИ

    У Руским Керестуре ше находза вецей институциї од найвисшого значеня за вкупну националну заєднїцу Руснацох.

1. НАЦИОНАЛНИ СОВИТ РУСКЕЙ НАЦИНАЛНЕЙ МЕНШИНИ, як найвисши орґан културней самоуправи Руснацох у Сербиї задлужени за обласц образованя, култури, информованя и службеного хаснованя язика и писма. Шедзиско Националного совиту у просторийох Дома култури у Руским Керестуре. Предсидатель Националного Совиту Руснацох СЛАВКО ОРОС, подпредсидателє Татяна Бучко Рац за образованє, Ирина Олеяр за културу, Ярослав Сабол за информованє и Звонко Сабол за обласц службеного хаснованя язика и писма. Технїчни секретар Националного совиту Йоаким Рац. Национални Совит ма 18 членох.

2. ШЕДЗИСКО АПОСТОЛСКОГО ЕҐЗАРХАТА ЗА ГРЕКОКАТОЛЇКОХ У СЕРБИЇ И ЧАРНЕЙ ГОРИ

3. ОСНОВНА ШКОЛА И ҐИМНАЗИЯ "ПЕТРО КУЗМЯК" ма вецей од 600 школярох у основним и штреднїм образованю. Ма два школски обєкти зоз комплетну инфраструктуру за виводзенє настави по найвисших стандардох, фискултурну салу и интернат капацитету 70 места. Школа у подполносци интеґрована до образовней системи Републики Сербиї и єдина є така у швеце. Настава ше у Основней школи виводзи на руским язику, а у Ґимназиї на руским и сербским язику. Зоз одлуку Вивершней ради АП Войводини од децембра 2005. року Основна школа и Ґимназия "Петро Кузмяк" ма  статус Школи од окремного значеня.

4. РУСКИ НАРОДНИ ТЕАТЕР "ПЕТРО РИЗНИЧ ДЯДЯ" - єдини руски театер у функциї професийного, основани з одлуку Националного совиту рускей националней меншини, а на инициятиву и з финансийну помоцу Вивершней ради АП Войводини. Руски народни театер "Петро Ризнич Дядя" институция Руснацох од републичного и медзинародного значеня. Од снованя по тераз РНТ "Петро Ризнич Дядя" реализовал 8 професийни театрални проєкти.

5. ДОМ КУЛТУРИ - попри Руского народного театра "Петро Риснич Дядя", єдина установа у функциї професийней институциї култури при Руснацох, зоз професийно занятима кадрами и вецей од 500 активнима аматерами у рамикох фолклорней, рецитаторскей, хорскей, драмскей, шпивацкей, музичней, литерарней, подовей и других секцийох. Дом култури ма комплетну инфраструктуру нєобходну за виводзенє шицких планованих програмох роботи, ма значенє централней културней установи при Руснацох и статус од републичного и медзинародного значеня за Руснацох. Дом култури главни ношитель трох найвекших културних манифестацийох при Руснацох - Драмски мемориял "Петро Ризнич Дядя" (смотра театралних представох) Фестивал култури Руснацох "Червена ружа" и Културна манифестация "Костельникова єшень". Снователь Дома култури Скупштина општини Кула, а порядна робота и проєкти ше финансує зоз буджетох локалней самоуправи, АП Войводини, Републики Сербиї и од спонзорох и донаторох.

6. ОДДЗЕЛЄНЄ ПРЕДШКОЛСКЕЙ УСТАНОВИ "БАМБИ" зоз сучаснима обєктами и опрему и можлївосцами дуплованя капацитету за змесценє дзецох од терашнїх 150 у предшколским оддзелєню  и яшелькох. Оддзелєнє предшколскей установи "Бамби" орґанизоване и финансийно интеґроване до системи предшколского образованя у Републики Сербиї.

7. ПАРОХИЯ И КАТЕДРАЛНА ГРЕКОКАТОЛЇЦКА ЦЕРКВА св, о. МИКОЛАЯ, МАНАСТИР ЧАСНИХ ШЕСТРОХ, МАРИЙОВО СВЯТИЛЇЩЕ ВОДИЦА, ДОМ ГУМАНИТАРНЕЙ ОРҐАНИЗАЦИЇ КАРИТАС

8. ОДДЗЕЛЄНЄ НАЦОНАЛНОГО МУЗЕЮ, АРХИВИ И ҐАЛЕРИЇ

9. ОДДЗЕЛЄНЄ ОПШТИНСКЕЙ БИБЛИОТЕКИ зоз вецей од 10.000 насловами.

ДРУГИ ИНСТИТУЦИї И УСТАНОВИ

1. ДОМ ЗА СТАРИХ

2. ОДДЗЕЛЄНЄ ПОШТИ

3. ОДДЗЕЛЕНЄ ПОЛИЦИЇ

ЗДРУЖЕНЯ ГРАЖДАНОХ, НЄВЛАДОВО ОРҐАНИЗАЦИЇ

1. РУСКА МАТКА - шедзиско и Месни одбор

2. МЕСНИ ОДБОР СОЮЗУ РУСНАЦОХ И УКРАїНЦОХ

3. ЗДРУЖЕНЄ РОМОХ  "Лоли лулидї" - свою активносц унапрямує на подполним социялизованю коло 100 припаднїкох ромскей националней меншини хтори ше уж у значней мири уклопели до штредку у хторим жию. Шицки ромски дзеци ходза до основней школи, а вше вецей єст тих котри школованє предлужую на штреднїм та и висших ступньох образованя.

4. СПОРТСКЕ ДРУЖТВО "РУСИН" ма активних коло 250 спортистох у фодбалским, рукометним (женским и хлопским), карате, атлетским, столнотенисерским, шаховским, конїцким, боди билдинґ и кошаркашским клубе. У 2006. року керестурски спортисти участвовали дома и на страни на 180 змаганьох и посцигли замерковани резултати. У спорту активни и коло 50 спортски роботнїки волонтере. Спортске дружтво "Русин" ма два будинки, фодбалски стадион зоз помоцнима теренами, рукометни стадион, хиподром, а обезпечени и други нєобходни простор за активносци клубох.

5. ЗДРУЖЕНЄ РЕМЕСЕЛЬНЇКОХ И ПРИВАТНИХ ПРИВРЕДНЇКОХ зоз традицию длугу вецей як 170 роки. Нєшка ма коло 130 членох, крашнє ушорени Ремесельнїцки дом и намага ше посцигнуц висши ступень орґанизованосци приватних поднїмательох пре заєднїцки наступ на домашнїм и шветовим тарґовищу.

6. ЗДРУЖЕНЄ ПЕНЗИОНЕРОХ И БОРЦОХ - наймасовнєйше здруженє хторе ма вецей як 700 членох

7. ЛОВАРСКЕ ДРУЖТВО "ЯРЕБИЦА" - розполага зоз своїм будинком и ма коло 90 активних членох. Ловарске дружтво першенствено водзи рахунка о защити дзивих животиньох и стара ше о ожелєньованю хотара.

8. РИБАРСКЕ ДРУЖТВО "КОЛЯК"  - ма коло 200 членох котри активни на порибйованю беґеля, а окреме активно роби рибочуварска служба. Учашнїк є и орґанизатор велїх змаганьох у спортским риболове.

9. ДОБРОДЗЕЧНЕ ОГНЬОГАСНЕ ДРУЖТВО, ма свой дом, огньогасни камион зоз цистерну и активних 45 членох хтори вше порихтани интервеновац кед то затреба.

10. НЄВЛАДОВА ОРҐАНИЗАЦИЯ "ЖЕЛЄНИ ПЕРСЦЕНЬ" - Найзначнєйша активносц Еколоґийного руху ше одноши на ожелєньованє, защиту животного штредку, ушоренє валала и обисцох, а заклада ше и за обезпечованє здравей води за пице. Еколоґийни рух "Желєни персцень" роби прейґ секцийох: етно секция и ручни роботи, квецарскей, рибарскей и других.

11. МЛАДЕЖСКА НЄВЛАДОВА ОРҐАНИЗАЦИЯ "ПАКТ РУТЕНОРУМ" ма коло 50 членох, и успишно орґанизує музичну манифестацию за младих ФЕШТА. Активно ше уключує до велїх других активносцох на ушореню и розвою валала.

12. ЗДРУЖЕНЄ АНТИАЛКОГОЛИЧАРОХ "ЗДРАВИ ЖИВОТ" - основане пред шейсцома роками, а найвекши резултат у тим периодзе 18 нови члени хтори престали хасновац алкогол и хтори отримую апстиненцию. Робота ше одвива прейґ отримованя числених преподаваньох о хоротох завосносци як цо то алкоголизем, дроґа и други.

13. ЗДРУЖЕНЄ ПАПРИҐАРОХ ма коло 30 членох.